ກອງປະຊຸມ ລະດັບເຈົ້າໜ້າທີ່ອາວຸໂສດ້ານການຂົນສົ່ງ ແລະ ກອງປະຊຸມລັດຖະມົນຕີຄົມມະນາຄົມ-ຂົນສົ່ງ ອະນຸພາກພື້ນແມ່ນ້ຳຂອງ ຄັ້ງທີ 9, ລະຫວ່າງວັນທີ 12-13 ທັນວາ 2024, ທີ່ນະຄອນຫລວງວຽງຈັນ

ໃນວັນທີ 12-13 ທັນວາ 2024 ທີ່ ໂຮງແຮມ ຄຣາວພາຊາ, ນະຄອນຫຼວງວຽງຈັນ ກະຊວງໂຍທາທິການ ແລະ ຂົນສົ່ງ ໄດ້ຮັບກຽດໃນການເປັນປະທານ ແລະ ເຈົ້າພາບ ຈັດກອງປະຊຸມ ເຈົ້າໜ້າທີ່ອາວຸໂສຂົນສົ່ງ ແລະ ກອງປະຊຸມລັດຖະມົນຕີຄົມມະນາຄົມ-ຂົນສົ່ງ ອະນຸພາກພື້ນແມ່ນ້ຳຂອງ ຄັ້ງທີ 9 (National Transport Facilitation Senior Official Meeting and 9^th Greater Mekong Subregion Cross-Border Transport Facilitation Agreement Joint Committee Meeting “NTFC-SOM and  9th GMS CBTA JCM”) ໂດຍການເປັນປະທານຂອງ ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ. ເຂົ້າຮ່ວມກອງປະຊຸມຄັ້ງນີ້ປະກອບມີ ເຈົ້າໜ້າທີ່ອາວຸໂສ ແລະ ລັດຖະມົນຕີຂົນສົ່ງ ຈາກປະເທດສະມາຊິກອະນຸພາກພື້້ນແມ່ນໍ້າຂອງ 6 ປະເທດ, ທະນາຄານພັດທະນາອາຊີ ໃນນາມກອງເລຂາ GMS CBTA ແລະ ຜູ້ເຂົ້າຮ່ວມພາຍໃນ ຈາກອົງການຈັດຕັ້ງລັດທີ່ກ່ຽວຂ້ອງ ທັງໝົດ 100 ທ່ານ.

ຈຸດປະສົງຂອງກອງປະຊຸມ:

1.     ເພື່ອຮັບຟັງການລາຍງານ ຜົນຂອງກອງປະຊຸມເຈົ້າໜ້າທີ່ອາວຸໂສອໍານວຍຄວາມສະດວກການຂົນສົ່ງ ;

2.    ການເປີດຄືນ ການແລ່ນລົດຂົນສົ່ງໂດຍສານ ແລະ ສິນຄ້າ ຜ່ານແດນ ໃນກອບປະເທດ ອະນຸພາກພຶ້ນແມ່ນໍ້າຂອງ GMS Early Harvest ທີ່ໄດ້ລົງນາມແຕ່ປິ 2018 ທີ່ ສສ ຫວຽດນາມ ຊຶ່ງປັດຈຸບັນດາປະເທດ ສະມາຊິກ ໄດ້ລົງທະບຽນ ແລ້ວລວມມີຈຳນວນ 589 ອະນຸຍາດ ຊຶ່ງກວມເອົາ 24% ຂອງຈໍນວນທີ່ກໍານົດທັງໝົດ, ຜົນການແລ່ນລົດທົດລອງ Trial Run, ປະລິມານການສັນຈອນ, ສາຍທາງ ແລະ ສິ່ງທ້າທາຍ;

3.    ບົດບັນທຶກຄວາມເຂົ້າໃຈ MOU ສະບັບທີ 2 ສຳລັບການເປີດສາຍທາງເພີ່ມເຕີມໃສ່ ໃນອະນຸສັນຍາ 1 ແລະ ບັນຫາອື່ນໆ (ທີ່ບັນດາປະເທດ GMS ທີ່ຕົກລົງເຫັນດີເພີ່ມສາຍທາງແລ່ນລົດ, ການກໍານົດເງື່ອນໄຂເພີ່ມເຕີມໃນການຈັດຕັ້ງປະບັດ ແລະ ແຜນການເປີດສາຍທາງແລ່ນລົດ);

4.    ນອກຈານີ້ ຍັງປຶກສາຫາລື ການຈັດຕັ້ງປະຕິບັດ ແຜນວຽກ ຂອງ ສັນຍາຂົນສົ່ງຂ້າມແດນ CBTA ປີ 2024 ແລະ ແຜນການ ໃນ 2025 ລວມທັງກອງປະຊຸມປີ້ນອ້ອມ ຕ່າງໆ ທີ່ຕິດພັນ, ການກວດກາຕິດຕາມ ການແລ່ນລົດEarly Harvest ແລະ ຂໍ້ມູນການອຳນວຍຄວາມສະດວກໃຫ້ ແກ່ການຄ້າ ແລະ ການຂົນສົ່ງ, ການສ້າງຄູ່ມືການພັດທະນາແລວທາງ, ການເຂົ້າເປັນພາຄີ ຂໍ້ລິເລີ່ມສັນຍາຂົນສົ່ງຂ້າມແດນ IICBTA ແລະ ການແລ່ນເປີດແລ່ນລົດ Early Harvest ຂອງ ມຽນມາ, ການແກ້ໄຂບັນຫາພາສີ ແລະ ການປັບປຸງສັນຍາ CBTA ແລະ ການ ມອບ-ຮັບ ການເປັນປະທານ CBTA;