ຂ່າວ

ກອງປະຊຸມສາກົນ ໜຶ່ງແລວທາງໜຶ່ງເສັ້ນທາງ ການຂົນສົ່ງທາງລົດໄຟ

 ໃນວັນທີ 20-21 ກັນຍາ 2018 ຢູ່ທີ່ ນະຄອນ ເສີນຕູ່ ສປ ຈີນ ໄດ້ຈັດກອງປະຊຸມສາກົນ ໜຶ່ງແລວທາງໜຶ່ງ ເສັ້ນທາງ  ການຂົນສົ່ງທາງລົດໄຟຂຶ້ນຢ່າງເປັນທາງການ, ໂດຍແມ່ນ ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງ ຍທຂ ພ້ອມດ້ວຍຄະນະເຂົ້າຮ່ວມ ໂດຍມີ ຜູ້ແທນຈາກບັນດາປະເທດຕ່າງໆ ທີ່ນອນໃນບັນດາແລວເສັ້ນທາງດັ່ງ ກ່າວເຂົ້າຮ່ວມ ຫລາຍກວ່າ 30 ປະເທດ ລວມຜູ້ເຂົ້າຮ່ວມທັງໝົດ ຫລາຍ ກວ່າ 700 ກວ່າຄົນ. ໃນວາລະກອງປະຊຸມ, ທ່ານ ວຽງສະຫວັດ ສີພັນດອນ ຮອງລັດຖະມົນຕີ ໄດ້ມີ ຄຳເຫັນໃນການດຳເນີນວຽກງານ ເສັ້ນທາງລົດໄຟ ຢູ່ໃນ ສປປ ລາວ, ເຊີ່ງບາງເນື້ອໃນຂອງບົດກ່າວໄດ້ ກ່າວວ່າ: ກອງປະຊຸມ ໜຶ່ງແລວທາງໜຶ່ງເສັ້ນທາງ ໃນດ້ານການຂົນສົ່ງທາງ ລົດໄຟ ໃນຄັ້ງນີ້ ແມ່ນກອງ ປະຊຸມສາກົນ ທີ່ພົບປະແລກປ່ຽນບົດຮຽນ ທີ່ມີຄ່າສຳລັບ ສປປ ລາວ ໂດຍສະເພາະມັນ ເປັນໂອກາດທີ່ດີ ໃນການຮຽນຮູ້, ປຶກສາຫາລື ແລະ ແລກປ່ຽນບົດຮຽນ ປະສົບການທີ່ດີ ຈາກແຂກຜູ້ເຂົ້າຮ່ວມ, ນັກຄົ້ນ ຄວ້າ ສະເພາະ, ແລະ ຊ່ຽວຊານດ້ານວຽກງານການຂົນສົ່ງທາງລົດໄຟ ເຊິ່ງຈະເປັນຜົນດີ ສຳລັບ ສປປ ລາວທີ່ ຈະນຳໃຊ້ລະບົບການຂົນສົ່ງດັ່ງກ່າວເຂົ້າເປັນພື້ນຖານໂຄງລ່າງດ້ານຄົມມະນາຄົມຂອງປະເທດ.

ກອງປະຊຸມໃນຄັ້ງນີ້ໄດ້ຮັບການສະໜັບສະໜູນຈາກຫລາຍພາກສ່ວນເຊັ່ນ: ອົງການປົກຄອງ ແຂວງເສສວນ ເຊີ່ງເປັນ ຜູ້ສະໜັບສະໜູນຫລັກ, ອົງການປົກຄອງ ເມືອງເສີນຕູ່, ກຸ່ມບໍລິສັດ ເອີຢວນ ວິສະວະກຳ ທາງລົດໄຟຈີນ ຈຳກັດ ແລະ  ບັນດາບໍລິສັດ ສຳຫລວດ-ອອກແບບ ກໍ່ສ້າງເສັ້ນທາງລົດໄຟຕ່າງໆ ຂອງ ສປ ຈີນ.

