ຂ່າວພາຍໃນກະຊວງ
ກອງປະຊຸມການເຮັດທົດລອງວຽກງານອອກບັດ-ມອບບັດ ໃຫ້ສະມາຊິກພັກສົມບູນ
ໃນວັນທີ 15 ພະຈິກ 2012 ຢູ່ທີ່ຫ້ອງປະຊຸມເບີ 1 ໄດ້ຈັດໃຫ້ມີກອງປະຊຸມການເຮັດທົດລອງວຽກງານອອກບັດ- ມອບບັດ ໃຫ້ສະມາຊິກພັກສົມບູນ ຂອງພັກປະຊາຊົນປະຕິວັດລາວ ຂອງອົງຄະນະພັກກະຊວງ ໂຍທາທິການ ແລະຂົນສົ່ງ, ໂດຍການເປັນປະທານຂອງທ່ານ ລັດຕະນະມະນີ ຄູນນີວົງ ຄະນະພັກກະຊວງ, ລັດຖະມົນຕີຊ່ວຍວ່າການ, ຜູ້ຊີ້ນຳວຽກງານຕິດຕາມ, ຊຸກຍູ້ ແລະປະເມີນຜົນການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ແລະວຽກງານອອກບັດ-ມອບບັດໃຫ້ສະໃຊິກພັກສົມບູນ ພ້ອມດ້ວຍບັນດາສະຫາຍເລຂາ ແລະຮອງເລຂາ ຄະນະພັກຮາດຖານ, ໜ່ວຍພັກຮາກຖານລະ 1 ສະຫາຍ ຂອງບັນດາກົມ, ຫ້ອງການ, ອົງການ, ສະຖາບັນ, ສູນຝຶກ ແລະລັດວິສາຫະກິດທີ່ຂື້ນກັບ ອົງຄະນະພັກກະຊວງ ຍທຂ ເຂົ້າຮ່ວມທັງໝັດ 53 ສະຫາຍ. ໃນການເຮັດທົດລອງອອກບັດ-ມອບບັດໃນຄັ້ງນີ້ ໂດຍແມ່ນ ຄະນະພັກຮາກຖານ ລັດວິສາຫະກິດ ວິສາວະກຳ ຄົມມະນາຄັມເປັນຈຸດເຮັດທົດລອງ. ໃນນີ້ ທ່ານ ບຸນກອງ ໜູຟອງສະໝຸດ ທີ່ປຶກສາລັດຖະມົນຕີ, ຫົວໜ້າຄະນະຮັບຜິດຊອບວຽກງານອອກບັດ-ມອບບັດໃຫ້ສະມາຊິກພັກສົມບູນ ໄດ້ສະເໜີມະຕິຕົກລົງຂອງກົມການເມືອງສູນກາງພັກ ສະບັບເລກທີ 33/ກມສພ, ລົງວັນທີ 29/07/2010 ວ່າດ້ວຍການອອກບັດ-ມອບບັດ ໃຫ້ສະມາຊິກພັກສົມບູນຂອງພັກປະຊາຊົນປະຕິວັດລາວ ແລະບົດແນະນຳຂອງຄະນະຈັກຕັ້ງສູນກາງພັກ ສະບັບເລກທີ 074/ຄຈສພ,ລົງວັນທີ 27/01/2011 ກ່ຽວກັບການຈັດຕັ້ງຜັນຂະຫຍາຍມະຕິຕົກລົງ ຂອງກົມການເມືອງສູນກາງພັກ ເລກທີ 33/ກມສພ, ວ່າດ້ວຍການອອກບັດ-ມອບບັດໃຫ້ສະມາຊິກພັກສົມບູນຂອງພັກປະຊາຊົນປະຕິວັດລາວ. ແລະ ທ່ານ ລັນ ແສງອາພອນ ຫົວໜ້າກົມຈັດຕັ້ງ-ພະນັກງານ ກະຊວງ ຍທຂ ກໍໄດ້ສະເໜີແນະນຳຜ່ານໃບສຳຫລວດ ແລະຕິລາຄາແບ່ງປະເພດ ແລະແບ່ງໜ່ວຍຜ່ານໃບສຳຫລວດສະມາຊິກສົມ ບູນ ແລະຕີລາຄາແບ່ງປະເພດ ເຊີ່ງມີແບບຟອມຢູ່ຂັ້ນໜ່ວຍ 10 ຫົວຂໍ້ຄື: 1) ຮ່າງເຈາະຈີ້ມຂຽນບົດສຳຫລວດຂອງສະມາຊິກພັກ, 2) ຮ່າງບົດສຳຫລວດສະມາຊິກພັກ, 3) ຕາຕະລາງໃຫ້ຄະແນນ ເພື່ອຈັດປະເພດສະມາຊິກພັກ ຕາມ 5 ມາດຖານ, 4) ຕາຕະລາງສັງລວມຄະແນນຂອງສະມາຊິກພັກສົມບູນ ໃນ 5 ມາດຖານ, 5) ຕາຕະລາງຕີລາຄາສະມາຊິກພັກ ຕາມ 5 ມາດຖານ (ກ.3), 6) ບັນຊີສັງລວມການຕີລາຄາ (ກ.4), 7) ຮ່າງບົດສະຫຼູບ, 8) ຮ່າງໃບສະເໜີ, 9) ບັນຊີລາຍຊື່ສະມາຊິກພັກສົມບູນທີ່ໄດ້ຕາມມາດຖານຈະໄດ້ຮັບບັດ (ຂໍ້ມູນສົ່ງໃຫ້ຄະນະພັກກະຊວງ), 10) ບັນຊີລາຍຊື່ສະມາຊິກພັກສົມບູນທີ່ໄດ້ມາດຖານຈະໄດ້ຮັບບັດ (ເອົາໄວ້ຕິດຕາມຢູ່ໜ່ວຍພັກຮາກຖານ).