ພິທີ ວາງສີລາລຶກ ໂຄງການ ກໍ່ສ້າງຂົວໃໝ່ ແທນຂົວເກົ່າ 6 ແຫ່ງ ຕາມທາງຫຼວງແຫ່ງຊາດເລກ 8 ທີ່ເປັນທາງຫຼວງອາຊຽນ (AH15).

ໃນວັນທີ 19 ທັນວາ 2024, ຢູ່ທີ່ ໂຮງແຮມ Double Tree ນະຄອນຫຼວງວຽງຈັນ ໄດ້ມີພິທີ ວາງສີລາລຶກ ໂຄງການ ກໍ່ສ້າງຂົວໃໝ່ ແທນຂົວເກົ່າ 6 ແຫ່ງ ຕາມທາງຫຼວງແຫ່ງຊາດເລກ 8 ທີ່ເປັນທາງຫຼວງອາຊຽນ (AH15). ໃນພິທີ ໃຫ້ກຽດເຂົ້າຮ່ວມໂດຍທ່ານ ງາມປະສົງ ເມືອງມະນີ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ທ່ານ JUNG YUNG SOO ເອກອັກຄະລັດຖະທູນ ສາທາລະນະລັດ ເກົາຫຼີ ປະຈໍາ ສປປ ລາວ, ພ້ອມດ້ວຍແຂກຝ່າຍ ສປປ ລາວ ແລະ ສ.ເກົາຫຼີ ເຂົ້າຮ່ວມ.

ທາງຫຼວງແຫ່ງຊາດເລກ 8 ຜ່ານແຂວງບໍລິຄໍາໄຊ ແລະ ສ່ວນໜຶ່ງຜ່ານແຂວງຄໍາມ່ວນ; ເປັນເສັ້ນທາງສາກົນທີ່ສໍາຄັນ ສໍາລັບ ສປປ ລາວ, ຣາຊະອານາຈັກໄທ ແລະ ສສ ຫວຽດນາມ. ເສັ້ນທາງດັ່ງກ່າວ ໄດ້ຮັບການກໍ່ສ້າງໃນຊຸມປີ 1980; ປັດຈຸບັນ ຂົວຫຼາຍແຫ່ງມີສະພາບເກົ່າ ແລະ ຊຸມໂຊມ, ແລວທາງບໍ່ໄດ້ມາດຕະຖານ. ປະລິມານການສັນຈອນ ຕາມເສັ້ນທາງດັ່ງກ່າວ ນັບມື້ນັບເພີ່ມຂຶ້ນ. ອີງຕາມຜົນການສຶກສາພົບວ່າ ໃນຕອນທາງທີ່ມີປະລິມານການສັນຈອນໜາ
ແໜ້ນທີ່ສຸດ ຕາມທາງເລກ 8, ປະລິມານການສັນຈອນຈະເພີ່ມຂຶ້ນຈາກ 5,205 ຄັນ/ວັນ ໃນປີ 2024 ເປັນ 7,858 ຄັນ/ວັນ ໃນປີ 2043. ໝາຍຄວາມວ່າ ໃນໄລຍະເວລາ 19 ປີ ປະລິມານການສັນຈອນຈະເພີ່ມຂຶ້ນ 50,9%. ສະນັ້ນ, ຈຶ່ງມີຄວາມຈໍາເປັນ ທີ່ຈະຕ້ອງໄດ້ປັບປຸງ ຍົກລະດັບຂົວ ແລະ ທາງ ໃຫ້ໄດ້ມາດຕະຖານ. ດັ່ງນັ້ນ, ເມື່ອເຫັນເຖິງຄວາມຈໍາເປັນດັ່ງກ່າວ, ລັດຖະບານ ສ.ເກົາຫຼີ ໂດຍຜ່ານອົງການ KOICA ຈຶ່ງເຫັນດີໃຫ້ການສະໜັບສະໜູນ ຊ່ວຍເຫຼືອລ້າ ໃນມູນຄ່າ 13,000,000  ໂດລາສະຫະລັດ ເພື່ອຈັດຕັ້ງປະຕິບັດໂຄງການ ກໍ່ສ້າງຂົວໃໝ່ ແທນຂົວເກົ່າ 6 ແຫ່ງ ຕາມທາງຫຼວງແຫ່ງຊາດເລກ 8 ທີ່ເປັນທາງຫຼວງອາຊຽນ (AH15). ຊຶ່ງໄດ້ມີການເຊັນບົດບັນທຶກຄວາມເຂົ້າໃຈ ລະຫວ່າງ ກະຊວງ ຍທຂ ແລະ ອົງການ KOICA ໃນວັນທີ 21 ຕຸລາ 2021; ໄລຍະເວລາຈັດຕັ້ງປະຕິບັດໂຄງການ 5 ປີ ແຕ່ປີ 2021-2026. ນອກຈາກນີ້, ລັດຖະບານ ສປປ ລາວ ຍັງໄດ້ສົມທົບທຶນ ຈໍານວນ 12,680,720,000 ກີບ ປະກອບສ່ວນ ສົມທົບອາກອນ, ຊົດເຊີຍຜົນກະທົບ ແລະ ຄຸ້ມຄອງໂຄງການ.

