ຂ່າວ

ຂະແໜງ ຍທຂ ຈັດກອງປະຊຸມຝຶກອົບຮົມເຜີຍແຜ່ປຶ້ມຄູ່ມືກວດກາ ພາຍໃນ

ໃນວັນທີ 7 ມັງກອນ 2019 ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມຝຶກອົບຮົມເຜີຍແຜ່ປື້ມຄູ່ມືກວດກາ ພາຍໃນ ຂື້ນຢູ່ພະແນກ ຍທຂ ແຂວງໄຊຍະບູລີ ໂດຍການເປັນປະທານຂອງ ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ ເຊີ່ງມີ ທ່ານ ລົດ ສຸກສີວົງໄຊ ຮອງປະທານກວດກາ, ຮອງກົມກວດກາ, ບັນດາ ທ່ານຄະນະກົມ, ຄະນະພະແນກ ແລະ ພະນັກງານວິຊາການຜູ້ຮັບຜິດຊອບວຽກງານກວດກາ ກໍ່ເຂົ້າຮວ່ມ.

ໃນກອງປະຊຸມຝຶກອົບຮົມ ທ່ານປະທານກໍໄດ້ກ່າວຕໍ່ກອງປະຊຸມວ່າ: ວຽກງານກວດກາ ແມ່ນສ່ວນປະກອບອັນສຳຄັນ ທີ່ຕັດແຍກອອກຈາກກັນບໍ່ໄດ້ ແລະ ເປັນພາລະບົດບາດຕົ້ນຕໍແຫ່ງການນໍາພາຂອງພັກ ໃນເງື່ອນໄຂແຫ່ງຍຸກຂໍ້ມູນ ຂ່າວສານ, ໃນປັດຈຸບັນ ການກວດກາຍິ່ງມີບົດບາດພົ້ນເດັ່ນ ຊ່ວຍໃຫ້ຂຸດຄົ້ນຊອກເຫັນໄດ້ບັນດາປັດໄຈໃໝ່ ທີ່ກ້າວ ໜ້າ; ໃນໄລຍະຜ່ານມາ ຄະນະພັກແຕ່ລະຂັ້ນພາຍໃນ ກະຊວງໂຍທາທິການ ແລະ ຂົນສົ່ງ ກໍ່ໄດ້ເອົາໃຈໃສ່ນໍາພາ ວຽກງານກວດກາ ການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ, ແກ້ໄຂ ປະກົດການຫຍໍ້ທໍ້ຕ່າງໆ, ສາມາດສະກັດກັ້ນຂໍ້ຂາດຕົກບົກຜ່ອງ, ຄວາມຜິດພາດຂອງ ສະມາຊິກພັກ, ພະນັກ ງານ-ລັດຖະກອນ; ປະກອບສ່ວນສໍາຄັນເຂົ້າໃນການປັບປຸງການຈັດຕັ້ງ, ການກໍ່ສ້າງພັກ ແລະ ພະນັກງານ ຕະຫຼອດ ມາ; ສະແດງໃຫ້ເຫັນ ໃນແຕ່ລະໂຄງການລົງທຶນຂອງລັດ ກໍ່ສາມາດປະຫຍັດງົບປະມານໄດ້ຫຼາຍຕື້ກີບ. ຄ່ຽງຄູ່ກັບ ຜົນງານດັ່ງກ່າວ, ກໍ່ຍັງມີບັນດາຂໍ້ຄົງຄ້າງຈໍານວນໜຶ່ງຢູ່ ເປັນຕົ້ນ: ບັນດານິຕິກໍາຕ່າງໆ ໃນການກວດກາສະເພາະຂອງ ຂະແໜງ ຍທຂ ພວກເຮົາ ຍັງບໍ່ທັນມີຫຼາຍ.

