ກອງປະຊຸມສາມັນຄົບຄະນະບໍລິຫານງານຊາວໜຸ່ມກະຊວງ ຍທຂ ຄັ້ງທີ 02, ສະໄໝທີ XI

 ກອງປະຊຸມສາມັນຄົບຄະນະບໍລິຫານງານຊາວໜຸ່ມກະຊວງ ຍທຂ ຄັ້ງທີ 02, ສະໄໝທີ XI, ໄດ້ຈັດຂື້ນໃນຕອນເຊົ້າວັນທີ 04 ສິງຫາ 2021 ທີຫ້ອງປະຊຸມກະຊວງ ໂຍທາທິການ ແລະ ຂົນສົ່ງ, ໂດຍການເປັນປະທ່ານຂອງ ສະຫາຍ ບຸນມາ ຫຼວງບັນດິດ ກຳມະການພັກກະຊວງ, ກຳມະການສູນກາງຊາວ ໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມກະຊວງ ຍທຂ; ມີບັນດາສະຫາຍຮອງເລຂາ, ຄະນະປະຈຳ, ກຳມະການຄະນະບໍລິຫານງານຊາວໜຸ່ມກະຊວງ ຍທຂ ເຂົ້າຮ່ວມ. 

   ກອງປະຊຸມສາມັນຄົບຄະນະບໍລິຫານງານຊາວໜຸ່ມ​ກະຊວງໂຍທາທິການ ແລະ ຂົນສົ່ງ ຄັ້ງ​ທີ 02, ສະ​ໄໝທີ XI ຂຶ້ນຢ່າງເປັນທາງການ, ໃນທ່າມກາງທີ່ຊາວໜຸ່ມທົ່ວປະເທດ ພວມ​ອອກ​ແຮງ​ແຂ່ງຂັນ​ຈັດ​ຕັ້ງ​ຜັນ​ຂະຫຍາຍມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ເວົ້າລວມ; ເວົ້າສະເພາະ ແມ່ນສະມາຊິກຊາວໜຸ່ມທົ່ວກະຊວງໂຍທາທິການ ແລະຂົນສົ່ງ ໄດ້ພ້ອມກັນຈັດຕັ້ງຜັນຂະຫຍາຍມະຕິ​ກອງ​ປະຊຸມ​ໃຫຍ່ຜູ້ແທນອົງຄະນະພັກກະຊວງ ໂຍທາທິການ ແລະ ຂົນສົ່ງ ຄັ້ງທີ V,  ມະຕິ​ກອງ​ປະຊຸມ​ໃຫຍ່ຜູ້ແທນຊາວໜຸ່ມກະຊວງ ໂຍທາທິການ ແລະ ຂົນສົ່ງ ຄັ້ງທີ XI ໂດຍໄດ້ຮັບຜົນສຳເລັດເປັນກ້າວໆມາ.

    ກອງປະຊຸມຄັ້ງນີ້ ຈະໃຊ້ເວລາຢູ່ ເຄິ່ງວັນ, ຊຶ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນ ເພາະວ່າ ກອງປະຊຸມຈະພ້ອມກັນຄົ້ນຄວ້າ ແລະ ປຶກສາຫາລືວຽກງານຕ່າງໆ ດັ່ງນີ້: ສະຫຼຸບຕີລາຄາການເຄື່ອນໄຫວນໍາພາຂອງຄະນະບໍລິຫານງານຊາວໜຸ່ມ​ກະຊວງ 6 ເດືອນຜ່ານມາ ແລະ ກໍານົດແຜນການ 6 ເດືອນຕໍ່ໜ້າ; ພິຈາລະນາຮັບຮອງແຜນດໍາເນີນງານຂອງຄະນະບໍລິຫານງານຊາວໜຸ່ມ​ກະຊວງໂຍທາທິການ ແລະ ຂົນສົ່ງ ສະ​ໄໝທີ XI; ພິຈາລະນາຮັບຮອງ ຂໍ້ຕົກລົງ ວ່າດ້ວຍການແບ່ງຄວາມຮັບຜິດຊອບຂອງຄະນະບໍລິຫານງານຊາວໜຸ່ມ​ກະຊວງໂຍທາທິການ ແລະ ຂົນສົ່ງ ສະ​ໄໝທີ XI ແລະ ພິຈາລະນາຮັບຮອງ ຂໍ້ຕົກລົງ ວ່າດ້ວຍແບບແຜນວິທີເຮັດວຽກຂອງຄະນະບໍລິຫານງານຊາວໜຸ່ມ​ກະຊວງໂຍທາທິການ ແລະ ຂົນສົ່ງ ສະ​ໄໝທີ XI.

    ກອງປະຊຸມໃນຄັ້ງນີ້ ມີເນື້ອໃນສຳຄັນຫຼາຍດ້ານ ດັ່ງທີ່ໄດ້ກ່າວມານັ້ນ ແລະ ດ້ວຍເວລາທີ່ຈຳກັດ, ຈຶ່ງຮຽກຮ້ອງມາຍັງບັນດາສະຫາຍທັງໝົດທີ່ເຂົ້າຮ່ວມກອງປະຊຸມໃນຄັ້ງນີ້, ຈົ່ງເຊີດຊູ ແລະ ຍົກສູງຄວາມຮັບຜິດຊອບຂອງຕົນ ພ້ອມກັນສຸມສະຕິປັນຍາ ເຂົ້າໃນການຄົ້ນຄວ້າ ແລະປະກອບຄໍາຄິດຄໍາເຫັນຢ່າງກົງໄປກົງມາ ມີເຫດມີຜົນ ຕໍ່ບັນດາເອກະສານຕ່າງໆ ໃຫ້ຖືກກັບສະພາບຕົວຈິງທີ່ໄດ້ເຄື່ອນໄຫວນຳພາຈັດຕັ້ງປະຕິບັດ ໃນໄລຍະຜ່ານມາ, ເພື່ອຊອກໃຫ້ເຫັນດ້ານຕັ້ງໜ້າທີ່ພົ້ນເດັ່ນ ແລະ ຂໍ້ຄົງຄ້າງ ທີ່ຈະຕ້ອງໄດ້ຄົ້ນຄວ້າປັບປຸງແກ້ໄຂໃນຕໍ່ໜ້າ.