 

 

 

 

 

ກອງປະຊຸມເຜີຍແຜ່ຜົນການເກັບກຳຂໍ້ມູນ ແລະ ກະກຽມອອກແບບລະອຽດສຳລັບໂຄງການຂະຫຍາຍໂຄງລ່າງນ້ຳສະອາດ ແລະ ໂພຊະນາການ

ໃນຕອນເຊົ້າຂອງວັນທີ 19 ກັນຍາ 2018 ຢູ່ທີ່​ສະ​ຖາ​ບັນ​ຝຶກ​ອົບ​ຮົມ ຍ​ທ​ຂ (ຫຼັກ19) ໄດ້ເປີດກອງປະຊຸມເຜີຍແຜ່ຜົນການ ເກັບກຳຂໍ້ມູນ ແລະ ກະກຽມອອກແບບລະອຽດ (Inception Workshop) ສຳລັບໂຄງການຂະຫຍາຍໂຄງລ່າງນ້ຳສະອາດ ແລະ ໂພຊະນາການ Scaling up Nutrition and WASH Infrastructure Project (SUNWIP). ໃຫ້ກຽດເປັນປະ ທານຮ່ວມໂດຍ  ທ່ານ ປອ. ສັນ​ຕິ​ສຸກ ສິມ​ມາ​ລາ​ວົງ ຮອງ​ລັດ​ຖະ​ມົນ​ຕີ ກະ​ຊວງ ຍ​ທ​ຂ, ທ່ານ. Leo Faber ເອກອັກຄະ ລາດສະທູດ ສະຫະພາບເອີຣົບ ປະຈຳ ສປປ ລາວ. ໃຫ້ກຽດເຂົ້າຮ່ວມມີ ທ່ານ Jens Luetkenherm ເອກອັກຄະ ລາດສະທູດ ສະ​ຫະ​ພັນ​ເຢຍ​ລະ​ມັນ ປະຈຳ ສປປ ລາວ, ທ່ານ Jan Wiegelmqnm ຫົວໜ້າຫ້ອງການຜູ້ຕາງໜ້າ ທະນາຄານພັດທະນາເຢຍລະມັນ (KfW) ປະ​ຈຳ ສ​ປ​ປ ລາວ, ທ່ານ ທ່ອນ​ແກ້ວ ພຸດ​ທະ​ໄກ​ຍະ​ລາດ ຮອງ​ເຈົ້າ​ແຂວງແຂວງ​ສະ​ຫວັນ​ນະ​ເຂດ, ທ່ານ ຮອງເຈົ້າແຂວງແຂວງຄຳມ່ວນ, ບັນດາທ່ານຫົວໜ້າກົມ, ທ່ານຮອງຫົວໜ້າກົມ, ທ່ານຫົວໜ້າ ພະແນກ, ທ່ານຮອງຫົວໜ້າພະແນກອ້ອມຂ້າງກະຊວງ ຍທຂ, ທ່ານຜູ້ແທນຈາກສູນ​ກາງ, ​ບັນ​ດາ​ແຂວງ, ບັນ​ດາເມືອງ ແລະ ພາກ​ສ່ວນ​ຕ່າງໆທີ່​ກ່ຽວ​ຂ້ອງເຂົ້າຮ່ວມຢ່າງພ້ອມພຽງ.

