ຂ່າວພາຍໃນກະຊວງ
ພິທີເປີດຊຸດຮຽນທິດສະດີການເມືອງ ຂັ້ນຕົ້ນ ຊຸດທີ I ຂອງກະຊວງໂຍທາທິການ ແລະ ຂົນສົ່ງ
ກະຊວງໂຍທາທິການ ແລະ ຂົນສົ່ງ ໄດ້ເປີດຊຸດຮຽນທິດສະດີການເມືອງ ຂັ້ນຕົ້ນ ຊຸດທີ I ຂື້ນ ໃນວັນທີ 25 ກໍລະກົດ 2024 ຢູ່ທີ່ສະຖາບັນໂຍທາທິການ ແລະ ຂົນສົ່ງ (ຫລັກ 19) ໃຫ້ກຽດເຂົ້າຮ່ວມໃນການເປີດຊຸດຮຽນຄັ້ງນີ້ມີ ສະຫາຍ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ-ການປົກຄອງແຫ່ງຊາດ, ສະຫາຍ ລັນ ແສງອາພອນ ຮອງເລຂາຄະນະບໍລິຫານພັກ, ຄະນະປະຈຳພັກ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ຫົວໜ້າສະຖາບັນ ຍທຂ, ຫົວໜ້າກົມ, ຫົວໜ້າພະແນກຈາກສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາຮອງກົມອ້ອມຂ້າງກະຊວງ ແລະ ບັນດາຄູອາຈານ, ແຂກທີ່ມີກຽດ ແລະ ນັກສໍໍມະນາກອນ ເຂົ້າຮ່ວມໃນພີທີເປີດຊຸດຮຽນຄັ້ງນີ້.
ຈຸດປະສົງ ເພື່ອຍົກສູງຄວາມຮັບຮູ້ຄວາມເຂົ້າໃຈກ່ຽວກັບທິດສະດີການເມືອງ, ທິດສະດີ ມາກ-ເລນິນ, ພຶດຕິກຳຂອງພັກເຮົາໃນແຕ່ລະໄລຍະໃຫ້ແກ່ສະມາຊິກພັກ-ພະນັກງານຫຼັກແຫຼ່ງພາຍໃນ ກະຊວງໂຍທາທິການ
ແລະ ຂົນສົ່ງ ເພື່ອສ້າງໃຫ້ມີຄວາມເຊື່ອໝັ້ນຕໍ່ອຸດົມການຂອງພັກ, ມີທັດສະນະຫຼັກໝັ້ນການເມືອງ, ເສີມຂະຫຍາຍທັດສະນະປະຕິວັດໃຫ້ໜັກແໜ້ນຂຶ້ນຕື່ມ, ຍົກສູງຄວາມສາມາດໃນການວິເຄາະບັນຫາຢ່າງມີວິທະຍາສາດ
ແລະ ມີຄວາມສາມາດໃນການນໍາໃຊ້ວິທີວິທະຍາສາດໃນການນໍາພາ-ຄຸ້ມຄອງ, ວິທີການເຝິກຝົນຫຼໍ່ຫຼອມບຸກຄະລິກຂອງພະນັກງານນຳພາ-ຄຸ້ມຄອງ
ເພື່ອຕອບສະໜອງຄວາມຮຽກຮ້ອງຕ້ອງການຂອງປະເທດຊາດໃນໄລຍະໃໝ່ ໃນພາລະກິດແຫ່ງການປົກປັກຮັກສາ
ແລະ ສ້າງສາພັດທະນາປະເທດຊາດ ໃຫ້ກ້າວໜ້າຢ່າງບໍ່ຢຸດຢັ້ງ ແລະ
ເພື່ອເຮັດໃຫ້ທິດສະດີການເມືອງ ອັນປະກອບດ້ວຍທິດສະດີມາກ-ເລນິນ, ແນວຄິດ ໄກສອນ ພົມວິຫານ, ມູນເຊື້ອ ແລະ
ປະຫວັດສາດຂອງພັກ, ຂອງຊາດ, ກົດລະບຽບພັກ, ແນວທາງນະໂຍບາຍຂອງພັກ ແລະ ລັດ ກາຍເປັນພື້ນຖານແນວຄິດ ແລະ
ການກະທຳຂອງສະມາຊິກພັກ-ພະນັກງານ ສາມາດເຮັດໃຫ້ທຸກຄົນມີຄວາມຮັບຮູ້, ເຂົ້າໃຈ, ມີຄວາມເຊື່ອໝັ້ນ, ມີສະຕິຕື່ນຕົວປະຕິບັດແນວທາງນະໂຍບາຍຂອງພັກ ແລະ ລັດ, ຍົກລະດັບຄວາມຮູ້ກ່ຽວກັບທັດສະນະ, ນະໂຍບາຍຂອງພັກ-ລັດຢ່າງເລິກເຊິ່ງ, ມີຫຼັກໝັ້ນຢ່າງ ໜັກແໜ້ນ, ມີຄຸນສົມບັດສິນທຳປະຕິວັດດີ, ມີຈິດໃຈຮັກຊາດ, ຮັບໃຊ້ປະຊາຊົນຢ່າງແທ້ຈິງ. ສາມາດຮັບຮອງກັບໜ້າທີ່ການເມືອງໃນໄລຍະໃໜ່ ຂອງເງື່ອນໄຂແຫ່ງການເຊື່ຶອມໂຍງກັບພາກພື້ນ ແລະ ສາກົນໃນປະຈຸບັນ
ເພື່ອນຳເອົາຄວາມຮູ້ເຫລົ່ານັ້ນມາໝູນໃຊ້ເຂົ້າໃນການປະຕິບັດໜ້າທີ່ການເມືອງ ແລະ ວຽກງານຕົວຈິງຂອງຕົນເອງຮັບຜິດຊອບໃຫ້ເກີດຜົນປະໂຫຍດສູງສຸດ ແລະ ກາຍເປັນພະນັກງານຫລັກແຫຼ່ງສືບທອດປ່ຽນແທນໃນອານາຄົດ ໃຫ້ສອດຄ່ອງຕາມແຜນພັດທະນາ ບຸກຄະລາກອນ ຂອງກະຊວງ ໂຍທາທິການ ແລະ ຂົນສົ່ງ ທີ່ວາງອອກ.
