ຂ່າວພາຍໃນກະຊວງ
ລັດຖະມົນຕີ ກະຊວງໂຍທາທິການ ແລະ ຂົນສົ່ງ ເຂົ້າຮ່ວມກອງປະຊຸມ ATM ຄັ້ງທີ່ 30
ໃນລະຫວ່າງວັນທີ 21-22 ພະຈິກ 2024 ທ່ານ ງາມປະສົງ ເມືອງມະນີ (H.E. Mr. Ngampasong Muongmany) ລັດຖະມົນຕີ ກະ ຊວງ ໂຍທາທິການ ແລະ ຂົນສົ່ງ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ ລັດຖະມົນຕີຂົນສົ່ງອາຊຽນ ຄັ້ງທີ 30 ທີ່ ກົວລາລໍາເປີ ປະເທດ ມາເລເຊຍ. ໃນກອງປະຊຸມຄັ້ງນີ້ໄດ້ມີບັນດາລັດຖະມົນຕີຂົນສົ່ງ ຈາກປະເທດອາຊຽນ, ຕີມໍແລັດສເຕ ແລະ ບັນດາປະເທດຄູ່ຮ່ວມມືກັບອາຊຽນ ເຊັ່ນ: ສປ ຈີນ, ຍີ່ປຸ່ນ ແລະ ສ.ເກົາຫຼີ ເຂົ້າຮ່ວມ ລວມຈໍານວນຜູ້ເຂົ້າຮ່ວມຫຼາຍກວ່າ 200 ທ່ານ. ກອງປະຊຸມ ໄດ້ລາຍງານຜົນສໍາເລັດຂອງຂະແໜງ ຄົມມະນາຄົມຂົນສົ່ງອາຊຽນ ໃນໄລຍະ 1 ປີ ຜ່ານມາ ແລະ ຮັບຮອງ ເອົາຜົນສໍາເລັດຂອງ ກອງປະຊຸມ STOM ຄັ້ງທີ 57 ແລະ 58, ວຽກບຸລິມະ ສິດປະຈໍາປີ, ໝາກຜົນໃນປີ 2024 ຂອງຂະແໜງ ຄົມມະ ນາຄົມຂົນສົ່ງໃນອາຊຽນ ແລະ ບັນດາເອກະສານ ສໍາຄັນຈໍານວນໜຶ່ງຄື: ຄໍາແນະນຳກ່ຽວກັບລົດໄຟຟ້າຂະໜາດນ້ອຍ (Light Electric Vehicle “LEV”) ໃນອາຊຽນ ແລະ ຄໍາແນະນຳອາຊຽນກ່ຽວກັບການຂົນສົ່ງສິນຄ້າໃນຕົວເມືອງ (UFT).
ນອກຈາກນັ້ນ, ບັນດາລັດຖະມົນຕີິຂົນສົ່ງອາຊຽນໄດ້ ຮັບຮອງ ແລະ ລົງນາມ ຂໍ້ຜູກພັນທີ 5 ວ່າດ້ວຍສິດທິຜູ້ໂດຍສານລົງຈອດ-ຢຸດພັກຖ້ຽວບິນ-ເດີນທາງຕໍ່ກັບສາຍການບິນເດີມ (Own Stopover Rights) ພາຍໃຕ້ຂອບພັນທະສົນທິສັນຍາພະຫຸພາຄີ ຕໍ່ກັບສິດສຳລັບການຂົນສົ່ງຜູ້ໂດຍ ສານທາງອາ ກາດອາຊຽນ (Multilateral Agreement on Full Liberalization on Air Passenger Services/MAFLPAS) ເຊິ່ງເປັນຜົນສໍາເລັດສໍາຄັນ ທັງເປັນບາດກ້າວໃໝ່ໃຫ້ແກ່ການເຊື່ອມຈອດທາງອາກາດໃນອາຊຽນ. ຜົນສຳເລັດຂອງກອງປະຊຸມຄັ້ງນີ້ ແມ່ນສືບເນ່ື່ອງມາຈາກບັນດາແຜນງານຕ່າງໆ ທີ່ໄດ້ຕົກລົງກັນໃນກອງປະຊຸມ ລັດຖະມົນຕີຂົນສົ່ງອາຊຽນ ຄັ້ງທີ 29 ທີ່ໄດ້ຈັດຂຶ້ນ ຢູ່ ນະຄອນ ຫຼວງພະບາງ, ສປປ ລາວ ໃນເດືອນ ພະຈິກ 2023 ທີ່ຜ່ານມາ.
ຄຽງຄູ່ກັບກອງປະຊຸມລັດຖະມົນຕຕຂົນສົ່ງອາຊຽນຄັ້ງທີ່ 30, ກະຊວງຄົມມະນາຄົມຂົນສົ່ງ ມາເລເຊຍ ໃນນາມເປັນເຈົ້າພາບ ໄດ້ຈັດກອງປະຊຸມພິເສດ ລະຫວ່າງ ລັດຖະມົນຕີຂົນສົ່ງອາຊຽນ ແລະ ຄູ່ຮ່ວມພັດທະນາຫຼັກທີ່ໄດ້ມີສ່ວນຮ່ວມໃນການພັດທະນາ ແລະ ກໍ່ສ້າງພື້ນຖານໂຄງລ່າງເພື່ອຮັບໃຊ້ການຂົນສົ່ງໃນອາຊຽນ ຄື ADB, AIIB, WorldBank, UNESCAP ແລະ ITF ເພື່ອປືກສາຫາລືກ່ຽວກັບທິດທາງການພັດທະນາ ແລະ ການເຊື່ອມຈອດອາຊຽນໃນອານາຄົດ.
ໃນໂອກາດນີ້, ທ່ານ ລັດຖະມົນຕີກະຊວງໂຍທາທິການ ແລະ ຂົນສົ່ງ ຍັງໄດ້ພົບປະປະຊຸມ 2 ຝ່າຍ ກັບ ກະຊວງຄົມມະນາຄົມຂົນສົ່ງ ແຫ່ງ ສປ. ຈີນ ແລະ ກະຊວງ ໂຍທາທິການ ແລະ ຂົນສົ່ງ ແຫ່ງຣາສະອານະຈັກກຳປູເຈຍ ແລະ ຄູ່ຮ່ວມພັດທະນາຈໍານວນໜຶ່ງ ເພື່ອຕິດຕາມຊຸກຍູ້ບັນດາຂົງເຂດການຮ່ວມມື ໃນຂອບ 2 ຝ່າຍ ເພື່ອການເຊື່ອມຈອດເຊື່ອມໂຍງ ໃຫ້ມີຄວາມຄືບໜ້າຕາມແຜນ ທີ່ວາງໄວ້.
