ຂ່າວ

ກອງປະຊຸມປຶກສາຫາລືກ່ຽວກັບແລວທາງລົດໄຟ ເຊື່ອມຕໍ່ແຕ່ນະຄອນຫລວງວຽງຈັນ ສປປ ລາວ ຫາ ທ່າເຮືອຫວຸ້ງອ່າງ ສສ ຫວຽດນາມ

ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມປຶກສາຫາລືກ່ຽວກັບການກໍ່ສ້າງ ແລະ ດຳເນີນການແລວທາງ ລົດໄຟເຊື່ອມຕໍ່ແຕ່ນະຄອນຫລວງວຽງຈັນຫາທ່າເຮືອຫວຸ້ງອ່າງ ສສ ຫວຽດນາມ ກອງປະຊຸມດັ່ງກ່າວໄດ້ຈັດຂຶ້ນໃນ ວັນທີ 6 ສິງຫາ 2018 ຜ່ານມານີ້ ຢູ່ທີ່ກະຊວງ ຍທຂ ນະຄອນຫລວງວຽງຈັນ ມີ ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງ ຍທຂ, ສປປ ລາວ ຝ່າຍ ສສ ຫວຽດນາມ ແມ່ນທ່ານ ຫງວຽນງ໊ອກດົ່ງ ຮອງລັດຖະມົນຕີ ກະຊວງຄົມມະນາຄົມ-ຂົນສົ່ງ ສສ ຫວຽດນາມ ມີບັນດາກົມ, ກອງ ແລະ ຊ່ຽວຊານທີ່ກ່ຽວຂ້ອງເຂົ້າຮ່ວມ.  ເຊິ່ງແລວ ທາງລົດໄຟເຊື່ອມຕໍ່ແຕ່ນະຄອນຫລວງວຽງຈັນ ສປປ ລາວ ຫາ ທ່າເຮືອຫວຸ້ງອ່າງ ສສ ຫວຽດນາມ ມີຈຸດເລີ່ມຕົ້ນແມ່ນ ນະຄອນຫລວງວຽງຈັນ ສປປ ລາວ ຈຸດສຸດທ້າຍແມ່ນທ່າເຮືອຫວຸ້ງອ່າງ ສສ ຫວຽດນາມ ດ້ວຍຄວາມຍາວທັງໝົດແມ່ນ 555 ກິໂລແມັດ ຜ່ານບັນດາເມືອງ, ແຂວງ ຄື: ແຂວງຄຳມ່ວນ, ແຂວງບໍລິຄຳໄຊ, ນະຄອນຫລວງວຽງຈັນ (ສປປ ລາວ) , ແຂວງກວ່າງບິ່ງ, ແຂວງຮ່າຕິ່ງ (ສສ ຫວຽດນາມ) ຕາມແລວທາງທີ່ຜ່ານເຂດຊາຍແດນທີ່ຜ່ານສອງປະເທດ ຢູ່ທີ່ອຸມົງທາງລົດໄຟ ບໍລິເວນຊາຍແດນໃກ້ກັບ ດ່ານຊາຍແດນສາກົນ ນາເພົ້າ ແຂວງຄຳມ່ວນ (ສປປ ລາວ) ແລະ ດ່ານຈາລໍ ແຂວງກວ່າງບິ່ງ (ສສ ຫວຽດນາມ) ໂດຍໄດ້ຮັບການຊ່ວຍເຫຼືອດ້ານງົບປະມານຈາກອົງການສາກົນ ສ.ເກົາຫລີ (KOICA) ເຊິ່ງທັງສອງຝ່າຍ ເປັນເອກະພາບກັນໃຫ້ສໍາເລັດບົດສຶກສາຄວາມເປັນໄປໄດ້ ຂອງຊ່ວງທາງ ລົດໄຟຂອງປະເທດຂອງຕົນ ຕາມລະບຽບກົດໝາຍຂອງແຕ່ລະປະເທດ ເພື່ອພິຈາລະນາຕົກລົງບົນພື້ນຖານຮັບຮອງ ດັ່ງກ່າວ ສອງຝ່າຍລາຍງານຜົນການສຶກສາຄວາມເປັນໄປໄດ້ ຂອງໂຄງການໃຫ້ກັນຊາບ ເພື່ອຈຸດປະສົງພັດທະນາ ໂຄງການຮ່ວມກັນ ຕາມແຜນການລວມ ແລະ ຄາດຄະເນການແບ່ງຊ່ວງລົງທຶນ.

