ກອງປະຊຸມສະຫລຸບລາຍງານຜົນການຈັດຕັ້ງປະຕິບັດວຽກງານຂອງ ໂຄງການປັບປຸງນ່ານຟ້າ ແລະ ວົງຈອນບິນ ສະນາມບິນສາກົນຫຼວງພະບາງ

         ກອງປະຊຸມວ່າດ້ວຍບົດລາຍງານເທື່ອສຸດທ້າຍ ຂອງໂຄງການແບ່ງປັຍຄວາມຮູ້ (KSP) ພາຍໃຕ້ຫົວຂໍ້ “ການປັບປຸງນ່ານຟ້າ ແລະ ວົງຈອນບິນຂອງສະໜາມບິນສາກົນຫຼວງພະບາງ” ຈັດຂື້ນວັນທີ 03 ກັນຍາ 2024 ທີ່ນະຄອນຫຼວງວຽງຈັນ ໂດຍມີທ່ານ ໄຊສົງຄາມ ມະໂນທໍາ ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ທ່ານ ຊອຍ ຍອນ ຊຸງ ທີ່ປຶກສາອາວຸໂສ ແລະ ອະດິດເອກອັກຄະລັດຖະທູດ ສ ເກົາຫຼີ ປະຈຳປະເທດ ອູຣູກວຍ ທ່ານ ຈອງ ຢອງ ຊູ ເອກອັກຄະລັດຖະທູດ ສ ເກົາຫຼີ ປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

         ທ່ານ ພາກ ຈອງຄິວ ຜູ້ອຳນວຍການໃຫຍ່ອົງການສົ່ງເສີມການຄ້າ-ການລົງທຶນ ສ ເກົາຫຼີ (KOTRA) ວຽງຈັນ ໄດ້ລາຍງານຕໍ່ກອງປະຊຸມວ່າ: ການປັບປຸງການຄຸ້ມຄອງນ່ານຟ້າຜ່ານໂຄງການ KSP ສາມາດໃຫ້ສົມບູນຂື້ນໄດ້ ໂດຍການຍົກລະດັບການປະຕິບັດງານຂອງສະໜາມບິນ ປັບປຸງແສງສະຫວ່າງໃນອາຄານຜູ້ໂດຍສານ ແລະ ບັນດາໂຄງລ່າງພື້ນຖານທີ່ສຳຄັນອື່ນໆ ການປັບປຸງສາມາດບັນລຸໄດ້ໂດຍການຮ່ວມມືພາກລັດ-ເອກະຊົນ (PPP) ເຊີ່ງຈະດຶງດູດການລົງທຶນທັງພາກລັດ ແລະ ພາກເອກະຊົນໃຫ້ໄດ້ຮັບຜົນປະໂຫຍດສູງສຸດ ເຊີ່ງການພັດທະນາບໍ່ພຽງແຕ່ຈະປັບປຸງຄວາມປອດໄພ ແລະ ປະສິດທິພາບການຂົນສົ່ງທາງອາກາດເທົ່ານັ້ນ ຫາກຍັງຊ່ວຍຊຸກຍູ້ການພັດທະນາເສດຖະກິດ ແລະ ຮັດແໜ້ນສາຍພົວພັນທາງດ້ານເສດຖະກິດ ລະຫວ່າງ ສ ເກົາຫຼີ ແລະ ສປປ ລາວ.

         ໂຄງການ KSP ຄາດວ່າຈະສາມາດຍົກລະດັບສະໜາມບິນສາກົນຫຼວງພະບາງ ໃຫ້ໄດ້ມາດຕະຖານ ອົງການການບິນພົນລະເຮືອນສາກົນ (ICAO) ປັບປຸງຂັ້ນຕອນການບິນ ແລະ ສ້າງສະພາບແວດລ້ອມໃນການດຳເນີນງານໃຫ້ມີຄວາມປອດໄພຫຼາຍຂື້ນ ແລະ ການປັບປຸງຄາດວ່າ ຈະດຶງດູດສາຍການບິນຂອງ ສ ເກົາຫຼີ ໃຫ້ເປີດເສັ້ນທາງບິນໂດຍກົງຈາກສະໜາມບິນສາກົນອິນຊອນ ຫາ ຫຼວງພະບາງ ເຊີ່ງເປັນຂີດໝາຍອັນສຳຄັນໃນການພັດທະນາການບິນ ແລະ ການເຊື່ອມຕໍ່ສາກົນຂອງລາວ.

         ໂອກາດນີ້ ທ່ານ ໄຊສົງຄາມ ມະໂນທຳ ໄດ້ສະແດງຄວາມຊົມເຊີຍຕໍ່ການສະໜັບສະໜູນຂອງລັດຖະບານ ສ ເກົາຫຼີ ໃນການປັບປຸງສິ່ງອຳນວຍຄວາມສະດວກ ແລະ ລະບຽບການຂອງສະໜາມບິນໃຫ້ທັນສະໄໝຕາມມາດຕະຖານສາກົນ ທ່ານຍັງໄດ້ຍົກໃຫ້ເຫັນຄວາມຈຳເປັນອັນສຳຄັນໃນການຝຶກອົບຮົມພະນັກງານການບິນ ແລະ ຮຽກຮ້ອງໃຫ້ສືບຕໍ່ໃຫ້ການສະໜັບສະໜູນດ້ານນີ້ຕື່ມອີກ.

         ກອງປະຊຸມຄັ້ງນີ້ ບໍລິສັດ Moon Engineering Co, Ltd ແລະ ບໍລິສັດ Korean Airport Corporation ຈາກ ສ ເກົາຫຼີ ໄດ້ນຳສະເໜີສິ່ງທ້າທ້າຍທີ່ເຄີຍພົບພໍ້ ແລະ ແນວທາງໃນການພັດທະນາ ເຊີ່ງລວມມີການປັບຮູບແບບພື້ນທີ່ຄວບຄຸມ Terminal (TMA) ການປັບປຸງການອອກແບບພື້ນທີ່ນ່ານຟ້າ ແລະ ການປັບປຸງວົງຈອນບິນຂອງສະໜາມບິນສາກົນ ຫຼວງພະບາງ ພາຍໃນຂົງເຂດ TMA ນອກນັ້ນທັງສອງບໍລິສັດ ຍັງໄດ້ຍົກໃຫ້ເຫັນແນວຄວາມຄິດ ການອອກແບບໃໝ່ ສຳລັບສະ    ໜາມບິນສາກົນ ຫຼວງພະບາງ ລວມທັງນຳສະເໜີລາຍລະອຽດຕ່າງໆ ຂອງແຜນການໃນປີຕໍ່ໄປ ເຊີ່ງລວມມີວຽກງານການອອກແບບເພີ່ມຕື່ມ ແລະ ການຈັດຝຶກອົບຮົມໃຫ້ຜູ້ຄຸ້ມຄອງການບິນລາວ.