Provincial News
ກອງປະຊຸມໃຫຍ່ຄັ້ງທີ IV ຂອງໜ່ວຍຊາວໜຸ່ມຮາກຖານ ພະແນກ ໂຍທາທິການ ແລະ ຂົນສົ່ງ ແຂວງອັດຕະປື
ກອງປະຊຸມໃຫຍ່ຂອງໜ່ວຍຊາວຮາກຖານໜຸ່ມພະແນກ ໂຍທາທິການ ແລະ ຂົນສົ່ງແຂວງອັດຕະປື ຄັ້ງທີ IV ໄດ້ຈັດຂື້ນໃນວັນທີ 8 ທັນວາ 2016 ທີ່ຫ້ອງປະຊຸມພະແນກ ໂຍທາທິການ ແລະ ຂົນສົ່ງ ແຂວງ, ໂດຍການເປັນປະທານ ຂອງ ສະຫາຍ ຄຳປະດິດ ສີຊານົນ ຄະນະປະຈຳຄະນະບໍລິຫານງານຊາວໜຸ່ມແຂວງ, ເລຂາໜ່ວຍຊາວໜຸ່ມຮາກຖານພະແນກ ໂຍທາທິການ ແລະ ຂົນສົ່ງ. ກອງປະຊຸມຍັງໄດ້ເປັນກຽດຢ່າງສູງ ຕ້ອນຮັບ ສະຫາຍ ເພັດມີໄຊ ຄຳພັກດີ ກຳມະການພັກແຂວງ, ເລຂາຄະນະພັກຮາກຖານພະແນກ ຍທຂ; ສະຫາຍ ສູນນະຄອນ ແກ້ວວຽງຄຳ ປະທານກວດກາຄະນະພັກຮາກຖານ ພະແນກ ຍທຂ ແລະ ສະຫາຍ ອ໋ອງຄຳ ຄູນສະໄໝ ຮອງເລຂາຊາວໜຸ່ມແຂວງ, ມີບັນດາສະຫາຍຜູ້ຕາງໜ້າຈາກ ໜ່ວຍຊາວໜຸ່ມຮາກຖານພະແນກກະສິກຳ, ໜ່ວຍກຳມະບານ, ແມ່ຍິງ, ຂະແໜງການພາຍໃນພະແນກ ຍທຂ ແລະ ສຳມະຊິກຊາວໜຸ່ມພາຍໃນພະແນກ ຍທຂ ເຂົ້າຮ່ວມທັງໝົດ45ສະຫາຍ,ຍິງ 11 ສະຫາຍ.
ກອງປະຊຸມໄດ້ຜ່ານບົດສະຫຼຸບການຈັດຕັ້ງຂໍ້ແຂ່ງຂັນ 4 ບຸກປະຈຳປີ2015, ບົດລາຍງານການເມືອງຂອງໜ່ວຍຊາວໜຸ່ມຮາກຖານຕໍ່ກອງປະຊຸມໃຫຍ່ຄັ້ງທີ IV, ບົດສຳຫຼວດຂອງຄະນະໜ່ວຍຊາວໜຸ່ມຮາກຖານຄັ້ງທີ III. ຈາກນັ້ນກອງປະຊຸມກໍ່ໄດ້ຄົ້ນຄວ້າ ແລະ ປະກອບຄຳເຫັນຢ່າງກົງໄປກົງມາ ດ້ວຍຄວາມຮັບຜິດຊອບສູງ ຂອງບັນດາສະຫາຍຜູ້ແທນ ກອງປະຊຸມ ເປັນການສະຫຼຸບຕີລາຄາຄືນ ໃນການຈັດຕັ້ງປະຕິບັດ ວຽກງານອົງການຈັດຕັ້ງຊາວໜຸ່ມ ໃນໄລຍະ3ປີຜ່ານມາ(2013-2016) ແລະ ກໍານົດທິດທາງແຜນການ 3 ປີຕໍ່ໜ້າ (2016-2019). ຜ່ານການຄົ້ນຄວ້າປືກສາຫາລື ກ່ຽວກັບບັນຫາຕ່າງໆທີ່ໄດ້ຍົກຂື້ນ ໃນກອງປະຊຸມໃຫຍ່ຄັ້ງທີ IV ຂອງໜ່ວຍຊາວໜຸ່ມຮາກຖານພະແນກ ຍທຂ ແຂວງ, ພ້ອມກັນນັ້ນກອງປະຊຸມ ຍັງໄດ້ຕົກລົງຮັບຮອງເອົາບັນດາເນື້ອໃນເອກະສານຕ່າງໆດັ່ງນີ້:
