ກອງປະຊຸມປະຈຳປີ 2024 ຂອງໂຄງການ WaterWorX

ໃນຕອນເຊົ້າຂອງວັນທີ 13 ທັນວາ 2024 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໄດ້ຈັດກອງປະຊຸມ ສະຫຼຸບຜົນການຈັດຕັ້ງປະຕິບັດວຽກງານ ປະຈຳປີ 2024 ແລະ ຜ່ານແຜນການປະຈໍາປີ 2025 ຂອງໂຄງການຍົກລະດັບການຄຸ້ມຄອງຊັບສິນຄົງທີ່ ດ້ວຍການນໍາໃຊ້ລະບົບຂໍ້ມູນຂ່າວສານດ້ານພູມີສາດ (GIS) ພາຍໃຕ້ທຶນ ຂອງວິສາຫະກິດດ້ານນ້ຳ ຂອງເມືອງອໍາສະເຕີດໍາ (World Waternet Amsterdam), ໂດຍການເປັນປະທານຮ່ວມ ຂອງ ທ່ານ ນາງ ພູວັນ ແສນບຸດຕະລາດ ຮັກສາຫົວໜ້າກົມນໍ້າປະປາ ກະຊວງໂຍທາທິການ ແລະ ຂົນສົ່ງ, ຜູ້ຕາງໜ້າຕົວແທນສະຖານທູດໂຮນລັງ ປະຈໍາປະເທດໄທ, ທ່ານ Kees Van Der Lugth (ຄີສ ວັນເດີລຸກ) ຫົວໜ້າປະຈໍາພາກພື້ນ ຂອງໂຄງການ World Waternet Amsterdam, ໂດຍມີຜູ້ເຂົ້າຮ່ວມຈາກກະຊວງໂຍທາທິການ ແລະ ຂົນສົ່ງ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງກະສິກໍາ ແລະ ປ່າໄມ້, ກະຊວງສາທາລະນະສຸກ, ຄູອາຈານ ແລະ ນັກສຶກສາ ພາກວິຊາສະພາບແວດລ້ອມຜັງເມືອງ ຄະນະສະຖາປັດຕະຍະກໍາສາດ ມະຫາວິທະຍາໄລແຫ່ງຊາດ, ສະມາຄົມນໍ້າປະປາລາວ, ອົງການສາກົນ ADB, WB, UNICEF, EU, UN habitat, GGGI, Gret ແລະ ລັດວິສາຫະກິດນໍ້າປະປາແຂວງ, ນະຄອນຫຼວງວຽງຈັນ ລວມທັງໝົດ 65 ທ່ານ.

ໂດຍປະຕິບັດຕາມເປົ້າໝາຍການພັດທະນາແບບຍືນຍົງ ເປົ້າໝາຍທີ 06  ທີ່ອົງການສະຫະປະຊາຊາດໄດ້ລະບຸໄວ້ ໂດຍສະເພາະແມ່ນ SDG 6 ພາຍໃນປີ 2030 ໃຫ້ທຸກຄົນສາມາດເຂົ້າເຖິງນໍ້າດື່ມທີ່ປອດໄພ ແລະ ລາຄາບໍ່ແພງ ຢ່າງທົ່ວເຖິງ ແລະ ເທົ່າທຽມກັນ. ໂດຍອີງຕາມ ວິໄສຮອດປີ 2035, ຍຸດທະສາດການພັດທະນາຂະແໜງນໍ້າປະປາ ແລະ ສຸຂາພິບານ ໄລຍະ 09 ປີ (2022-2030) ແລະ ແຜນພັດທະນາ ໄລຍະ 04 ປີ (2022-2025) ໃນນັ້ນ ເປົ້າໝາຍລວມຂອງຍຸດ​ທະ​ສາດ​ດັ່ງກ່າວ ໄລ​ຍະແຕ່ນີ້ຮອດປີ 2030 ໃຫ້ໝົດທຸກຄົນທີ່ດໍາລົງຊີວິດຢູ່ໃນຕົວເມືອງ ເຂົ້າເຖິງນໍ້າປະປາ ແລະ ສຸຂາພິບານ ທີ່ມີການຄຸ້ມຄອງຢ່າງປອດໄພ, ກວ້າງຂວາງ, ທົ່ວເຖິງ, ທີ່ເປັນໜ້າເພິ່ງພໍໃຈ ແລະ ໃນລາຄາທີ່ສົມເຫດສົມຜົນ ໂດຍສູ້ຊົນຮັບປະກັນໃຫ້ປະຊາຊົນ 90% ທີ່ອາໄສໃນເທດສະບານແຂວງ ແລະ ເມືອງ ເຂົ້າເຖິງນໍ້າປະປາທີ່ສະອາດປອດໄພ.

