ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ນຳພາຄະນະຜຸ້ແທນຂອງກະຊວງ ຍທຂ ເດີນທາງໄປເຂົ້າຮ່ວມກອງປະຊຸມ ໂຕະມົນລັດຖະມົນຕີ ອາຊຽນ-ຈີນ

ໃນລະຫວ່າງວັນທີ່ 15 ຫາ 18 ກັນຍາ 2023 ທ່ານ​ ງາມປະສົງ ເມືອງມະນີ ລັດ​ຖະ​ມົນ​ຕີ ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ໄດ້​​​ນຳພາ​ຄະ​ນະ​ຜຸ້ແທນຂອງກະຊວງ ຍທຂ ເດີນທາງໄປເຂົ້າຮ່ວມກອງ​ປະຊຸມ ໂຕະມົນລັດຖະມົນຕີ ອາຊຽນ-ຈີນ ກ່ຽວກັບ ວຽກງານການກໍ່ສ້າງ ຄັ້ງທີ1 (the first China ASEAN Ministerial Roundtable Meeting on Construction) ທີ່ນະຄອນໜານໜິງ, ສປ ຈີນ. ກອງປະຊຸມ ດັ່ງກ່າວແມ່ນມີຄວາມໝາຍຄວາມສຳຄັນ ແລະ ເປັນຈຸດລິເລີມ ການເປີດກວ້າງການຮ່ວມມື ເພື່ອຜົນປະໂຫຍດຮ່ວມກັນ   ໂດຍສະເພາະ ເພື່ອເປັນການແລກປ່ຽນກາລະໂອກາດໃໝ່ຂອງການຮ່ວມມື ອາຊຽນ-ຈີນ ເຂົ້າໃນວຽກງານການກໍ່ສ້າງ, ພັດທະນາຕົວເມືອງ ແລະ ຊົນນະບົດ. ກອງປະຊຸມດັ່ງກ່າວໄດ້ຮັບກຽດເປັນປະທານໂດຍທ່ານ ນີຫົງ ລັດຖະມົນຕີ ກະຊວງເຄຫາສະຖານ ການພັດທະນາຕົວເມືອງ ແລະ ຊົນນະບົດ ແລະ ມີບັນດາລັດຖະມົນຕີ ແລະ ຕົວແທນຂອງບັນດາປະເທດສະມາຊິກອາຊຽນເຂົ້າຮ່ວມຢ່າງພ້ອມພຽງ. ໃນກອງປະຊຸມບັນດາລັດຖະມົນຕີຈີນ ແລະ ອາຊຽນໄດ້ມີການປຶກສາຫາລືແລະ ພັດປ່ຽນກັນປະກອບຄຳເຫັນຢ່າງສ້າງສັນເພື່ອແລກປ່ຽນບົດຮຽນ ແລະ ລາຍງານສະພາບການພັດທະນາຂອງຂະແໜງການຢູ່ພາຍໃນປະເທດຕົນ. ທ່ານ​ ງາມປະສົງ ເມືອງມະນີ ລັດ​ຖະ​ມົນ​ຕີ ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ກໍໄດ້ຂື້ນກ່າວໃນປະກອບຄຳເຫັນ ໂດຍໄດ້ສະແດງຄວາມຮູ້ບຸນຄຸນຢ່າງຈິງໃຈ ແລະ ຊົມເຊີຍລັດຖະບານ ສປ ຈີນ ທີ່ໄດ້ລິເລີ້ມ ກອງປະຊຸມດັ່ງກ່າວ. ທ່ານຍັງໄດ້ເນັ້ນໃຫ້ເຫັນເຖິງຄວາມສຳຄັນ ຂອງວຽກງານການພັດທະນາຕົວເມືອງ ແລະ ຊົນນະບົດ ຢ່າງຮອບດ້ານ ເພື່ອຮັບປະກັນໄດ້ເຖິງຄວາມປອດໄພ, ທົນທານ, ການມີສ່ວນຮ່ວມ ແລະ ຍືນຍົງ. ພ້ອມນີ້ທ່ານຍັງໃຫ້ຄວາມເຊື່ອໝັ້ນວ່າ ກອງປະຊຸມໃນຄັ້ງນີ້ຈະໄດ້ຮັບຜົນປະໂຫຍດ ແລະ ໝາກຜົນທີ່ດີ ຈະເປັນເວທີທີ່ສຳຄັນ ສຳລັບການປຶກສາຫາລື ແລະ ການຮ່ວມມືຂອງບັນດາປະເທດສະມາຊິກອາຊຽນ ແລະ ສປ ຈີນ ເພື່ອບັນລຸເປົ້າໝາຍຮ່ວມກັນ  ໃນອະນາຄົດ. ໃນນາມຕາງໜ້າກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ແລະ ລັດຖະບານແຫ່ງ ສປປ ລາວ ທ່ານໄດ້ໃຫ້ການສະໜັບສະໜູນຂໍລິເລີ້ມ ໜານໜີງ ເຊີ່ງໄດ້ຮັບການຮັບຮອງຈາກກອງປະຊຸມ ຢ່າງເປັນເອກະພາບ.

