ຍທຂ ເຊື່ອມຊຶມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 6 ສະໄໝທີ XI

ຄະນະບໍລິຫານງານພັກ ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມເຊື່ອມຊຶມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 6 ສະໄໝທີ XI ຂຶ້ນໃນວັນທີ 2 ສິງຫາ 2023 ທີ່ກະຊວງ ຍທຂ, ໂດຍການເປັນປະທານຂອງ ສະຫາຍ ງາມປະສົງ ເມືອງມະນີ ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງ ຍທຂ, ມີບັນດາສະຫາຍຄະນະປະຈໍາພັກ, ຄະນະບໍລິຫານງານພັກ, ຄະນະໜ່ວຍພັກບັນດາຮາກຖານ, ຫົວໜ້າ, ຮອງຫົວໜ້າຫ້ອງການ, ກົມ, ສະຖາບັນ, ກອງວິຊາການ; ຜູ້ອໍານວຍການ, ຮອງຜູ້ອໍານວຍການ ລັດວິສາຫະກິດ ແລະ ຄະນະບໍລິຫານງານອົງການຈັດຕັ້ງມະຫາຊົນຂັ້ນກະຊວງ ເຂົ້າຮ່ວມ.

ກອງປະຊຸມຄັ້ງນີ້ ຈັດຂຶ້ນເພື່ອເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 6 ສະໄໝທີ XI ໃຫ້ມີຄວາມໝາຍ-ສຳຄັນມີເນື້ອໃນເລິກເຊິ່ງ, ຜັນຂະຫຍາຍມາເປັນແຜນການລະອຽດ ເພື່ອເຮັດໃຫ້ຄະນະພັກທຸກຂັ້ນ, ສະມາຊິກພັກ, ພະນັກງານລັດຖະກອນເຂົ້າໃຈ, ເຊື່ອມຊຶມ ແລະ ກຳແໜ້ນເນື້ອໃນມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 6 ສະໄໝທີ XI ຢ່າງກວ້າງຂວາງ ທົ່ວເຖິງ ເລິກເຊິ່ງ ເປັນເຈົ້າການຍົກສູງຄວາມຮັບຜິດຊອບການເມືອງ ໃນການປະຕິບັດມະຕິດັ່ງກ່າວໃຫ້ປະກົດຜົນເປັນຈິງ ແລະ ທັນກຳນົດເວລາທີ່ສູນກາງກຳນົດໄວ້. ເພື່ອເປັນບ່ອນອີງໃຫ້ບັນດາຮາກຖານພັກ ໃນການຜັນຂະຫຍາຍມະຕິດັ່ງກ່າວໃຫ້ເປັນແຜນງານ, ໂຄງການລະອຽດຕິດພັນກັບວຽກງານຕົວຈິງຂອງຂະແໜງ ຍທຂ, ຍູ້ແຮງການຈັດຕັ້ງຜັນຂະຫຍາຍເຂົ້າສູ່ຊີວິດຕົວຈິງໃຫ້ເປັນຂະບວນການຟົດຟື້ນ ກວ້າງຂວາງ ແລະ ແຂງແຮງຂອງມະຫາຊົນ ສ້າງການຫັນປ່ຽນທາງດ້ານຄວາມຮັບຮູ້, ທັດສະນະ, ແນວຄິດ ແລະ ການກະທຳແນໃສ່ສົ່ງເສີມດ້ານດີ, ແກ້ໄຂຂໍ້ບົກຜ່ອງ, ຂໍ້ຄົງຄ້າງ ແລະ ສິ່ງທ້າທາຍຕ່າງໆໃນໄລຍະຜ່ານມາ, ສ້າງຄວາມເຊື່ອໝັ້ນຂອງພະນັກງານຕໍ່ການນຳພາຂອງພັກ ແລະ ການບໍລິຫານຄຸ້ມຄອງຂອງລັດ.

