ຂ່າວພາຍໃນກະຊວງ
ສສຊ ເຂດ I ນະຄອນຫລວງວຽງຈັນ ພົບປະ ກະຊວງ ຍທຂ
ໃນວັນທີ່ 14 ກັນຍາ 2012 ຢູ່ທີ່ກະຊວງໂຍທາທິການ ແລະຂົນສົ່ງ ຄະນະສະມາຊິກສະພາແຫ່ງຊາດຊຸດທີ VII ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ ໄດ້ລົງພົບປະໂອ້ລົມກັບພະນັກງານ ກະຊວງ ຍທຂ, ໂດຍແມ່ນທ່ານ ດຣ. ກິແກ້ວ ໄຂຄຳພິທູນ ກຳມະການສູນກາງພັກ, ຫົວໜ້າສະຖາບັນການເມືອງ-ການປົກຄອງແຫ່ງຊາດ ພ້ອມດ້ວຍສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ, ເປັນກຽດເຂົ້າຮ່ວມຂອງທ່ານ ສົມມາດ ພົລເສນາ ກຳມະການສູນກາງພັກ, ລັດຖະມົນຕີວ່າການ, ທ່ານ ບຸນຈັນ ສີນທະວົງ ລັດຖະມົນຕີຊ່ວຍວ່າການ ທັງເປັນ ສສຊ ເຂດເລືອກຕັ້ງທີ 13 ແຂວງສະຫວັນນະເຂດ. ພ້ອມດ້ວຍພະນັກງານຫລັກແຫ່ລງຂອງກະຊວງ ຍທຂ ເຂົ້າຮ່ວມຢ່າງພ້ອມພຽງ ຈຳນວນ 150 ທ່ານ.
ໃນການພົບປະໂອ້ລົມພະນັກງານຂອງ ສສຊ ເຂດເລືອກຕັ້ງທີ 1 ໄດ້ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VII ແລະເນື້ອໃນຈິດໃຈຄຳສັ່ງແນະນຳສະບັບເລກທີ 02, 03 ຂອງເຈົ້າຄອງນະຄອນຫລວງວຽງຈັນ ເພື່ອປຸກລະດົມຂະບວນການຂ່ຳນັບຮັບຕ້ອນກອງປະຊຸມຄູ່ຮ່ວມລັດຖະສະພາອາຊີ-ເອີລົບ (ASEP 7), ກອງປະຊຸມສຸດຍອດອາຊີ-ເອີລົບ (ASEM 9) ແລະງານມະຫາກຳກິລາມະຫາວິທະຍາໄລອາຊຽນ ຄັ້ງທີ 16 ທີ່ລາວເຮົາໄດ້ຮັບກຽດເປັນເຈົ້າພາບໃນທ້າຍປີ 2012.
