ຂ່າວພາຍໃນກະຊວງ
ພິທີເຊັນສັນຍາໂຄງການກໍ່ສ້າງທາງແຕ່ ປາກລາຍ-ພູດູ່ ແຂວງໄຊຍາບູລີ
ໃນວັນທີ່ 30 ພະຈິກ 2012 ຢູ່ທີ່ໂຮງແຮມລາວພລາຊາ ນະຄອນຫຼວງວຽງຈັນ ໄດ້ຈັດພິທີເຊັນສັນຍາໂຄງການກໍ່ສ້າງທາງແຕ່ປາກລາຍ-ພູດູ່ ແຂວງໄຊຍະບູລີ ໂດຍເປັນກຽດເຂົ້າຮ່ວມຂອງທ່ານ ບຸນຈັນ ສິນທະວົງ ລັດຖະທົນຕິຊ່ວຍວ່າ ການກະຊວງ ຍທຂ, ທ່ານ ພົງສະຫວັນ ສິດທະວົງ ຄະນະພັກແຂວງ ຮອງເຈົ້າແຂວງໄຊຍະບູລີ, ທ່ານ ນາງ ທິບພະວັນ ສຸພາມິດກິດຈາ, ເອກອັກຄະລັດຖະທູດ ໄທປະຈຳລາວ, ທ່ານ ອັກຄະສີລິ ບູລະນະສີລິ, ຜູ້ອຳນວຍການອົງ ການນິດາ ແຫ່ງລາຊະອານາຈັກໄທ. ເສັ້ນທາງປາກລາຍ-ພູດູ່, ແຂວງໄຊຍະບູລີ, ມີຈຸດເລີ້ມຕົ້ນ ຢູ່ສາມແຍກ ບ້ານແກ້ງສ້າວ (ທາງເບີ 4) ເມືອງປາກລາຍ, ແຂວງໄຊຍະບູລີ ໄປເຖີງພູດູ່ (ຊາຍແດນໄທ), ມີຄວາມຍາວ 27,99 ກິໂລແມັດ ແລະທາງຮ່ອມເຂົ້າ ບ້ານບວມເລົາ ແລະບ້ານຜາແກ້ວ ມີຄວາມຍາວ 4,21 ກິໂລແມັດ ລວມທັງໝົດ: 32,20 ກິໂລແມັດ ເສັ້ນທາງແຕ່ປາກລາຍ-ພູດູ່ ປັດຈຸບັນເປັນທາງດີນແດງ ຊີ່ງຈະໄດ້ຮັບການຍົກລະດັບເປັນທາງປູຢາງອັດສຟຼານ (AC) ເປັນເສັ້ນທາງທີ່ມີຄວາມສຳຄັນໃນການພັດທະນາເສດຖະກິດ-ສັງຄົມ ພື້ນຖານໂຄງລ່າງຂອງໄຊຍະບູລີ ແລະເປັນເສັ້ນທາງເຊື່ອມຕໍ່ອອກໄປສູ່ປະເທດໄທ ຊື່ງໃນຕໍ່ໜ້າຢູ່ຊາຍແດນລາວ-ໄທ ຈະໄດ້ຍົກລະດັບຈາກດ່ານທ້ອງຖິ່ນເປັນດ່ານສາກົນ ຈະເຮັດໃຫ້ມີການຄ້າຂາຍແລກປ່ຽນສີ້ນຄ້າຫຼາຍຂື້ນກວ່າເກົ່າ. ຜ່ານມາເຖີງປະຈຸບັນເສັ້ນທາງດັ່ງກ່າວ ຍາມລະດູແລ້ງເປັນຝຸ່ນປົກຫຸ້ມທົ່ວເສັ້ນທາງ, ບ້ານ, ເຮືອນ ແລະການປູກຝັງຂອງປະຊາຊົນ ຍາມລະດູຝົນນ້ຳອັ່ງຖ້ວມ ໜ້າທາງເປັນຂຸ່ມ, ເປັນບໍ່ ເຮັດໃຫ້ມີຄວາມຫຍຸ້ງຍາກໃນການສັນຈອນໄປມາ ຂອງປະຊາຊົນ ຢູ່ດຂກດັ່ງກ່າວຫຼາຍ. ງົບປະມານໃນການກໍ່ສ້າງ ແມ່ນລັດຖະບານແຫ່ງ ສປປ ລາວ ໄດ້ຂໍທຶນສະໜັບສະໜູນ ຈາກສຳນັກງານຄວາມຮ່ວມມືພັດທະນາເສດຖະກິດ ກັບປະເທດເພື່ອນບ້ານ ຫຼືເອີ້ນວ່າ: ອົງການນິດາ ແຫ່ງລາຊະອານາ ຈັກໄທ ໃນການປັບປຸງຍົກລະດັບເສັ້ນທາງໃຫ້ໄດ້ມາດຕະຖານ. ໃນວັນທີ 02 