ກະຊວງໂຍທາທິການ ແລະ ຂົນສົ່ງ (ຍທຂ) ຊີ້ແຈງຫຼາຍບັນຫາທີ່ພົ້ນເດັ່ນ ຕໍ່ຄໍາຊັກຖາມຂອງສະມາຊິກສະພາແຫ່ງຊາດ

ກະຊວງໂຍທາທິການ ແລະ ຂົນສົ່ງ (ຍທຂ) ຊີ້ແຈງຫຼາຍບັນຫາທີ່ພົ້ນເດັ່ນ ຕໍ່ຄໍາຊັກຖາມຂອງສະມາຊິກສະພາແຫ່ງຊາດ (ສສຊ) ທີ່ຕິດພັນກັບການຈັດຕັ້ງປະຕິບັດວຽກງານຂອງ ຍທຂ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກນີ້ ພາຍໃຕ້ການເປັນປະທານ ຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ຊີ້ແຈງວ່າ: ການຟື້ນຟູສະພາບຊຸດໂຊມຂອງບັນດາເສັ້ນທາງໃນທົ່ວປະເທດ ໂດຍສະເພາະລະບົບເສັ້ນທາງເພື່ອອໍານວຍຄວາມສະດວກໃຫ້ແກ່ການຂົນສົ່ງ, ການຜະລິດ ແລະ ການທ່ອງທ່ຽວແມ່ນບຸລິມະສິດ ທີ່ບັນຈຸໃນແຜນພັດທະນາ 5 ປີ 2021-2025 ຂອງຂະ        ແໜງການ ຍທຂ. ໃນນີ້ ໄດ້ສຸມໃສ່ປັບປຸງ ແລະ ຍົກລະດັບທາງຫຼວງແຫ່ງຊາດ ທີ່ເປັນທາງຫຼວງອາຊຽນ ຈໍານວນ 8 ເສັ້ນ ໃນ ສປປ ລາວ ໃຫ້ໄດ້ມາດຕະຖານທາງຫຼວງອາຊຽນ ສາມາດຮັບນໍ້າໜັກໄດ້ 11 ໂຕນ/ເພົາ ມີ: ທາງເລກ 3 (AH3), ທາງເລກ 2 (AH13), ທາງເລກ 13 ເໜືອ (AH12), ທາງເລກ 13 ໃຕ້ (AH11), ທາງເລກ 8 (AH15), ທາງເລກ 12 (AH131), ທາງເລກ 9 (AH16), ທາງເລກ 18 (AH132) ໃຫ້ສາມາດຮັບນໍ້າໜັກໄດ້ 11 ໂຕນ/ເພົາ. ສ່ວນຫຼາຍຕາໜ່າງທາງຫຼວງແຫ່ງຊາດ ແມ່ນຮັບນໍ້າໜັກໄດ້ 6.2 ໂຕນ/ເພົາ ຫາ 8.1 ໂຕນ/ເພົາ. ນອກນີ້ ຍັງມີການກໍ່ສ້າງ ແລະ ສ້ອມແປງຂົວຕາມທາງຫຼວງແຫ່ງຊາດ ແລະ ຂົວຂ້າມນໍ້າຂອງຈໍານວນ ໜຶ່ງ, ພ້ອມທັງປັບປຸງ ແລະ ສ້ອມແປງທາງຫຼວງທ້ອງຖິ່ນ ເພື່ອເຊື່ອມຕໍ່ເຂດຈຸດສຸມການຜະລິດ ແລະ ການທ່ອງທ່ຽວ ໃສ່ທາງຫຼວງທີ່ເປັນສາຍຫຼັກ ແລະ ສະຖານີລົດໄຟ.

ສຳລັບມາດຕະການໃນການຟື້ນຟູ ສະພາບຊຸດໂຊມຂອງບັນດາເສັ້ນທາງໃນທົ່ວປະເທດ ຄື: (I ). ທາງຫຼວງແຫ່ງຊາດ ທີ່ໄດ້ຮັບການປັບປຸງ ແລະ ຟື້ນຟູສໍາເລັດ ມີ 3 ຕອນທາງ ຄື: (1) ທາງເລກ 13 ເໜືອ ແຕ່ ສີເກີດ ໂພນໂຮງ, (2) ທາງເລກ 13 ໃຕ້ ແຕ່ ຊາຍແດນ ນະຄອນຫຼວງວຽງຈັນ, ກມ 71 ຫາ ທ່າແຂກ ແລະ (3) ທາງເລກ 11 ແຕ່ ຂົວນໍ້າສັງ ຫາ ຄົກເຂົ້າດໍ. (II). ທາງຫຼວງແຫ່ງຊາດ ທີ່ກຳລັງດໍາເນີນການປັບປຸງ ແລະ ຟື້ນຟູ ມີຈໍານວນ 5 ເສັ້ນ ຄື: (1) ທາງເລກ 2E ແຕ່ ເມືອງໄຊ ຫາ ເມືອງຂວາ, (2) ທາງເລກ 2W ແຕ່ ເມືອງໄຊ ຫາ ເມືອງປາກແບ່ງ, (3) ທາງເລກ 13 ເໜືອ ແຕ່ ສີໄຄ-ສີເກີດ, (4) ທາງເລກ 13 ໃຕ້ ແຕ່ ໄຟແດງ ຫຼັກ 21 ຫາ ຊາຍແດນແຂວງບໍລິຄໍາໄຊ ແລະ (5) ທາງເລກ 12 ແຕ່ ທ່າແຂກ ຫາ ນາເພົ້າ ຊາຍແດນລາວ - ຫວຽດນາມ. (III). ສືບຕໍ່ການກໍ່ສ້າງຂົວຕາມທາງຫຼວງແຫ່ງຊາດ ແລະ ຂົວຂ້າມນໍ້າຂອງມີ: (1) ຂົວມິດຕະພາບ ລາວ-ໄທ ແຫ່ງທີ 5 (ບໍລິຄໍາໄຊ-ບຶງການ), (2) ຂົວຂ້າມນໍ້າຂອງກ້ອນຕື່ນ ຫ້ວຍແກ້ວ ແຂວງບໍ່ແກ້ວ ແລະ (3) ກໍ່ສ້າງຂົວ 12 ແຫ່ງ ຕາມທາງເລກ 20 ແຕ່ ແຂວງຈໍາປາສັກ ຫາ ສາລະວັນ, ກໍ່ສ້າງຂົວ 6 ແຫ່ງ ຕາມທາງເລກ 8 ແຂວງບໍລິຄໍາໄຊ. (IV). ສືບຕໍ່ໂຄງການທີ່ຢູ່ໃນຂັ້ນຕອນກະກຽມເຈລະຈາເງິນກູ້ ເພື່ອດໍາເນີນການກໍ່ສ້າງຂົວຂ້າມນໍ້າຂອງ ຫຼວງພະບາງ ຫາ ເມືອງຈອມເພັດ. (V). ສືບຕໍ່ຈັດຕັ້ງປະຕິບັດວຽກຟື້ນຟູທາງເລກ 8 (ກມ 42+800 - ກມ 52+325) ທີ່ໄດ້ຮັບຄວາມເສຍຫາຍຈາກໄພພິບັດ ປີ 2023. (VI). ສືບຕໍ່ຂຶ້ນແຜນງົບປະມານບ້ວງກອງທຶນທາງ ເຂົ້າໃນວຽກບູລະນະຮັກສາ ແລະ ສ້ອມ ແປງທາງຫຼວງແຫ່ງຊາດ ແລະ ທາງຫຼວງທ້ອງຖິ່ນ ປະຈໍາປີ 2025. (VII). ສືບຕໍ່ວຽກປັບປຸງ ແລະ ສ້ອມແປງທາງຫຼວງທ້ອງຖິ່ນ ພາຍໃຕ້ໂຄງການ ພັດທະນາ ແລວທາງເສດຖະກິດພາກພື້ນອາຊີຕາເວັນອອກສ່ຽງໃຕ້ ເພື່ອການເຊື່ອມໂຍງ ແລະ ເຊື່ອມຈອດ (SEARECC) ຢູ່ 5 ແຂວງ (ຜົ້ງສາລີ, ຫຼວງນໍ້າທາ, ອຸດົມໄຊ, ຫຼວງພະບາງ ແລະ ໄຊຍະບູລີ) ນອນຢູ່ໃນ 12 ເມືອງ, ກວມເອົາຈໍານວນ 13 ເສັ້ນທາງ ລວມຄວາມຍາວທັງໝົດ 300 ກມ. (VIII). ສືບຕໍ່ວຽກບູລະນະຮັກສາ ແລະ ສ້ອມແປງ ທາງຫຼວງທ້ອງຖິ່ນ ພາຍໃຕ້ໂຄງການ LRSP2 ທີ່ນໍາໃຊ້ເງິນກູ້ດອກເບ້ຍຜ່ອນຜັນ ຈາກທະນາຄານໂລກ, ອົງການນໍດິກເພື່ອການພັດທະນາ, ທະນາຄານລົງທຶນເອີຣົບ ແລະ ງົບປະມານສົມທົບ ຈາກກອງທຶນທາງ ແລະ ແຂວງ. ຈັດຕັ້ງປະຕິບັດຢູ່ 6 ແຂວງ (ຜົ້ງສາລີ, ອຸດົມໄຊ, ໄຊຍະບູລີ, ຫົວພັນ, ຊຽງຂວາງ ແລະ ບໍລິຄໍາໄຊ) ກວມເອົາຈໍານວນ 61 ເສັ້ນທາງ ລວມຄວາມຍາວທັງໝົດ 1,968 ກມ. (IX). ສືບຕໍ່ໂຄງການພັດທະນາທາງຊົນນະບົດ ທີ່ໄດ້ຮັບທຶນຊ່ວຍເຫຼືອຈາກລັດຖະບານເຢຍລະມັນ (KFW) ມີ 2 ໂຄງການ ຄື: ໂຄງການພັດທະນາທາງຊົນນະບົດ ໄລຍະ 3 (RDP3) ແລະ ໄລຍະ 4 (RDP4) ໄດ້ຈັດຕັ້ງປະຕິບັດຢູ່ 2 ແຂວງ ຄື: ແຂວງຫົວພັນ ກວມເອົາ 5 ເສັ້ນທາງ ລວງຍາວທັງໝົດ 74,8 ກມ, ກໍ່ສ້າງຂົວ 9 ແຫ່ງ ລວງຍາວ 270 ແມັດ ແລະ ແຂວງຜົ້ງສາລີ ກວມເອົາ 4 ເສັ້ນທາງ ລວງຍາວທັງໝົດ 150 ກມ ກໍ່ສ້າງຂົວ 5 ແຫ່ງ ລວງຍາວ 60 ແມັດ ແລະ (X). ໂຄງການປັບປຸງທາງຫຼວງທ້ອງຖິ່ນເພື່ອການເຊື່ອມໂຍງ-ເຊື່ອມຈອດ ໃຫ້ມີຄວາມທົນທານຕໍ່ກັບການປ່ຽນແປງຂອງສະພາບດິນຟ້າອາກາດ CRRCIP ຢູ່ 3 ແຂວງພາກໃຕ້ (ແຂວງຄໍາ ມ່ວນ, ສະຫວັນນະເຂດ ແລະ ສາລະວັນ) ລວມລວງຍາວປະມານ 300 ກມ.