ກອງປະຊຸມ ຄະນະວິຊາການອໍານວນຄວາມສະດວກດ້ານການຂົນສົ່ງ

ໃນຕອນເຊົ້າຂອງວັນທີ 14 ມີນາ 2024 ທີ່ໂຮງແຮມແລນມາກ ລີເວີຊາຍ ນະຄອນຫຼວງວຽງຈັນ, ກະຊວງໂຍທາທິການ ແລະ ຂົນສົ່ງ, ໄດ້ຈັດກອງປະຊຸມ ຄະນະວິຊາການອໍານວນຄວາມສະດວກດ້ານການຂົນສົ່ງໃນຂອບການຮ່ວມມືອະນຸພາກພື້ນແມ່ນ້ຳຂອງ ຄັ້ງທີ 1 ໂດຍມີຜູ້ເຂົ້າຮ່ວມຈາກ 6 ປະເທດຄື:  ສປປ ລາວ, ສປ ຈີນ, ສສ ຫວຽດນາມ, ກໍາປູເຈຍ,  ໄທ ແລະ ມຽນມາ.

ພາຍໃຕ້ການເປັນປະທານຮ່ວມ ຂອງ ທ່ານ ພັນທະພາບ ພູນສະຫວັດ ຮອງຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ ແລະ Mr Mohammad Ehteshamul Hoque ຊ້ຽວຊານອາວຸໂສ ການຄ້າ ແລະ ການຂົນສົ່ງ ທະນາຄານ ພັດທະນາອາຊີ (ADB) ກອງປະຊຸມໄດເດໍາເນີນເປັນເວລາ 1 ວັນ ຈຸດປະສົງຂອງກອງປະຊຸມແມ່ນເພື່ອປືກສາຫາລືດ້ານກົນໄກ, ວີທີການຄຸ້ມຄອງ ແລະ ລາຍລະອຽດການຈັດຕັ້ງປະຕິບັດ ຕາມບົດບັນທຶກຄວາມເຂົ້າໃຈ ພາຍໃຕ້ໂຄງການ GMS CBTA on the Early Harvest Implementation (GMS-CBTA EARLY Harvest) ເພື່ອກະກຽມການທົດລອງການເປີດແລ່ນລົດຂົນສົ່ງຂ້າມແດນ ພາຍໃຕ້ຂອບສັນຍາ ການຂົນສົ່ງຂ້າມແດນ ອະນຸພາກພື້ນແມ່ນ້ຳຂອງ ຊື່ງຈະເລີ່ມຈັດຕັ້ງປະຕິບັດຢ່າງເປັນທາງການ ພາຍໃນວັນທີ 0 ເມສາ 2024 ນີ້.