  ອົງປະກອບທັງໝົດຂອງໂຄງການ ມີ 7 ອົງປະກອບດັ່ງນີ້: ອອກແບບ ແລະ ທີ່ປຶກສາ ການກໍ່ສ້າງ; ‚ກໍ່ສ້າງຂົວ 6 ແຫ່ງ (ລວມທັງປັບປຸງຈຸດໂຄ້ງອັນຕະລາຍ 2 ຈຸດ); ƒກໍ່ສ້າງ ແລະ ຕິດຕັ້ງ ອຸປະກອບຄວາມປອດໄພຕາມຖະໜົນ; „ປູກຈິດສໍານຶກດ້ານຄວາມປອດໄພທາງຫຼວງ; …ສະໜອງອຸປະກອນ ສໍາລັບການຈັດຕັ້ງປະຕິບັດໂຄງການ; †ຝຶກອົບຮົມ ສ້າງຂີດຄວາມສາມາດໃຫ້ພະນັກງານ ແລະ ‡ບໍລິຫານໂຄງການ.

ສະໜາມກໍ່ສ້າງຂອງໂຄງການ ແມ່ນຕັ້ງຢູ່ເມືອງຄໍາເກີດ, ແຂວງບໍລິຄໍາໄຊ. ຂົວ 6 ແຫ່ງ ທີ່ຈະກໍ່ສ້າງໃໝ່ ມີຄວາມຍາວທັງໝົດ 231 ແມັດ, ປະກອບດ້ວຍ: ຂົວນໍ້າຂຽວ 2, ຂົວຫ້ວຍຂີ້ໝ້ຽງ, ຂົວຫ້ວຍມ່ວງ, ຂົວຫ້ວຍປຸ່ງ, ຂົວນໍ້າຫງາງໃຫຍ່ ແລະ ຂົວຫ້ວຍບໍໂດດ. ຊຶ່ງຂົວທັງໝົດ ເປັນປະເພດ ຂາງເບຕົງອັດແຮງ ຄວາມກວ້າງ 12.9 ແມັດ (ເລັນລົດ 3.5 ແມັດ x 2 ເບື້ອງ+ບ່າທາງ 1.0 ແມັດ x 2 ເບື້ອງ + ທາງຄົນຍ່າງ 1.5 ແມັດ x 2 ເບື້ອງ + ຂອບຂົວ 0.45 ແມັດ x 2 ເບື້ອງ). ໂຄ້ງອັນຕະລາຍ 2 ຈຸດ ທີ່ຈະໄດ້ຮັບການປັບປຸງ ມີຄວາມຍາວທັງໝົດ 1.44 ກມ, ໜ້າທາງກວ້າງ 12 ແມັດ (ເລັນລົດ 3.5 ແມັດ x 2 ເບື້ອງ+ບ່າທາງ 2.5 ແມັດ x 2 ເບື້ອງ). ນອກຈາກນັ້ນ, ຍັງມີການກໍ່ສ້າງ ແລະ ຕິດຕັ້ງ ອຸປະກອບຄວາມປອດໄພຕາມຖະໜົນ ເປັນຕົ້ນແມ່ນ: ທາງມ້າລາຍ, ປ້າຍສັນຍານຈະລາຈອນ ແລະ ໂນນຫຼຸດຜ່ານຄວາມໄວ  ຢູ່ຕໍ່ໜ້າໂຮງຮຽນປະຖົມໂພນຕານ, ປະຖົມກວັນຈັນ, ປະຖົມຫຼັກ 10 ແລະ ປະຖົມ ທົ່ງແປ.