ຍ້ອນເຫັນໄດ້ຄວາມສໍາຄັນດັ່ງກ່າວ, ຄະນະພັກ-ຄະນະນໍາກະຊວງ ຍທຂ ຈຶ່ງໄດ້ມອບໃຫ້ ກົມກວດກາ ເປັນເຈົ້າການ ສົມທົບກັບພາກສ່ວນກ່ຽວຂ້ອງ ເພື່ອສ້າງບັນດານິຕິກໍາທີ່ສໍາຄັນໃນການກວດກາ ສະເພາະຂະແໜງ ຍທຂ ພວກເຮົາ, ເຊິ່ງປຶ້ມຄູ່ມືດັ່ງກ່າວນີ້ສ້າງຂຶ້ນເພື່ອຜັນຂະຫຍາຍເນື້ອໃນຂອງ ກົດໝາຍວ່າດ້ວຍການຕ້ານການສໍ້ລາດບັງຫຼວງ (ສະບັບ ປັບປຸງ) ເລກທີ 039/ສພຊ, ລົງວັນທີ 17/12/2012 ເຂົ້າໃນການກວດກາທາງດ້ານເຕັກນິກ-ວິສະວະກໍາ ເຊັ່ນ: ກວດກາການລົງທຶນໂຄງການ, ກວດກາການຄຸ້ມຄອງສໍາຫຼວດ-ອອກແບບ, ກວດກາການປະມູນ, ກວດກາມູນຄ່າ ໂຄງການ, ກວດກາຄຸນະພາບໂຄງການ ແລະ ອື່ນໆ ແລະ ເພື່ອບັນລຸຈຸດປະສົງຄາດ  ໝາຍ, ທ່ານປະທານຍັງໄດ້ ສະເໜີມາຍັງບັນດານັກສຳມະນາກອນ ຈົ່ງຍົກສູງສະຕິຄວາມຮັບຜິດຊອບ ເຂົ້າໃນການຕິດຕາມຮັບຟັງ, ຄົ້ນຄວ້າ, ເຊື່ອມຊຶມ ແລະ ປະກອບຄໍາຄິດຄໍາເຫັນ ຢ່າງສັດຈະວິພາກ ຕໍ່ເນື້ອໃນຫົວຂໍ້ຕ່າງໆ ແລະ ນໍາໄປເຜີຍແຜ່ໃຫ້ທົ່ວເຖິງ ແລະ ເຂົ້າໃຈເລິກເຊິ່ງຕໍ່ການຈັດຕັ້ງປະຕິບັດໃຫ້ຖືກຕ້ອງ ແລະ ສໍາເລັດເປັນກ້າວໆໄປ ແລະ ຮັບປະກັນໄດ້ເຖິງ ຄວາມຖືກຕ້ອງຕໍ່ກົດໝາຍ ແລະ ລະບຽບການ.

ພິທີເປີດນໍາໃຊ້ເສັ້ນທາງປູຢາງສອງຊັ້ນທີ່ເປັນໂຄງການລະດັບຊາດຂອງລັດຖະບານ ຢູ່ແຂວງໄຊສົມບູນ

ໂຄງການກໍ່ສ້າງທາງປູຢາງສອງຊັ້ນ ເປັນໂຄງການລະດັບຊາດຂອງລັດຖະບານ ຊຶ່ງຈັດຕັ້ງປະຕິບັດຢູ່ແຂວງໄຊສົມບູນ, ທີ່ມີຊື່ວ່າເສັ້ນທາງເບີ 4: ເຊີ່ງເລີ່ມແຕ່ບ້ານພູຫົວຊ້າງ ຫາ ບ້ານອ່າວໃຕ້, ເມືອງອະນຸວົງ ຊຶ່ງເປັນເສັ້ນທາງຫຼວງຂອງ ແຂວງເລກທີ 9302 ເຊື່ອມຕໍ່ລະຫວ່າງເມືອງ ອະນຸວົງ ຫາ ເມືອງຮົ່ມ. ການກໍ່ສ້າງເສັ້ນທາງດັ່ງກ່າວແມ່ນໄດ້ແບ່ງ ອອກເປັນ 2 ຊ່ວງ ຄື: ຊ່ວງທີ 1: ແຕ່ ບ້ານພູຫົວຊ້າງ ຫາ ບ້ານອ່າວໃຕ້ ເມືອງອະນຸວົງ ແລະ ຊ່ວງທີ 2: ແຕ່ ບ້ານ ນໍ້າຄຽນ ເມືອງຮົ່ມ ຫາ ບ້ານອ່າວກາງ ເມືອງອະນຸວົງ.