ມີຖຸນາ 2012 ລັດຖະບານລາວ ໄດ້ເຊັນສັນຍາຮັບເອົາການຊ່ວຍເຫຼືອດ້ານການເງິນ ກັບອົງການນິດາ ໃນມູນຄ່າທັງໝົດ: 718 ລ້ານບາດໄທ, ແບ່ງເປັນທຶນຊາວຍເຫຼືອລ້າ 20% ເທົ່າກັບ 143,6 ລ້ານບາດ ແລະທຶນກູ້ຢືມດອກເບັ້ຍຕ່ຳ 80% ເທົ່າກັບ 574,4 ລ້ານບາດ ຊື່ງການຊ່ວຍດັ່ງກ່າວ ເປັນການປະຕິບັດຍຸດທະສາດຂອງການຮ່ວມມືໃນການພັດທະນາ ລະຫວ່າງປະເທດເພື່ອນບ້ານ ໂດຍສະເພາະ ສປປ ລາວ ແລະລາຊະອານາຈັກໄທ ໃນການປັບປຸງ ແລະຂະຫຍາຍຕາໜ່າງ ເສັ້ນທາງຫຼວງ ຂອງ ສປປ ລາວ ໃຫ້ເຊື່ອມຕໍ່ກັບປະເທດໄທ ແລະອະນຸພາກພື້ນ ແລະອີກດ້ານໜຶ່ງກໍເພື່ອແນ່ໃສ່ຟື້ນຟູ ແລະພັດທະ ນາເສດຖະກິດຂອງ ສປປ ລາວ ໃຫ້ບັນລຸເປົ້າໝາຍຍຸດທະສາດ ຂອງ ລັດຖະບານ ເພື່ອຫຼຸດພົ້ນຈາກຄວາມດ້ອຍພັດທະນາ ພາຍໃນປີ 2020. ໂຄງການດັ່ງກ່າວ ພາຍຫລັງການກໍ່ສ້າງສຳເລັດແລ້ວ ຈະນຳເອົາຜົນປະໂຫຍດອັນມະຫາສານ ມາໃຫເພໍ່ແມ່ປະຊາຊົນ ແລະເປັນສີ່ງອຳນວຍຄວາມສະດວກຢ່າງສູງ ເພື່ອໃຫ້ເມືອງປາກລາຍ ແຂວງໄຊຍະບູລີມີຄວາມຈະເລີນສີວິໄລເຊັ່ນ: 1) ມີເສັ້ນທາງທີ່ມີມາດຕະຖານສູງ ຮັບປະກັນຄົມມະນາຄົມ ຂົນສົ່ງທຽວໄດ້ຕະຫລອດປີ ທັງມີຄວາມປອດໄພ ແລະມີຄວາມສວຍງາມ; 2) ປະຊາຊົນທີ່ນຳໃຊ້ເສັ້ນທາງມີຄວາມສະດວກ ໃນການຂົນສົ່ງຜົນຜະລິດຂອງຕົນ ເຂົ້າສູ່ທ້ອງຕະຫລາດໃນຕົວເມືອງ ແລະສົ່ງອອກຊາຍແດນລະຫວ່າງປະເທດ; 3) ເມື່ອມີເສັ້ນທາງດີໄປມາສະດວກ ຈະເປັນການດຶງດູດເອົານັກທຸລະກິດ ເຂົ້າມາລົງທຶນໃນຂົງເຂດເມືອງປາກລາຍຫຼາຍຂື້ນ ຊື່ງຈະມີໂຮງຈັກໂຮງງານເກີດຂື້ນ ແລະປະຊາຊົນຈະມີວຽກຮັດງານທຳ ແລະຈະມີລາຍຮັບໃນການພັດທະນາເສດຖະກິດຄອບຄົວຂອງຕົນ. ຜົນປະໂຫຍດຈາການດຳເນີນໂຄງການກໍ່ສ້າງທາງດັ່ງກ່າວ ບໍ່ຳງແຕ່ເຮັດໃຫເປະຊາຊົນ ທີ່ອາໄສຢູ່ຕາມຊົນນະບົດຫ່າງໄກສອກຫຼີກ ມີຄວາມສະດວກສະບາຍ ໃນດ້ານຄົມມະນາຄົມຂົນສົ່ງ ແລະຈໍລະຈອນສີນຄ້າດທົ່ານັ້ນ, ແຕ່ຍັງເປັນການສົ່ງເສີມການພັດທະນາຮອບດ້ານ ເພື່ອບັນລຸແຜນຍຸດທະສາດຂອງຊາດ ໃນການລົບລ້າງ ຄວາມທຸກຍາກ ຂອງປະຊາຊົນບັນດາເຜົ່າ ໃນທົ່ວປະເທດອີກດ້ວຍ.