ເຫັນດີຮັບຮອງຜົນການເລືອກຕັ້ງ ຄະນະໜ່ວຍຊາວໜຸ່ມຮາກຖານຊຸດທີ IV ເຊີ່ງປະກອບມີ 5 ສະຫາຍ,ຍິງ 1 ສະຫາຍຄື:
1. ສະຫາຍ ຄຳປະດິດ ສີຊານົນ ເປັນເລຂາ
2. ສະຫາຍ ຄຳພຸດພະໃສ ສີສຸລາດ ເປັນຮອງເລຂາ
3. ສະຫາຍ ຄຳພຸດ ສຽງສີປະເສີດ ເປັນຮອງເລຂາ
4. ສະຫາຍ ນາງ ສິລິວັນ ອີນທິວົງ ເປັນປະທານກວດກາ
5. ສະຫາຍ ສຳລານສິນ ແສນຂຸນວົງ ເປັນຄະນະ
ກອງປະຊຸມເຫັນດີຮັບຮອງເອົາບົດສະຫຼຸບການຈັດຕັ້ງຂະບວນການ 4 ບຸກໃນ 1 ປີຜ່ານມາ ແລະ ທິດທາງ 1 ປີຕໍ່ໜ້າ. ເຫັນດີຮັບຮອງ ເອົາບົດລາຍການເມືອງຂອງກອງປະຊຸມໃຫຍ່ຄັ້ງທີ IV ຂອງໜ່ວຍຊາວໜຸ່ມຮາກຖານພະແນກ ຍທຂ; ຮັບຮອງເອົາມະຫາຊົນກ້າວໜ້າເຂົ້າເປັນສຳມະຊິກຊາວໜຸ່ມ 4 ສະຫາຍ ແລະ ອະນຸມັດຊາວໜຸ່ມທີ່ກະຊຽນອະຍຸ ອອກຈາກອົງການຈັດຕັ້ງຊາວໜຸ່ມ 8 ສະຫາຍ; ເອົາໃຈໃສ່ປະຕິບັດໜ້າທີ່ວຽກງານຂະບວນການ ແລະ ວິຊາສະເພາະທີ່ການຈັດຕັ້ງຂັ້ນເທີງມອງໝາຍໃຫ້ສຳເລັດຜົນ ແລະ ມີປະສິດທີ່ຜົນສູງ ໂດຍສຸມໃສ່ເອົາວຽກງານແນວຄິດເປັນກົກ; ເອົາໃຈໃສ່ວຽກງານກວດກາ, ລະບົບສ່ອງແສງລາຍງານ ແລະ ວຽກງານປ້ອງກັນ ໃຫ້ໄດ້ຮັບການປັບປຸງດີຂື້ນ; ເອົາໃຈໃສ່ຊີ້ນຳ-ນຳພາ, ເອື້ອຍອຳນວຍຄວາມສະດວກຈາກ ຄະນະພັກຮາກຖານ, ຄະນະນຳພະແນກ ຍທຂ ອົງການຈັດຕັ້ງ ກຳມະບານ ແລະ ແມ່ນຍິງ, ອົງການຈັດຕັ້ງສັງຄົມຕ່າງໆ ເພື່ອຍາດແຍ່ງ ການຊ່ວຍເຫຼື່ອ ສະໜັບສະໜູນດ້ານງົບປະມານ, ພາຫານະ ແລະ ວັດຖຸສິ່ງຂອງເຂົ້າໃນການເຄື່ອນໄຫວວຽກງານຕ່າງໆ.