ເສັ້ນທາງດັ່ງກ່າວມີຄວາມຍາວ 30,50 ກິໂລແມັດ, ໜ້າທາງປູດ້ວຍຢາງສອງຊັ້ນ (DBST), ຄວາມກວ້າງໜ້າທາງ 6,00 ແມັດ, ແຫລ່ງທຶນຊຳລະການກໍ່ສ້າງຈາກກະຊວງແຜນການ ແລະ ການລົງທຶນໂດຍສົມທົບກັບ ກະຊວງ ການເງິນ, ກະຊວງໂຍທາທິການ ແລະ ຂົນສົ່ງ ແລະ ແຂວງໄຊສົມບູນ ຈັດເຂົ້າເປັນໂຄງການສະເພາະ ໂດຍຂຶ້ນແຜນ ຊຳລະ ໃນໄລຍະ 6 ປີ, ເລີ່ມແຕ່ສົກງົບປະມານ 2014–2015 ເປັນຕົ້ນໄປ, ເຈົ້າຂອງໂຄງການແມ່ນພະແນກໂຍທາ ທິການ ແລະ ຂົນສົ່ງ ແຂວງໄຊສົມບູນ, ເຊີ່ງມີມູນຄ່າການກໍ່ສ້າງຂອງໂຄງການທັງໝົດຕາມສັນຍາ 263.360.699.113 ກີບ, ມີໄລຍະການກໍ່ສ້າງນັບແຕ່ວັນທີ 03 ກຸມພາ 2014 ຫາ 03 ກຸມພາ 2016, ແຕ່ເນື່ອງຈາກ ໂຄງການດັ່ງກ່າວບໍ່ສາມາດສຳເລັດຕາມແຜນ ຈຶ່ງໄດ້ຮັບອະນຸມັດໃຫ້ຕໍ່ໄລຍະເວລາຂອງໂຄງການຕື່ມອີກ ຈົນເຖິງວັນທີ 31 ທັນວາ 2018 ຈຶ່ງສຳເລັດ 100 ເປີເຊັນ.

ດັ່ງນັ້ນ, ໃນວັນທີ 28 ທັນວາ 2018 ທີ່ຜ່ານມາໄດ້ມີພິທີມອບ-ຮັບ ໂຄງການ ແລະ ເປີດນຳໃຊ້ເສັ້ນທາງເບີ 04 ຢູ່ ແຂວງໄຊສົມບູນ, ເຂົ້າຮ່ວມພິທີຄັ້ງນີ້ມີ ທ່ານ ວຽງສະຫວັດ ສີພັນດອນ ຄະນະພັກກະຊວງ, ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ, ທ່ານ ພອຍຄໍາ ຮຸ່ງບຸນຍວງ ຮອງເລຂາພັກແຂວງ, ຮອງເຈົ້າແຂວງໆໄຊສົມບູນ, ພ້ອມ ດ້ວຍບັນດາທ່ານ ຫົວໜ້າກົມ, ຫົວໜ້າພະແນກ ແລະ ບັນດາແຂກທີ່ເຂົ້າຮ່ວມ.