ໃນພິທີ ສະຫາຍ ງາມປະສົງ ເມືອງມະນີ ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງ ຍທຂ ໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະ​ຈຳປີ 2022 ຈໍານວນ 10 ໜ່ວຍພັກ ພ້ອມທັງໃຫ້ກຽດໂອ້ລົມຕໍ່ກອງຊຸມໃນຄັ້ງນີ້: ບັນດາໜ່ວຍພັກທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນໃນຄັ້ງນີ້ ຕ້ອງ​ຕັ້ງໜ້າ​ເອົາ​ໃຈ​ໃສ່​ນໍາພາ​-ຊີ້​ນໍາສະມາຊິກ​ພັກ, ພະນັກງານ-ລັດຖ​ະກອນພາຍ​ໃນຮາກ​ຖານ​ພັກ​ຂອງ​ຕົນ​ ດໍາ​ເນີນ​ການ​ກໍ່ສ້າງ​ໜ່ວຍ​ພັກ​​ປອດໃສ, ເຂັ້ມແຂງ, ໜັກແໜ້ນຕາມ 5 ເນື້ອ​ໃນ, ຕີລາຄາຄຸນນະພາບ ແລະ ແບ່ງປະເພດສະມາຊິກພັກ ແລະ ໜ່ວຍພັກໃຫ້ໄດ້ຕາມມາດຕະຖານເງື່ອນໄຂທີ່ໄດ້​ຮັບຮອງ​ເປັນ​ໜ່ວຍ​ພັກປອດໃສ, ເຂັ້ມແຂງ, ໜັກແໜ້ນ ປະ​ຈໍາປີ 2022. ດັ່ງນັ້ນ, ຈົ່ງພ້ອມກັນສືບຕໍ່ຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງຮາກຖານພັກພວກສະຫາຍ ໃຫ້ສຳເລັດຢ່າງຕໍ່ເນື່ອງ ຕາມຄາດໝາຍທີ່ວາງໄວ້ກໍຄືການຜັນຂະຫຍາຍມະຕິກອງປະຊຸມໃຫຍ່ຂອງບັນດາສະຫາຍໃຫ້ຖືກຈັດຕັ້ງປະຕິບັດຢ່າງມີຜົນສຳເລັດ. ສິ່ງສຳຄັນຕ້ອງ​ສືບຕໍ່​ເຊື່ອມ​ຊຶມ​ແນວທາງ​ແຜນ​ນະ​ໂຍບາຍ, ມະຕິ, ​ຄໍາ​ສັ່ງ, ກົດ​ລະບຽບ​ຂອງ​ພັກ ແລະ ກົດໝາຍຂອງລັດໃຫ້ເລິກເຊິ່ງ, ເຂົ້າໃຈ ​ແລະ ປະຕິບັດຢ່າງເຂັ້ມງວດ​. ຕ້ອງ​ກໍາ​ແໜ້ນ​ສະພາບ​ຄວາມ​ເປັນ​ຈິງ​ຂອງສະມາຊິກພັກຢູ່​ຮາກ​ຖານ​ຕົນ​, ​ເພື່ອ​ສຶກສາອົບຮົມນຳພາແນວຄິດໃຫ້ເຂົ້າໃຈຕໍ່ແນວທາງນະໂຍບາຍຂອງພັກ, ມະຕິຄຳສັ່ງ, ຄໍາແນະນໍາຂອງພັກມາຈັດຕັ້ງຜັນຂະຫຍາຍເຂົ້າໃນຮາກຖານພັກຕົນ, ສ້າງ​ສະມາຊິກ​ພັກໃຫ້​ມີ​ຄຸນ​ທາດ​ການ​ເມືອງ​ໜັກ​ແໜ້ນ, ມີ​ຄຸນສົມບັດ​ສິນ​ທໍາ​ປະຕິວັດ, ມີ​ຄວາມ​ຈົ່ງ​ຮັກ​ພັກດີ​ຕໍ່​ອຸດົມ​ການ​ຂອງ​ພັກ-ຂອງຊາດຢ່າງແທ້ຈິງ.