ການຈັດຕັ້ງປະຕິບັດ ໂຄງການຍົກລະດັບການຄຸ້ມຄອງຊັບສິນຄົງທີ່ ດ້ວຍການນໍາໃຊ້ລະບົບຂໍ້ມູນຂ່າວສານດ້ານພູມີສາດ (GIS) ພາຍໃຕ້ທຶນຊ່ວຍເຫຼືອລ້າ ຂອງວິສາຫະກິດດ້ານນ້ຳ ຂອງເມືອງອໍາສະເຕີດໍາ         (World Waternet Amsterdam) ໄດ້ແບ່ງອອກເປັນ 3 ໄລຍະດັ່ງລາຍລະອຽດລຸ່ມນີ້:

-       ໄລຍະ​ທີ I ​ແຕ່​ປີ 2018-2021:  ໄລຍະເລີ່ມຕົ້ນ ຢູ່ແຂວງຫລວງນໍ້າທາ

-       ໄລຍະທີ II ແຕ່ປີ 2023-2026: ໄລຍະກາງ ການຂະຫຍາຍໃນຂອບເຂດທົ່ວປະເທດ

-       ໄລຍະ​ທີ III ​ແຕ່​ປີ 2027-2030: ໄລຍະສຸດທ້າຍ ຄວາມຍືນຍົງ ຫັລງຈາກສິ້ນສຸດໂຄງການ

ຄາດໝາຍຜົນໄດ້ຮັບຈາກກອງປະຊຸມ

1)      ສະຫຼຸບ ແລະ ຖອດຖອນ ບົດຮຽນໃນການຈັດຕັ້ງປະຕິບັດໂຄງການ ໃນໄລຍະ 1 ປີ ຜ່ານມາ;

2)      ເຜີ່ຍແຜ່ກິດຈະກຳ ແລະ ຜົນໄດ້ຮັບ ຂອງໂຄງການໃນໄລຍະ 1 ປີ ຜ່ານມາ ໃຫ້ກັບພາກສ່ວນທີ່ກ່ຽວຂ້ອງຮັບຊາບ;

3)   ເຜີຍແຜ່ໃຫ້ລັດວິສາຫະກິດນ້ຳປະປາ ແລະ ພາກສ່ວນກ່ຽວຂ້ອງໄດ້ເຂົ້າໃຈເພີ່ມເຕີ່ມກ່ຽວກັບການນຳໃຊ້ ລະບົບຂໍ້ມູນຂ່າວສານດ້ານພູມີສາດ (GIS) ເຂົ້າການຄຸ້ມຄອງ ແລະ ບໍລິຫານຈັດການ ວຽກງານນໍ້າປະປາ;

4)      ການຮ່ວມມື ແລະ ການເຂົ້າເຖິງແຫຼ່ງທຶນອື່ນໆ ເພື່ອຜັ່ນຂະຫຍາຍກິດຈະກຳ ຂອງໂຄງການ ໃນຂອບເຂດທົ່ວປະເທດ;

5)      ຖອດຖອນບົດຮຽນກ່ຽວກັບການປ່ຽນແປງດິນຟ້າອາກາດທີ່ມີຜົນກະທົບຕໍ່ຂະແໜງນ້ຳປະປາເພື່ອຕອບໂຕ້ໄພພິບັດ.

