ທ່ານລັດຖະມົນຕີກະຊວງ ຍທຂ ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ນິຕ້າ ທະນາຄານພັດທະນາອາຊີ

ໃນຕອນເຊົ້າຂອງ ວັນທີ 11 ມີນາ 2025 ທີ່ຫ້ອງຮັບແຂກຂອງ ກະຊວງ ໂຍທາທິການ ແລະ ຂົນສົ່ງ, ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ນິຕ້າ ໂປຄລຽວ (Ms. Neeta Pokhrel) ຫົວໜ້າພະແນກອາຊີຕາເວັນອອກຊ່ຽງໃຕ້ ແລະ ປາຊີຟິກ, ຮັບຜິດຊອບວຽກງານນຳ້ປະປາ ແລະ ພັດທະນາຕົວເມືອງ, ທະນາຄານພັດທະນາອາຊີ (ADB), ເນື່ອງໃນໂອກາດທີ່ເດີນ ທາງມາເຮັດວຽກ ແລະ ຕິດຕາມການຈັດຕັ້ງປະຕິບັດໂຄງການຂອງທະນາຄານພັດທະນາອາຊີຢູ່ ສປປ ລາວ.

ທ່ານລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍຕໍ່ ທ່ານ ນາງ ນິຕ້າ ທີ່ໃຫ້ຄວາມສໍາຄັນໃນການຮ່ວມມືເພື່ອພັດທະນາຊຸມຊົນ ແລະ ຍົກລະດັບຊິວິດການເປັນຢູ່ຂອງປະຊາຊົນລາວໃຫ້ດີຂື້ນເທື່ອລະກ້າວ. ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ການສະໜັບສະໜູນຂອງ ADB ຕໍ່ຂະແໜງການໂຍທາທິການ ແລະ ຂົນສົ່ງ ໂດຍສະເພາະແມ່ນວຽກງານນໍ້າປະປາ ແລະ ສຸຂາພິບານ, ການພັດທະນາຕົວເມືອງ ແລະ ການຂົນສົ່ງສາທາລະນະ.

ໃນໂອກາດນີ້, ທ່ານ ລັດຖະມົນຕີ ແລະ ທ່ານ ນາງ ນິຕ້າ ໂປຄລຽວ ໄດ້ປືກສາຫາລືແລກປ່ຽນຄໍາຄິດຄໍາເຫັນກ່ຽວກັບ ການຈັດຕັ້ງປະຕິບັດໂຄງການທີ່ໄດ້ຮັບການກູ້ຢືມ ແລະ ຊ່ວຍເຫຼືອລ້າ ຈາກທະນາ ຄານພັດທະນາອາຊີ ມາພັດທະນາຂະແໜງການໂຍທາທິການ ແລະ ຂົນສົ່ງ ຢູບັນດາແຂວງໃນທົ່ວປະເທດເປັນຕົ້ນວຽກງານ ການພັດທະນາຕົວເມືອງ ແລະ ຊຸມຊົນ, ການພັດທະນານໍ້າປະປາ ແລະ ສຸຂາພິບານ, ການກໍ່ສ້າງ ແລະ ບູລະນະຮັກສາສະໜາມຂີ້ເຫຍື້ອໃຫ້ມີຄວາມຍືນຍົງ ແລະ ອືີ່ນໆ.

ໃນການເຂົ້າຢ້ຽມຂໍ່ານັບຄັ້ງນີ້, ທ່ານ ນາງ ນິຕ້າ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານລັດຖະມົນຕີ ກະຊວງໂຍທາທິການ ແລະ ຂົນສົ່ງ ແລະ ໄດ້ສະແດງຄວາມເຊື່ອໝັ້ນຕໍ່ການນຳພາ-ຊີ້ນຳ ແລະ ການສະໜັບສະໜູນ ໃນການຮ່ວມມືກັນ ແລະ ຈັດຕັ້ງປະຕິບັດບັນດາໂຄງການໃຫ້ສຳເລັດຕາມແຜນທີ່ວາງໄວ້.