ຂ່າວພາຍໃນກະຊວງ
ພິທີປິດ ຊຸດຮຽນ ທິດສະດີການເມືອງ ຂັ້ນຕົ້ນ ຊຸດທີ I
ໃນຕອນບ່າຍຂອງວັນທີ 23 ຕຸລາ 2024 ຢູ່ທີ່ສະຖາບັນ ໂຍທາທິການ ແລະ ຂົນສົ່ງ (ຫລັກ 19) ໄດ້ຈັດພິທີປິດ ຊຸດຮຽນ ທິດສະດີການເມືອງ ຂັ້ນຕົ້ນ ຊຸດທີ I ຂື້ນ ໃຫ້ກຽດເຂົ້າຮ່ວມໃນການເປີດຊຸດຮຽນຄັ້ງນີ້ມີ ສະຫາຍ ປທ ນາງ ຄຳຫລ້າ ແກ້ວອຸ່ນຄຳ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ-ການປົກຄອງແຫ່ງຊາດ, ສະຫາຍ ລັນ ແສງອາພອນ ຮອງເລຂາຄະນະບໍລິຫານພັກ,ຄະນະປະຈຳພັກ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ຫົວໜ້າສະຖາບັນ ຍທຂ, ຫົວໜ້າກົມ, ຫົວໜ້າພະແນກ ຈາກສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາແຂກອ້ອມຂ້າງກະຊວງ ແລະ ບັນດາ ຄູອາຈານ, ແຂກທີ່ມີກຽດ ແລະ ນັກຮຽນ ເຂົ້າຮ່ວມໃນພີທີປິດຊຸດຮຽນຄັ້ງນີ້.
ພິທີປິດຄັ້ງນີ້ ທ່ານ ບຸນທະວີ ວິໄລສອນ ຫົວໜ້າພະແນກຈັດຕັ້ງ-ບໍລິຫານ ແລະ ກວດກາ ຕາງໜ້າໃຫ້ສະຖາບັນ ຍທຂ ໄດ້ລາຍງານຜົນສຳເລັດຂອງບັ້ນການຮຽນການສອນ ຄື: ຊຸດການຮຽນການສອນຫລັກສູດ ທີດສະດີການເມືອງ ແລະ ການປົກຄອງ ຂັ້ນຕົ້ນລະບົບ 3ເດືອນ ຊຸດທີ I ໄດ້ດຳເນີນການສອນແຕ່ວັນທີ 25 ກໍລະກົດ ຈົນເຖິງ ວັນທີ 23 ຕຸລາ 2024 (ເປັນເວລາ 3ເດືອນ) ໃນຫລັກສູດນີ້ມີນັກຮຽນທັງໝົດ 30 ສະຫາຍ, ຍິງ 06 ສະຫາຍ. ບັນດານັກຮຽນທັງໝົດແມ່ນມາຈາກ ຫ້ອງການ, ບັນດາກົມ, ສະຖາບັນ, ກອງວິຊາການ, ອົງການຈັດຕັ້ງມະຫາຊົນ, ພະແນກ ຍທຂ ນະຄອນຫລວງ ແລະ ລັດວິສະຫະກິດ ອ້ອມຂ້າງກະຊວງ. ທາງດ້ານເນື້ອໃນຂອງຊຸດຮຽນທີດສະດີການເມືອງ ຂັ້ນຕົ້ນ ລະບົບ 3 ເດືອນ ປະກອບມີບົດຮຽນທັງໝົດ 10 ບົດ ຄື: ປັດຊະຍາມາກ-ເລນິນ; ເສດຖະກິດການເມືອງມາກ-ເລນິນ; ລັດທິສັງຄົມນິຍົມວິທະຍາສາດ; ການເມືອງວິທະຍາ; ສັງຄົມສາດ; ແນວຄິດໄກສອນ ພົມວິຫານ; ການຄຸ້ມຄອງ ແລະ ບໍລິຫານລັດ; ທິດສະດີລັດ-ກົດມາຍ; ເຕັກນິກບໍລິຫານ ແລະ ປະຫວັດສາດພັກ ແລະ ກໍ່ສ້າງພັກ, ການຂື້ນຫ້ອງສິດສອນແມ່ນມີບັນດາຄູອາຈານເຂົ້າຮ່ວມສິດສອນທັງໝົດ 33 ທ່ານ ຊຶ່ງມາຈາກສະຖາບັນການເມືອງ ແລະ ການປົກຄອງແຫ່ງຊາດ. ໃນຊຸດຮຽນທິດສະດີການເມືອງຂັ້ນຕົນລະບົບ 3 ເດືອນ ຊຸດນີ້ ສະຖາບັນ ຍທຂ ຍັງໄດ້ເຊີນຄະນະນຳຂັ້ນກົມຂອງກະຊວງ ຍທຂ ມາໃຫ້ຄວາມຮູ້ ແລະ ຄວາມເຂົ້າໃຈຕື່ມ ເພື່ອໃຫ້ເຂົາເຈົ້າຮຽນຮູ້ ແລະ ໝູນໃຊ້ ບັນດາບົດຮຽນເຂົ້າສູ່ພາກປະຕິບັດຕົວຈິງ ໃນຂົງເຂດວຽກງານວິຊາສະເພາະຂອງຕົນ.
