Ministry News
ຄະນະຜູ້ແທນຂັ້ນສູງ ກະຊວງ ຍທຂ ສຳເລັດການເຄື່ອນໄຫວຢ້ຽມຢາມ ແລະ ເຮັດວຽກກັບ ກະຊວງ ຄົມມະນາຄົມ ຂົນສົ່ງ, ສປຈີນ ທີ່ນະຄອນຫຼວງປັກກິ່ງ, ລະຫວ່າງວັນທີ 17-21 ພະຈິກ 2012
ຕອບສະໜອງຕາມການເຊື້ອເຊີນຂອງ ທ່ານ ຢັງ ຈວນ ຖັງ, ລັດຖະມົນຕີວ່າການ ກະຊວງ ຄົມມະນາຄົມ ຂົນສົ່ງ, ສປຈີນ, ທ່ານ ສົມມາດ ພົລເສນາ, ລັດຖະມົນຕີວ່າການ ກະຊວງ ໂຍທາທິການ ແລະ ຂົນສົ່ງ ພ້ອມຄະນະ ໄດ້ໄປເຄື່ອນໄຫວຢ້ຽມຢາມ ແລະ ເຮັດວຽກກັບ ກະຊວງ ຄົມມະນາຄົມ ຂົນສົ່ງ, ສປຈີນ ທີ່ນະຄອນຫຼວງປັກກິ່ງ ລະຫວ່າງ ວັນທີ 17-21 ພະຈິກ 2012.
ການພົບປະສອງຝ່າຍ ໄດ້ຈັດຂື້ນຢູ່ທີ່ ກະຊວງ ຄົມມະນາຄົມ ຂົນສົ່ງ ໃນວັນທີ 19 ພະຈິກ 2012, ໂດຍທັງສອງຝ່າຍ ໄດ້ເຫັນດີເປັນກະພາບກັນຈະສືບຕໍ່ຮັດແໜ້ນສາຍພົວພັນການຮ່ວມມື ໃນຂະແໜງ ຄົມມະນາຄົມ ຂົນສົ່ງ ລະຫວ່າງສອງປະເທດທີ່ມີມາແຕ່ດົນນານໃຫ້ໄດ້ຮັບການພັດທະນາຍິ່ງຂື້ນ ເປັນຕົ້ນແມ່ນ ຈະສູ້ຊົນໃຫ້ໄດ້ເຊັນບົດບັນທຶກສາມຝ່າຍ ລາວ-ໄທ-ຈີນ ກ່ຽວກັບການຈັດຕັ້ງປະຕິບັດການອຳນວຍຄວາມສະດວກໃຫ້ແກ່ການຂົນສົ່ງຜ່ານແດນ ຢູ່ ດ່ານຊາຍແດນບໍ່ເຕັນ-ມໍຫານ ແລະ ຫ້ວຍຊາຍ-ຊຽງຂອງ ຜ່ານເສັ້ນທາງR3, ຊຸກຍູ້ບັນດາໂຄງການກໍ່ສ້າງພື້ນຖານໂຄງລ່າງຂອງລາວ ທີ່ຢູ່ໃນແຜນການຮ່ວມມືລາວ-ຈີນ ໃຫ້ໄດ້ຮັບການຈັດຕັ້ງປະຕິບັດ, ການປັບປຸງຄອງເດີນເຮືອຕາມລຳແມ່ນ້ຳຂອງ-ແມ່ນ້ຳລ້ານຊ້າງ ແລະ ການຮ່ວມມືດ້ານວິຊາການໃນຂະແໜງການບິນພົນລະເຮືອນ ແລະ ຂະແໜງໂຍທາທິການທາງນ້ຳ. ໃນໂອກາດນີ້, ທ່ານ ສົມມາດ ພົລເສນາ, ລັດຖະມົນຕີວ່າການ ກະຊວງ ຍທຂ ໄດ້ສະແດງຄວາມຍ້ອງຍໍຊົມເຊີຍຕໍ່ ທ່ານ ຢັງ ຈວນ ຖັງ ທີ່ໄດ້ຮັບການເລືອກຕັ້ງເຂົ້າໃນຄະນະບໍລິຫານງານສູນກາງພັກຄອມມູນິດຈີນອີກສະໄໝນຶ່ງ ແລະ ຖືກແຕ່ງຕັ້ງເປັນລັດຖະມົນຕີວ່າການ ກະຊວງ ຄົມມະນາຄົມ ຂົນສົ່ງ ຜູ້ໃໝ່, ພ້ອມທັງໄດ້ສະແດງຄວາມຂອບໃຈຢ່າງຈິງໃຈຕໍ່ການຕ້ອນຮັບອັນອົບອຸ່ນຈາກ ຝ່າຍຈີນ. ໃນໂອກາດພົບປະໃນຄັ້ງນີ້, ກະຊວງ ຍທຂ ຍັງໄດ້ເຊັນບົດບັນທຶກ ກັບບໍລິສັດ ຂົວທາງຈີນ, ຊຶ່ງເປັນລັດວິສາຫະກິດກໍ່ສ້າງຂະໜາດໃຫ່ຍຂອງ ສປຈີນ ເພື່ອດຳເນີນການສຳຫຼວດ ແລະ ສຶກສາຄວາມເປັນໄປໄດ້ ສຳລັບໂຄງການກໍ່ສ້າງປັປປຸງຄອງເດີນເຮືອຕາມລຳນ້ຳຂອງ ແຕ່ ຫ້ວຍຊາຍ - ນະຄອນຫຼວງວຽງຈັນ ແລະ ໂຄງການກໍ່ສ້າງທ່າເຮືອບ້ານວັງ, ແຂວງວຽງຈັນ.
ນອກຈາກນັ້ນ, ຄະນະຜູ້ແທນ ກະຊວງ ຍທຂ ຍັງໄດ້ພົບປະກັບ ປະທານທະນາຄານຂາເຂົ້າ-ຂາອອກ, ສປຈີນ, ໂດຍຝ່າຍຈີນ ຢືນຢັນຈະສືບຕໍ່ໃຫ້ການສະໜັບສະໜູນດ້ານທຶນຮອນສຳລັບບັນດາໂຄງການກໍ່ສ້າງພື້ນຖານໂຄງລ່າງ ຢູ່ ສປປລາວ.
ນອກຈາກການພົບປະເຮັດວຽກແລ້ວ, ຄະນະຜູ້ແທນ ຍັງໄດ້ໄປຢ້ຽມຢາມ ແລະ ທັດສະນະສຶກສາ ການດຳເນີນທຸລະກິດໂຄງການສຳປະທານເສັ້ນທາງແຕ່ ໃຈກາງເມືອງ - ສະໜາມບິນສາກົນປັກກິ່ງ ລວງຍາວ 18.5 ກມ, ຊຶ່ງເປັນການຮ່ວມທຸລະກິດລະຫວ່າງ ບໍລິສັດຂົວທາງຈີນ, ຊຶ່ງເປັນລັດວິສາຫະກິດຂອງລັດ ແລະ ໜ່ວຍງານຮັບຜິດຊອບຄຸ້ມຄອງເສັ້ນທາງຂອງ ນະຄອນປັກກິ່ງ. ນອກຈາກນັ້ນ, ຄະນະຜູ້ແທນ ຍັງໄດ້ໄປຢ້ຽມຢາມຫໍພິພິດຕະພັນແຫ່ງຊາດຈີນ ແລະ ສະຖານທີ່ປະຫັວດສາດຈຳນວນໜຶ່ງ.