ໃນວັນທີ 27 ກໍລະກົດ 2023 ທີລັດວິສາຫະກິດ ລົດໄຟແຫ່ງຊາດລາວ, ໄດ້ຈັດພິທີປະກາດ ແຕ່ງຕັ້ງຄະນະສະພາບໍລິຫານ ລັດວິສາຫະກິດ ລົດໄຟແຫ່ງຊາດລາວ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ ແລະ ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງ ໂຍທາທິການ ແລະ ຂົນສົ່ງ, ມີທ່ານຮອງຫົວໜ້າກົມຈັດຕັ້ງ ແລະ ພະນັກງານ ກະຊວງ ຍທຂ, ກະຊວງ ການເງິນ, ຮອງຫົວໜ້າກົມປັບປຸງທຸລະກິດ ແລະ ປະກັນໄພ ກະຊວງການເງິນ, ຜູ້ອໍານວຍການ, ຮອງຜູ້ອໍານວຍການ ພ້ອມດ້ວຍພະນັກງານລັດວິສາຫະກິດ ລົດໄຟແຫ່ງຊາດລາວ ເຂົ້າຮ່ວມ.

ໃນກອງປະຊຸມ ທ່ານ ທ່ານ ອຸໄທ ອິນທິລາດ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງ ການເງິນ ໄດ້ຂຶ້ນຜ່ານຂໍ້ຕົກລົງ ສະບັບເລກທີ 0588/ກງ, ລົງວັນທີ 24 ກຸມພາ 2023 ວ່າດ້ວຍການແຕ່ງຕັ້ງຄະນະສະພາບໍລິຫານ ລັດວິສາຫະກິດ ລົດໄຟແຫ່ງຊາດລາວ  ດັ່ງນີ້:  ແຕ່ງຕັ້ງ ທ່ານ ບຸນປອນ ວັນນະຈິດ ຮອງລັດຖະມົຕີກະຊວງການເງິນ ເປັນປະທານ; ທ່ານ ດາວຈິນດາ ສີຫາລາດ ຜູ້ອໍານວຍການໃຫຍ່ ລັດວິສາຫະກິດ ລົດໄຟແຫ່ງຊາດລາວ  ເປັນຮອງປະທານ; ທ່ານ ສົມພາວັນ ສີຫາປັນຍາ ຮອງຫົວໜ້າກົມປະຕິຮູບລັດວິສາຫະກິດ ແລະ ການປະກັນໄພ ກະຊວງການເງິນ ເປັນກຳມະການ; ທ່ານ ຫີນເພັດ ຫຼ້າຄອນວົງ ຮອງຫົວໜ້າກົມທາງລົດໄຟ ກະຊວງ ຍທຂ ເປັນກຳມະການ; ທ່ານ ທອງເດີນ ຄໍາມະນີ ຮອງຜູ້ອໍານວຍການລັດວິສາຫະກິດ ລົດໄຟແຫ່ງຊາດລາວ ເປັນກຳມະການ.