ຫລັງຈາກນັ້ນ, ຈຶ່ງໄດ້ມີພິທີມອບໃບຢັ້ງຢືນການຝຶກອົບໃຫ້ແກ່ນັກຮຽນ ຈຳນວນ 30 ສະຫາຍ ໂດຍການມອບໃບຢັ້ງຄັ້ງນີ້ ແມ່ນ ສະຫາຍ ປທ ນາງ ຄຳຫລ້າ ແກ້ວອຸ່ນຄຳ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ-ການປົກຄອງແຫ່ງຊາດ ແລະ ໃຫ້ກຽດຢືນເປັນສັກຂີພິຍານໂດຍ ສະຫາຍ ລັນ ແສງອາພອນ ຮອງເລຂາຄະນະບໍລິຫານພັກ,ຄະນະປະຈຳພັກ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ພິທີມອບແມ່ນເຕັມໄປດ້ວຍບັນຍາກາດອັນຟົດຟືນ ແລະ ໄດ້ຮັບຜົນສຳເລັດເປັນຢ່າງດີ.
ພາຍຫລັງໄດ້ມອບໃບຢັ້ງຢືນໃຫ້ນັກຮຽນທິດສະດີການເມືອງຄັ້ງນີ້ແລ້ວ ທ່ານຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ກໍ່ໄດ້ມີຄຳເຫັນໂອ້ລົມຕໍ່ນັກຮຽນດັ່ງນີ້: ເພື່ອເຮັດໃຫ້ນັກຝຶກອົບຮົມມີຄວາມຮັບຮູ້ອັນໃໝ່ ເຊັ່ນ: ບັນດາຫຼັກມູນພື້ນຖານຂອງທິດສະດີມາກ-ເລນິນ ໃນເງື່ອນໄຂໃໝ່, ມີຄວາມເຂົ້າໃຈຢ່າງເປັນລະບົບ ແລະ ຈະແຈ້ງກວ່າເກົ່າ ເປັນຕົ້ນແມ່ນ ວິທີສັດຈະວິພາກວັດຖຸນິຍົມ, ບັນດາຄູ່ມາດຕະເກນ ແລະ ກົດເກນພື້ນຖານຕ່າງໆ, ທິດສະດີວ່າດ້ວຍຮູບຖານເສດຖະກິດສັງຄົມ, ບັນດາຫຼັກມູນພື້ນຖານທາງດ້ານທິດສະດີເສດຖະສາດການເມືອງຂອງມາກ, ແນວທາງເສດຖະກິດ ແລະ ນະໂຍບາຍສັງຄົມຂອງພັກ, ທິດສະດີກໍ່ສ້າງພັກແບບໃໝ່ຂອງເລນິນ, ແນວຄິດໄກສອນພົມວິຫານ, ເຊິ່ງເປັນຫຼັກມູນທິດສະດີພື້ນຖານທີ່ພັກລັດພວກເຮົາໝູນໃຊ້; ເພື່ອເຮັດໃຫ້ນັກຝຶກອົບຮົມສາມາດກຳໄດ້ກ່ຽວກັບ ບົດບາດການນຳພາຂອງພັກ ແລະ ການຄຸ້ມຄອງຂອງລັດ ຕໍ່ກົນໄກເສດຖະກິດຕະຫລາດ, ການພົວພັນເສດຖະກິດກັບຕ່າງປະເທດ ແລະ ການສູ້ຊົນເຮັດໃຫ້ປະເທດເຮົາຫຼຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາ; ເພື່ອໃຫ້ພວກເຮົາໄດ້ພ້ອມກັນເຊື່ອມຊຶມຄືນໃໝ່ ຕໍ່ແນວທາງປ່ຽນແປງໃໝ່ຂອງພັກຢ່າງຮອບດ້ານທີ່ມີຫຼັກການຂອງພັກ, ເປັນຕົ້ນແມ່ນຈຸດໝາຍເສັ້ນທາງກ້າວຂຶ້ນສັງຄົມນິຍົມຂອງປະເທດເຮົາ, ຮັບຮູ້ບັນຫາແນວທາງເສດຖະກິດ ແລະ ນະໂຍບາຍສັງຄົມຈຳນວນໜຶ່ງທີ່ຈຳເປັນຂອງພັກ ແລະ ລັດຖະບານ; ແລະ ໃນການຝຶກອົບຮົມຄັ້ງນີ້ ຍັງໄດ້ສ້າງທັດສະນະຫຼັກ ໝັ້ນການເມືອງ ໃຫ້ມີຄວາມໜັກແໜ້ນຕື່ມອີກບາດກ້າວໜຶ່ງ, ພ້ອມກັນນີ້ ຍັງເປັນການຝຶກຝົນຫຼໍ່ຫຼອມຕົນເອງທາງດ້ານຄຸນສົມບັດສິນທຳປະຕິວັດ, ເພີ່ມທະວີສະຕິລະວັງຕົວຕໍ່ກົນອຸບາຍຂອງສັດຕູ ແລະ ກຸ່ມຄົນທີ່ບໍ່ດີ. ພ້ອມກັນນັ້ນ ຍັງເປັນການສ່ອງແສງໃຫ້ເຫັນດ້ານຕັ້ງໜ້າດ້ານປະກົດການຫຍໍ້ທໍ້ ທີ່ເກີດຂຶ້ນໃນສັງຄົມ ກໍ່ຄືໃນຕົນເອງໃນໄລຍະຜ່ານມາ ແລະ ຊອກຫາວິທີການແກ້ໄຂຢ່າງເໝາະສົມ.
ສຸດທ້າຍ ທ່ານຮອງລັດຖະມົນຕີ ຍັງໄດ້ຮຽກຮ້ອງໃຫ້ນັກຝຶກອົບຮົມ ຕ້ອງໄດ້ນໍາເອົາສິ່ງທີ່ໄດ້ຮຽນຮູ້ມານີ້ ໄປໝູນໃຊ້ຢ່າງມີຫົວຄິດປະດິດສ້າງໃນວຽກງານຂອງຕົນ, ສືບຕໍ່ຮໍ່າຮຽນຄົ້ນຄວ້າ ແລະ ປະກອບສ່ວນວຽກງານຕາມການຈັດຕັ້ງມອບໝາຍໃຫ້ຢ່າງຈິງຈັງ, ກົງໄປກົງມາ ແລະ ມີຄວາມຮັບຜິດຊອບສູງ ເຮັດໃຫ້ການປະຕິບັດໜ້າທີ່ວຽກງານ ແລະ ແຜນການຈັດຕັ້ງປະຕິບັດໃນຕໍ່ໜ້າ ສອດຄ່ອງກັບສະພາວະຄວາມເປັນຈິງ ລະຫວ່າງຄວາມສາມາດ ແລະ ການຕອບສະໜອງດ້ານງົບປະມານ ແນໃສ່ຈັດຕັ້ງປະຕິບັດແຜນການ ວຽກງານຂອງກົມກອງຂອງຕົວເອງໃຫ້ປະກົດຜົນເປັນຈິງ.