ການເບີກຈ່າຍຄ່າຊົດເຊີຍສິ່ງກີດຂວາງຂອງໂຄງການກໍ່ສ້າງ ທາງລົດໄຟ ລາວ-ຈີນ ໄດ້ເລີ່ມແລ້ວ

ພາຍຫລັງທີ່ ຄູ່ມືການເບີກຈ່າຍຄ່າຊົດເຊີຍ ໄດ້ຖືກຮັບຮອງຢ່າງເປັນທາງການ ໃນວັນທີ 11 ມີຖຸນາ 2018 ແລະ ລາຄາ ຫົວໜ່ວຍສໍາລັບການຊົດເຊີຍສິ່ງກີດຂວາງ ຂອງນະຄອນຫລວງ ແລະ ທັງ 4 ແຂວງທີ່ມີໂຄງການຜ່ານ ໄດ້ມີການ ຮັບຮອງຈາກສະພາທ້ອງຖິ່ນຢ່າງເປັນທາງການແລ້ວ, ບໍລິສັດທາງລົດໄຟລາວ-ຈີນ ໄດ້ສົມທົບ ກັບຄະນະຄຸ້ມຄອງ ໂຄງການ, ຫ້ອງການປະສານງານໂຄງການ, ຄະນະກຳມະການໄກ່ເກັ່ຍນະຄອນຫລວງ/ແຂວງ, ຄະນະກໍາມະການ ໄກ່ເກັ່ຍເມືອງ ແລະ ບໍລິສັດຜູ້ຮັບເໝົາໄດ້ດໍາເນີນການລົງກວດກາຕົວຈິງ ແລະ ສ້າງເອກະສານຢັ້ງຢືນຜົນກະທົບ ຈາກການກໍ່ສ້າງໂຄງການ, ຊຶ່ງສາມາດ ສ້າງເອກະສານຢັ້ງຢືນເພື່ອເປີກຈ່າຍຄ່າຊົດເຊີຍ ງວດທີ 1 ໄດ້ສໍາເລັດທັງໝົດ ຢູ່ 3 ແຂວງ ລວມມູນຄ່າ 56.518.823.375 ກີບ ຄື: ແຂວງຫຼວງນ້ໍາທາ ຊົດເຊີຍ ທີ່ພັກອາໄສ ພ້ອມ ຕອນດິນ ຈຳນວນ 41 ຄອບຄົວ ເປັນມູນຄ່າ 28.541 250.000 ກີບ, ແຂວງອຸດົມໄຊ ຊົດເຊີຍ ທີ່ພັກອາໄສ ພ້ອມ ຕອນດິນ ຈໍານວນ 13 ຄອບຄົວ ແລະ ໂຮງຮຽນມັດທະຍົມ 1 ແຫ່ງ ເປັນມູນຄ່າ 20.348 597.769 ກີບ ແລະ ແຂວງວຽງຈັນ ຊົດເຊີຍ ທີ່ພັກອາໄສ ພ້ອມ ຕອນດິນ ຈໍານວນ 22 ຄອບຄົວ ເປັນມູນຄ່າ 7,628.975.000 ກີບ, ຈໍານວນ ເງິນມູນຄ່າດັ່ງກ່າວນີ້, ບໍລິສັດທາງລົດໄຟລາວ-ຈີນ ໄດ້ໂອນເຂົ້າບັນຊີຂອງຄະນະກໍາມະການໄກ່ເກັ່ຍຂອງແຂວງແລ້ວ ໃນ ວັນທີ 25/7/2018 ແລະ ທຸກແຂວງທີ່ກ່ຽວຂ້ອງ ໄດ້ແຈ້ງຕອບວ່າໄດ້ຮັບເງິນຈໍານວນດັ່ງກ່າວແລ້ວ, ຂັ້ນຕອນຕໍ່ໄປ ຄະນະກໍາມະການໄກ່ເກັ່ຍແຂວງ ຈະໄດ້ດຳເນີນການເບີກຈ່າຍຄ່າຊົດເຊີຍ ໃຫ້ປະຊາຊົນຜູ້ທີ່ຖືກຜົນກະທົບ ຕາມ ຈໍານວນມູນຄ່າເງິນ ທີ່ໄດ້ຕົກລົງຮັບຮອງນໍາກັນ ໂດຍຜ່ານບັນຊີທະນາຄານຂອງຜູ້ທີ່ຖືກຜົນກະທົບ ຫຼື ຮັບເປັນເງິນສົດ (ໃນກໍລະນີຜູ້ທີ່ຖືກຜົນກະທົບບໍ່ມີບັນຊີທະນາຄານ).ສໍາລັບການເບີກຈ່າຍຄ່າຊົດເຊີຍຈໍານວນທີ່ຍັງເຫລືອນັ້ນ, ຂຶ້ນຢູ່ ກັບຄວາມພ້ອມຂອງຄວາມສຳເລັດການສ້າງເອກະສານຢັ້ງຢືນຜົນກະທົບເພື່ອການເປີກຈ່າຍຄ່າຊົດເຊີຍ. ຖ້າຫາກ ບ້ານໃດ, ເມືອງໃດ, ແຂວງໃດ ສ້າງເອກະສານດັ່ງກ່າວສໍາເລັດຮຽບຮ້ອຍແລ້ວ ກໍຈະໄດ້ດໍາເນີນການເບີກຈ່າຍຄ່າ ຊົດເຊີຍໃຫ້ເປັນລໍາດັບ ຕໍ່ໆໄປຕາມບັນຊີບູລິມະສິດຂອງແຂວງ ຈົນກວ່າການເບີກຈ່າຍຄ່າຊົດເຊີຍຈະສຳເລັດເສັດສິ້ນ ໂດຍສົມບູນ.

