ກົມກວດກາ(ຍທຂ)ມອບແຜ່ນຮູບພາບກ່ຽວກັບ ການຕ້ານການສໍ້ລາດບັງຫຼວງໃຫ້ໂຮງຮຽນອະນຸບານ ມະນີພອນ ບ້ານໂພນປາເປົ້າ, ເມືອງສີສັດຕະນາກ, ນະຄອນຫຼວງວຽງຈັນ

       ພິທີດັ່ງກ່າວທ່ານ ບຸນຊົມ ບຸດຕະວົງ  ຮອງຫົວໜ້າກົມກວດກາ ໄດ້ກ່າວຈຸດປະສົງໃນການມອບແຜ່ນຮູບພາບ ກ່ຽວກັບການຕ້ານການສໍ້ລາດບັງຫຼວງ, ປືມກົດໝາຍ ວ່າດ້ວຍຕ້ານການສໍ້ລາດບັງຫຼວງ ແລະ ປື້ມກົດໝາຍ ວ່າດ້ວຍ ກວດກາລັດ ໃຫ້ໂຮງຮຽນ ອະນຸບານ ມະນີພອນ ເພື່ອໂຄສະນາເຖິງຜົນຮ້າຍຂອງການສໍ້ລາດບັງຫຼວງ ແລະ ປູກຈິດສຳນຶກ​ ໃຫ້ອະນຸຊົນ ສ້າງສະຕິເປັນເຈົ້າຕາມທິດທາງ 3 ບໍ່ ຄື: ບໍ່ກ້າ,​ ບໍ່ສາມາດ​ ແລະ ບໍ່ຢາກສໍ້ລາດບັງຫຼວງ. ເຊິ່ງລາຍການທີ່ນໍາໄປມອບມີຄື: ແຜ່ນຮູບພາບ 4 ຫົວຂໍ້ ກ່ຽວກັບການຕ້ານການສໍ້ລາດບັງຫຼວງ ຈໍານວນ 1 ຊຸດ; ປື້ມກົດໝາຍ ວ່າດ້ວຍ ການຕ້ານການສໍ້ລາດບັງຫຼວງ ຈໍານວນ 5 ຫົວ ແລະ ປື້ມກົດໝາຍ ກວດກາລັດ ຈໍານວນ 5 ຫົວ.

ໂດຍໃຫ້ການຕ້ອນຮັບຂອງທ່ານ ນ. ຄຳໝູນ ສີລາປານີ  ຜູ້ອໍານວຍການໂຮງຮຽນ, ຄະນະຄູ ແລະ ນ້ອງນັກຮຽນ ພ້ອມນີ້ຍັງໄດ້ສະແດງຄວາມຂອບໃຈຕໍ່ຄະນະຈາກ ກົມກວດກາ, ກະຊວງໂຍທາທິການ ແລະ ຂົນສົ່ງ ທີ່ໄດ້ນໍາເອົາແຜ່ນຮູບພາບ ແລະ ປື້ມກົດໝາຍ ມາມອບໃຫ້ໂຮງຮຽນ ອະນຸບານມະນີພອນ ແລະ ທາງໂຮງຮຽນຈະເຜີຍແຜ່ເພື່ອປູກຈິດສຳນຶກ ໃຫ້ນ້ອງນັກຮຽນໄດ້ຮຽນຮູ້, ເຂົ້າໃຈເຖິງຜົນຮ້າຍຄວາມອັນຕະລາຍຂອງການສໍ້ລາດບັງຫຼວງ.