ຂ່າວພາຍໃນກະຊວງ
ກອງປະຊຸມພົບປະສອງຝ່າຍຢ່າງເປັນທາງການລະຫວ່າງ ກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກະຊວງຄົມມະນາຄົມ ຣາຊະອານາຈັກໄທ
![](/web/image/9873/6486bcfd82b0f9216e3bd9ab422b51489c283ea1.jpg?access_token=0fcbaf68-7002-4eb2-8a73-433c04660379)
ໃນກອງປະຊຸມດັ່ງກ່າວ, ທັງສອງຝ່າຍໄດ້ຮ່ວມກັນແລກປ່ຽນຂໍ້ມູນຂ່າວສານ ແລະ ປຶກສາຫາລືກັນຕໍ່ກັບກອບການຮ່ວມມືຂອງສອງປະເທດເວົ້າລວມ, ເວົ້າສະເພາະແມ່ນໃນຂະແໜງຄົມມະນາຄົມ-ຂົນສົ່ງ ເຊິ່ງໄດ້ລົງເລິກປຶກສາຫາລືກັນເປັນຕົ້ນ: ການອໍານວຍຄວາມສະດວກໃນການຂົນສົ່ງໂດຍສານ ແລະ ສິນຄ້າຂ້າມແດນລະຫວ່າງສອງປະເທດ ລາວ-ໄທ ເຊັ່ນ: ຄວາມພ້ອມຮອບດ້ານໃນການດໍາເນີນງານການແລ່ນລົດໄຟລາວ-ໄທ ຢູ່ສະຖານີວຽງຈັນ(ຄໍາສະຫວາດ), ການເປີດສາຍທາງຂົນສົ່ງໂດຍສານ ແລະ ສິນຄ້າເພີ້ມລະຫວ່າງສອງປະເທດ, ຄວາມເປັນໄປໄດ້ໃນການສ້າງຂົວສະເພາະລົດໄຟແຕ່ນະຄອນຫຼວງວຽງຈັນ-ຈັງຫວັດໜອງຄາຍ, ຄວາມເປັນໄປໄດ້ໃນການເພີ້ມການຮັບນໍ້າໜັກຂອງຂົວມິດຕະພາບລາວ-ໄທແຫ່ງທີ 1. ນອກນັ້ນ, ທັງສອງຝ່າຍຍັງໄດ້ຮ່ວມກັນປຶກສາຫາລືກ່ຽວກັບແຜນການຮ່ວມມືດ້ານການພັດທະນາບຸກຄະລະກອນລະຫວ່າງສອງກະຊວງຕື່ມອີກ.
ພາຍຫຼັງສໍາເລັດກອງປະຊຸມສອງຝ່າຍແລ້ວ, ທ່ານ ໄຊສົງຄາມ ມະໂນທັມ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ພ້ອມດ້ວຍຄະນະ ກໍ່ໄດ້ນໍາພາ ຄະນະຜູ້ແທນຂອງຝ່າຍໄທ ລົງຢ້ຽມຢາມສະຖານີຂົນສົ່ງສິນຄ້າລາວ-ໄທ ແລະ ຈຸດຄ່ຽນຖ່າຍສິຄ້າລາງສູ່ລາງລະຫວ່າງລົດໄຟລາວ-ໄທ ແລະ ລາວ-ຈີນ; ພ້ອມນັ້ນ, ກໍ່ໄດ້ລົງຢ້ຽມຢາມສະຖານີລົດໄຟນະຄອນຫຼວງວຽງຈັນ (ລົດໄຟລາວ-ຈີນ).