ຂ່າວພາຍໃນກະຊວງ
ພິທີເຊັນສັນຍາ ໂຄງການປັບປຸງ ແລະ ສ້ອມແປງທາງ 13 ໃຕ້ ແຕ່ນະຄອນຫຼວງວຽງຈັນ ຫາ ແຂວງ ບໍລິຄໍາໄຊ (ກມ 21-ກມ 71)
ພິທີເຊັນສັນຍາ ໂຄງການປັບປຸງ ແລະ ສ້ອມແປງທາງ 13 ໃຕ້ ແຕ່ນະຄອນຫຼວງວຽງຈັນ ຫາ ແຂວງ ບໍລິຄໍາໄຊ (ກມ 21-ກມ 71)
ລະຫວ່າງ
ກົມຂົວທາງ, ກະຊວງ ໂຍທາທິການ ແລະ ຂົນສົ່ງ
ແລະ
ບໍລິສັດຮ່ວມທຶນ ລັດວິສາຫະກິດກໍ່ສ້າງທາງເລກ 8 ແລະ ບໍລິສັດ ສົມໄຊ ຈະເລີນການກໍ່ສ້າງ ແລະ ສ້ອມແປງຂົວທາງ ຈຳກັດຜູ້ດຽວ.
ໂດຍມີ ທ່ານ ງາມປະສົງ ເມືອງມະນີ, ລັດຖະມົນຕີ ກະຊວງໂຍທາທິການ
ແລະ ຂົນສົ່ງ,
ທ່ານ ຫົວໜ້າຫ້ອງການ ກະຊວງ ໂຍທາທິການ ແລະ ຂົນສົ່ງ, ທ່ານຫົວໜ້າກົມ ຮອງກົມ,
ຮອງຫົວໜ້າພະແນກ ຍທຂ ແຂວງບໍລິຄໍາໄຊ ແລະ ນະຄອນຫຼວງວຽງຈັນ,
ບັນດາທ່ານປະທານບໍລິສັດຜູ້ຮັບເໝົາ ແລະ ແຂກທີ່ມີກຽດ ກໍ່ໃຫກຽດເຂົ້າຮ່ວມ.
ທ່ານ ສຸກສາຄອນ ຊູຕັນນຸວົງ ຫົວໜ້າໂຄງການປັບປຸງ ແລະ ສ້ອມແປງທາງ 13 ໃຕ້ ນະຄອນຫຼວງວຽງຈັນ ຫາ ແຂວງ ບໍລິຄໍາໄຊ (ກມ 21-ກມ 71) ໄດ້ລາຍງານຄວາມເປັນມາໂດຍສັງເຂບຂອງໂຄງການມີດັ່ງນີ້:
1.ໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ 13 ໃຕ້ ຊ່ວງນະຄອນຫຼວງວຽງຈັນ ຫາ ແຂວງບໍລິຄໍາໄຊ(ກມ21-ກມ71)ໄດ້ຮັບການສ້າງຕັ້ງຂື້ນຕາມຂໍ້ຕົກລົງລັດຖະມົນຕີກະຊວງໂຍທາທິການ ແລະ ຂົນສົ່ງ, ສະບັບເລກທີ 10204/ຍທຂ ລົງວັນທີ 08 ພຶດສະພາ 2025.
ສ່ວນການກະກຽມໂຄງການໄດ້ເລີ້ມມາແຕ່ ວັນທີ 1 ເມສາ 2022 ນໍາໃຊ້ເງິນກູ້ຢຶມ AIIB 13 ໃຕ້ ຊ່ວງ 3 ສໍາລັບວຽກ ທີປຶກສາສໍາຫຼວດອອກແບບ ແລະ ທີ່ປຶກສາ ກວດສອບຄວາມປອດໄພທາງຫຼວງ ຈໍານວນ 505,035ໂດລາ(ຫ້າແສນ ຫ້າພັນ ສາມສິບຫ້າໂດລະສະຫະລັດ) ແລະ ນໍາໃຊ້ເງິນຊ່ວຍເຫຼືອກອງທຶນຮ່ວມມືຫຼາຍຝ່າຍ MCDF ສໍາລັບທີປຶກສາ ສຶກສາສະພາບແວດລ້ອມ-ສັງຄົມ ແລະ ຍົກຍ້າຍສີ່ງກີດຂວາງ ແລະ ຊ່ຽວຊານສັນຍາ Output Performance Base Road Contract(OPBRC) ຈໍານວນ 700.000 ໂດລາສະຫະລັດ (ເຈັດແສນໂດລາສະຫະລັດ).