      ໂຄງການກໍ່ສ້າງທາງລົດໄຟ ລາວ-ຈີນ ເປັນໂຄງການຮ່ວມມືຍຸດທະສາດຂອງສອງປະເທດລາວ-ຈີນ ຊຶ່ງພັກ ແລະ ລັດຖະບານຂອງສອງປະເທດລາວ-ຈີນ ໄດ້ເອົາໃຂໃສ່ເປັນພິເສດ, ໂຄງການ ນີ້ເປັນໂຄງການທີ່ມີຄວາມໝາຍຄວາມ ສຳຄັນທີ່ສຸດ ໃນການພັດທະນາພື້ນຖານໂຄງລ່າງຄົມມະນາຄົມ ຂົນສົ່ງ ຂອງ ສປປ ລາວ ຕາມນະໂຍບາຍ ຫັນ ປະເທດຈາກສະຖານະພາບການເປັນປະເທດ ທີ່ບໍ່ມີ ຊາຍແດນຕິດກັບທະເລ ກາຍເປັນປະເທດເຊື່ອມຈອດ ແລະ ເປັນການຈັດຕັ້ງປະຕິບັດນະໂຍບາຍ ຂອງ ສປ ຈີນ ”ໜຶ່ງແລວໜຶ່ງເສັ້ນທາງ”. ພ້ອມດຽວກັນນັ້ນໂຄງການນີ້ ຍັງໄດ້ ສະແດງໃຫ້ເຫັນເຖິງສອງ ປະເທດ ລາວ-ຈີນ ໄດ້ພ້ອມກັນປະຕິບັດ ເພື່ອບັນລຸຂໍ້ຕົກລົງວ່າດ້ວຍຍຸດທະສາດ ການ ເຊື່ອມຈອດ ອາຊຽນ-ຈີນ ຊຶ່ງໄດ້ລົງນາມຮ່ວມກັນລະຫວ່າງລັດຖະບານ ຂອງບັນດາປະເທດອາຊຽນ ແລະ ລັດຖະບານ ສປ ຈີນ.

