ພິທີມອບ-ຮັບ ແລະ ເປີດນໍາໃຊ້ໂຄງການຂະຫຍາຍລະບົບນໍ້າປະປາ ນະຄອນຫຼວງພະບາງ

ໃນຕອນເຊົ້າວັນທີ 12 ພະຈິກ 20224 ໄດ້ຈັດພິທີມອບ-ຮັບ ແລະ ເປີດນຳໃຊ້ ໂຄງການຂະຫຍາຍລະບົບນໍ້າປະປາ ນະຄອນຫຼວງພະບາງ ແຂວງຫຼວງພະບາງ, ທີ່ໂຮງງານຜະລິດນໍ້າປະປາ ບ້ານຜານົມ, ນະຄອນຫຼວງພະບາງ, ແຂວງຫຼວງພະບາງ; ໂດຍເປັນກຽດເຂົ້າຮ່ວມຂອງ ທ່ານ ງາມປະສົງ ເມືອງມະນີ (H.E. Mr. Ngampasong Muongmany), ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ທ່ານ ໂຄອິຊູມິ ຊຶໂຕມູ (H.E. KOIZUMI TSUTOMU) ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ, ທ່ານ ນາງ ສິລິພອນ ສຸພັນທອງ (H.E. Siriphone SOUPHANTHONG) ຮອງເຈົ້າແຂວງ ແຂວງຫຼວງພະບາງ, ທ່ານ ນາງ ມີຢາໂກະ ໂກບາຢາຊິ (Ms. Miyako KOBAYASHI) ຫົວໜ້າອົງການໄຈກາ ປະຈຳລາວ, ມີບັນດາຜູ້ຕາງໜ້າກະຊວງຈາກສູນກາງ ແລະ ບັນດາພະແນກຈາກທ້ອງຖິ່ນ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.

ໂຄງການ ຂະຫຍາຍລະບົບນໍ້າປະປາ ນະຄອນຫຼວງພະບາງ, ແຂວງຫຼວງພະບາງ ແມ່ນໄດ້ຮັບທຶນຊ່ວຍເຫຼືອຈາກອົງການໄຈກາ (JICA) ປະເທດຍີ່ປຸ່ນ, ຈໍານວນ 1,922 ຕື້ເຢັນ ມີໜ້າວຽກສໍາຄັນຂອງໂຄງການຄື: ກໍ່ສ້າງ ແລະ ປັບປຸງສິ່ງອຳນວຍຄວາມສະດວກ ຂອງໂຮງງານຜະລິດນໍ້າປະປາ ໃຫ້ສາມາດສະໜອງນໍ້າປະປາ ໄດ້ຢ່າງມີສະຖຽນລະພາບ, ປະກອບສ່ວນເຂົ້າໃນການພັດທະນາ ສົ່ງເສີມ ປັບປຸງ ສະພາບແວດລ້ອມຕົວເມືອງ ຂອງນະຄອນຫຼວງພະບາງ ກໍ່ຄືເມືອງມໍລະດົກໂລກ, ເຊື່ງຂອບເຂດຂອງໂຄງການປະກອບມີ 65 ບ້ານ, ໃນນັ້ນ ບ້ານທີ່ມີນໍ້າປະປາແລ້ວ 60 ບ້ານ (63,347 ຄົນ) ແລະ ບ້ານທີ່ຈະໄດ້ຮັບການບໍລິການໃໝ່ 5 ບ້ານ (3,803 ຄົນ). ການກໍ່ສ້າງໄດ້ປັບປຸງໂຮງງານຜະລິດນໍ້າປະປາ ບ້ານຜານົມ ສະເລ່ຍຕົວຈິງ 10,000 ແມັດກ້ອນ/ມື້, ທັງສາມາດຜະລິດນໍ້າເພີ່ມຂຶ້ນສະເລ່ຍ 14,500 ແມັດກ້ອນ/ມື້, ປັບປຸງລະບົບສາຍທໍ່ໃນຂອບເຂດ 60 ບ້ານ ແລະ ຂະຫຍາຍທໍ່ໃໝ່ໄປຫາ 5 ບ້ານ, ກໍ່ສ້າງອ່າງເກັບນໍ້າສູງຊູດິນໃໝ່ 1,500 ແມັດກ້ອນ ຢູ່ບ້ານຜານົມ ເພື່ອໃຊ້ແທນອ່າງເກັບນໍ້າພູສີ.

ນອກຈາກນັ້ນ, ຍັງໄດ້ຕິດຕັ້ງລະບົບ ນໍ້າມອດໄຟ ທີ່ສາມາດນໍາໃຊ້ໄດ້ກັບທີ່ ໃນຂອບເຂດມໍລະດົກໂລກ 35 ຈຸດ, ນອກເຂດມໍລະດົກໂລກ 11 ຈຸດ ລວມເປັນ 46 ຈຸດ ເພື່ອໃຊ້ປົກປັກຮັກມໍລະດົກໂລກ ຈາກອັກຄີໄຟຕ່າງໆ ແລະ ປັບປຸງຄືນພື້ນທີ່ ທີ່ຖືກຜົນກະທົບຈາກໂຄງການກໍ່ສ້າງ. ໂຄງການດັ່ງກ່າວ ແມ່ນບໍລິສັດ Nihon Suido Consultants Co., Ltd. ເປັນຜູ້ອອກແບບລະອຽດ ແລະ ເປັນທີ່ປຶກສາໂຄງການ ແລະ ບໍລິສັດ Kubota Construction Co., Ltd. ເປັນຜູ້ຮັບເໝົາກໍ່ສ້າງ.

ໂຄງການຂະຫຍາຍລະບົບນໍ້າປະປາ ນະຄອນຫຼວງພະບາງ ກໍ່ເປັນໂຄງການໜຶ່ງ ທີ່ຊ່ວຍຊຸກຍູ້ໃຫ້ຍຸດທະສາດການພັດທະນາຂະແໜງນໍ້າປະປາ ແລະ ສຸຂາພິບານ ແລະ ແຜນພັດທະນາ ທີ່ໄດ້ກໍານົດເປົ້າໝາຍລວມໄວ້ຄື: ໝົດທຸກຄົນທີ່ດໍາລົງຊີວິດຢູ່ໃນຕົວເມືອງ ເຂົ້າເຖິງນໍ້າປະປາ ແລະ ສຸຂາພິບານ ທີ່ມີການຄຸ້ມຄອງຢ່າງ ປອດໄພ, ກວ້າງຂວາງ, ທົ່ວເຖິງ ທີ່ເປັນໜ້າເພິ່ງພໍໃຈ ແລະ ໃນລາຄາທີ່ສົມເຫດສົມຜົນ.