ໂຄງການ SUNWIP ຈະປະກອບສ່ວນໂດຍກົງເຂົ້່າໃນການບັນລຸເປົ້່າໝາຍ ຍຸດທະສາດແຫ່ງຊາດ ວ່າດ້ວຍໂພສະນາການ ຂອງ ສປປລາວ ຮອດປີ 2025 ແລະ ແຜນປະຕິບັດງານ 2016-2020 ແລະ ຍັງຈະປະກອບສ່ວນເຂົ້່າໃນການ ບັນລຸເປົ້່າ ໝາຍແຫ່ງການພັດທະນາທີ່ຍືນຍົງ SDG 2 ທີ່ວ່າ “ຍຸດຕິຄວາມ ອຶດຫິວ, ບັນລຸໄດ້ການຄ້ຳປະກັນສະບຽງອາຫານ ແລະ ປັບປຸງໂພສະນາການໃຫ້ດີຂື້ນ” ແລະ SDG 6 “ຮັບປະກັນໃຫ້ທຸກຄົນໄດ້ເຂົ້າ ເຖີງການນຳໃຊ້ ນ້ຳທີ່ສະອາດ ແລະ ສຸຂາພິ ບານ ທີ່ສະອາດ ເເລະ ປອດໄພ”. ຈຸດປະສົງຂອງໂຄງການແມ່ນເພື່ອປັບປຸງການເຂົ້າເຖິງນ້ຳທີ່ສະອາດ ແລະ ປອດໄພໃຫ້ແກ່ ປະຊາຊົນ ຕະຫຼອດປີ ແລະ ການສົ່ງເສີມຄວາມຮູ້ໃນການນຳໃຊ້ນ້ຳ ໃຫ້ຖືກສຸຂະອະນາໄມ ເເລະ ເພື່ອ ສຸຂະອະນາ ໄມທີ່ດີຂື້ນ, ຊື່ງສາມາດຫຼຸດຜ່ອນ ຜົນທະທົບ ເເລະ ປ້ອງການພະຍາດຖ້ອງທ້ອງ ແລະ ເພີ່ມຜົນປະໂຫຍດໃຫ້ມີໂພ​ຊະນາ ການທີ່ດີຂື້ນ.

ກອງປະຊຸມໃນຄັ້ງນີ້ ທ່ານຜູ້ແທນຈາກສູນ​ກາງ, ​ບັນ​ດາ​ແຂວງ, ບັນ​ດາເມືອງ ແລະ ພາກ​ສ່ວນ​ຕ່າງໆທີ່​ກ່ຽວ​ຂ້ອງ ໄດ້ປະ ກອບຄຳຄິດຄຳເຫັນ, ບົດຮຽນ ແລະ ຂໍ້ສະເໜີອັນດີ ໂດຍ​ສະ​ເພາະ​ແມ່ນ ບັນ​ດາ​ຄະ​ນະຊ່ຽວ​ຊານ​ໂຄງ​ການ ທີ່​ໄດ້​​ສະ​ເໜີ​​ແຜນ ແລະ ຂໍ້​ມູນ​ຕ່າງໆ ກ່ຽວ​ກັບ​ໂຄງ​ການ ໃຫ້​​ໄດ້​ຮູ້​ເຖິງ ຄວາມ​ສຳ​ຄັນ ແລະ ຄວາມ​ຈຳ​ເປັນ​ຂອງ​ການ​ຈັດ​ຕັ້ງ​ປະ​ຕິ​ບັດ​ໂຄງ​ການ ຫຼາຍ​ກ່​ວາ​ເກົ່າ.

ກອງປະຊຸມໃນຄັ້ງນີ້ບັນລຸໄດ້ໝາກຜົນອັນຈົບງາມຕາມຄາດໝາຍທີ່ໄດ້ວາງໄວ້ເປັນຢ່າງດີ.


 

 

 

 

 

 

 

 

 

 

 

ພິທີມອບ-ຮັບໂຄງການກໍ່ສ້າງນໍ້າປະປາ ແລະ ສຸຂະພິບານ ເມືອງກາສີ ແລະ ເມືອງວັງວຽງ ແຂວງວຽງຈັນ, ເມືອງປາກແບ່ງ ແລະ ເມືອງໄຊ ແຂວງອຸດົມໄຊ ແລະ ເຂດພັດທະນາກຸ່ມບ້ານດອນຕະລາດ ເມືອງຈຳປາສັກ ແຂວງຈຳປາສັກ

 