ໂຄງການກໍ່ສ້າງທາງລົດໄຟ ແຕ່ຊາຍແດນລາວ-ຈີນ ເຖິງ ສະຖານີຂົນສົ່ງ ໂດຍສານນະຄອນຫລວງວຽງຈັນ ມີຄວາມ ຍາວ 409 ກມ, ຊຶ່ງແລວທາງລົດໄຟໄດ້ຜ່ານ 5 ແຂວງຄື: ຫລວງນໍ້າທາ ກວມເອົາ 16,9 ກມ, ອຸດົມໄຊ 126,6 ກມ, ຫລວງພະບາງ 80 ກມ, ວຽງຈັນ 145,5 ກມ ແລະ ນະຄອນຫລວງວຽງຈັນ 40 ກມ. ໄລຍະເວລາ ການກໍ່ສ້າງ ແມ່ນ 5 ປີ, ຊຶ່ງເລີ່ມການກໍ່ສ້າງ ໃນວັນທີ 01 ມັງກອນ 2017 ແລະ ຄາດວ່າຈະສໍາເລັດໃນວັນທີ 02 ທັນວາ 2021.

ພິທີເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 50 ວັນ ຊຸດທີ XXI

  ພິທີເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 50 ວັນ ຊຸດທີ XXI ໃຫ້ແກ່ ພະນັກງານຫລັກແຫລ່ງ ຂອງ ກະຊວງໂຍທາທິການ ແລະ ຂົນສົ່ງ ​ໄດ້​ຈັດ​ຂີ້ື້ນວັນ​ທີ 27  ກໍລະກົດ 2018 ທີ່ສະຖາບັນ ຝຶກອົບຮົບ ໂຍທາທິການ ແລະ ຂົນສົ່ງ (ຫລັກ 19 ທ່າ​ນາ​ແລ້ງ) ​ໂດຍ​​ການເປັນປະທານ​ຂອງ ສະຫາຍ ບຸນຈັນ ສິນຣາຊະວົງ ເລຂາຄະນະ​ພັກຫ້ອງການ​ກະຊວງ, ໂດຍການເຂົ້າຮ່ວມຂອງບັນດາຄະນະກົມ, ຮອງກົມ ຂອງສະຖາບັນການເມືອງ ແລະ ການປົກຄອງແຫ່ງຊາດ, ສະຖາບັນຝຶກອົບຮົມ ຍທຂ, ກົມຈັດຕັ້ງ ແລະ ພະນັກງານ ກະຊວງ ຍທຂ, ຄູອາຈານ ແລະ ນັກສຳມະນາກອນ.

ເຊຶ່ງການຝຶກອົມຮົມທິດສະດີການເມືອງ-ການປົກຄອງ ຊຸດທີ່ XXI ຈະໄດ້ເລີ່ມດຳເນີນການຝຶກ ແຕ່ວັນທີ 27 ກໍລະກົດ ຈົນເຖິງ ວັນທີ 04 ຕຸລາ 2018 ຈິ່ງຈະສຳເລັດ, ເຊີ່ງມີນັກສຳມະນາກອນເຂົ້າຮ່ວມທັງໝົດ 30 ສະຫາຍ, ຍິງ 11 ສະຫາຍ ແລະ ມີບັນດາອາຈານເຂົ້າຮ່ວມສິດສອນທັງໝົດແມ່ນມາຈາກສະຖາບັນການເມືອງ ແລະ ການປົກຄອງ ແຫ່ງຊາດ, ນອກຈາກນີ້ຍັງມີ​ບັນດາຄູຮັບເຊີນຈາກບັນດາກົມ, ກອງໃນກະຊວງ ຍທຂ, ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ.

