ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນຄັ້ງທີ 56 (the 56th ASEAN Senior Transport Officials Meeting) ລະຫວ່າງ ວັນທີ 7-8 ພະຈິກ 2023, ທີ່ ນະຄອນຫລວງພະບາງ

ກະຊວງ ໂຍທາທິການ ແລະ ຂົນສົ່ງ, ແຫ່ງ ສປປ ລາວ ໃນນາມເຈົ້າພາບ ໄດ້ຈັດກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນຄັ້ງທີ 56 ແລະ ກອງປະຊຸມປິ່ນອ້ອມ ຫລື 56^th STOM ໃນລະຫວ່າງ ວັນທີ 7-8 ພະຈິກ 2023, ທີ່ນະຄອນຫລວງຫຼວພະບາງ. ໂດຍໃຫ້ກຽດເປັນປະທານ ແລະ ກ່າວເປີດກອງປະຊຸມ, ໂດຍ ທ່ານ ງາມປະສົງ ເມືອງມະນີ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ; ໂດຍມີບັນດາເຈົ້າໜ້າທີ່ອາວຸໂສຂົນສົ່ງອາຊຽນ 10 ປະເທດອາຊຽນ, ຕີມໍແລັດສເຕ ແລະ ບັນດາປະເທດຄູ່ຮ່ວມມືກັບອາຊຽນ ເຊັ່ນ: ສປ ຈີນ, ສ.ເກົາຫຼີ, ຍີ່ປຸ່ນ ແລະ ສະຫະພາບເອີຣົບ ເຂົ້າຮ່ວມ ຫຼາຍກວ່າ 141 ທ່ານ.

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພຶ່ອປຶກສາຫາລື, ທົບທວນ ແລະ ຮັບຮອງບັນຫາຕ່າງໆຈາກກອງປະຊຸມ ເຈົ້າໜ້າທີ່ອາວຸດໂສຂົນສົ່ງອາຊຽນ ຄັ້ງທີ 55 ທີ່ຈັດຂື້ນໃນລະຫວ່າງ ວັນທີ 6-7 ມີຖຸນາ 2023 ທີ່ນະຄອນຫລວງວຽງຈັນ, ໂດຍມີບັນດາໜ້າວຽກດັ່ງລຸ່ມນີ້: ທົບທວນການຈັດຕັ້ງປະຕິບັດບັນດາໜ້າວຽກ, ກິດຈະກໍາ ແລະ ແຜນງານຕ່າງໆທີ່ໄດ້ຕົກລົງກັນໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ່ 28 ແລະ ກອງປະຊຸມປິ່ນອ້ອມຕ່າງໆທີ່ໄດ້ຈັດຂື້ນຢູ່ ບາລີ ປະເທດອີນໂດເນເຊຍໃນ ປີ 2022 ທີ່ຜ່ານມາ;  ລາຍງານຄວາມຄືບໜ້າການຈັດຕັ້ງແຜນງານ 2022-2023 ພາຍໃຕ້ແຜນຍຸດທະສາດຂົນສົ່ງອາຊຽນ 2016-2025 ແລະ ທົບທວນທ້າຍສະໄໝຂອງແຜນຍຸດທະສາດສະບັບປັດຈຸບັນ ເພື່ອຮ່າງຍຸດທະສາດສະບັບຕໍ່ໄປ; ຕິດຕາມຜົນກອງປະຊຸມຂອງ 4 ໜ່ວຍງານທີ່ຢູ່ໃນແຜນຍຸດທະສາດການຂົນສົ່ງອາຊຽນຄື: ໜ່ວຍງານການຂົນສົ່ງທາງອາກາດ, ໜ່ວຍງານການຂົນສົ່ງທາງບົກ, ໜ່ວຍງານການຂົນສົ່ງທາງທະເລ, ການຂົນສົ່ງແບບຍືນຍົງ ແລະ ໜ່ວຍງານການອໍານວຍຄວາມສະດວກດ້ານການຂົນສົ່ງ;  ກະກຽມເອກະສານຕ່າງໆທີ່ຈະສະເໜີຮັບຮອງໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ່ 29 ທີ່ ສປປ ລາວ ເປັນເຈົ້າພາບ; ພ້ອມທັງໄດ້ເຊີນປະເທດ ຕີມໍ ແລັດສະເຕ ເຂົ້າເປັນຜູ້ສັງເກດການໃນກອງປະຊຸມລະດັບວິຊາການ, ລະດັບໜ່ວຍງານ ແລະ ລະດັບອື່ນໆຂອງຂະແໜງການຂົນສົ່ງ.