ຂ່າວພາຍໃນກະຊວງ
ທ່ານ ງາມປະສົງ ເມືອງມະນີ ເປັນປະທານກອງປະຊຸມຄົ້ນຄ້ວາເນື້ອໃນຮ່າງ ກົດໝາຍວ່າດ້ວຍນໍ້າເປື້ອນ
ໃນວັນທີ 23 ທັນວາ 2025, ທີ່ຫ້ອງວ່າການປົກຄອງເມືອງ ວັງວຽງ, ແຂວງວຽງຈັນ, ທ່ານ ງາມປະສົງ ເມືອງມະນີ, ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ທັງເປັນຫົວໜ້າຄະນະຫົວໜ້າຄະນະຮັບຜິດຊອບຊີ້ນໍາລວມ ໃນການຄົ້ນຄວ້າເນື້້ອໃນຮ່າງກົດໝາຍວ່າດ້ວຍນໍ້າເປື້ອນໄດ້ໃຫ້ກຽດເປັນປະທານກອງປະຊຸມຄົ້ນຄ້ວາເນື້ອໃນໃສ່ຮ່າງກົດໝາຍວ່າດ້ວຍນໍ້າເປື້ອນ, ໂດຍມີບັນດາທ່ານ ຫົວໜ້າກົມ, ຮອງຫົວໜ້າກົມ, ຕາງໜ້າຈາກສະພາແຫ່ງຊາດ, ຫ້ອງວ່າການສໍານັກງານນາຍົກລັດຖະມົນຕີ, ກະຊວງຍຸຕິທໍາ, ກະຊວງກະສິກໍາ ແລະ ສິ່ງແວດລ້ອມ, ກະຊວງສາທາລະນະສຸກ ແລະ ບັນດາກົມກອງອ້ອມຂ້າງກະຊວງ ໂຍທາທິການ ແລະ ຂົນສົ່ງ ເຂົ້າຮ່ວມ.
ຈຸດປະສົງຫຼັກຂອງກອງປະຊຸມໃນຄັ້ງນີ້ແມ່ນເພື່ອລະດົມຄໍາຄິດເຫັນພາຍໃນຄະນະຊີ້ນໍາ ແລະ ຄະນະຮັບຜິດຊອບຄົ້ນຄ້ວາເນື້ອໃນສ້າງຮ່າງກົດໝາຍວ່າດ້ວຍນໍ້າເປື້ອນໃຫ້ຄົບຖ້ວນສົມບູນກ່ອນນໍາສະເໜີຕໍ່ຄະນະນໍາກະຊວງ ແລະ ກະກຽມເປິດກວ້າງທົ່ວປະເທດ.
ໃນວາລະເປີດກອງປະຊຸມ,
ທ່ານ ຮອງລັດຖະມົນຕີໄດ້ເນັ້ນວ່າ ຂະແໜງນໍ້າປະປາ ແລະ ສຸຂາພິບານ
ແມ່ນຂະແໜງການໜຶ່ງທີ່ສໍາຄັນ ແລະ ເປັນໜຶ່ງໃນປັດໃຈຊຸກຍູ້ການພັດທະນາ ຂະແໜງ ໂຍທາທິການ ແລະ ຂົນສົ່ງ
ເພື່ອປະກອບສ່ວນໃຫ້ແກ່ການພັດທະນາເສດຖະກິດສັງຄົມແຫ່ງຊາດ ໃຫ້ສາມາດບັນລຸຕາມເປົ້າໝາຍການພັດທະນາແບບຍືນຍົງ (Sustainable Development Goals, SDGs). ນໍ້າປະປາ
ແລະ ສຸຂາພິບານເປັນໜ້າວຽກໜຶ່ງທີ່ນອນຢູ່ໃນເປົ້າໝາຍທີ 6 (SDGs 6) ຂອງເປົ້າໝາຍການພັດທະນາແບບຍືນຍົງ ໂດຍສະເພາະແມ່ນຮັບປະກັນໃຫ້ມີນໍ້າໃຊ້, ການບໍລິຫານນໍ້າແບບຍືນຍົງ ແລະ
ສຸຂະອະນາໄມສຳລັບໝົດທຸກຄົນ. 
ຍຸດທະສາດ ແລະ ແຜນພັດທະນາຮອດປີ 2030, ປະຊາຊົນທີ່ດໍາລົງຊີວິດຢູ່ໃນເຂດຕົວເມືອງໄດ້ເຂົ້າເຖິງສຸຂາພິບານທີ່ມີການຄຸ້ມຄອງທີ່ປອດໄພ,
ທົ່ວເຖິງ, ເປັນໜ້າເພິ່ງພໍໃຈ ແລະ ສົມເຫດສົມຜົນ. ຮັບປະກັນໃຫ້ນ້ຳເປື້ອນໃນເທດສະບານແຂວງ
ແລະ ເມືອງໄດ້ຮັບການບໍາບັດທີ່ເໝາະສົນ, ວຽກງານສຸຂາພິບານໄດ້ຮັບການຄຸ້ມຄອງຢ່າງມີປະສິດທິພາບ
ແລະ ປອດໄພຕໍ່ສິ່ງແວດລ້ອມ ແລະ ສັງຄົມ.
ໃນກອງປະຊຸມ ທ່ານ ວັນສະແຫວງ ອຸດທະຈັກ, ຮອງຫົວໜ້າກົມນໍ້າປະປາ ໄດ້ລາຍງານໂຄງສ້າງ ແລະ ຮ່າງເບື້ອງຕົ້ນຂອງກົດໝາຍວ່າດ້ວຍນໍ້າເປື້ອນ, ເຊີ່ງຮ່າງສະບັບເບື້ອງຕົ້ນນີ້ປະກອບມີ 17 ພາກ, 13 ໝວດ ແລະ 112 ມາດຕາ. ຫຼັງຈາກນັ້ນ, ກອງປະຊຸມໄດ້ຮັບການປະກອບຄໍາຄິດຄໍາເຫັນຈາກບັນດາທ່ານຜູ້ເຂົ້າຮ່ວມກອງປະຊຸມ ໃສ່ຮ່າງກົດໝາຍດັ່ງກ່າວເປັນຕົ້ນແມ່ນຕາງໜ້າຈາກສະພາແຫ່ງຊາດ, ກະຊວງຍຸຕິທໍາ, ຕາງໜ້າຈາກກະຊວງ ໂຍທາທິການ ແລະ ຂົນສົ່ງ ແລະ ຊີ້ແຈງຈາກຄະນະຮັບຜິດຊອບຮ່າງກົດໝາຍສະບັບດັ່ງກ່າວ.
ກອງປະຊຸມຂອງຄະນະຊີ້ນໍາ ແລະ ຄະນະຮັບຜິດຊອບຄົ້ນຄ້ວາເນື້ອໃນສ້າງຮ່າງກົດໝາຍວ່າດ້ວຍນໍ້າເປື້ອນມີແຜນຈະດໍາເນີນເປັນເປັນເວລາ 2 ວັນ, ວັນທີ່ 23-24 ທັນວາ 2025.