ກອງປະຊຸມສາມັນຄົບຄະນະບໍລິຫານງານພັກກະຊວງ ຍທຂ ຄັ້ງທີ 13 ສະໄໝທີ V

ກອງປະຊຸມສາມັນຄົບຄະນະບໍລິຫານງານພັກກະຊວງ ຍທຂ ຄັ້ງທີ 13 ສະໄໝທີ V ໄດ້ໄຂຂຶ້ນໃນວັນທີ 5 ຕຸລາ 2023 ທີ່ກະຊວງ ຍທຂ ໂດຍໃຫ້ກຽດເປັນປະທານຂອງ ສະຫາຍ ງາມປະສົງ ເມືອງມະນີ ເລຂາຄະນະບໍລິຫາງານພັກ, ລັດຖະມົນຕີກະຊວງ ຍທຂ; ມີສະຫາຍຮອງເລຂາຄະນະພັກ, ບັນດາສະຫາຍຄະນະປະຈຳພັກ, ກຳມະການພັກກະຊວງ ເຂົ້າຮ່ວມ.

ກອງປະຊຸມ​ສາ​ມັນຄົບຄະນະບໍລິຫານງານພັກກະຊວງ ຍທຂ ຄັ້ງທີ 13 ສະ​ໄໝທີ V ນີ້, ຊຶ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນ ເພາະວ່າຈະໄດ້ພ້ອມກັນສະຫຼຸບຕີລາຄາ ປຶກສາຫາລື ແລະ ພິຈາລະນາຮັບຮອງຫຼາຍວຽກງານດັ່ງນີ້: ບົດສະຫຼຸບຕີລາຄາການນຳພາເຄື່ອນໄຫວຂອງຄະນະບໍລິຫານງານພັກກະຊວງ 3 ເດືອນ (7-9/2023) ແລະ ກໍານົດແຜນການ 3 ເດືອນຕໍ່ໜ້າ (10-12/2023); ບົດສະຫຼຸບຕີລາຄາການຈັດຕັ້ງປະຕິບັດວຽກງານ ທາງລົດໄຟ ໃນໄລ ຍະຜ່ານມາ ແລະ ກຳນົດແຜນໃນຕໍ່ໜ້າ; ແລະ ບົດສະຫຼຸບຕີລາຄາການຈັດຕັ້ງປະຕິບັດວຽກງານ ເຄຫາ ແລະ ຜັງເມືອງ ໃນໄລຍະຜ່ານມາ ແລະ ກຳນົດແຜນໃນຕໍ່ໜ້າ.

ກອງປະຊຸມໃນຄັ້ງນີ້,  ມີຫຼາຍວຽກງານທີ່ສໍາຄັນ ດັ່ງທີ່ໄດ້ກ່າວມາຂ້າງເທິງນັ້ນ ດ້ວຍເວລາອັນເຄັ່ງຮ້ອນ  ຈຶ່ງຮຽກຮ້ອງມາຍັງບັນດາສະຫາຍຄະນະປະຈຳພັກ,  ກໍາມະການພັກກະຊວງ ຈະຕ້ອງພ້ອມກັນເຊີດຊູ ແລະ ຍົກສູງຄວາມຮັບຜິດຊອບຂອງຕົນ, ພ້ອມກັນສຸມສະຕິປັນຍາເຂົ້າໃນການຄົ້ນຄວ້າ ແລະ ປະກອບຄໍາຄິດຄໍາເຫັນ ຕໍ່ເນື້ອໃນເອກະສານຕ່າງໆຂອງກອງປະຊຸມ ຢ່າງກົງໄປກົງມາ ຖືກກັບສະພາບຕົວຈິງຂອງການເຄື່ອນໄຫວນຳພາຂອງຄະນະບໍລິຫານງານພັກກະຊວງ ຍທຂ, ເພື່ອຊອກໃຫ້ເຫັນດ້ານຕັ້ງໜ້າທີ່ພົ້ນເດັ່ນ ແລະ ຂໍ້ຄົງຄ້າງ ທີ່ຕ້ອງໄດ້ຄົ້ນຄວ້າປັບປຸງແກ້ໄຂໃນຕໍ່ໜ້າ, ຜົນກະທົບຈາກ ບັນຫາໄພເງິນເຟີ ແລະ ບັນຫາທີ່ເກີດຂຶ້ນຈາກສະພາບການຂອງສາກົນມີການຜັນແປ, ເຊຶ່ງໄດ້ສົ່ງຜົນສະທ້ອນອັນໃຫຍ່ຫຼວງໃຫ້ແກ່ທາງດ້ານເສດຖະກິດ, ​ວັດທະນະທໍາ-ສັງຄົມ ແລະ ການດໍາລົງຊີວິດຂອງພະນັກງານ. ຕໍ່ສະພາບການດັ່ງກ່າວໄດ້ເປັນສິງທ້າທາຍຕໍ່ກັບວຽກງານຂະແໜງການ ຍທຂ ທີ່ຈະຕ້ອງໄດ້ເພີ່ມທະວີ ແລະ ຄວາມເອົາໃຈໃສ່ ໃນການວາງມາດຕະການໃນຕໍ່ໜ້າຢ່າງເຂັ້ມງວດ.