ກອງປະຊຸມຮຽບຮຽງຮ່າງກົດໝາຍວ່າດ້ວຍການລົດໄຟ

ເພື່ອເຮັດໃຫ້ຮ່າງກົດໝາຍວ່າດ້ວຍທາງລົດໄຟ ສົມບູນຍິ່ງຂື້ນ, ທາງຄະນະຮັບຜິດຊອບ ຈຶ່ງໄດ້ຕົກລົງເຫັນດີ ຈັດກອງ ປະຊຸມຮຽບຮຽງຮ່າງກົດໝາຍດັ່ງກ່າວນີ້ຂື້ນ ໃນວັນທີ 03 ມັງກອນ 2019 ທີ່ນາປ່າກວາງ ເມືອງແກ້ວອຸດົມ ແຂວງ ວຽງຈັນ ກອງປະຊຸມໄດ້ດໍາເນີນເປັນເວລາສອງວັນ 3 - 4 ມັງກອນ 2018. ໂດຍການເປັນປະທານຂອງ ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ, ທ່ານວຽງສະຫວັດ ສີພັນດອນ, ຮອງລັດຖະມົນຕີກະຊວງ ຍທຂ, ທ່ານ ສາຍທອງ ແກ້ວດວງດີ, ປະທານກໍາມາທິການກົດ ໝາຍ, ທ່ານ ບຸນປອນ ສີສຸລາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ມີຜູ້ແທນເຂົ້າຮ່ວມຈາກຫຼາຍພາກສ່ວນທີ່ກ່ຽວຂ້ອງ ເຊີ່ງປະກອບມີຄະນະ ກົມທາງລົດໄຟ, ຫົວໜ້າ ກົມນິຕິກຳ, ສະພາແຫ່ງຊາດ, ຫ້ອງວ່າການປະທານປະເທດ ແລະ ກະຊວງຍຸຕິທໍາ.

ເພື່ອປະຕິບັດຕາມແຜນບົດສັງລວມ, ຄຳເຫັນຂອງທ່ານສະມາຊິກສະພາແຫ່ງຊາດ ຕໍ່ຮ່າງກົດໝາຍວ່າດ້ວຍການ ລົດໄຟ ໃຫ້ເປັນສະບັບສົມບູນ ແລະ ເປັນເອກພາບ ເພື່ອປະກາດນໍາໃຊ້ຢ່າງເປັນທາງການ, ໃນກອງປະຊຸມສະໄໝ ສາມັນເທື່ອທີ 6 ຂອງສະພາແຫ່ງຊາດຊຸດທີ VIII ໄດ້ພິຈາລະນາຮັບຮອງເອົາກົດ ໝາຍວ່າດ້ວຍທາງລົດໄຟ, ໃນວັນທີ 17 ທັນວາ 2018 ໄດ້ມີການລົງຄະແນນສຽງເພື່ອຮັບຮອງເອົາກົດ ໝາຍສະບັບນີ້, ຊຶ່ງມີສະມາຊິກສະພາທັງໝົດ 129 ທ່ານ, ມີຄະແນນເຫັນດີ 111 ທ່ານ ເທົ່າກັບ 86%, ບໍ່ເຫັນດີ 16 ທ່ານ ເທົ່າກັບ 12%, ບໍ່ອອກສຽງ 2 ທ່ານ ເທົ່າກັບ 2%. ກົດໝາຍວ່າດ້ວຍການລົດໄຟສະບັບນີ້ແມ່ນກໍານົດ, ຫຼັກການ, ລະບຽບການ ແລະ ມາດຕະການ ກ່ຽວກັບ ການຄຸ້ມຄອງ, ຕິດຕາມ, ກວດກາວຽກງານການລົດໄຟເພື່ອໃຫ້ການຈັດຕັ້ງປະຕິບັດວຽກງານໃຫ້ມີປະສິດທິພາບ, ປະສິດທິຜົນ, ທັນສະໄໝ, ຍືນຍົງ ແລະ ເປັນມິດກັບສິ່ງແວດລ້ອມ, ແນໃສ່ຮັບປະກັນໃຫ້ການດໍາເນີນກິດຈະການ ການລົດໄຟ ແລະ ຂົນສົ່ງທາງລົດໄຟ ໃຫ້ມີຄວາມສະດວກ, ໂລ່ງລ່ຽນ, ວ່ອງໄວ, ເປັນລະບຽບຮຽບຮ້ອຍ, ປອດໄພ ສາມາດເຊື່ອມຈອດ, ເຊື່ອມໂຍງດັບພາກພື້ນ ແລະ ສາກົນ ປະກອບສ່ວນເຂົ້າໃນວຽກງານ ປ້ອງກັນຊາດ-ປ້ອງກັນ ຄວາມສະຫົງບ ແລະ ການພັດທະນາເສດຖະກິດ-ສັງຄົມຂອງຊາດ ແລະ ໃຫ້ສໍາເລັດກັບແຜນຍຸດທະສາດການລົດໄຟ ທີ່ໄດ້ວາງອອກ.