ການຝຶກອົບຮົມໃນຄັ້ງນີ້ ຈະເຮັດໃຫ້ບັນດານັກສຳມະນາກອນ ໄດ້ເຊື່ອມຊຶມ ແລະ ເຂົ້າໃຈແນວທາງນະໂຍບາຍ, ທິດສະດີ ທີ່ພັກ-ລັດພວກເຮົາໝູນໃຊ້ ໃນການຊີ້ນໍາ-ນໍາພາ ໃນພາລະກິດສ້າງສາ ແລະ ພັດທະນາປະເທດຊາດ ເພື່ອກ້າວ ສູ່ລະບອບສັງຄົມນິຍົມ. ການເຂົ້າໃຈໃນທິດສະດີ, ທິດທາງ, ນະໂຍບາຍ, ການຄຸ້ມຄອງບໍລິຫານ, ແຜນການລວມ ຂອງຊາດ ແມ່ນມີຄວາມຈໍາເປັນທີ່ສຸດ, ເພາະເຮົາຈະໄດ້ໝູນໃຊ້ບັນດາແນວທາງ ທິດສະດີເຫລົ່ານັ້ນ ໃນການຈັດຕັ້ງ ຜັນຂະຫຍາຍ ໃຫ້ເປັນແຜນການຍ່ອຍທີ່ລະອຽດໃນແຕ່ລະຂະແໜງການ,  ໂດຍສະເພາະທີ່ກ່ຽວພັນກັບຂະແໜງການ ຍທຂ ຂອງພວກເຮົາ ເວົ້າລວມ, ເວົ້າສະເພາະ ກໍ່ໄດ້ເຈາະຈົງໄປຍັງບັນດາຄວາມຮັບຜິດຊອບ ໃນແຕ່ລະກົມກອງ ແລະ ວຽກງານທີ່ບັນດາສະຫາຍຮັບຜິດຊອບ ແລະ ເຄື່ອນໄຫວ. ສະນັ້ນ ການຮຽນທິດສະດີການເມືອງ-ການປົກຄອງ ໃນ ຄັ້ງນີ້ ມີຈຸດປະສົງ ແມ່ນເພື່ອເຮັດ​ໃຫ້​ບັນດາສະຫາຍ ນັກສຳມະນາກອນ ​ມີ​ຄວາມ​ຮັບ​ຮູ້​ອັນ​ໃໝ່​ໃນຫລາຍ​ດ້ານ ​ເຊັ່ນ: ບັນ​ດາ​ຫລັກ​ມູນ​ພື້ນ​ຖານ​ຂອງ​ທິດ​ສະ​ດີ​ມາກ-ເລ​ນິນ ໃນ​ເງື່ອນ​ໄຂ​ໃໝ່​, ມີຄວາມເຂົ້າ​ໃຈ​ໃນກົດ​ເກນ​ພື້ນ​ຖານ, ບັນດາທິດສະດີ ຕ່າງໆ ແລະ ນະ​ໂຍ​ບາຍ​ສັງ​ຄົມ​ຂອງ​ພັກ; ການ​ພົວ​ພັນ​ເສດ​ຖະ​ກິດ​ກັບ​ຕ່າງ​ປະ​ເທດ ແລະ ການ​ສູ້​ຊົນ​ເຮັດ​ໃຫ້​ປະ​ເທດ​ເຮົາ ​ຫລຸດ​ພົ້ນ​ອອກ​ຈາກ​ຄວາມ​ທຸກ​ຍາກ.

ນອກຈາກນັ້ນ, ໃນ​ບັ້ນ​ຝຶກ​ອົບ​ຮົມ​ຄັ້ງ​ນີ້​ ຍັງ​ຈະໄດ້​ສ້າງ ແລະ ຝຶກຝົນໃຫ້ນັກສຳມະນາກອນ​ມີທັດ​ສະ​ນະ​ຫລັກ​ໝັ້ນ​ການ​ເມືອງ​ ທີ່​ໜັກ​ແໜ້ນ​ຂຶ້ນຕື່ມ​ອີກ​ກ້າວ​ໜຶ່ງ, ພ້ອມ​ກັນ​ນີ້ ຍັງ​ເປັນ​ການ​ຝຶກ​ຝົນ​ຫລໍ່ຫລອມ​ຕົນ​ເອງ ​ທາງ​ດ້ານ​ຄຸນ​ສົມ​ບັດ ສິນ​ທຳ​ປະ​ຕິ​ວັດ ເພີ່ມ​ທະ​ວີ ສະ​ຕິ​ລະ​ວັງ​ຕົວ​ຕໍ່​ກົນ​ອຸ​ບາຍຫັນປ່ຽນໂດຍສັນຕິ​ຂອງ​ສັດ​ຕູ ແລະ ​ກຸ່ມຄົນ​ທີ່ບໍ່​ດີອີກດ້ວຍ.​

Additional information