ການ ມອບ-ຮັບ ເຄື່ອງໃຊ້ຫ້ອງການ ລະຫວ່າງ ກົມຂົນສົ່ງ, ກະຊວງ ຍທຂ ແລະ ກົມຕຳຫຼວດຈະລາຈອນ, ກະຊວງ ປກສ, ພາຍໃຕ້ໂຄງການຂະແໜງຂົວທາງ ໄລຍະ 2 (LRSP2).

ການມອບ-ຮັບ ເຄື່ອງໃຊ້ຫ້ອງການ (ຄອມພິວເຕີຕັ້ງໂຕະ, ໂນດບຸກ ແລະ ເຄື່ອງພິມເອກະສານ) ລະຫວ່າງ ກົມຂົນສົ່ງ, ກະຊວງ ຍທຂ ແລະ ກົມຕຳຫຼວດຈະລາຈອນ, ກະຊວງ ປກສ, ຊຶ່ງມີຈຸດປະສົງເພື່ອຮັບໃຊ້ວຽກງານເຂົ້າໃນການເກັບກຳຂໍ້ມູນ ແລະ ສັງລວມສະຖິຕິອຸບປະຕິເຫດ ໃສ່ລະບົບໂປຣແກຣມ Data for Road Incident Visualisation Evaluation and Reporting (DRIVER), ເພື່ອນຳເອົາຂໍ້ມູນດັ່ງກ່າວ ມາວິເຄາະ, ວິໄຈ ແລະ ສາມາດປັບປຸງ, ແກ້ໄຂ ແລະ ປ້ອງກັນ ຈຸດທີ່ມັກເກີດອຸບປະຕິເຫດຕາມເສັ້ນທາງ ບໍ່ໃຫ້ມັນເກີດຕື່ມອີກ.

ຊຶ່ງພິທີດັ່ງກ່າວ, ໄດ້ຈັດຂຶ້ນ ໃນວັນທີ 21/5/2021, ທີ່ ຫ້ອງປະຊຸມ ກົມຂົນສົ່ງ, ກະຊວງ ຍທຂ, ໂດຍການເປັນປະທານຂອງທ່ານ ດຣ ບຸນຕາ ອ່ອນນາວົງ, ຫົວໜ້າກົມຂົນສົ່ງ ກະຊວງ ຍທຂ, ຊຶ່ງມີຜູ້ຕາງໜ້າຈາກ ທະນາຄານໂລກ ປະຈຳ ສປປ ລາວ, ກົມຕຳຫຼວດຈະລາຈອນ, ກະຊວງ ປກສ ແລະ ຜູ້ຕາງໜ້າຈາກ ປກສ ແຂວງ/ເມືອງ (ນະຄອນຫຼວງວຽງຈັນ, ວຽງຈັນ, ບໍລີຄຳໄຊ, ຄໍາມ່ວນ) ກໍ່ໄດ້ເຂົ້າຮ່ວມ, ມູນຄ່າເຄື່ອງທັງໝົດປະມານ 50,000 ໂດຣາສະຫະຣັດ.