ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກກະຊວງໂຍທທິການ ແລະ ຂົນສົ່ງ, ສະໄໝທີ V

ກອງປະຊຸມ​ຄົບຄະນະກາງສະໄໝ ຂອງຄະນະບໍລິຫານງານພັກກະຊວງໂຍທາທິການ ແລະ ຂົນສົ່ງ ສະ​ໄໝທີ V  ຈະໃຊ້ເວລາຢູ່ 3 ວັນ, ຊຶ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນ ເພາະວ່າ: ໜຶ່ງ ຈະໄດ້ດໍາເນີນການທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຄະນະບໍລິຫານງານພັກກະຊວງ, ສອງ ຈະໄດ້ພ້ອມກັນດໍາເນີນກອງປະຊຸມເປີດກວ້າງຄົ້ນຄວ້າປະກອບຄໍາເຫັນຕໍ່ການສະຫຼຸບຕີລາຄາການນໍາພາຂອງຄະນະບໍລິຫານງານພັກກະຊວງໃນໄລຍະກາງສະໄໝ, ສາມ ຈະໄດ້ດໍາເນີນຊິວິດການເມືອງພາຍໃນຄະນະບໍລິຫານງານພັກກະຊວງ.

ການທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຄະນະບໍລິຫານງານພັກກະ ຊວງ ຄັ້ງນີ້ ຈະໄດ້ພ້ອມກັນຮັບຟັງການເຜີຍແຜ່ເຊື່ອມຊຶມ ຄໍາສັ່ງຂອງຄະນະເລຂາທິການສູນກາງພັກ ​ເລກທີ 268/ຄລສພ, ລົງ​ວັນ​ທີ 20 ມັງກອນ 2023, ຄໍາແນະນໍາ ຂອງຄະນະຈັດຕັ້ງສູນກາງພັກ ເລກທີ 25/ຄຈສພ, ລົງວັນທີ ​24 ມັງກອນ 2023, ມະຕິຂອງກົມການເມືອງສູນກາງພັກ ສະບັບເລກທີ 030/ກມສພ, ລົງວັນທີ ​03 ມັງກອນ 2018 ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ, ມາດຕະຖານສະມາຊິກພັກ, ຂໍ້ຫ້າມສໍາລັບສະມາຊິກພັກ, ສິດ ແລະ ໜ້າທີ່ຂອງຄະນະບໍລິຫານງານພັກກະຊວງ ທີ່ໄດ້ກໍານົດໄວ້ໃນກົດລະບຽບພັກ ສະໄໝທີ XI ແລະ ເປັນການເປີດກວ້າງປະຊາທິປະໄຕພາຍໃນພັກ ແລະ ໃຫ້ບັນດາສະຫາຍ ທີ່ເຂົ້າຮ່ວມການທາບທາມ ພ້ອມກັນເບິ່ງ ແລະ ມີຄວາມເຫັນຕີລາຄາບັນຫາຕ່າງໆ ທີ່ພົວພັນເຖິງການນໍາພາລວມ ແລະ ບຸກຄົນໃນຄະນະບໍລິຫານງານພັກກະຊວງ ສະໄໝທີ V. ການປະກອບຄໍາເຫັນ ທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກ ຄົນຄະນະບໍລິຫານງານພັກກະຊວງ ເປັນເນື້ອໃນສໍາຄັນໃຫ້ແກ່ການດໍາເນີນຊີວິດການເມືອງສໍາຫຼວດກາງສະໄໝພາຍໃນຄະນະບໍລິຫານງານພັກກະຊວງ ໃຫ້ມີເນື້ອໃນກວ້າງຂວາງເລິກເຊິ່ງ ເພື່ອປັບປຸງຄຸນທາດການເມືອງ, ຄຸນສົມບັດສິນທໍາປະຕິວັດ, ແບບແຜນການດໍາລົງຊີວິດ, ຄວາມຮັບຜິດຊອບໜ້າທີ່ການເມືອງທີ່ໄດ້ຮັບມອບໝາຍ, ແບບແຜນນໍາພາ ແລະ ວິທີເຮັດວຽກ ຂອງແຕ່ລະສະຫາຍ ໃນຄະນະບໍລິຫານງານພັກກະຊວງ ໃຫ້ຖືກຕ້ອງ, ໜັກແໜ້ນ, ຮັບປະກັນຄວາມເປັນແບບຢ່າງ ຂອງຄະນະບໍລິຫານງານພັກກະຊວງ ສ້າງຄວາມເຊື່ອໝັ້ນ, ຄວາມເຫຼື້ອມໃສສັດທາ ຂອງສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ຕໍ່ການນໍາພາລວມຂອງຄະນະບໍລິຫານງານພັກກະຊວງ.

        ກອງປະຊຸມ ຈະໄດ້ພ້ອມກັນຄົ້ນຄວ້າ ປະກອບຄໍາເຫັນໃສ່ຮ່າງບົດສະຫຼຸບ ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກກະຊວງໂຍທາທິການ ແລະ ຂົນສົ່ງ ຄັ້ງທີ V ກາງສະໄໝ ແລະ ກໍານົດທິດທາງແຜນການໃນຕໍ່ໜ້າ; ຮ່າງບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາ 5 ປີ (2021-2025) ຂອງກະຊວງໂຍທາທິການ ແລະ ຂົນສົ່ງ ໄລຍະຜ່ານມາ ແລະ ກໍານົດທິດທາງແຜນການໃນຕໍ່ໜ້າ.

             ກອງປະຊຸມໄດ້ດໍາເນີນຊີວິດການເມືອງພາຍໃນຄະນະບໍລິຫານງານພັກກະຊວງ, ສໍາຫຼວດການນໍາພາລວມ ຂອງຄະນະບໍລິຫານງານພັກກະຊວງໃນໄລຍະກາງສະໄໝ ແລະ ສໍາຫຼວດບຸກຄົນຄະນະພັກກະຊວງ. ພ້ອມກັນນີ້ ກອງປະຊຸມຈະໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາ ຂອງສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດ  ແຫ່ງ ສປປ ລາວ ເພື່ອເປັນເຂັມຊີ້ທິດເຍືອງທາງ ໃຫ້ຄະນະບໍລິຫານງານພັກກະຊວງໂຍທາທິການ ແລະ ຂົນສົ່ງ ພວກເຮົາ ໃນການນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ໃຫ້ປະກົດຜົນເປັນຈິງ.