2.ຈຸດປະສົງຂອງໂຄງການ ເພຶ່ອກໍ່ສ້າງ ຟື້ນຟູ ແລະ ບູລະນະຮັກສາ ຕອນທາງ 13 ໃຕ້ ກມ 21-ກມ71 ຄວາມຍາວ 50 ກມ ໃຫ້ເຊື່ອມຈອດກັນກັບ ຕອນທາງ 13 ໃຕ້ ແຕ່ ກມ 71 ເມືອງທ່າພະບາດ ແຂວງບໍລິຄໍາໄຊ ຫາ ກມ 346 ແຂວງຄໍາມ່ວນ ທີໄດ້ກໍ່ສ້າງສໍາເລັດແລ້ວ, ຊຶ່ງຕອນທາງ 13 ໃຕ້ ກມ 21 ຫາ ກມ 71 ແມ່ນສວ່ນໜຶ່ງ ຂອງເສັ້ນທາງຫລວງແຫ່ງຊາດ 13 ແລະ ເປັນທາງຫລວງອາຊຽນ (AH11) ເປັນເສັ້ນທາງເຊື່ອມຈອດ ເຊື່ອມໂຍງ ເຮັດໜ້າທີໃນການບໍລິການຂົນສົ່ງໂດຍສານ, ສິນຄ້າ ແລະ ການເຂົ້າເຖີງການບໍລິການທ່ອງທຽວ ທັງເປັນເສັ້ນທາງເຊື່ອມຈອດກັບ ນະຄອນຫຼວງວຽງຈັນ ແຫ່ງ ສປປ ລາວ ແລະ ບັນດາແຂວງພາກໃຕ້, ເຊື່ອມຈອດກັບ ເສັ້ນທາງຫລວງແຫ່ງຊາດເລກ 13 ເໜືອ ຫຼື ທາງຫຼວງອາຊຽນ (AH12) ແລະ ກັບບັນດາແຂວງພາກເໜືອ ຂອງ ສປປລາວ ແລະ ບັນດາປະເທດອອ້ມຂ້າງ.
3. ແຫຼ່ງທຶນໂຄງການປະກອບມີ ທຶນກູ້ຢຶມຈາກ ທະນາຄານ ພັດທະນາພື້ນຖານໂຄງລ່າງອາຊີ (AIIB) 40 ລ້ານໂດລາສະຫະລັດ, ເທົ່າກັບປະມານ 280,500,000 ຢວນ (ສອງຮ້ອຍແປດສິບລ້ານ ຫ້າແສນ ຢວນ) , ກອງທຶນ ອາບູດາບີ ເພຶ່ອການພັດທະນາ (ADFD) 20 ລ້ານໂດລາສະຫະລັດ, ວັນທີ 2 ມີຖຸນາ 2025 ໄດ້ເຊັນສັນຍາເງິນກູ້ຢືມ ແລະ ທຶນລັດຖະບານ ສປປ ລາວ ສົມທົບ, ງົບປະມານກອງທຶນທາງ ປະມານ 12 ລ້ານໂດລາສະຫະລັດ.
4. ຂອບເຂດໂຄງການ ເລີ່ມຕົ້ນຈາກບ້ານໂຄກສີວິໄລ, ກິໂລແມັດ 21+300 ເມືອງໄຊທານີ, ນະຄອນຫຼວງວຽງຈັນ ແລະ ໄປສິ້ນສຸດທີ່ບ້ານໄຊສະຫວ່າງ ກມ 71+300 ເມືອງທ່າພະບາດ ແຂວງ ບໍລິຄໍາໄຊ, ໄລຍະທາງທັງໝົດ 50 ກິໂລແມັດ, ເສັ້ນທາງໄປຜ່ານ ນະຄອນຫຼວງວຽງຈັນ ແລະ ແຂວງບໍລິຄໍາໄຊ , ຜ່ານສາມເມືອງ ຄື: ເມືອງໄຊທານີ, ເມືອງປາກງື່ມ(ປະມານ 29 ກມ) ແລະ ເມືອງທ່າພະບາດ ລ່ວມ 21 ບ້ານ (19 ບ້ານໃນນະຄອນຫຼວງວຽງຈັນ ແລະ 2 ບ້ານ ແຂວງບໍລິຄໍາໄຊ).
5. ການອອກແບບເບື້ອງຕົ້ນ (Conceptual Design)
1.1 ທາງ 4 ຊອງຈາລະຈອນ ເລີ້ມຈາກ ກມ 21+300 ຫາ ກມ 41+500, ມີຄວາມຍາວ 20.2 ກມ, ຄວາມກວ້າງ 23 ແມັດ, : (ຊ່ອງຈາລະຈອນ ໜຶ່ງກວ້າງ 3,50 ແມັດ, ບ່າທ່າງ 2 ເບື້ອງ ກວ້າງເບື້ອງລະ 1,70 ແມັດ, ທາງຍ່າງ 2 ເບື້ອງ, ເບື້ອງລະ 1,50 ແມັດ, ມີດອນກາງທາງພ້ອມໄຟເຍື່ອງທາງ ແລະ ຮ່ອງລະບາຍນໍ້າ ຮູບໂຕ U ມີຝາປິດ ສອງຂ້າງທາງ).
