ຂ່າວພາຍໃນກະຊວງ
ກອງປະຊຸມຄັ້ງທີ່ II ຂອງຄະນະກຳມະການປະສານງານຮ່ວມສຳລັບ ໂຄງການສ້າງຂີດຄວາມສາມາດວຽກງານບູລະນະຮັກສາທາງຫຼວງໃນ ສ ປ ປ ລາວ
ກອງປະຊຸມຄັ້ງທີ່ II ຂອງຄະນະກຳມະການປະສານງານຮ່ວມສຳລັບ
ໂຄງການສ້າງຂີດຄວາມສາມາດວຽກງານບູລະນະຮັກສາທາງຫຼວງໃນ ສ ປ ປ ລາວ
ໃນວັນທີ 13 ພະຈິກ 2012 ຢູ່ທີ່ນະຄອນຫຼວງວຽງຈັນ ໄດ້ມີການເປີດກອງປະຊຸມຄັ້ງທີ່ II ຂອງຄະນະກຳມະການປະສານງານຮ່ວມສຳລັບໂຄງການສ້າງຂີດຄວາມສາມາດວຽກງານບູລະນະຮັກສາທາງຫຼວງໃນ ສ.ປ.ປ.ລາວ. ໂດຍມີຂະແໜງການທີ່ກ່ຽວຂ້ອງຈາກພາກສ່ວນກົມຂົວທາງ, ພະແນກ ຍທຂ ແຂວງ ວຽງຈັນ ແລະ ສະຫວັນນະເຂດ ແລະ ຊ່ຽວຊານທີ່ປຶກສາ JICA ປະຈຳໂຄງການ ເຂົ້າຮ່ວມຢ່າງເປັນທາງການ.
ກອງປະຊຸມໃນຄັ້ງນິ້ ໃຫ້ກຽດເປັນປະທານຮ່ວມໂດຍມີທ່ານ Mr. Masato TOGAWA, ຫົວໜ້າຫ້ອງການອົງການ JICA ປະຈຳປະເທດລາວ ແລະ ທ່ານ ງາມປະສົງ ເມືອງມະນີ, ຮອງຫົວໜ້າກົມຂົວທາງ. ຈຸດປະສົງຂອງກອງປະຊຸມ ແມ່ນເພື່ອຕິດຕາມຄວາມຄືບໜ້າ ແລະ ຜົນສຳເລັດບາງດ້ານຂອງໂຄງການ ແລະ ອີກດ້ານໜຶ່ງກໍ່ເພື່ອປຶກສາຫາລື ແລະ ແລກປ່ຽນຄວາມຄິດຄວາມເຫັນບັນຫາຕ່າງໆ ທີ່ກ່ຽວຂ້ອງກັບໂຄງການ.
ຄວາມຄືບໜ້າໂດຍລວມໃນການຈັດຕັ້ງປະຕິບັດໂຄງການຢູ່ໃນໄລຍະໜຶ່ງປີທຳອິດລວມມີ: (1) ປັບປຸງ ແລະ ຝຶກອົບຮົມກ່ຽວກັບລະບົບຄຸ້ມຄອງບູລະນະຮັກເສັ້ນທາງຫຼວງແຂວງ (PRoMMS), ເພື່ອນຳໃຊ້ເປັນລະບົບແລະວິທີການໃນການກຳນົດຄວາມຕ້ອງການຂອງວຽກງານບູລະນະຮັກສາເສັ້ນທາງຢູ່ໃນລະດັບຂັ້ນແຂວງ, (2) ສະເໜີກ່ຽວກັບລະບົບການນຳໃຊ້ພາຫະນະສຳຫຼວດເສັ້ນທາງ (VIMS), ຊຶ່ງເປັນອຸປະກອນເຄື່ອງມື ແລະ software ເພື່ອນຳໃຊ້ເຂົ້າໃນການສຳຫຼວດຄວາມເປັນຄື້ນຂອງໜ້າທາງ ເພື່ອຕອບສະໜອງຂໍ້ມູນໃຫ້ແກ່ລະບົບຄຸ້ມຄອງເສັ້ນທາງ (RMS) ແລະ (3) ຈັດຕັ້ງປະຕິບັດສ້ອມແປງເສັ້ນທາງຫຼວງແຫ່ງຊາດເລກ9 ໄດ້ 3.1 ກິໂລແມັດ, ຊຶ່ງແມ່ນໜ້າວຽກໜຶ່ງທີ່ນອນຢູ່ໃນໂຄງການສ້ອມແປງທາງຕົວແບບໄລຍະທີໜຶ່ງ ແລະ ໄດ້ຈັດຕັ້ງປະຕິບັດສຳເລັດໃນເດືອນ 6, 2012. ການລາຍງານຄວາມຄືບໜ້າເພີ່ມເຕີມອື່ນໆ ລວມທັງການປັບປຸງຄູ່ມືດ້ານເຕັກນິກສ້ອມແປງທາງ/ຂົວ ແລະ ການຝຶກອົບຮົມທາງດ້ານທິດສະດີ ແລະ ພາກປະຕິບັດຕົວຈິງສຳລັບວຽກສ້ອມແປງທາງແບບເປັນປະຈຳ ແລະ ສ້ອມແປງທາງຕາມກຳນົດ.
