ກະຊວງໂຍທາທິການ
ແລະ ຂົນສົ່ງ ໄດ້ຈັດກອງປະຊຸມເຜີຍແຜ່ເຊື່ອມຊຶມການຈັດຕັ້ງຜັນຂະຫຍາຍວຽກງານການເມືອງ-ແນວຄິດທົ່ວປະເທດຄັ້ງທີ
V ຂຶ້ນໃນວັນທີ 2 ມີນາ 2023 ນີ້,
ທີ່ກະຊວງ ຍທຂ ໂດຍການເປັນປະທານ ແລະ ເຜີຍແຜ່ເອກະສານຂອງທ່ານ ງາມປະສົງ ເມືອງມະນີ
ເລຂາຄະນະບໍລິຫານງານພັກ, ລັດຖະມົນຕີກະຊວງ ຍທຂ, ມີຄະນະປະຈໍາພັກກະຊວງ, ຮອງລັດຖະມົນຕີ,
ຄະນະພັກຮາກຖານ, ຄະນະໜ່ວຍພັກ, ຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ເຜີຍແຜ່ເອກະສານບົດສະຫຼຸບຕີລາຄາ ສະພາບການຈັດຕັ້ງປະຕິບັດວຽກງານການ ເມືອງ-ແນວຄິດ ໄລຍະແຕ່ປີ 2003-2022 ແລະ
ທິດທາງຮອດປີ 2025, ເຜີຍແຜ່ຄໍາເຫັນຊີ້ນໍາຂອງສະຫາຍ ທອງລຸນ
ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ;
ເຜີຍແຜ່ມະຕິກອງປະຊຸມວຽກງານການເມືອງ-ແນວຄິດທົ່ວປະເທດຄັ້ງທີ V
ແລະ ມະຕິກົມການເມືອງສູນກາງພັກ ສະບັບເລກທີ 206/ກມສພ, ລົງວັນທີ 7 ທັນວາ 2020
ວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່ ແລະ ເອກະສານຕັ້ງໜ້າຜັນຂະຫຍາຍມະຕິດັ່ງກ່າວນີ້ເຂົ້າໃນຊີວິດສັງຄົມຕົວຈິງ.
ກອງປະຊຸມຄັ້ງນີ້ຈັດຂຶ້ນ
ເພື່ອແນໃສ່ໃຫ້ຄະນະພັກກະຊວງ-ອົງການອ້ອມຂ້າງສູນກາງ, ຕະຫຼອດຮອດສະມາຊິກພັກ, ພະນັກງານ-ລັດຖະກອນໄດ້ຮັບຮູ້,
ເຂົ້າໃຈ, ເຊື່ອມຊຶມ ແລະ ກໍາແໜ້ນເນື້ອໃນກອງປະຊຸມວຽກງານການເມືອງແນວຄິດ ທົ່ວປະເທດຄັ້ງທີ
V ຢ່າງເລິກເຊິ່ງ ເພື່ອຍົກສູງນໍ້າໃຈຮັກຊາດ, ຈິດໃຈເອກະລາດ,
ເປັນເຈົ້າຕົນເອງ, ເສີມສ້າງຄວາມສາມັກຄີເປັນປຶກແຜ່ນ ເພີ່ງຕົນເອງ ແລະ
ສ້າງຄວາມເຂັ້ມແຂງດ້ວຍຕົນເອງ; ຍົກສູງຄວາມຮັບຜິດຊອບຂອງຄະນະພັກແຕ່ລະຂັ້ນ ຕໍ່ວຽກງານການເມືອງ-ແນວຄິດໃນໄລຍະໃໝ່
ເພື່ອສ້າງກໍາລັງແຮງແຫ່ງຄວາມເປັນເອກະພາບດ້ານການເມືອງ-ແນວຄິດ ແລະ
ກໍາລັງແຮງໃນການຈັດຕັ້ງປະຕິບັດພາລະກິດປະຕິວັດຂອງພັກ ໃນການປົກປັກຮັກສາ ແລະ
ສ້າງສາພັດທະນາປະເທດຊາດ.
