ກອງປະຊຸມໜ່ວຍງານວິຊາການອໍານວຍຄວາມສະດວກດ້ານການຂົນສົ່ງອາຊຽນ ຄັ້ງທີ່ 47 ແລະ ກອງປະຊຸມຫົວໜ້າຄະນະປະສານງານດ້ານການຂົນສົ່ງຜ່ານແດນ ຄັ້ງທີ 16

     ໃນຕອນເຊົ້້າຂອງວັນທີ 22 ຕຸລາ 2024 ທີ່ ໂຮງແຮມ ສຸພັດຕາ, ນະຄອນຫຼວງວຽງຈັນ ກະຊວງໂຍທາທິການ ແລະ ຂົນສົ່ງ ໄດ້ເປັນເຈົ້າພາບຈັດກອງປະຊຸມໜ່ວຍງານວິຊາການອໍານວຍຄວາມສະດວກດ້ານການຂົນສົ່ງອາຊຽນ ຄັ້ງທີ່ 47 ແລະ ກອງປະຊຸມຫົວໜ້າຄະນະປະສານງານດ້ານການຂົນສົ່ງຜ່ານແດນ ຄັ້ງທີ 16 ພາຍໃຕ້ການເປັນປະທານ ຂອງ ທ່ານ ນາງ ອຳໄພວັນ ແກ້ວປະດິດ ຮອງຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ. ເຂົ້າຮ່ວມກອງປະຊຸມ ໃນຄັ້ງນີ້ ປະກອບມີ ຜູ້ແທນ ຈາກ ປະເທດສະມາຊິກ ອາຊຽນ 10 ປະເທດ, ກອງເລຂາອາຊຽນ, ຄູ່ຮ່ວມພັດທະນາ ຈາກ ຍີ່ປຸ່ນ, ອາເມລິກາ ແລະ ປະເທດ ຕິມໍເລດຕເຕ ໃນຖານະ ປະເທດ ສັງເກດການ ແລະ ຜູ້ເຂົ້າຮ່ວມພາຍໃນ ຈາກອົງການຈັດຕັ້ງລັດທີ່ກ່ຽວຂ້ອງ ທັງໝົດ 91 ທ່ານ.

    ຈຸດປະສົງ ກອງປະຊຸມໜ່ວຍງານວິຊາການອໍານວຍຄວາມສະດວກດ້ານການຂົນສົ່ງອາຊຽນ ຄັ້ງທີ່ 47 ແມ່ນ ຮັບຟັງການລາຍງານຄວາມຄືບໜ້າການຈັດຕັ້ງປະຕິບັດຂອງບັນດາປະເທດສະມາຊິກ ໃນກອບວຽກຕ່າງໆດ້ານການຂົນສົ່ງ ເຊັ່ນ: ສັນຍາຂົນສົ່ງຫຼາຍຮູບແບບອາຊຽນ, ສັນຍາການຂົນສົ່ງສິນຄ້າຜ່ານແດນອາຊຽນ, ການໃຫ້ສັດຕະຍາບັນ ຕໍ່ສັນຍາຂົນສົ່ງໂດຍສານອາຊຽນ ແລະ ການປຶກສາຫາວຽກງານການຮ່ວມມື ລະຫວ່າງອາຊຽນ ແລະ ປະເທດຄູ່ຮ່ວມພັດທະນາ ເຊັ່ນ : ອາຊຽນ-ຍີ່ປຸ່ນ, ອາຊຽນ-ສະຫະລັດອາເມລິກາ ແລະ ອື່ນໆ ຊຶ່ງຈະດຳເນີນເປັນເວລາ 2 ວັນ ລະຫວ່າງ ວັນທີ 22-23 ຕຸລາ 2024. ກອງປະຊຸມຫົວໜ້າຄະນະປະສານງານດ້ານການຂົນສົ່ງຜ່ານແດນ ຄັ້ງທີ 16 ເປັນເວທີປະສານງານ ແລະ ປຶກສາຫາລືວຽກງານການຂົນສົ່ງທາງບົກລະຫວ່າງປະເທດສະມາຊິກອາຊຽນ ເພື່ອອຳນວຍຄວາມສະດວກໃນການຂົນສົ່ງ ສິນຄ້າ ແລະ ໂດຍສານຂ້າມແດນ ໃຫ້ມີຄວາມສະດວກສະບາຍ ແລະ ໂລ່ງລ່ຽນ ກອງປະຊຸມຈະດຳເນີນເປັນເວລາ 1​ ວັນ ໃນວັນທີ 24 ຕຸລາ 2024.