ພິທີເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ 50 ວັນ ຊຸດທີ່ 25 ຂອງກະຊວງ ໂຍທາທິການ ແລະ ຂົນສົ່ງ, ທີ່ ສະຖາບັນໂຍທາທິການ ແລະ ຂົນສົ່ງ

ກະ​ຊວງ​ໂຍ​ທາ​ທິ​ການ ແລະ ຂົ​ນ​ສົ່ງ ໄດ້​ໄຂ​ຊຸດ​ຝຶກ​ອົບ​ຮົມ​ທິດ​ສະ​ດີ​ການ​ເມືອງ ແລະ ການ​ປົກ​ຄອງ ຊຸດ​ທີ່ 25 ຂຶ້ນ​ ຢ່າງ​ເປັນ​ທາງ​ການ ໃຫ້​ແກ່​ພະ​ນັກ​ງານຫຼັກ​ແຫຼ່ງ ແລະ ພະ​ນັກ​ງານ​ສະ​ມາ​ຊິກ​ພັກ ແລະ ບັນ​ດາ​​ກົມກອງ, ສ​ະ​ຖາ​ບັນ ແລະ ລັດ​ວິ​ສາ​ຫະ​ກິດ ອ້ອມ​ຂ້າງ​ກະ​ຊວງ ໂຍ​ທາ​ທິ​ການ ແລະ ຂົນ​ສົ່ງ, ຫຼັກ​ສູດ​ຝຶກ​ອົບ​ຮົມ​ດັ່ງ​ກ່າວ​ໄດ້​ຈັດ​ຂຶ້ນ​ຢູ່​ທີ່ ສະ​ຖາ​ບັນ​ ຍທຂ (ຫຼັກ 19).

          ຊຸດ​ຝຶກ​ອົ​ບ​ຮົມ​ດັ່ງ​ກ່າວ​ນີ້ ຈະ​ໃຊ້​ເວ​ລາ 50 ວັນ ຫຼື 10 ອາ​ທິດ​ເຕັມ ຊຶ່ງ​ຈະ​ເລີ້ມ​ແຕ່                             ​ວັນ​ທີ 18 ເດືອນ ກັນຍາ ຈົ​ນ​ໄປ​ຮອດ ວັນ​ທີ 24 ເດືອນ ພະຈິກ 2023 ຈຶ່ງ​ຈະ​ສຳ​ເລັດ. ໃນ​ຊຸດ​ຮຽນ​ນີ້ ມີ​ນັກ​ສຳ​ມະ​ນາ​ກອນ​ເຂົ້າ​ຮ່ວມທັງ​ໝົດ 34 ທ່ານ, ຍິງ 08 ທ່ານ ຊື່ງ​ມາ​ຈາກ ບັນດາຫ້ອງການ, ກົມກອງ, ສະຖາບັນ ພະແນກ ຍທຂ ນະຄອນຫຼວງ ແລະ ລັດວິສາຫະກິດ ອ້ອມ​ຂ້າງ ກະ​ຊວງ ຍ​ທ​ຂ.

          ໃນ​ການ​ຈັດ​ຝຶ​ກ​ອົບ​ຮົມ​ຄັ້ງ​ນີ້ ຄາດ​ວ່າ​ຈະ​ມີ ອາ​ຈານ​ເຂົ້າ​ຮ່ວມ​ສິ​ດ​ສອນ​ທັງ​ໝົດ ຈຳ​ນວນ 29 ທ່ານ, ຍີງ 08 ທ່ານ. ຊຶ່ງ​ຄູ​ອາ​ຈານ​ທັງ​ໝົດ ແມ່ນ​ມາ​ຈາກ​ສະ​ຖາ​ບັນ​ການ​ເມືອງ ແລະ ການ​ປົກ​ຄອງ​ແຫ່​ງ​ຊາດ ແລະ ນອກ​ຈາກ​ນັ້ນ ກໍ​ຍັງ​ຈະ​ມີ ​ຄະ​ນະ​ພັກ​ ຄະນະນໍາ ​ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ, ກະ​ຊວງ ປ້ອງ​ກັນ​ຊາດ, ປ້ອງກັນ​ຄວາ​ມ​ສະ​ຫງົບ ແລະ ບັນ​ດາ​ກົມ​ອ້ອມ​ຂ້າງ ກະ​ຊວງ ຂອງ ກະ​ຊວງ ຍ​ທ​ຂ ຂອງ​ພວກ​ເຮົາ ຈະ​ໄດ້​ໃຫ້​ກຽດ​ມາ​ຂຶ້ນ​ຫ້ອງ​ໃນ​ບາ​ງ​ຫົວ​ຂໍ້​ຕື່ມ ອັນ​ຈະ​ເຮັດ​ໃຫ້​ການ​ຝຶກ​ອົບ​ຮົມ​ໃນ​ຄັ້ງ​ນີ້ ມີ​ເນື້ອ​ໃນ​ໜັກ​ແໜ້ນ​ຂື້ນ​ຕື່ມ.

          ຫຼັກ​ສູດ​ທິ​ດ​ສະ​ດີ​ການ​ເມືອງ ແລະ ການ​ປົກ​ຄອງ ນີ້​ປະ​ກອບ​ມີ 5 ພາກ​ສ່ວນ​ໃຫຍ່ ແລະ ມີ​ບົດ​ຮຽນ​ທັງ​ໝົດ​ ຢູ່ 33 ບົດ ເຊັ່ນ:

·         ພ​າກວິ​ຊາ ປັດ​ຊະ​ຍາ, ມີ 6 ບົດ.

·         ພາກວິ​ຊາ ເສດ​ຖະ​ສາດ​ການ​ເມືອງ, ມີ 8 ບົດ.

·         ພາກວິ​ຊາ ລັດ​ທິ​ສັງ​ຄົມ​ນິ​ຍົມ ວິ​ທະ​ຍາ​ສາດ, ມີ 6 ບົດ.

·         ພາກວິ​ຊາ ບໍ​ລິ​ຫານ​ສາດ, ມີ 8 ບົດ.

·         ພາກວິ​ຊາ ກໍ່​ສ້າງ​ພັກ, ມີ 5 ບົດ.

ການຝຶກອົບຮົມຄັ້ງນີ້ຈະປະກອບມີຫຼາຍກິດຈະກຳ ເຊັ່ນ: ການຮ່ຳຮຽນທິດສະດີຢູ່ຫ້ອງຮຽນ, ການຄົ້ນຄວ້າເປັນໜ່ວຍ, ການຄົ້ນຄວ້າລວມຫ້ອງ, ການໄປທັດສະນະສຶກສາຢ້ຽມຢາມສະຖານທີ່ສຳຄັນໆ ທາງດ້ານມູນເຊື້ອ ທິດສະດີການເມືອງ ແລະ ການປົກຄອງ ທີ່ສອດຄ່ອງກັບເນື້ອໃນຫຼັກສູດ.

ນອກຈາກນັ້ນ, ກໍ່ຍັງຈະມີການຂຽນບົດ, ການຜ່ານບົດເກັບກ່ຽວບຸກຄົນ ພ້ອມທັງ ການຮັບລາຍງານສ່ອງແສງເປັນລາຍອາທິດ ແລະ ແກ້ໄຂຂໍ້ຂ້ອງໃຈຕ່າງໆ ຈາກບັນດາອາຈານປະຈຳພາກວິຊາອີກດ້ວຍ.