Ministry News
ຜັນຂະຫຍາຍຜົນສຳເລັດຂອງກອງປະຊຸມກໍ່ສ້າງ ຮາກຖານການເມືອງ ແລະພັດທະນາຊົນນະບົດຮອບດ້ານທົ່ວປະເທດ
ໃນວັນທີ 15 ມີຖຸນາ 2012 ໄດ້ຈັດກອງປະຊຸມວຽກງານກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານທົ່ວປະເທດຄັ້ງທີ III ຢູ່ສະໂມສອນກະຊວງ ໂຍທາທິຫານ ແລະຂົນສົ່ງ ໂດຍການເປັນປະທານຂອງທ່ານ ສົມມາດ ພົລເສນາ ລັດຖະມົນຕີວ່າການກະຊວງ ຍທຂ, ເປັນກຽດເຂົ້າຮ່ວມຂອງທ່ານ ເມກ ພັນລັກ ລັດຖະມົນຕີຊ່ວຍວ່າການ ປະຈຳຫ້ອງວ່າການລົດຖະບານ, ຮອງປະທານ ຄະນະຊີ້ນຳພັດທະນາຊົນນະບົດ ແລະລຶບລ້າງຄວາມທຸກຍາກແຫ່ງຊາດ ພ້ອມດ້ວຍຄະນະພັກກະຊວງ, ຄະນະພັກຮາກຖານ, ຄະນະໜ່ວຍພັກຮາກຖານ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ຫຼືທຽບເທົ່າຮອງຫົວໜ້າພະແນກຂອງຫ້ອງການ, ກົມ, ອົງການ, ສະຖາບັນ, ສະພາວິທະຍາສາດ-ເຕັກໂນໂລຊີ, ກອງວິຊາການ, ສູນຝຶກ, ຫ້ອງການດັດສົມນ້ຳປະປາ, ຄະນະອຳນວຍການລັດວິສາຫະກິດ ອ້ອມຂ້າງກະຊວງ, ຄະນະບໍລິຫານງານ ສາມອົງການຈັດຕັ້ງມະຫາຊົນກະຊວງເຂົ້າຮ່ວມທັງໝົດ 165 ທ່ານ.
ເພື່ອບັນລຸເປົ້າໝາຍສະຫັດສະວັດການພັດທະນາໃນປີ 2015 ໂດຍສະເພາະແມ່ນໄດ້ເຜີຍແຜ່ເຊື່ອມຊືມບົດສູນທອນພົດຂອງສະຫາຍ ຈູມມະລີ ໄຊຍະສອນ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ຕໍ່ກອງປະຊຸມດັ່ງກ່າວ.ກອງປະຊຸມໄດ້ສຳເລັດຜົນເປັນຢ່າງຈົບງາພາຍໃຕ້ ບັນຍາກາດອັນຟົດຟື້ນ ແລະບັນລຸຈຸດປະສົງຕາມຄາດໝາຍທີ່ວາງໄວ້, ເຊີ່ງສະແດງເຖີງຄວາມບຸກບືນຂອງບັນດາສະຫາຍຄະນະພັກກະຊວງ,ຄະນະພັກ, ຄະນະນຳຂອງແຕ່ລະກົມ, ກອງ, ລັດວິສາຫະກິດອ້ອມຂ້າງກະຊວງ ທີ່ໄດ້ເອົາໃຈໃສ່ກະກຽມເນື້ອໃນມີຄຳເຫັນດຮັດໃຫ້ກອງປະຊຸມດຳເນິນໄປດ້ວຍດີ. ໃນນັ້ນບັນຫາສຳຄັນຕົ້ນຕໍແມ່ນ ສະແດງເຖີງຄວາມສາມັກຄີ ເປັນເອກະພາບທີ່ໜັກແໜ້ນ ແລະມີຄວາມຮັບຜິດຊອບສູງຕໍ່ທັດສະນະ ໃນການຕີລາຄາສະພາບການຈັດຕັ້ງປະຕິບັດ ວຽກງານຊີ້ນຳ-ນຳພາ ແລະການຜັນຂະຫຍາຍຜົນສຳເລັດຂອງກອງປະຊຸມວຽກງານກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານທົ່ວປະເທດຄັ້ງທີ III ເຂົ້າໃນວຽກງານຕົວຈິງຂອງກະຊວງ ໂຍທາທິການ ແລະຂົນສົ່ງ ເວົ້າລວມ, ເວົ້າສະເພາະແມ່ນໄດ້ພ້ອມກັນກຳນົດເປັນທິດໃນການຈັດຕັ້ງປະຕິບັດ ໃຫ້ເປັນເອກະພາບ ໃຫ້ພ້ອມກັນບັນລຸບາດກ້າວບຸກທະລຸທີ 4 ກ່ຽວກັບການກໍ່ສ້າງຮາກຖານການເມືອງ ແລະພັດທະນາຊົນນະບົດ, ໄປພ້ອມກັບການສ້າງຂະບວນການແຂ່ງຂັນ “ ຮັກຊາດ ແລະພັດທະນາ “ ໃຫ້ດຳເນີນຢ່າງກ້ວາງຂວາງ ແລະມີລັກສະນະຕັ້ງໜ້າຖືກທິດຕາມ 4 ເນື້ອໃນ 4 ຄາດໝາຍໃຫ້ໄດ້ຢ່າງກ້ວາງຂວາງ ທັງໝົດນີ້ ແມ່ນເພື່ອສຶບຕໍ່ປະຕິບັດບັນດາໜ້າທີ່ ແລະທີດທາງວຽກງານຈຸດສຸມຈຳນວນໜຶ່ງຂອງກອງປະຊຸມໃຫຍ່ ຄັ້ງທີ IX ຂອງພັກໃຫ້ມີຜົນສຳເລັດ. ເພື່ອຜັນຂະຫຍາຍທິດທາງດັ່ງກ່າວມາເປັນແຜນບຸກທະລຸລະອຽດຂອງຂະແໜງໂຍທາທີການ ແລະຂົນສົ່ງນັ້ນ ຕ້ອງໄດ້ເອົາໃຈໃສ່ບາງດ້ານຄື:
1) ສຸ່ມໃສ່ປະຕິບັດ, ຖືເອົາການພັດທະນາຊົນນະບົດ ແລະລຶບລ້າງຄວາມທຸກເປັນສະໜາມຮົບອັນດັບໜຶ່ງໃນການພັດທະນາປະເທດເຮົາ.
2) ສຶບຕໍ່ນຳໃຊ້ຈຸດພິເສດດ້ານທີ່ຕັ້ງຂອງປະເທດເຮົາໃຫ້ເກີດປະໂຫຍດສູງສຸດ ໂດຍເລັ່ງໃສ່” “ “ຂະຫຍາຍ ແລະພັດທະນາລະບົບຄົມມະນາຄົມ ໃຫ້ເປັນປາຍແຫຼມທີ່ ລົ່ງລ່ຽນ, ສະດວກ, ປອດໄພ, ທັນສະໄໝ, ໂປ່ງໃສ ເພື່ອປະຕິບັດສອງໜ້າທີ່ຍຸດທະສາດ ແລະເຊື່ອມຈອດກັບອານຸພາກພື້ນ”.
3) ເອົາໃຈໃສ່ວຽກງານການອອກແບບຜັງເມືອງ ແລະຜັງເຂດຈຸດສຸ່ມຂອງສູນກາງ, ຂອງແຂວງຕ່າງໆ ແລະເຂດທີ່ໝັ້ນການປະຕິວັດ 64 ເຂດ.
4) ເອົາໃຈໃສ່ການສັບຊ້ອນຈັດວາງພະນັກງານໃຫ້ສອດຄ່ອງກັບມາດຕະຖານ ແທດເໝາະກັບຄວາມຮູ້, ຄວາມສາມາດ ແລະຄວາມຊຳນິຊຳນານງານ.
5) ຄົ້ນຄ້ວາຊອກແຫຼ່ງທຶນເພື່ອປັບປຸງກໍ່ສ້າງທາງແຕ່ເທດສະບານແຂວງ ຫາເທດສະບານເມືອງ ໃນແຕ່ລະແຂວງ ແລະປະສານສົມທົບກັບການຈັດຕັ້ງອື່ນ ແລະພາກສ່ວນທີ່ກ່ຽວຂ້ອງ.
6) ຕ້ອງການປະສານສົມທົບກັບທ່ອງຖິ່ນ ຕາມທິດຊີ້ນຳຂອງສະຫາຍ ເລຂາທິການໃຫຍ່ ໂດຍຫັນເອົາໂຄງການພັດທະນາຊົນນະບົດ-ແກ້ໄຂຄວາມທຸກຍາກໄປຂື້ນກັບຄວາມຮັບຜິດຊອບ ນຳພາ-ຊີ້ນຳ ແລະການຄຸ້ມຄອງຂອງຄະນະພັກ-ອົງການປົກຄອງທ້ອງຖິ່ນໂດຍກົງ.