ໂຄງການຂົນສົ່ງແບບຍືນຍົງໃນຕົວເມືອງ ນະຄອນຫຼວງວຽງຕຈັນ ຕາມແຜນຈະໃຫ້ສຳເລັດກາງປີ 2025

ໃນວັນທີ 28 ຕຸລາ 2024 ຜ່ານມານີ້, ທ່ານ ລິດຕາ ຂັດຕິຍະ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ພ້ອມດ້ວຍຄະນະ ໄດ້ລົງຕິດຕາມຄວາມຄືບໜ້າຂອງການຈັດຕັ້ງປະຕິບັດໂຄງການຂົນສົ່ງແບບຍືນຍົງໃນຕົວເມືອງ ນະຄອນຫຼວງວຽງຈັນ, (ໂຄງການລົດເມ BRT) ຢູ່ພາກສະໜາມຂອງໂຄງການກໍ່ສ້າງຕົວຈິງໃນຫຼາຍຈຸດ, ໂດຍການຕ້ອນຮັບຂອງ ທ່ານ ຄຳພັນ ວັນທະນາ ຫົວໜ້າໂຄງການຂົນສົ່ງແບບຍືນຍົງໃນຕົວເມືອງ ນະຄອນຫຼວງວຽງຈັນ (ລົດເມ BRT), ມີບັນດາທ່ານຫົວໜ້າ, ຮອງຫົວໜ້າກົມຂົນສົ່ງ, ຮອງຫົວໜ້າພະແນກໂຍທາທິການ ແລະ ຂົນສົ່ງ ນວ, ຜູ້ຕາງໜ້າທະນາຄານພັດທະນາອາຊີປະຈຳ ສປປ ລາວ, ບໍລິສັດຮັບເໝົາກໍ່ສ້າງ ພ້ອມດ້ວຍພະນັກງານວິຊາການ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນການລົົງຕິດຕາມພາກສະໜາມກໍ່ສ້າງຕົວຈິງໃນຄັ້ງນີ້ ແມ່ນໄດ້ເລີ່ມຕົ້ນຈາກຈຸດກໍ່ສ້າງສະຖານີຂື້ນລົງຂອງຜູ້ໂດຍສານໜ້າໂຮງແຮມຊຳເມີເຊັດ, ຈຸດສະຖານີເສັ້ນທາງໄກສອນ ພົມວິຫານ, ເຂດໂພນສະອາດ ຂຶ້ນໄປຫາປະຕູໄຊ ຊຶ່ງແຜນຈະກໍ່ສ້າງສະຖານີຂຶ້ນ-ລົງລົດເມ BRT ແລະ ສະຖານີໃຫຍ່ ແລະ ເຂດປັບປຸງລະບົບລະບາຍນ້ຳ. ຈາກນັ້ນ, ກໍໄດ້ລົງເບິ່ງຈຸດກໍ່ສ້າງອູ່ລົດເມຫຼັກ 16 ຊຶ່ງແຜນຈະສ້າງບ່ອນຈອດລົດເມ, ອາຄານ, ສູນບັນຊາລົດ, ອູ່ສ້ອມແປງ ແລະ ອື່ນໆ. ສຳລັບຈຸດສຸດທ້າຍແມ່ນໄດ້ລົງເບິ່ງຢູ່ເສັ້ນທາງດົງໂດກ-ໜ້າມະຫາວິທະຍາໄລແຫ່ງຊາດ ຊຶ່ງຈຸດດັ່ງກ່າວປັດຈຸບັນແມ່ນໄດ້ເລັ່ງປັບປຸງພື້ນຖານໂຄງລ່າງ ທີ່ຈະກໍ່ສ້າງສະຖານີຂຶ້ນ-ລົງ ລົດເມ ຄາດວ່າຈະໄດ້ເລີ່ມລົງມືຕິດຕັ້ງ ໂຄງສ້າງດ້ານເທິງ ເປັນຕົ້ນແມ່ນ ຫຼັງຄາ, ຮາວຈັບ ແລະ ສິ່ງອຳນວຍຄວາມສະດວກ ພາຍໃນເດືອນພະຈິກນີ້.