ພາຍຫຼັງທີ່ທີມງານຂອງໂຄງການສ້າງຂີດຄວາມສາມາດວຽກງານບູລະນະຮັກສາທາງຫຼວງ (CaRoL) ໄດ້ສະ ເໜີຄວາມຄືບໜ້າຂອງໂຄງການໂດຍລວມແລ້ວ, ການປຶກສາຫາລືແມ່ນໄດ້ເນັນໃສ່ວຽກງານການຝຶກອົບຮົມທາງດ້ານທິດສະດີ ແລະ ພາກປະຕິບັດຕົວຈິງ (OJT)ທີ່ມີແຜນຈະຈັດຕັ້ງປະຕິບັດໃນເດືອນ ທັນວາ 2012 ນີ້. ແນວຄວາມຄິດຂອງ (OJT) ແມ່ນເພື່ອໃຫ້ພະແນກ ຍທຂ ແຂວງ ດຳເນີນການຈັດລຽງອັນດັບກ່ຽວກັບວຽກສ້ອມແປງທາງແບບເປັນປະຈຳ, ເປັນຕົ້ນແມ່ນ: ການກວດກາ, ການຕີລາຄາ ແລະ ວຽກສ້ອມແປງຂະໜາດນ້ອຍ, ການຮັບຮອງຄຸນນະພາບຂອງວຽກ, ພາຍໃຕ້ການຊຸກຍູ້ຊ່ວຍເຫຼືອທາງດ້ານເຕັກນິກຈາກຊ່ຽວຊານທີ່ປຶກສາ JICA, ໂດຍການນຳໃຊ້ປື້ມຄູ່ມືເຕັກນິກສ້ອມແປງທາງ/ຂົວ ທີຊ່ຽນຊານທີ່ປຶກສາໄດ້ມີການປັບປຸງ. ສຳລັບວັດສະດຸທີ່ຕ້ອງການເພື່ອສ້ອມແປງທາງເລກ9 ທີ່ນອນຢູ່ໃນໜ້າວຽກ (OJT) ແມ່ນຈະໄດ້ຮັບການຊ່ວຍເຫຼືອຈາກຝ່າຍຍີ່ປຸ່ນ. ນອກຈາກນິ້ທາງໂຄງການຍັງໄດ້ຈັດຊື້ ແລະ ຕອບສະໜອງອຸປະກອນທີ່ຈຳເປັນຈຳນວນໜຶ່ງພາຍໃຕ້ການຊ່ວຍເຫຼືອຂອງອົງການ JICA ເພື່ອນໍາໃຊ້ເຂົ້າໃນການຝຶກທັກສະ ແລະ ຄວາມຮູ້ກ່ຽວກັບວຽກງານບູລະນະຮັກສາເສັ້ນທາງ/ຂົວ ໃຫ້ມີຄວາມສຳນານໂດຍຜ່ານໂຄງການຕົວແບບ ເພື່ອເຮັດໃຫ້ເສັ້ນທາງໄດ້ຮັບການບູລະນະຮັກສາຢ່າງ ເໝາະສົມ
1. ພາຫະນະນຳໃຊ້ເຂົ້າໃນວຽກຕິດຕາມກວດແລະສ້ອມແປງທາງທີ່ໄດ້ຈັດຊື້ໂດຍໄດ້ຮັບການຊ່ວຍເຫຼືອຈາກອົງການJICA
2. ໂຄງການສ້ອມແປງທາງຕົວແບບລວງຍາວ 3.1 ກມຊ່ວງທາງ (ກມ15+800) ຊຶ່ງເປັນພາກສ່ວນໜຶ່ງຂອງໂຄງການ CaRoL, ສຳເລັດໃນເດືອນ 6, 2012