ຂ່າວພາຍໃນກະຊວງ
ຖະແຫຼງຂ່າວກ່ຽວກັບວຽກງານການປະມູນ
ໃນວັນທີ 05 ຕຸລາ 2012 ຢູ່ທີ່ຫ້ອງປະຊຸມ ເບີ 3 ຂອງກະຊວງ ຍທຂ ໄດ້ຈັດການຖະແຫຼງຂ່າວກ່ຽວກັບການປະມູນວຽກງານຂອງຂະແໜງຂົວທາງຂື້ນ, ໂດຍການເປັນປະທານຂອງທ່ານ ດຣ. ສັນຕິສຸກ ສິມມາລາວົງ ຫົວໜ້າຫ້ອງການກະຊວງ ຍທຂ ແລະທ່ານ ປໍທອງ ໂງ່ນພະຈັນ ຮອງຫົວໜ້າກົມຂົວທາງ ທັງເປັນຜູ້ຊີ້ນຳວຽກງານ ຈັດຊື້ຈັດຈ້າງ ບໍລິສັດທີ່ປຶກສາ ແລະຜູ້ຮັບເໝົາກໍ່ສ້າງບັນດາໂຄງການຕ່າງໆ ພາຍໃນກົມຂົວທາງ. ເຊີງມີສື່ມວນຊົນເຂົ້າຮ່ວມ 5 ພາກສ່ວນຄື: ໜັງສືພີມປະຊາຊົນ, ໜັງສືພີມວຽງຈັນໃໝ່, ໜັງສືພີມປະເທດລາວ, ໜັງສືພີມວຽງຈັນທາມ ແລະໜັງສືພີມລາວພັດທະນາ. ກ່ອນອື່ນທ່ານ ດຣ. ສັນຕິສຸກ ສິມມາລາວົງ ຫົວໜ້າຫ້ອງການກະຊວງ ຍທຂ ກໍໄດ້ກ່າວເປີດການຖະແຫຼງຂ່າວກ່ຽວກັບວຽກງານໂຍທາທິການ ແລະຂົນສົ່ງ ເພື່ອເຮັດໃຫ້ປະຊາຊົນ, ສື່ມວນຊົນ ແລະສັງຄົມເຂົ້າໃຈຈະແຈ້ງ ແລະຮັບຊາບການປະມູນໂຄງການ, ການຈັດຊື້ຈັດຈ້າງ ແລະຫົວໜ່ວຍການກໍ່ສ້າງລາຄາກາງຂອງຂະແໜງຂົວທາງ ຫຼັງຈາກນັ້ນ, ທ່ານ ປໍທອງ ໂງ່ນພະຈັນ ກໍໄດ້ອະທິບາຍທາງດ້ານເຕັກນິກໃນການກໍ່ສ້າງທາງ ນັບແຕ່ເລີ່ມການປະມູນ, ຈັດຊື້ຈັດຈ້າງ ແລະຂັ້ນຕອນເອກະສານຕ່າງໆໃຫ້ສື່ມວນຊົນຟັງ, ແລ້ວສື່ມວນຊົນກໍໄດ້ມີຄຳຖາມຫຼາຍບັນຫາ ຕໍ່ການຖະແຫຼງຂ່າວໃນເທື່ອນີ້. ເປັນຕົ້ນແມ່ນເສັ້ນທາງເລກ 13 ເໜືອ ຊ່ວງເມືອງໂພນໂຮງ-ເມືອງກາສີ ທີ່ຜ່ານແຂວງວຽງຈັນ ຍາວ 202 ກມ ທີ່ເປເພ່ໜັກ ຈາກພາຍຸໄຮມາ ແລະພາຍຸນົກເຕັນ ໃນປີ 2011 ແລະຫຼາຍເສັ້ນທາງໃນ ສປປ ລາວ. ທ່ານ ປໍທອງ ໂງ່ນພະຈັນ ກໍໄດ້ເວົ້າຕື່ມອີກວ່າ ຕອນທຳອິດແມ່ນໃຫ້ແຕ່ລະ ບໍລິສັດທີ່ຖືກມອບ-ໝາຍໃຫ້ດຳເນິນການກໍສ້າງສ້ອມແປງທາງ ພໍໃຫ້ການສັນຈອນໄປ-ມາໄດ້ສາກ່ອນ ແລ້ວທ່ານກໍໄດ້ຖະແຫຼງຂ່າວວ່າໃຫ້ແຕ່ລະບໍລິສັດປູ່ຢ່າງຄືນໃໝ່ໃນຊ່ວງລະດູແລ້ງນີ້ ເພາະທ່ານເອງກໍແມ່ນໃນນາມຜູ້ຊີ້ນຳ ວຽກງານດ້ານນີ້.