ສຳເລັດ ໂຄງການກໍ່ສ້າງລະບົບນໍ້າປະປາ ແລະ ສຸຂາພິບານ 2 ເມືອງ ແຂວງບໍລິຄໍາໄຊ

ພິທີ ມອບ-ຮັບ ໂຄງການກໍ່ສ້າງລະບົບນ້ຳປະປາ ແລະ ສຸຂາພິບານ ເມືອງປາກຊັນ ແລະ ເມືອງປາກກະດິງ ແຂວງບໍລິຄຳໄຊ ຈັດຂື້ນໃນວັນທີ 16 ກັນຍາ 2022 ທີ່ແຂວງບໍລິຄຳໄຊ  ໂດຍເປັນກຽດກ່າວມອບຂອງ ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ,  ແລະ ກ່າວຮັບໂດຍ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ມີພາກສ່ວນທີ່ກ່ຽວຂ້ອງເຂົ້າຮ່ວມ  

ໂດຍສືບຕໍ່ຜັນຂະຫຍາຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ່ IX (2021-2025) ໄປຄຽງຄູ່ກັບການພັດທະນາໃຫ້ໄປຕາມ SDG ຂອງປະຊາຄົມໂລກເວົ້າລວມ, ເວົ້າສະເພາະແມ່ນ SDG6 ແລະ ແຜນພັດທະນາ 5 ປີຂອງຂະແໜງ ຍທຂ ໂດຍສະເພາະແມ່ນແຜນພັດທະນາ 2022-2025, ຍຸດທະສາດ 2022-2030 ແລະ ວິໄສທັດຮອດປີ 2030 ຂອງຂະແໜງນໍ້າປະປາ ແລະ ສຸຂາພິບານ (1) ໃຫ້ປະຊາຊົນລາວ 90% ທີ່ອາໄສໃນເທດສະບານແຂວງ ແລະ ເມືອງ ໄດ້ຊົມໃຊ້ນໍ້າປະປາ ທີ່ສະອາດ ແລະ ປອດໄພ, (2) ປະຊາກອນ 100%ທີ່ອາໄສໃນເທດສະບານແຂວງ ແລະ ເມືອງ ໄດ້ນໍາໃຊ້ວິດຖ່າຍທົ່ວເຖິງ ແລະ ຖືກຫຼັກອະນາໄມ (3)ໃຫ້ນໍ້າເປື້ອນໃນເທດສະບານແຂວງ ແລະ ເມືອງ 50% ໄດ້ຮັບການບໍາບັດຢ່າງຖືກຫຼັກການ.
 

ນ້ຳປະປາ ແມ່ນປັດໃຈໜຶ່ງທີ່ຈຳເປັນຕໍ່ການຍົກລະດັບຄຸນນະພາບຊີວິດ ຂອງປະຊາຊົນໃຫ້ນັບມື້ດີຂຶ້ນ, ການຊົມໃຊ້ນໍ້າປະປາ ໃນຕົວເມືອງ ແລະ ຊົນນະບົດ ຍັງແມ່ນຕົວຊີ້ບອກພື້ນຖານອັນໜຶ່ງ ໃນການພັດທະນາເສດຖະກິດ-ສັງຄົມ ໃນແຕ່ລະໄລຍະຂອງ ປະເທດເຮົາ. ສະນັ້ນ, ລັດຖະບານ ຍາມໃດກໍໄດ້ເອົາໃຈໃສ່ພັດທະນາ, ປັບປຸງ ແລະ ຂະຫຍາຍລະບົບນ້ຳປະປາໃຫ້ທົ່ວເຖິງທັງໃນຕົວເມືອງ ແລະ ຊົນນະບົດ ໃນທົ່ວປະເທດ. 

ໂຄງການກໍ່ສ້າງນໍ້າປະປາ ແລະ ສຸຂາພິບານ ເມືອງປາກຊັນ, ເມືອງປາກກະດິງ ເປັນໂຄງການ ໄດ້ຮັບເງິນກູ້ ຈາກທະນາຄານພັດທະນາອາຊີ (ADB Loan 3041-Lao) ​ເພື່ອ​ພັດທະນາ​ລະບົບ​ນໍ້າ​ປະປາ ພາຍ​ໃຕ້​ໂຄງການ​  ນໍ້າ​ປະປາ ​ແລະ ສຸຂາພິບານ ຂອງ​ກະຊວງ ໂຍທາທິການ ແລະ ຂົນສົ່ງ ​ໂດຍ​ແມ່ນ​ກົມ​ນໍ້າ​ປະປາ ​ເປັນ​ຜູ້​ຈັດ​ຕັ້ງ​ປະຕິບັດ ຮ່ວມ​ກັບ ພະ​ແນ​ກໂຍທາທິການ ແລະ ຂົນສົ່ງ ​ແຂວງ ພາຍ​ໃຕ້​ການ​ຊີ້​ນໍາ-​ນໍາພາ ຂອງ​ຄະນະ​ນໍາ ກະຊວງ ໂຍທາທິການ ແລະ ຂົນສົ່ງ, ຄະນະ​ນໍາ​ຂອງ​ແຂວງ​ບໍລິ​ຄໍາ​ໄຊ ​ແລະ ບັນດາ​ພະ​ແນ​ກການຕ່າງໆ ທີ່​ກ່ຽວຂ້ອງ, ​ໂຄງການ​ກໍ່ສ້າງ​ນໍ້າ​ປະປາ ຢູ່​ເມືອງ​ປາກ​ຊັນ ​ແລະ ​ເມືອງ​ປາກ​ກະດິງ ​ໃຊ້​ງົບປະມານ​ທັງໝົດ 38,65 ຕື້​ກີບ, ລັດຖະບານ ປະກອບເປັນທຶນໃຫ້ລັດວິສາຫະກິດ ນໍ້າປະປາແຂວງ 70% ເປັນມູນຄ່າ 27,06 ຕື້ກີບ, ສ່ວນ 30% ເປັນມູນຄ່າ 11,59 ຕື້ກີບ ໃຫ້ລັດວິສາຫະກິດ ນໍ້າປະປາແຂວງ ກູ້ຢືມ ໃນເງື່ອນໄຂດອກເບ້ຍ 6,4% ຕໍ່ປີ, ໄລຍະທົດແທນຄືນ 25 ປີ.