ໃນວັນທີ 4 ກັນຍາ 2018 ທີ່ເມືອງກາສີ ແຂວງວຽງຈັນໄດ້ຈັດພິທີ ມອບ-ຮັບ ໂຄງການນໍ້າປະປາ ແລະ ສຸຂະພິບານຕົວເມືອງນ້ອຍ ໃຫ້ 5 ເມືອງ, 3 ແຂວງ,  ໂດຍການເຂົ້າຮ່ວມຂອງທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີ ກະຊວງ ຍທຂ, ມີບັນດາທ່ານຮອງເຈົ້າແຂວງໆວຽງຈັນ,ແຂວງອຸດົມໄຊ,ບັນດາທ່ານຫົວໜ້າກົມ,ຮອງກົມ, ຫົວໜ້າພະແນກ, ເຈົ້າເມືອງ ແລະ ບັນດາພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນພິທີດັ່ງກ່າວ ທ່ານ ພົມມາ ແວວລາວັນ ຫົວໜ້າກົມນໍ້າປະປາ ໃຫ້ຮູ້ວ່າ: ໂຄງການດັ່ງກ່າວ ເປັນໂຄງການຊ່ວຍເຫຼືອລ້າຈາກທະນາຄານພັດທະນາອາຊີ ຫຼື ADB ຕໍ່ເນື່ອງມາແຕ່ປີ 2009 ເປັນຕົ້ນມາ ເຊິ່ງມີເປົ້າ

ໝາຍປັບປຸງໂຮງານເກົ່າທັງໝົດ 13 ເມືອງ, ມູນຄ່າ 26 ລ້ານກວ່າໂດລາສະຫະລັດ ໃນນີ້ ໄດ້ມອບໄປແລ້ວ 8 ເມືອງ ແລະ ໄດ້ມອບຢູ່ເມືອງກາສີໃນຄັ້ງ ນີ້ປະກອບມີ 5 ເມືອງຄື: ເມືອງວັງວຽງ ແລະ ເມືອງກາສີ ແຂວງວຽງຈັນ, ເມືອງປາກແບງ ແລະ ເມືອງໄຊ ແຂວງອຸດົມໄຊ ແລະ ເຂດພັດທະນາດອນຕະລາດ, ເມືອງ ແລະ ແຂວງຈໍາປາສັກ,  ເຊິ່ງໂຮງງານນໍ້າປະປາທັງໝົດ ມີປະຊາຊົນເຂົ້າເຖິງ 140.000 ກວ່າຄົນ ເປັນໂຮງງານໍ້າປະປາທີ່ສະອາດໄກ້ຄຽງກັບນໍ້າດື່ມ ພໍ່ແມ່ປະຊາຊົນສາມາດໃຊ້ດື່ມກິນໄດ້. ລວມມູນຄ່າກໍ່ສ້າງ ທັງໝົດ 26 ລ້ານກວ່າໂດລາສະຫະລັດ.

