ກອງປະຊຸມໃຫຍ່ສະມາຄົມສະຖາປະນິກ ແລະ ວິສະວະກອນກໍ່ສ້າງລາວ (ສສວ) ຄັ້ງທີ IV

        ກອງປະຊຸມໃຫຍ່ສະມາຄົມສະຖາປະນິກ ແລະ ວິສະວະກອນກໍ່ສ້າງລາວ (ສສວ) ຄັ້ງທີ IV ໄດ້ຈັດຂຶ້ນວັນທີ 12 ພຶດສະພາ 2022 ທີ່ ໂຮງແຮມຄຣາວພລາຊາ ໂດຍການເປັນປະທານຂອງ ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ; ທ່ານ ສຈ ດຣ ບຸນເຫຼື່ອມ ສີສຸລາດ ປະທານຄະນະປັບປຸງ ສສວ ແລະ ທ່ານ ພອນໄຊ ສຸດທິພົງ ປະທານ ສສວ ທັງເປັນຮອງປະທານຄະນະປັບປຸງ ສສວ ພ້ອມດ້ວຍສະມາຊິກ ສສວ ແລະ ພາກສ່ວນກ່ຽວຂ້ອງເຂົ້າຮ່ວມ.

         ທ່ານ ພອນໄຊ ສຸດທິພົງ ໄດ້ຂຶ້ນຜ່ານບົດລາຍງານການເຄື່ອນໄຫວປະຕິບັດວຽກງານຂອງສະມາຄົມ ສສວ ວ່າ:ມາຮອດປັດຈຸບັນ ສສວ ມີສະມາຊິກທັງໝົດ 1.781 ຄົນ, ໂດຍ ສສວ ໄດ້ສືບຕໍ່ແລກປ່ຽນຂໍ້ມູນຂ່າວສານທາງວິຊາສະເພາະ, ລະບຽບ ແລະ ບັນດານິຕິກຳ ທີ່ກ່ຽວຂ້ອງກັບວິຊາການ ການສົ່ງເສີມ ແລະ ເປີດກວ້າງການແຂ່ງຂັນອອກແບບ ການສົ່ງນັກສຶກສາໄປຮ່ວມກິດຈະກຳກັບສະມາຄົມວິຊາຊີບ ແລະ ອົງການຈັດຕັ້ງສາກົນຕ່າງໆຢ່າງເປັນປະຈຳ ແລະ ຕໍ່ເນື່ອງ.

ໃນກອງປະຊຸມຄັ້ງນີ້ ໄດ້ປ່ອນບັດຄັດເລືອກເອົາຄະນະບໍລິຫານງານຊຸດໃໝ່ ລົງສະໝັກ 24 ສະຫາຍ ເລືອກເອົາ 19 ສະຫາຍ ໃນນັ້ນ ເຫັນດີເປັນເອກກະພາບເລືອກເອົາທ່ານ ວົງໄພ ບຸນມະນີ ເປັນປະທານສະມາຄົມສະຖາປະນິກ ແລະ ວິສະວະກອນກໍ່ສ້າງລາວຜູ້ໃໝ່.