ໃນກອງປະຊຸມ ຜູ້ແທນຈາກຫຼາຍພາກສ່ວນທີ່ເຂົ້າຮ່ວມ ໄດ້ປະກອບຄໍາຄິດເຫັນ, ຄໍາອະທິບາຍ ເຂົ້າໃສ່ບົດສັງລວມຄໍາ ເຫັນຂອງ ສະມາຊິກສະພາແຫ່ງຊາດຕໍ່ກົດໝາຍດັ່ງກ່າວ ເພື່ອໃຫ້ກົດໝາຍສົມບູນ ແລະ ໃນຕອນທ້າຍຂອງກອງ ປະຊຸມ ທ່ານ ສົມພັນ ແພງຄຳມີ ຮອງສະພາແຫ່ງຊາດ, ທັງເປັນປະທານຈຶ່ງໄດ້ສະຫຼູບກອງປະຊຸມດັ່ງນີ້ “ການຮຽບຮຽງ ກົດໝາຍໃນຄັ້ງນີ້ ໄດ້ມອບໃຫ້ຄະນະທັງສອງຝ່າຍ ກໍ່ຄືກະຊວງ ຍທຂ ແລະ ຄະນະກໍາມາທິການສະພາແຫ່ງຊາດ ກັບໄປຮຽບນຽງຄືນ, ສໍາລັບເນື້ອໃນແມ່ນຫ້າມມີການປ່ຽນແປງໃດໆ, ຖ້າຈະມີການປ່ຽນແປງແມ່ນໃຫ້ເຮັດໜັງສືສະເໜີ ຢ່າງເປັນທາງການ ເພື່ອຂໍປ່ຽນ ຫຼືດັດແກ້ເນື້ອໃນ, ຕ້ອງກວດກາ ດ້ານຫຼັກໄວຍາກອນພາສາລາວ ໃຫ້ຖືກຕ້ອງ ແລະ ຊັດເຈນ ແລ້ວມອບໃຫ້ຄະນະກໍາມາທິການຜູ້ຮັບຜິດຊອບແຕ່ລະຂັ້ນຕອນ” ກອງປະຊຸມໄດ້ສໍາເລັດຢ່າງເປັນທາງການ ໃນຕອນແລງຂອງວັນທີ 4 ມັງກອນ 2019.

ເຜີຍແຜ່ສອງກົດໝາຍສະບັບປັບປຸງ ແລະ ບັນດານິຕິກຳທີ່ກ່ຽວຂ້ອງ ຂອງຂະແໜງການ ຍທຂ

ໂດຍປະຕິບັດຕາມຂໍ້ຕົກລົງຂອງລັດຖະມົນຕີ ວ່າດ້ວຍການອະນຸມັດຈັດກອງປະຊຸມເຜີຍແຜ່ ກົດໝາຍວ່າດ້ວຍ ການ ຜັງເມືອງ (ສະບັບປັບປຸງ), ກົດໝາຍວ່າດ້ວຍການບິນພົນລະເຮືອນ (ສະບັບປັບປຸງ) ແລະບັນດານິຕິກຳທີ່ກ່ຽວຂ້ອງ ສະບັບເລກທີ 29603/ຍທຂ.ຫກ, ລົງວັນທີ 17 ທັນວັນ 2018, ກົມນິຕິກໍາໄດ້ຮ່ວມກັບກົມເຄຫາ-ຜັງເມືອງ ແລະ ກົມການບິນພົນລະເຮືອນ, ໄດ້ຈັດກອງປະຊຸມຂຶ້ນໃນວັນທີ 24-25 ທັນວາ 2018 ທີ່ທ່າລາດ ແຂວງວຽງຈັນ, ໂດຍການ ເປັນປະທານຂອງ ທ່ານ ດາວເຮືອງ ນັນທາວົງ, ຮອງເຈົ້າແຂວງແຂວງວຽງຈັນ ແລະ ສຈ ປອ ບຸນດຫຼື່ອມ ສີສຸລາດ, ຜູ້ຊ່ວຍລັດຖະມົນຕີ, ມີບັນດາແຂກເຂົ້າຮ່ວມຈາກກົມ, ກອງອ້ອມຂ້າງກະຊວງ ຍທຂ, ກະຊວງທີ່ກ່ຽວຂ້ອງທັງພາກລັດ ແລະພາກທຸລະກິດ ແລະຈາກບັນດາພະແນກການທີ່ກ່ຽວຂ້ອງ 5 ແຂວງພາກກາງ.

