ກະຊວງໂຍທາທິການ ແລະ ຂົນສົ່ງ ເຊື່ອມຊືມເອກະສານສໍາຄັນຂອງພັກ

ກອງປະຊຸມວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງກະຊວງໂຍທາທິການ ແລະ ຂົນສົ່ງ ປະຈໍາປີ 2024 ໄດ້ຈັດຂຶ້ນໃນວັນທີ 13 ມິຖຸນາ 2025 ທີ່ກະຊວງດັ່ງກ່າວ. ໃຫ້ກຽດເຂົ້າຮ່ວມຂອງສະຫາຍ ງາມປະສົງ ເມືອງມະນີ ເລຂາຄະນະບໍລິຫານງານພັກ, ລັດຖະມົນຕີ ກະຊວງໂຍທາທິການ ແລະ ຂົນສົ່ງ, ມີຄະນະປະຈໍາພັກ, ກໍາມະການພັກກະຊວງ, ບັນດາຫົວໜ້າກົມ, ຮອງກົມ, ຜູ້ອໍານວຍການລັດວິສາຫະກິດ, ພ້ອມດ້ວຍພາກສ່ວນທີ່ກ່ຽວ ຂ້ອງເຂົ້າຮ່ວມ.

ສະຫາຍ ງາມປະສົງ ເມືອງມະນີ ໄດ້ກ່າວວ່າ: ກອງປະຊຸມວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຂອງກະຊວງ ຍທຂ ປະຈຳ ປີ 2024 ແລະ ໃນປີ 2025 ກໍ່ເປັນປີມ້ວນທ້າຍແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຕິດພັນກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ແລະ ການກະກຽມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງພັກ ແລະ ກະກຽມຄວາມພ້ອມດ້ານຕ່າງໆ ໃຫ້ແກ່ກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງ ຍທຂ ແລະ ກອງປະຊຸມໃຫຍ່ຂອງບັນດາໜ່ວຍພັກ ທີ່ຂຶ້ນກັບອົງຄະນະພັກກະຊວງ ຍທຂ ໃຫ້ເປັນຂະບວນຟົດຟື້ນ.

ກອງປະຊຸມຄັ້ງນີ້, ກໍໄດ້ພ້ອມກັນຈັດຕັ້ງເຊື່ອມຊຶມເອກະສານທີ່ສໍາຄັນຂອງຂັ້ນເທິງ, ທົບທວນຄືນກ່ຽວກັບການ ເຄື່ອນໄຫວວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງໃນໄລຍະໜຶ່ງປີຜ່ານມາ ເພື່ອຊອກໃຫ້ເຫັນຈຸດດີດ້ານຕັ້ງໜ້າ ກໍຄືຜົນສໍາເລັດທີ່ຈະຕ້ອງໄດ້ຮັກສາ ແລະ ເສີມຂະຫຍາຍໃຫ້ດີຂຶ້ນເລື້ອຍໆ ແລະ ຈຸດອ່ອນຂໍ້ຄົງຄ້າງທີ່ຈະຕ້ອງສຸມໃສ່ແກ້ໄຂໃຫ້ທັນກັບສະພາບ, ບົນພື້ນຖານການຄົ້ນຄວ້າແນວທາງນະໂຍບາຍຂອງພັກກ່ຽວກັບວຽກງານຈັດຕັ້ງທີ່ກອງປະຊຸມ ໃຫຍ່ຄັ້ງທີ XI ຂອງພັກໄດ້ກໍານົດອອກ ເພື່ອກ້າວໄປສູ່ການກໍານົດທິດທາງ, ວິທີການ ເຄື່ອນໄຫວຢ່າງເປັນປົກກະຕິ ເຮັດໃຫ້ການເຄື່ອນໄຫວວຽກງານມີປະສິດທິພາບ ແລະ ໄດ້ຮັບປະສິດທິຜົນສູງ ທັງສອດຄ່ອງກັບສະພາບຄວາມເປັນຈິງໃນປັດຈຸບັນ ແນໃສ່ປັບປຸງຍົກສູງຄຸນນະພາບ ວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງກະຊວງໂຍທາທິການ ແລະ ຂົນສົ່ງ ໃນໄລຍະໃໝ່ໃຫ້ດີຂຶ້ນ ສາມາດຮັບປະກັນຕໍ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ພ້ອມກັນນັ້ນກໍເປັນພື້ນຖານໃຫ້ການວາງທິດທາງຈຸດສຸມຂອງວຽກງານຈັດຕັ້ງ, ກໍ່ສ້າງພັກ-ພະນັກງານໃນໂຍທາທິການ ແລະ ຂົນສົ່ງສະເພາະໜ້າ ແລະ ຍາວນານ.

ທ່ານຍັງກ່າວຕື່ມວ່າ: ພ້ອມນີ້ກໍເປັນການສະຫລຸບຕີລາຄາ ຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໂຍທາທິການ ແລະ ຂົນສົ່ງໃນຄັ້ງນີ້ ແມ່ນຈະໄດ້ພ້ອມກັນຮັບຟັງ ແລະ ເຊື່ອມຊຶມບັນດາເອກະສານທີ່ສໍາຄັນຈໍານວນໜຶ່ງ ເຊັ່ນ: ປາຖະກາຖາມູນເຊື້ອ 70 ປີ ວຽກງານຈັດຕັ້ງຂອງພັກປະຊາຊົນປະຕິວັດລາວ, ເຜີຍແຜ່ບົດສະຫລຸບວຽກງານກໍ່ສ້າງພັກ-ພະນັງານ ແລະ ປັບປຸງກົງຈັກການຈັດຕັ້ງທົ່ວປະເທດປະຈໍາປີ 2024, ຜ່ານບົດສະຫລຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງກະຊວງ ຍທຂ ປະຈໍາປີ 2024 ແລະ ທິດທາງໜ້າທີ່ປີ 2025, ເຜີຍແຜ່ຄໍາແນະນໍາຂອງຄະນະຈັດຕັ້ງສູນກາງພັກສະບັບເລກທີ 28/ຄຈສພ, ລົງວັນທີ 14 ກຸມພາ 2025 ກ່ຽວກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ.

            ໃນໂອກາດດຽວກັນ, ກໍ່ໄດ້ມີພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2024 ຈໍານວນ 11 ໜ໋ວຍພັກຮາກຖານ ແລະ ມອບຫລຽນກາລະນຶກ 70 ປີ ວັນສ້າງຕັ້ງຄະນະຈັດຕັ້ງສູນກາງພັກໃຫ້ພະນັກງານບຳນານ 11 ທ່ານ ຍິງ 2 ທ່ານ ແລະ ພະນັກງານປະຈຳການ 19 ທ່ານ ຍິງ 10 ທ່ານ ອີກດ້ວຍ.