ໃນວັນດຽວກັນ ທ່ານ​ ງາມປະສົງ ເມືອງມະນີ ລັດ​ຖະ​ມົນ​ຕີ ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ພ້ອມ​ດ້ວຍ​ຄະ​ນະ ກໍໄດ້ເຂົ້າຮ່ວມກອງປະຊຸມ​ພົບ​ປະ​ສອງ​ຝ່າຍ​ກັບ ທ່ານ​ ນິຫົງ ລັດ​ຖະ​ມົນ​ຕີ ກະ​ຊວງ ເຄ​ຫາ​ສະ​ຖານ ການ​ພັດ​ທະ​ນາ​ຕົວ​ເມືອງ ແລະ ຊົນ​ນະ​ບົດ ພ້ອມ​ດ້ວຍ​ຄະ​ນະ. ການພົບປະໃນຄັ້ງນີ້ແມ່ນມີຄວາມໝາຍຄວາມສຳຄັນ ແລະ ​ເປັນ​ຄັ້ງ​ທຳ​ອິດ​ ທີ່​ທັງ​ສອງ​ຝ່າຍ​ ໄດ້​ພົບ​ປະກັນ​ ເພື່ອ​ແລກ​ປ່ຽນ​ບົດ​ຮຽນ ແລະ ທົບທວນຄືນ ກ່ຽວກັບວຽກງານການກໍ່ສ້າງ ແລະ ການຮ່ວມມືກັນຂອງທັງສອງປະເທດໃນໄລຍະຜ່ານມາ ໂດຍສະເພາະກ່ຽວ​ກັບ​ການ​ພັດ​ທະ​ນາ​ໂຄງ​ລ່າງ​ພື້ນ​ຖານຂອງ​ຕົວ​ເມືອງ ແລະ ຊົນ​ນະ​ບົດ,  ມາດ​ຕະ​ຖານການອອກ​ແບບ, ​ການກໍ່​ສ້າງ, ການ​ອາ​ນຸ​ລັກ​ເຄ​ຫາ​ສະ​ຖານອາຄານທາງ​ດ້ານ​ປະ​ຫວັດ​ສາດ, , ບັນ​ດາ​ໂຄງ​ການ​ຕ່າງໆ ຂອງ​ສອງ​ປະ​ເທດ​ທີ່​ມີການຮ່ວມມືກັນ​ຜ່ານ​ມາ ເພື່ອ​ເປັນ​ແນວ​ທາງ​ໃນ​ການ​ປັບ​ປຸງແກ້​ໄຂບັນ​ຫາ ໃຫ້​ມີ​ຄວາມ​ສອດ​ຄ່ອງ​ກັບ​ສະ​ພາບ ແລະ ເງື່ອນ​ໄຂ​ຕົວ​ຈີງ​ຂອງ​ແຕ່​ລະ​ເຂດ ​ໂດຍເນັ້ນ​ໃສ່ການນໍາໃຊ້ເຕັກໂນໂລຊີ ແລະ ນະວັດຕະກຳໃໝ່ທີ່ທັນສະໄໝ ເຂົ້າມາຊ່ວຍເພື່ອຍົກສູງຄຸນນະພາບ ແລະ ​ຄວາມ​ຄົງ​ທົນຂອງວຽກງານດັ່ງກ່າວ. ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ໃຫ້ທັດສະນະຕໍ່ການພົບປະຄັ້ງນີ້ວ່າ ສອງກະຊວງພວກເຮົາຕ້ອງໄດ້ເພີ້ມ​ທະ​ວີ​ການ​ຮ່ວມມືແບບ​ຮອບ​ດ້ານ​ໃນ​ຕໍ່​ໜ້າ ເພື່ອປຶກສາຫາລື ແລະ ແລກປ່ຽນກັນຄໍາຄິດຄໍາເຫັນກ່ຽວກັບວຽກງານທີ່ຕິດພັນກັບ​ສອງ​ກະ​ຊວງ​ ພ້ອມທັງຮັດແໜັ້ນຄວາມສາມັກຄີທີ່ມີມາຢ່າງຍາວນານ ແລະ ພ້ອມກັນ​ຊ່ວຍຊຸກຍູ້ ແລະ ສົ່ງເສີມ ການ​ພັດ​ທະ​ນາ​ແບບ​​ຍືນ​ຍົງ​ ​​ເຂົ້າ​ໃນ​ວຽກງານການ​ວາງ​ແຜນ, ການກໍ່ສ້າງ, ການ​ພັດ​ທະ​ນາ​ຕົວເມືອງ ແລະ ຊົນນະບົດ, ການ​ອາ​ນຸ​ລັກ​ອາ​ຄານ​ທາງ​ດ້ານ​ປະ​ຫວັດ​ສາດ, ມາດຕະຖານເຕັກນິກຕ່າງໆ ລວມທັງເຄື່ອງມື ແລະ ອຸປະກອນທີ່ທັນສະໄໝ ມາຊ່ວຍພັດທະນາວຽກດັ່ງກ່າວ ເພື່ອຍົກສູງຄຸນນະພາບ ແລະ ຄວາມປອດໄພຂອງທີ່ຢູ່ອາໄສ ມີຄວາມຄົງທົນຕໍ່ການປ່ຽນແປງຂອງ​ດິນ​ຟ້າ​ອາ​ກາດໃນສະພາບປະຈຸບັນ, ມີສະພາບແວດລ້ອມທີ່ດີ ກ້າວ​ໄປ​ສູ່​ຕົວ​ເມືອງ​ທີ່​ໜ້າ​ຢູ່ ທັນສະໄໝ ແລະ ຍຶນ​ຍົງ.