ທ່ານ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ເມແກັນ ໂຈນສ, ເອກອັກຄະລັດຖະທູດ ອົດສະຕຣາລີ ປະຈໍາ ສປປ ລາວ

ໃນຕອນບ່າຍຂອງວັນທີ 07 ພຶດສະພາ 2024, ທ່ານ ງາມປະສົງ ເມືອງມະນີ (H.E. Mr.  Ngampasong Muongmany),​ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ເມແກັນ ໂຈນສ (H.E. Ms. Megan Jones), ເອກອັກຄະລັດຖະທູດ ອົດສະຕຣາລີ ປະຈໍາ ສປປ ລາວ ພ້ອມດ້ວຍຄະນະ ໃນໂອກາດທີ່ຖືກແຕ່ງຕັ້ງໃຫ້ດຳລົງຕໍາແໜ່ງ ເປັນເອກອັກຄະລັດຖະທູດຄົນໃໝ່.

ໃນໂອກາດນີ້,​ ທ່ານລັດຖະມົນຕີ ງາມປະສົງ ເມືອງມະນີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ນາງ ເມແກັນ ໂຈນສ ທີ່ໄດ້ຮັບການແຕ່ງຕັ້ງມາດຳລົງຕໍາແໜ່ງ ເປັນເອກອັກຄະລັດຖະທູດ ອົດສະຕຣາລີ ຄົນໃໝ່ປະຈໍາ ສປປ ລາວ, ເຊິ່ງຖືວ່າເປັນຄາດໝາຍທີ່ດີທີ່ປະຊາຊົນ 2 ປະເທດ ລາວ-ອົດສະຕຣາລີ ກຳລັງຢູ່ໃນບັນຍາກາດສະເຫລີມສະຫລອງການເປີດນໍາໃຊ້ຂົວຂ້າມແມ່ ນຳ້ ແຫ່ງທີ 1 ຄົບຮອບ 30 ປີ. 

ທ່ານລັດຖະມົນຕີ ກະຊວງ ຍທຂ ໄດ້ຖືໂອກາດດັ່ງກ່າວສະແດງຄວາມຂອບໃຈ ຕໍ່ ລັດຖະ ບານອົດສະຕຣາລີ ທີ່ຍາມໃດກໍ່ໄດ້ໃຫ້ການຊ່ວຍເຫຼືອ ສປປ ລາວ ເປັນຕົ້ນແມ່ນ ໂຄງການ ກໍ່ສ້າງຂົວມິດຕະພາບ ແຫ່ງທີ 1 ທີ່ໄດ້ສຳເລັດການກໍ່ສ້າງ ແລະ ເປີດນໍາໃຊ້ແຕ່ປີ 1994 ໃນມູນຄ່າ 42 ລ້ານໂດລາອົດສະຕຣາລີ. ນອກຈາກນັ້ນ, ໃນປີ 1998-2000 ລັດຖະບານອົດສະຕຣາລີ ຍັງໃຫ້ງົບປະມານຊ່ວຍເຫຼືອລ້າໃນການກໍ່ສ້າງ ຂົວເຊບັງໄຟ, ຂົວເຊບັງຫຽງ ແລະ ຂົວເຊບັງນວນ ແລະ ຂົວອີກຈຳນວນໜຶ່ງ ລວມມູນຄ່າທັງໝົດ 18 ລ້ານໂດລາອົດສະຕຣາລີ.

ນອກຈາກນັ້ນ, ໃນປີ 2022 ຍັງໄດ້ສຶບຕໍ່ຊ່ວຍເຫືຼອດ້ານວິຊາການ ໃນມູນຄ່າປະມານ 10 ລ້ານໂດລາອົດສະຕຣາລີ ພາຍໃຕ້ໂຄງການຮ່ວມມືລະຫວ່າງລາວ-ອົດສະຕຣາລີ ເພື່ອການເຊື່ອມໂຍງ-ເຊື່ອມຈອດ (Laos-Australia Connectivity Partnership-LACP) ເຊິ່ງເປັນການປະກອບສ່ວນສຳຄັນ ໃນໂຄງການພັດທະນາຕາມແລວທາງເສດຖະກິດ ອາຊີຕາເວັນ ອອກສ່ຽງໃຕ້ ເພື່ອການເຊື່ອມຈອດເຊື່ອມໂຍງ  (SEARECC) ເປັນຕົ້ນການສຶກສາຄວາມເປັນໄປໄດ້ ແລະ ອອກແບບດ່ານສາກົນ ນໍ້າເງິນ ແລະ ປາງຫົກ, ການສຶກສາຄວາມເປັນໄປໄດ້ ທ່າບົກອຸດົມໄຊ ແລະ ທ່າບົກຫຼວງພະບາງ ແລະ ການສ້າງຍຸດທະສາການຂົນສົ່ງຫຼາຍຮູບແບບ ຂອງ ກະຊວງ ຍທຂ ແລະ ແຜນພັດທະນາການຂົນສົ່ງຫລາຍຮູບແບບ ສຳລັບ 5 ແຂວງ ພາກເໜືອ.

ມາຮອດປະຈຸບັນນີ້, ລັດຖະບານອົດສະຕາລີ ໄດ້ສຶບຕໍ່ສະໜັບສະໜູນ ການຮ່ວມມືກັບກະຊວງ ໂຍທາທິການ ແລະ ຂົນສົ່ງ ຢ່າງຮັດແໜ້ນ ທາງດ້ານໂຄງລ່າງພື້ນຖານ, ການພັດທະນາບຸກຄະລາກອນ ແລະ ການສ້າງຄວາມເຂັ້ມແຂງ ຂະແໜງ ໂຍທາທິການ ແລະ ຂົນສົ່ງ.