ອີງໃສ່ ຜົນສຳ​ເລັດ​ທີ່​ກ່າວ​ມາ​ຂ້າງ​ເທິງ​ນັ້ນ ການຍົກລະດັບການຄຸ້ມຄອງຊັບສິນຄົງທີ່ ດ້ວຍການນໍາໃຊ້ລະບົບຂໍ້ມູນຂ່າວສານດ້ານພູມີສາດ (GIS ) ເຂົ້າການຄຸ້ມຄອງ ແລະ ບໍລິຫານຈັດການ ຂໍ້ມູນຂ່າວສານ ຂອງລັດວິສາຫະກິດນໍ້າປະປາ ໃຫ້ມີຄວາມທັນໄໝ ແລະ ສອດຄ່ອງກັບສະພາບຕົວຈີ່ງໃນປັດຈຸບັນ ແມ່ນມີຄວາມຈຳເປັນ, ໂດຍສະເພາະແມ່ນການຄຸ້ມຄອງ ແລະ ບໍລິຫານຈັດການ ຂໍ້ມູນ ລະບົບສາຍທໍ່, ລະບົບໂຮງງານ ເຊິ່ງເປັນປັດໄຈຫຼັກ ທີ່ຈະສາມາດຫຼຸດຜ່ອນນ້ຳບໍ່ສ້າງລາຍຮັບ ແລະ ຈະສາມາດເພີ່ມລາຍຮັບ ຫຼຸດລາຍຈ່າຍ ຂອງລັດວິສາຫະກິດນ້ຳປະປາ ໄດ້ຢ່າງມະຫາສານ ເພື່ອເຮັດໃຫ້ລັດວິສາຫະກິດນ້ຳປະປາ ມີກຳໄລ ແລະ ຍືນຍົງໄດ້.

 ການຫັນຄວາມເປັນທັນສະໄຫມໃນການບໍລິຫານ ແລະ ຄຸ້ມຄອງວຽກງານນ້ຳປະປາ ແມ່ນປັດໄຈທີ່ສຳຄັນ   ຂອງຜູ້ບໍລິການນ້ຳປະປາ ເປັນຕົ້ນແມ່ນການຄຸ້ມຄອງຊັບສິນຄົງທີ່ ແລະ ຂໍ້ມູນຂ່າວສານ ຂອງລັດວິສາຫະກິດນ້ຳປະປາ ເຊິິ່ງໄລຍະຜ່ານມາ ລັດວິສາຫະກິດນ້ຳປະປາ ຈຳນວນບໍ່ໜ້ອຍ ຍັງບໍ່ທັນມີກົນໄກ ແລະ ໂປຣແກມທີ່ທັນສະໄໝ ເຂົ້າມາຄຸ້ມຄອງ ແລະ ບໍລິຫານ ຊັບສິນຄົງທີ່ ແລະ ຂໍ້ມູນຂ່າວສານ ຂອງວຽກງານຕົນ ເຊິ່ງເປັນສາເຫດອັນໜື່ງ ທີ່ເຮັດໃຫ້ປະລິມານນ້ຳບໍ່ສ້າງລາຍຮັບສູງກວ່າມາດຖານທີ່ກຳນົດໄວ້ ແລະ ບໍ່ສາມາດ ຈະແກ້ໄຂບັນຫາໄດ້ທັນກັບເວລາ ເພາະຍັງຂາດລະບົບຄຸ້ມຄອງທີທັນສະໄໝ ໂດຍສະເພາະແມ່ນ ຂໍ້ມູນຂ່າວສານ ຂອງລະບົບສາຍທໍ່, ການກຳນົດ-ຕິດຕັ້ງໝໍ້ແທກນ້ຳແບ່ງເປັນເຂດ ຫຼື DMA, ຂໍ້ມູນ ຂອງລູກຄ້າ ແລະ ການຄຸ້ມຄອງຂໍ້ມູນ ຂອງລະບົບໂຮງງານ.