ໂຄງການດັ່ງກ່າວ ມີຄວາມສໍາຄັນ, ສ້າງເງື່ອນໄຂອໍານວນຄວາມສະດວກ ໃຫ້ການຄ້າ ການລົງທຶນ ທັງພາຍໃນ ແລະ ຕ່າງປະເທດ, ເຮັດໃຫ້ການໄປມາຫາສູ່ກັນຂອງປະຊາຊົນພາຍໃນ ແລະ ການເດີນທາງລະຫວ່າງ ບ້ານໄກ້ເຮືອນຄຽງ ມີີຄວາມສະດວກສະບາຍ ແລະ ປອດໄພ. ຊຶ່ງເປັນການປະກອບສ່ວນເຂົ້າໃນການສ້າງສາ ພັດທະນາປະເທດລາວ ຂອງພວກເຮົາຢາງຫຼວງຫຼາຍ.

ການຮ່ວມມື ລະຫວ່າງ ກະຊວງ ຍທຂ ແລະ ອົງການ KOICA ໄດ້ສະແດງໃຫ້ເຫັນເຖິງຄວາມສາມັກຄີ, ການພັດທະນາທີ່ຍືນຍົງ ແລະ ການກ້າວເດີນໄປທາງໜ້າ ພ້ອມໆກັນ. ການຊ່ວຍເຫຼືອດັ່ງກ່າວ ເປັນການ ຮັດແໜ້ນ ສາຍພົວພັນລະຫວ່າງ ລັດຖະບານ ກໍ່ຄືປະຊາຊົນ ຂອງ 2 ປະເທດ ສປປ ລາວ ແລະ ສ.ເກົາຫຼີ, ທີ່ມີສາຍພົວພັນອັນຍາວນານ ໃຫ້ແໜ້ນແຟ້ນຂຶ້ນຕື່ມ ອີກດ້ວຍ.

ທ່ານ​ເອກ​ອັກຄະ​ລັດຖະທູດ ​Jung Yung Soo ​ໄດ້​ສະ​ແດງ​ຄວາມ​ຄາດ​ຫວັງ​ ​ວ່າ​ຜົນສຳ​ເລັດ​ຂອງ​ໂຄງການ ຈະເປັນການຮັດແໜ້ນການ​ຮ່ວມ​ມື​ຢ່າງ​ແໜ້ນ​ແຟ້ນ ລະຫວ່າງ ສ.​ເກົາຫຼີ ​ແລະ ສປປ ລາວ. ທ່ານ​ເນັ້ນ​ໜັກ​ວ່າ, ພາຍຫຼັງ​ຂໍ້​ລິ​ເລີ່​ມຄວາມສາມັກຄີ ​ລະຫວ່າງ​ ສ.​ເກົາຫຼີ - ອາ​ຊຽນ (KASI), ສ.​ເກົາຫຼີ ໄດ້ສືບ​ຕໍ່​​ຄຳ​ໝັ້ນ​ສັນຍາ ​ໃນການຊຸກຍູ້​ການ​ຮ່ວມ​ມື​ດ້ານ​ການ​ພັດທະນາ, ການ​ແລກປ່ຽນຂອງ​ພາກ​ເອກະ​ຊົນ ​ແລະ ການ​ຂະຫຍາຍ​ການ​ລົງທຶນ.

ໃນໂອກາດນີ້ ທ່ານ ງາມປະສົງ ເມືອງມະນີ ຕາງໝ້າໃຫ້ ກະຊວງ ໂຍທາທິການ ແລະ ຂົນສົ່ງ ກໍ່ຄື ລັດຖະບານ ສປປ ລາວ ໄດ້ສະແດງຄວາມຂອບໃຈ ມາຍັງລັດຖະບານ ແລະ ປະຊາຊົນ ສ. ເກົາຫຼີ ຊື່ງຍາມໃດກໍມີຄວາມຮັກແພງ ຈິງໃຈ ຊ່ວຍເຫລືອປະກອບສ່ວນທຶນຮອນ ເຂົ້າໃນການພັດທະນາເສດຖະກິດ ສັງຄົມ ຂອງ ສປປ ລາວ, ໂດຍສະເພາະແມ່ນ ຂະແໜງ ຍທຂ ຕະຫລອດມາ.