ໃນໂອກາດນີ້, ທ່ານ ຄຳພັນ ວັນທະນາ ໄດ້ໃຫ້ສຳພາດຕໍ່ນັກຂ່າວໂທລະພາບ ແລະ ໜັງສືພິມວ່າ: ປັດຈຸບັນໂຄງການຂອງພວກເຮົາແມ່ນມີຄວາມຄືບໜ້າລວມທັງໝົດ 30 ສ່ວນຮ້ອຍ, ສຳລັບໂຄງການລົດເມ BRT ແມ່ນມີສະຖານີຂຶ້ນ-ລົງ 27 ຈຸດ ໂດຍແບ່ງການຮັບເໝົາກໍ່ສ້າງອອກເປັນ 2 ໄລຍະ, ສະເພາະລັດວິສາຫະກິດກໍ່ສ້າງທາງເລກ 8 ມີຢູ່ 19 ສະຖານີ ປັດຈຸບັນສຳເລັດໂຄງລ່າງພື້ນຖານປະມານ 9 ສະຖານີ, ສ່ວນຈຸດທີ 10 ຢູ່ໂພນສະອາດ ແມ່ນສຳເລັດ 100%, ເວົ້າລວມແລ້ວຍັງເຫຼືອ 9 ຈຸດແມ່ນກຳລັງກໍ່ສ້າງ, ສ່ວນໃຫຍ່ແມ່ນສໍາເລັດການກໍ່ສ້າງຮາກຖານສະຖານີລົດເມ BRT, ປັດຈຸບັນທາງໂຄງການພວກເຮົາແມ່ນສຸມໃສ່ໃນການເຮັດຂອບທາງເພາະວ່າອີງໃສ່ບົດຮຽນຜ່ານມາຈຸດໃດທີ່ແຄບກໍຕ້ອງໄດ້ຂະຫຍາຍທາງອອກກ່ອນ ເພື່ອເຮັດໃຫ້ລົດແລ່ນໄປໄດ້ສະດວກ, ເພາະວ່າສະຖານີຕັ້ງຢູ່ຈຸດກາງທາງຈຳເປັນຕ້ອງໄດ້ຂະຫຍາຍຂອບທາງກ່ອນ ການສັນຈອນກໍຈະບໍ່ລໍາບາກ ແລະ ອື່ນໆ, ສໍາລັບໂຄງການກໍ່ສ້າງສະຖານີຂຶ້ນ-ລົງລົດເມ BRT ໂດຍລວມແມ່ນຈະໃຫ້ສໍາເລັດທັງໝົດໃນກາງປີ 2025 ແລະ ການເປີດໃຫ້ບໍລິການແບ່ງອອກເປັນ 2 ໄລຍະຄື: ຈະເປີດທົດລອງ 3 ເດືອນໃຫ້ໃຊ້ບໍລິການບໍ່ເສຍຄ່າ ແລະ ຫຼັງຈາກນັ້ນແມ່ນຈະເປີດເປັນທາງການ. ໂຄງການ BRT ເປັນໂຄງການແກ້ໄຂການສັນຈອນແອອັດໂດຍທີ່ພວກເຮົາພະຍາຍາມໃຫ້ທຸກຄົນໃນສັງຄົມຫັນມາໝູນໃຊ້ລົດເມສາທາລະນະໃຫ້ຫຼາຍຂຶ້ນເປັນການປ່ຽນທັດສະນະຄະຕິໃນການຊົມໃຊ້ລົດສ່ວນຕົວມາໃຊ້ລົດເມສາທາລະນະ, ຖ້າບໍ່ປ່ຽນພຶດຕິກຳລົດກໍຍັງຈະຕິດຄືເກົ່າເພາະສະນັ້ນເຫດຜົນຫຼັກເຮົາເລືອກເສັ້ນທາງມາ ມຊ ກໍຍ້ອນມີການສັນຈອນຢູ່ຈຸດດັ່ງກ່າວຫຼາຍເຊັ່ນ: ມີນັກຮຽນ, ນັກສຶກສາຫຼາຍ ແລະ ລົດສັນຈອນກໍຫຼາຍ, ດັ່ງນັ້ນຖ້າໂຄງການສຳເລັດ ແມ່ນຈະມີຜົນດີໃນຫຼາຍຢ່າງ ເປັນຕົ້ນຈະເຮັດໃຫ້ການຊົມໃຊ້ລົດສ່ວນຕົວຫຼຸດລົງ ເຮັດໃຫ້ການສັນຈອນສະດວກສະບາຍບໍ່ແອອັດ ເປັນການປະຢັດເວລາ ປະຢັດຄ່າໃຊ້ຈ່າຍ ແລະ ອື່ນໆ.

ທ່ານ ຄຳພັນ ວັນທະນາ ໃຫ້ຮູ້ຕື່ມວ່າ: ປັດຈຸບັນທາງໂຄງການແມ່ນໄດ້ສຸມໃສ່ໃນການກໍ່ສ້າງຮາກຖານຂອງສະຖານີຂຶ້ນ-ລົງລົດເມ ແລະ ປັບປຸງລະບົບພື້ນຖານໂຄງລ່າງ ຊຶ່ງອາດຈະສ້າງຄວາມແອອັດຫຍຸ້ງຍາກໃນການສັນຈອນ ເຮັດໃຫ້ບາງສາຍທາງມີລົດຕິດຂັດ ແຕ່ທາງໂຄງການກໍໄດ້ແນະນຳໃຫ້ຜູ້ຮັບຜິດຊອບ ເອົາໃຈໃສ່ບໍ່ໃຫ້ກີດຂວາງການສັນຈອນ ຮັບປະກັນບໍ່ໃຫ້ເກີດຜົນກະທົບ ແລະ ອຸບັດເຫດ, ພ້ອມນີ້ ກໍຂໍຝາກເຖິງຜູ້ຂັບຂີ່ ກໍຄື ຜູ້ໃຊ້ລົດ-ໃຊ້ຖະໜົນ ເປັນເຈົ້າການມີສ່ວນຮ່ວມຊ່ວຍກັນ ໄປມາຢ່າງມີສະຕິ ລະມັດລະວັງ ທັງສັງເກດເບິ່ງສັນຍານປ້າຍຫ້າມ ປ້າຍເຕືອນ ທີ່ໂຄງການໄດ້ຕິດຕັ້ງໄວ້ ເພື່ອປ້ອງກັນການເກີດອຸບັດເຫດ ແລະ ມີສ່ວນຮ່ວມຊ່ວຍກັນອຳນວຍຄວາມສະດວກ ໃນການກໍ່ສ້າງໂຄງການດັ່ງກ່າວໃຫ້ມີຜົນສຳເລັດໂດຍໄວ.