 ຄຽງຄູ່ກັນນີ້ ໂຄງການຍັງສົ່ງເສີມສຸຂະພິບານໄປພ້ອມກັນສໍາລັບເຮືອນປະຊາຊົນທີ່ບໍ່ມີວິດຖ່າຍ ແມ່ນໃຫ້ສ້າງວິດຖ່າຍເພື່ອມາປ່ຽນກັບນໍ້າປະປາ ໂດຍບໍ່ ໄດ້ເສຍຄ່າ ແລະ ຄົວເຮືອນທີ່ຂາດເຂີນທາງໂຄງການໄດ້ສະ ໜອງອຸປະກອນວິດຖ່າຍໂດຍແຮງງານເປັນຂອງປະຊາຊົນ, ປັດຈຸບັນ ປະຊາຊົນໃນຕົວເມືອງ ທົ່ວໄປສະເລ່ຍ ການຊົມໃຊ້ນໍ້າປະປາ 72%, ໃນທົ່ວປະເທດມີພຽງແຕ່ 22% ຢ່າງໃດກໍຕາມ ທາງໂຄງການຈະສູ້ຊົນຂະຫຍາຍໂຄງການຢ່າງບໍ່ຢຸດຢັ້ງ ເພື່ອ ຕອບສະໜອງຄວາມຮຽກຮ້ອງຕ້ອງການຂອງສັງຄົມຕາມແຜນການທີ່ວາງໄວ້ຮອດປີ 2020 ໃຫ້ໄດ້ 80% ແລະ ປີ 2030 ໃຫ້ໄດ້ 90%. ສໍາລັບລາຄານໍ້າປະປາ ແມ່ນເກັບໃນລາຄາ ນໍ້າປະປາຊົນນະບົດຄື: ນັບແຕ່ 1 ແມັດກ້ອນ ຫາ 7 ແມັດກ້ອນ ແມ່ນເກັບໃນລາຄາຂາດທຶນ, ແຕ່ລາຄາ 8 ແມັດກ້ອນ ຫາ 15 ແມັດກ້ອນ ແມ່ນເກັບໃນລາຄາກໍາໄລໜ້ອຍໜຶ່ງ ແຕ່ກາຍ 15 ແມັດກ້ອນຂຶ້ນເມືອ ແມ່ນເກັບເອົາກໍາໄລ ເພື່ອມາຖົມຂຸມໂຕທີ່ຂາດທຶນ.

 ໃນພິທິ ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ ໄດ້ກ່າວວ່າ: ນໍ້າແມ່ນປັດໃຈໜຶ່ງທີ່ຈໍາເປັນ ເພື່ອຍົກລະດັບຄຸນນະພາບ ຊີວິດການ ເປັນຢູ່ຂອງປະຊາຊົນໃຫ້ດີຂຶ້ນ ການຊົມໃຊ້ນໍ້າປະປາໃນຕົວເມືອງ ແລະ ຊົນລະບົດຍັງແມ່ນຕົວຊີ້ບອກ ພື້ນຖານໃນການພັດທະນາ ເສດຖະກິດ-ສັງຄົມ ໃນແຕ່ລະໄລຍະ ສະນັ້ນ ລັດຖະບານຈິ່ງໄດ້ເອົາໃຈໃສ່ຂະຫຍາຍ ໃນນໍ້າປະປາໃຫ້ທົ່ວເຖິງ ໃນຕົວເມືອງນ້ອຍ ແລະ ຊົນລະບົດໃນທົ່ວປະເທດ ເພື່ອສ້າງ ໃຫ້ກາຍ ເປັນຕົວເມືອງສົມບູນ ແບບທີ່ມີນໍ້າຊົມໃຊ້ຢ່າງທົ່ວເຖິງ ຈາກນັ້ນ ໄດ້ມອບ ໂຄງການດັ່ງກ່າວຕ່າງໜ້າຮັບໂດຍ ທ່ານ ດາວເຮືອງ ນັນທະວົງ ຮອງເຈົ້າແຂວງໆວຽງຈັນ ພ້ອມທັງເປີດນໍາໃຊ້ຢ່າງເປັນທາງການ ແລະ ໃນໂອກາດດຽວກັນ ກໍຍັງໄດ້ມອບຫຼຽນກາແຮງງານ, ໃບຍ້ອງຍໍຈາກລັດຖະບານ ແລະ ຍ້ອງຍໍຂອງເຈົ້າແຂວງ ໃນບັນດາແຂວງທີ່ກ່ຽວຂ້ອງໃຫ້ຜູ້ທີ່ມີຜົນງານໃນຄັ້ງນີ້.

 

 

ກວດແກ້ໂດຍ ທ່ານ ສາຍພອນ ຖະໜອມຈິດ

ຂຽນຂ່າວໂດຍ ທ່ານ ໄຊຍາ ກິ່ງແກ້ວ

   

 

 

 

 

 

 

 

 

 

 

 

 

Additional information