ທ່ານລັດຖະມົນຕີ ກະຊວງໂຍທາທິການ ແລະ ຂົນສົ່ງ ເຄື່ອນໄຫວຊຸກຍູ້ວຽກງານ ຂອງ ຂະແໜງ ຍທຂ ຢູ່ ແຂວງໄຊຍະບູລີ

     ໃນວັນທີ 13 ພະຈິກ 2024 ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ວຽກງານ ຂອງ ຂະແໜງ ຍທຂ ຢູ່ແຂວງໄຊຍະບູລີ. ໃນການຊຸກຍູ້ວຽກງານຄັ້ງນີ້ ທ່ານລັດຖະມົນຕີ ກະຊວງ ຍທຂ ພ້ອມດ້ວຍຄະນະ ໄດ້ເຂົ້າພົບທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ ເພື່ອລາຍງານຈຸດປະສົງການລົງວຽກງານ ຢູ່ແຂວງໄຊຍະບູລີ ໃນຄັ້ງນີ້. ຈາກນັ້ນ, ທ່ານ ລັດຖະມົນຕີ ກໍ່ໄດ້ລົງຢ້ຽມຢາມ ພະແນກ ຍທຂ ແຂວງໄຊຍະບູລີ ແລະ ໄດ້ຮັບຟັງການລາຍງານ ຂອງ ທ່ານ ຫົວໜ້າພະແນກ ຍທຂ ແຂວງໄຊຍະບູລີ ໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ທິດທາງແຜນການຈຸດສຸມໃນທ້າຍປີ 2024 ແລະ ໃນໂອກາດອັນມີຄວາມໝາຍຄວາມສໍາຄັນດັ່ງກ່າວ ທ່ານລັດຖະມົນຕີ ກະຊວງ ຍທຂ ກໍ່ໄດ້ໃຫ້ກຽດມີຄໍາເຫັນໂອ້ລົມ ສະແດງຄວາມຍ້ອງຍໍຊົມເຊີຍຕໍ່ການນໍາພາ-ຊີ້ນຳ ການຈັດຕັ້ງປະຕິບັດວຽກງານໃນໄລຍະຜ່ານມາ ຂອງ ພະແນກ ຍທຂ ແຂວງໄຊຍະບູລີ ທີສາມາດຍາດໄດ້ຜົນສໍາເລັດຫຼາຍດ້ານ, ຈາກນັ້ນກໍ່ໄດ້ລົງຕິດຕາມກວດກາສະພາບຂອງເສັ້ນທາງໃນຕົວເມືອງ ແລະ ເສັ້ນທາງຫຼວງແຫ່ງຊາດ ເລກ 4 ແຕ່ເມືອງໄຊຍະລີ ຫາ ເມືອງແກ່ນທ້າວ.