ໃນຊຸດຮຽນທິດສະດີການເມືອງຄັ້ງນີ້ ແມ່ນຈະໃຊ້ເວລາ 90 ວັນ ຫຼື 13 ອາທິດເຕັມ ຊຶ່ງຈະເລີ່ມແຕ່ວັນທີ
29 ເດືອນ ກໍລະກົດ 2024 ຈົນໄປຮອດ ວັນທີ 4 ເດືອນ ພະຈິກ 2024, ມີນັກສຳມະນາກອນເຂົ້າຮ່ວມທັງໝົດ
30 ສະຫາຍ, ຍິງ 06 ສະຫາຍ ແລະ ຄາດວ່າຈະມີ ຄູ-ອາຈານ ສິດສອນທັງໝົດ ຈໍານວນ 35 ສະຫາຍ,
ຍິງ 11 ສະຫາຍ ຊຶ່ງມາຈາກ ສະຖາບັນການເມືອງ ແລະ ການປົກຄອງແຫ່ງຊາດ ແລະ ນອກຈາກນັ້ນ
ກໍຍັງຈະມີຄະນະພັກ ຄະນະນໍາກະຊວງ ແລະ ບັນດາຫົວໜ້າກົມອ້ອມຂ້າງກະຊວງ ຍທຂ ຂອງພວກເຮົາ ກໍ່ຈະໄດ້ໃຫ້ກຽດມາຂຶ້ນຫ້ອງໃນບັນດາຫົວຂໍ້ທີ່ກ່ຽວຂ້ອງກັບວຽກຂອງບັນດາກົມດັ່ງກ່າວ
ອັນຈະເຮັດໃຫ້ການຮຽນໃນຄັ້ງນີ້ມີເນື້ອໃນໜັກແໜ້ນ ແລະ ອຸດົມສົມບູນທັງຫຼັກທິດສະດີ ແລະ ຫຼັກວິຊາການ,
ເຊິ່ງການຮຽນຈະປະກອບມີຫຼາຍກິດຈະກຳເຊັ່ນ: ການຮ່ຳຮຽນທິດສະດີຢູ່ຫ້ອງຮຽນ, ການຄົ້ນຄວ້າເປັນໜ່ວຍ,
ການຄົ້ນຄວ້າລວມຫ້ອງ, ການໄປທັດສະນະສຶກສາຢ້ຽມຢາມສະຖານທີ່ສຳຄັນໆ ທາງດ້ານມູນເຊື້ອ
ທິດສະດີ ການເມືອງ ແລະ ການປົກຄອງ ທີ່ສອດຄ່ອງກັບເນື້ອໃນຫຼັກສູດເຊັ່ນ:
ຫໍພິພິດຕະພັນຂອງອະດີດຜູ້ນຳ ແລະ ໄປຖອດຖອນບົດຮຽນນຳ ຫົວໜ່ວຍຜະລິດເປັນສິນຄ້າ ຫຼື
ຫົວໜ່ວຍບໍລິການທີ່ສຳຄັນຕ່າງໆ. ນອກຈາກນັ້ນ, ກໍຍັງຈະມີການຂຽນບົດ, ການຜ່ານບົດເກັບກ່ຽວບຸກຄົນ
ພ້ອມທັງ ການຮັບລາຍງານສ່ອງແສງເປັນລາຍອາທິດ ແລະ ແກ້ໄຂຂໍ້ຂ້ອງໃຈຕ່າງໆ ຈາກບັນດາອາຈານປະຈຳພາກວິຊາອີກດ້ວຍ.
