ພິທິເຊັນສົນທິສັນຍາທະວິພາຄີວ່າດ້ວຍການຂົນສົ່ງທາງອາກາດ ລະຫວ່າງ ສປປ ລາວ - ສະຫະພັນທະລັດ ສະວິດເຊິແລນ

ໃນຕອນເຊົ້າວັນທີ 26 ກໍລະກົດ 2024, ກະຊວງໂຍທາທິການ ແລະ ຂົນສົ່ງ ໄດ້ຖືເປັນກຽດຈັດພິທິເຊັນ ສົນທິສັນຍາ ທະວິພາຄີ ວ່າດ້ວຍການຂົນສົ່ງທາງອາກາດ ລະຫວ່າງ ສປປ ລາວ ແລະ ສະຫະພັນທະລັດ ສະວິດເຊີແລນ. ຕາງໜ້າໃຫ້ ແກ່ລັດຖະບານ ສປປ ລາວ ໂດຍ ທ່ານ. ງາມປະສົງ ເມືອງມະນີ (H.E. Mr.  Ngampasong Muongmany), ລັດຖະມົນຕີ ກະຊວງໂຍທາທິການ ແລະ ຂົນສົ່ງ ແລະ ທ່ານ. ອາເລັກຊານເດີ ຟາເຊວ (H.E. Mr.  Alexandre Fasel), ຮອງລັດຖະມົນຕີ ກະຊວງການຕ່າງປະເທດ ແຫ່ງ ສະວິດເຊິແລນ. ເປັນກຽດເຂົ້າ ຮ່ວມ ເປັນ ສັກຂີພະຍານຝ່າຍລາວ ໂດຍກົມ ແລະ ກອງວິຊາການທີ່ກ່ຽວຂ້ອງພາຍໃນ ກະຊວງໂຍທາທິການ ແລະ ຂົນສົ່ງ, ກົມສົນທິສັນຍາກະຊວງການຕ່າງປະເທດ. ເປັນກຽດເຂົ້າຮ່ວມເປັນສັກຂີພະຍານຝ່າຍ ສະວິດເຊີແລນ ໂດຍ ທ່ານເອກ ອັກຄະລັດຖະຖູດ, ເລຂາທູດ, ຫົວໜ້າຝ່າຍການຮ່ວມມື ສະວິດເຊີແລນ-ປະເທດແມ່ນໍ້າຂອງ ແລະ ຜູ້ຕາງໜ້າຈາກກະ ຊວງການຕ່າງປະເທດສະວິດເຊີແລນ.

ຈຸດປະສົງຂອງການເຊັນສົນທິສັນຍາທະວິພາຄີ ໃນຄັ້ງນີ້ແມ່ນເພື່ອປ່ຽນແທນ ສົນທິສັນຍາທີ່ ທັງ 2 ຝ່າຍ ໄດ້ ຮ່ວມລົງນາມ ໃນ ວັນທີ 15 ທັນວາ ປີ 1999, ເພື່ອເປັນການເພີ່ມທະວີການຮ່ວມມືຂອງ ທັງ 2 ປະເທດດ້ານວຽກງານ ການບິນພົນລະເຮືອນ, ຮັບປະກັນການເຊື່ອມໂຍງເຊື່ອມຈອດ, ສົ່ງເສີມ ແລະ ອຳນວຍຄວາມສະດວກການເປີດຖ້ຽວ ບິນຂົນສົ່ງ ຜູ້ໂດຍສານ, ສິນຄ້າ ແລະ ໄປສະນີພັນ. ຄຽງຄູ່ນີ້, ຍັງເປັນການ ສົ່ງເສີມການຄ້າ, ການທ່ອງທ່ຽວ ແລະ ການລົງທຶນລະຫວ່າງ 2 ປະເທດ ເພື່ອສ້າງລາຍຮັບ ໃຫ້ແກ່ ປະເທດຊາດ,  ພ້ອມດ້ວຍ ການຍົກບົດບາດ ຂະແຫນງການບິນພົນລະເຮືອນ ກໍຄືຕະຫລາດການບິນ ຂອງ ສປປ ລາວ ຂຶ້ນຕື່ມອີກ ໃນເວທີສາກົນ.

         ໃນປີ 2024 ນີ້ຖືເປັນນິມິດໝາຍທີ່ດີ ທີ່ ສປປ ລາວ ໄດ້ຮັບເປັນເຈົ້າພາບ ຈັດກອງປະຊຸມສຸດຍອດອາຊຽນ ແລະ ພິທີເຊັນສົນທິສັນຍາ ວ່າດ້ວຍການຂົນສົ່ງທາງອາກາດ ລະຫວ່າງ ສປປ ລາວ ແລະ ສະຫະພັນທະລັດສະວິດ ເຊີແລນ ກໍ່ເປັນອີກໜຶ່ງວາລະທີ່ສຳຄັນທີ່ ລັດຖະບານ ແຫ່ງ ສປປ ລາວ ໄດ້ຮັບກຽດເປັນເຈົ້າພາບ, ຊຶ່ງສົນທິສັນຍາດັ່ງກ່າວ ຈະຊ່ວຍເສີມຂະຫຍາຍວຽກງານຂົນສົ່ງທາງອາກາດລາວ ອອກສູ່ສາກົນ.