ກອງປະຊຸມຄັ້ງນີ້ຍັງຖືເປັນກຽດຢ່າງສູງ ຮັບພັງການໂອ້ລົມ, ຕັກເຕືອນ, ໃຫ້ທິດຊີ້ນໍາຈາກ ສະຫາຍ ສູນນະຄອນ ແກ້ວວຽງຄຳ ຄະນະພັກຮາກຖານ ພະແນກ ຍທຂ ແລະ ສະຫາຍ ອ໋ອງຄຳ ຄູນສະໄໝ ຮອງເລຂາຄະນະບໍລິຫານງານຊາວໜຸ່ມແຂວງ. ຊຶ່ງສະຫາຍໄດ້ຕີລາຄາ ການຊີ້ນຳ-ນຳພາຂອງຄະນະໜ່ວຍຊາວໜຸ່ມຮາກຖານ ທີ່ເປັນຕົວແທນໃຫ້ແກ່ສະມາຊິກຊາວໜຸ່ມ ໃນການປະກອບສ່ວນພັດທະນາເສດຖະກິດສັງຄົມໃນໄລຍະຜ່ານມາ. ພ້ອມນັ້ນ ສະຫາຍ ຍັງໄດ້ຊີ້ນຳບາງບັນຫາຕໍ່ຄະນະໜ່ວຍຊາວໜຸ່ມຮາກຖານຊຸດໃໝ່ ແລະ ສະມາຊິກຊາວໜຸ່ມທຸກສະຫາຍ ເຊິ່ງມີເນື້ອໃນດັ່ງນີ້: ຄະນະໜ່ວຍຊາວໜຸ່ມຮາກຖານ ຕ້ອງໄດ້ເພີ້ມທະວີການສຶກສາອົບຮົມການເມືອງແນວຄິດໃຫ້ບັນດາສະມາຊິກຊາວໜຸ່ມ, ເປັນເຈົ້າການຕິດຕາມກວດກາ, ຊ່ວຍວຽກຄະນະພັກຮາກຖານ, ຄະນະພະແນກໃນການຈັດຕັ້ງປະຕິບັດວຽກງານ ແລະ ປະກົດການຫຍໍ້ທໍ້ຕ່າງໆ. ນອກຈາກນັ້ນຕ້ອງເພີ້ມທະວີຄວາມຮັບຜິດຊອບໃນການປະຕິບັດສິດໜ້າທີ່ຂອງຕົນກໍຄືການປະຕິບັດແຜນການຂອງຄະນະພັກວາງອອກ, ປະກອບສ່ວນການປະຕິບັດລະບອບນະໂຍບາຍຕ່າງໆຂອງລັດ, ເປັນກຳລັງແຮງໃນຂະບວນການເຄື່ອນໄຫວອອກແຮງງານໃຫ້ມີຂະບວນການທີ່ຟົດຟື້ນ, ເປັນຜູ້ນຳພາເຕົ້າໂຮມຄວາມສາມັກຄີ, ຍົກສູງຈິດໃຈເພິ່ງຕົນເອງ, ກຸ້ມຕົນເອງ, ແລະ ສ້າງຄວາມເຂັ້ມແຂງດ້ວຍຕົນເອງ. ສະມາຊິກຊາວໜຸ່ມຕ້ອງເປັນແບບຢ່າງທີ່ດີໃຫ້ແກ່ມະຫາຊົນ ແລະ ເປັນຜູ້ຫ້າວຫັນໃນຂະບວນການຕ່າງໆ. ປະກອບສ່ວນເຂົ້າໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຄະນະພັກຮາກຖານ, ແຜນພັດທະນາເສດຖະກິດສັງຄົມແຫ່ງລັດ ຂອງຂະແໜງ ຍທຂ ກໍ່ຄືເນື້ອໃນຈິດໃຈມະຕິກອງປະຊຸມໃຫຍ່ຂອງໜ່ວຍຊາວໜຸ່ມຮາກຖານພະແນກ ຍທຂ ຄັ້ງທີ IV ນີ້ໃຫ້ປະກົດຜົນເປັນຈິງ, ພ້ອມດຽວກັນນີ້ ສະຫາຍຍັງຝາກຄວາມຫັວງໃຫ້ຄະນະໜ່ວຍຊາວໜຸ່ມຊຸດໃຫມ່ ຈະນຳໄປຈັດຕັ້ງຜັນຂະຫຍາຍ ແລະ ຊີ້ນຳ-ນຳພາໃຫ້ເກີດດອກອອກຜົນເປັນກ້າວໆ.