1.2 ທາງ 2 ຊອງຈາລະຈອນ ຜ່ານເຂດຊຸມຊົນ ລວງຍາວ 16.3 ກມ, ຄວາມກວ້າງ 15 ແມັດ,: (ຊ່ອງຈາລະຈອນໜຶ່ງກວ້າງ 3,50 ແມັດ, ບ່າທາງ 2 ເບື້ອງ ກວ້າງເບື້ອງລະ 2,50 ແມັດ, ທາງຍ່າງ 2 ເບື້ອງ, ເບື້ອງລະ 1,50 ແມັດ, ມີໄຟເຍື່ອງທາງສອງຂ້າງທາງ ແລະ ຮ່ອງລະບາຍນໍ້າ ຮູບໂຕ U ມີຝາປິດ ສອງຂ້າງທາງ).
1.3 ທາງ 2 ຊ່ອງຈາລະຈອນ ບໍ່ຜ່ານຊຸມຊົນ ຄວາມຍາວ 13.5 ກມ ຄວາມກວ້າງ 12 ແມັດ ປະກອບມີ (2 ຊ່ອງຈາລະຈອນ ກວ້າງ ເບື້ອງລະ 3,50 ແມັດ, ບ່າທາງ ກວ້າງເບື້ອງລະ 2,50 ແມັດ)
1.4 ກໍ່ສ້າງເປັນທາງມາດຕະຖານທາງອາຊຽນ, ຮັບນໍ້າໜັກ 11 ໂຕນ ຕໍ່ ເພົາ, ໜ້າທາງປູຢາງຂົ້ວ ຫຼື (ອັດສະຟານ ຄອນກີດ)
6. ການດຳເນີນປະມູນຈັດຊື້-ຈັດຈ້າງຂອງໂຄງການດັ່ງກ່າວນີ້ ໄດ້ນໍາໃຊ້ຮູບແບບການປະມູນເປີດກວ້າງສາກົນ (ICB) ໂດຍນໍາໃຊ້ວິທີການໜຶ່ງຂັ້ນຕອນ, ສອງຊອງ (One Stage Two Enveloped). ຜ່ານການປະມຸນ ບໍລິສັດຮ່ວມທຶນ ລັດວິສາຫະກິດກໍ່ສ້າງທາງເລກ 8 ແລະ ບໍລິສັດສົມໄຊ ຈະເລີນການກໍ່ສ້າງ ແລະ ສ້ອມແປງຂົວທາງ ຈຳກັດຜູ້ດຽວ ເປັນຜູ້ມີເງື່ອນໄຂຄົບຖ້ວນ ຊະນະການປະມູນໃນມູນຄ່າສັນຍາ 45,569,900.00 ໂດລາສະຫະລັດ (ສີ່ສີບຫ້າລ້ານ ຫ້າແສນຫົກສີບເກົ້າພັນ ເກົ້າຮ້ອຍ ໂດລາສະຫະລັດ) ຕາມຂໍ້ຕົກລົງອະນຸມັດໃຫ້ເຊັນສັນຍາ ສະບັບເລກທີ 13111/ຍທຂ, ລົງວັນທີ 10 ມີຖຸນາ 2025 ໃນນັ້ນປະກອບມີ:
§ ວຽກກໍ່ສ້າງ ແລະ ບຸລະນະຮັກສາ 3ປີ 38,712,002.90 ໂດລາສະຫະລັດ (ສາມສິບແປດລ້ານ ເຈັດແສນສີບສອງພັນ ສອງໂດລາສະຫະລັດ ແລະ ເກົ້າສິບເຊັນ)
§ ວຽກສຸກເສີນ 595,697.10 ໂດລາສະຫະລັດ (ຫ້າແສນ ເກົ້າສິບຫ້າພັນ ຫົກຮ້ອຍ ເກົ້າສິບເຈັດ ໂດລາສະຫະລັດ ແລະ ສີບເຊັນ)
§ ວຽກບູລະນະຮັກສາ 7ປີ (O & M) 6,262,200.00 ໂດລາສະຫະລັດ (ຫົກລ້ານ ສອງແສນຫົກສິບສອງພັນ ສອງຮ້ອຍ ໂດລາສະຫະລັດ)
ພາຍຫລັງສໍາເລັດວຽກກໍ່ສ້າງ 3 ປີ ບໍລິສັດຈະໄດ້ເລີ້ມຕົ້ນສືບຕໍ່ປະຕິບັດ ວຽກບູລະນະຮັກສາ 7 ປີ, ໄລຍະສັນຍາລວມ ແມ່ນ10 ປີ.
ຍ້ອນຄວາມເອົາໃຈໃສ່ ແລະ ເປັນຫ່ວງເປັນໃຍ ສະພາບເສັ້ນທາງ ລັດຖະບານລາວເຮົາໄດ້ປະສານແຫ່ງທືນໃຫ້ ບໍລິສັດຮ່ວມທຶນ ລັດວິສາຫະກິດກໍ່ສ້າງທາງເລກ 8 ແລະ ບໍລິສັດ ສົມໄຊ ຈະເລີນການກໍ່ສ້າງ ແລະ ສ້ອມແປງຂົວທາງຈຳກັດຜູ້ດຽວ ໄດ້ເລີ້ມປະຕິບັດ ວຽກສ້ອມແປງທາງ ແຕ່ ວັນທີ 22 ເມສາ 2025 ເປັນຕົ້ນມາ.