ໃນກອງປະຊຸມໄດ້ຮັບການເຜີຍແຜ່ໂດຍທ່ານ ສຈ ປອ ບຸນເຫຼື່ອມ ສີສຸລາດ, ຜູ້ຊ່ວຍລັດຖະມົນຕີ, ທ່ານ ສຈ ປອ ສົມພອນ ເດດອຸດົມ, ທີ່ປຶກສາລັດຖະມົນຕີ ແລະ ທ່ານ ບົວຂາວ ຂຸນພະຍາ ຮອງຫົວໜ້າກົມການບິນພົນລະເຮືອນ, ຕາມວາລະຂອງກອງປະຊຸມ, ໃນການບັນຍາຍໄດ້ອະທິບາຍແບບລວມໆ ແລະໄດ້ເນັ້ນເຖິງເນື້ອໃນບາງມາດຕະການ ທີ່ສຳຄັນຂອງກົດໝາຍ, ທີ່ຕິດພັນກັບບັນກາຂໍ້ຫຍຸ້ງຍາກທີ່ເກີດຂື້ນກັບສັງຄົມຂອງການຄຸ້ມຄອງວຽກກິດຈະການທີ່ ກ່ຽວຂ້ອງ, ພາຍຫຼັງໄດ້ຮັບຟັງການເຜີຍແຜ່ກົດໝາຍ ຜູ້ແທນທີ່ເຂົ້າຮ່ວມກອງປະຊຸມໄດ້ມີການສົນທະນາແລກປ່ຽນ ບາງບັນຫາທີ່ຍັງຄ້າງຄາ ແລະຊ່ວຍກັນແຫ້ໄຂບັນຫາຢ່າງຫົງໄປກົງມາ.

ໃນຕອນທ້າຍຂອງກອງປະຊຸມ ທ່ານ ສຈ ປອ ບຸນເຫຼື່ອມ ສີສຸລາດ, ຜູ້ຊ່ວຍລັດຖະມົນຕີ ໄດ້ມີການສັງເກດຕີລາຄາ ລວມດ້ານດີ ແລະຂໍ້ຄົງຄ້າງດັ່ງນີ້: ດ້ານດີແມ່ນ ເຮັດໃຫ້ຜູ້ເຂົ້າຮ່ວມກອງປະຊຸມໃນຄັ້ງນີ້ ໄດ້ມີຄວາມຮັບຮູ້ ແລະເຂົ້າໃຈ ຫຼາຍຂຶ້ນພ້ອມທັງເປັນເຄື່ອງມື ແລະການສ້າງນິຕິກຳທີ່ກ່ຽວຂ້ອງຂອງຂະແໜງ ຍທຂ, ເປັນບ່ອນອີງໃນການຄຸ້ມຄອງ ກິດຈະການຜັງເມືອງ, ການບິນພົນລະເຮືອນ ແລະເຕັກນິກການສ້າງນິຕິກໍາ ໃຫ້ຖືກຕ້ອງຕ່ມຂັ້ນຕອນດ້ານວິຊາການ ແລະມາດຖານເຕັກນິກຂອງກະຊວງ ຍທຂ, ໃຫ້ສອດຄ່ອງກັບເຕັກນິກຂອງພາກພື້ນ ແລະສາກົນ ແລະບັນຂໍ້ຄົງຄ້າງ ແມ່ນສັງເກດເຫັນວ່າການຍົກບັນຫາສົນທະນາ ຄໍາຖາມ-ຕອບຂໍ້ຂ້ອງໃຈ ຂອງຜູ້ເຂົ້າຮ່ວມໃນກອງປະຊຸມຍັງບໍ່ທັນ ກວ້າງຂວາງເທົ່າທີ່ຄວນ.

Additional information