ສະຫະພັນແມ່ຍິງກະຊວງ ຍທຂ ຈັດພິທີປາຖະກະຖາສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ

ສະຫະພັນແມ່ຍິງກະຊວງ ໂຍທາທິການ ແລະ ຂົນສົ່ງ ໄດ້ຈັດພິທີປາຖະກະຖາສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ ຂຶ້ນໃນວັນທີ 28 ກໍລະກົດ 2023 ທີ່ຫ້ອງປະຊຸມໃຫຍ່ ກະຊວງ ຍທຂ ໂດຍການເປັນປະທານຂອງ ທ່ານ ນາງ ວັນ ດີລະພັນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງ ຍທຂ, ມີຕາງໜ້າສາມອົງການຈັດຕັ້ງມະຫາຊົນ ພ້ອມດ້ວຍສະມາຊິກແມ່ຍິງເຂົ້າຮ່ວມ.

ທ່ານນາງ ວັນ ດີລະພັນ ໄດ້ຍົກໃຫ້ເຫັນບົດບາດຂອງແມ່ຍິງລາວໃນການເຕີບໃຫຍ່ຂະຫຍາຍຕົວໃນພາລະກິດຕໍ່ສູ້ກູ້ຊາດຕະຫຼອດໄລຍະຜ່ານມາຈົນເຖິງປັດຈຸບັນ ແລະ ບົດບາດຄວາມສະເໝີພາບຍິງ-ຊາຍ ແລະ ການພັດທະນາແມ່ຍິງລາວໃນການສົ່ງເສີມແມ່ຍິງ, ການສຶກສາແມ່ຍິງລາວໄດ້ປະກອບສ່ວນໃນການສ້າງສາ ແລະ ພັດທະນາປະເທດຊາດ. ທ່ານໄດ້ຍົກໃຫ້ເຫັນ 4 ຄຸນລັກສະນະຂອງແມ່ຍິງລາວ, ຜ່ານມາເອື້ອຍນ້ອງແມ່ຍິງລາວໄດ້ພ້ອມກັນສຸມທຸກສະຕິປັນຍາເຂົ້າໃນການຈັດຕັ້ງປະຕິບັດວຽກງານຕ່າງໆ ຕາມການມອບໝາຍຢ່າງມີປະສິດທິຜົນ ຖືເອົາວຽກງານວິຊາສະເພາະເປັນຫຼັກເພື່ອຮັບປະກັນຄຸນນະພາບ, ມາຮອດປັດຈຸບັນພັກ-ລັດຖະບານໄດ້ອອກກົດໝາຍທີ່ຕິດພັນກັບບົດບາດຍິງ-ຊາຍ, ນອກນັ້ນຍັງຮຽກຮ້ອງໃຫ້ເອື້ອຍນ້ອງແມ່ຍິງໃຫ້ຖືເອົາການດຳລົງຊີວິດການເມືອງ, ການຕຳນິກໍ່ສ້າງຊ່ວຍເຫຼືອຊຶ່ງກັນ ແລະ ກັນ, ຈັດຕັ້ງປະຕິບັດຄຳຂວັນ ແລະ ຂໍ້ແຂ່ງຂັນ 3 ດີທີ່ສູນກາງສະຫະພັນແມ່ຍິງລາວວາງອອກ. ເພື່ອເປັນການສ້າງຄວາມສາມັກຄີພາຍໃນ ແລະ ສ້າງຄວາມເບີກບານມ່ວນຊື່ນໃນງານສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຊຶ່ງສະຫະພັນແມ່ຍິງກະຊວງ ຍທຂ ໄດ້ຈັດກິດຈະກຳເດີນແບບ ແລະ ງານວາງສະແດງສິນຄ້າຕື່ມອີກ.