ຂ່າວຕ່າງແຂວງ

ຄວາມຄືບໜ້າໂຄງການປັບປຸງ ແລະ ຂະຫຍາຍເສັ້ນທາງເລກ 21 ແຕ່ບ້ານຜາເມືອງ-ທາງເລກ 1D ບ້ານທ່າສີ ເມືອງບໍລິຄັນ ແຂວງບໍລິຄຳໄຊ


 

  ໂຄງການປັບປຸງ ​ແລະ ຂະຫຍາຍ​ເສັ້ນທາງ​ເລກ 21 ​ແຕ່​ບ້ານ​ຜາ​ເມື​ອງ-ທາງ​ເລກ 1D ບ້ານທ່າສີ ​ເມືອງ​ບໍລິ​ຄັນ ​ແຂວງ​ບໍລິ​ຄຳ​ໄຊ, ມີ​ລວງ​ຍາວ​ທັງ​ໝົດ 28,77 ກມ. ຊຶ່ງ​ໂຄງການ​ດັ່ງ​ກ່າວ​ແມ່ນ​ໂຄງການ​ບູລິ​ມະ​ສິດ​ຂອງ​ລັດ​ທະບານ ​ແຫ່ງ ສປປ ລາວ. ​ໂດຍ​ແມ່ນ​ກົມ​ຂົວ​ທາງ, ກະຊວງ ​ໂຍທາ​ທິການ ​ແລະ ຂົນ​ສົ່ງ ​ເປັນເຈົ້າຂອງ​ໂຄງການ, ​ໃນມູນຄາການກໍ່ສ້າງທັງໝົດ 138,627,176,549 ກີບ ໂດຍນໍາໃຊ້ງົບປະມານພາຍໃນ ຂອງລັດຖະບານ ສປປ ລາວ. ໂຄງການດັ່ງ​ໄດ້​ມິ​ພິທີເຊັນສັນຍາ​ການ​ກໍ່ສ້າງກັບ​ລັດ​ວິ​ສາ​ຫະກິດ ກໍ່ສ້າງ​ທາ​ເລກ 8 ​ໃນ​ວັນ​ທີ 1/10/2015 ​ແລະ ​ເລີ້ມ​ລົງ​ມີືການ​ກໍ່​ສ້າ​ງ​ໃນ​ວັນ​ທີ 20/9/2015 ຄາດ​ວ່າ​ຈະ​ສຳ​ເລັດວັນ​ທີ 30/9/2017.

 

​  ໂຄງການປັບປຸງ ​ແລະ ຂະຫຍາຍ​ເສັ້ນທາງ​ເລກ 21 ​ແຕ່​ບ້ານ​ຜາ​ເມື​ອງ-ທາງ​ເລກ 1D ບ້ານທ່າສີ ​ເມືອງ​ບໍລິ​ຄັນ ​ແຂວງ​ບໍລິ​ຄຳ​ໄຊ, ມີ​ລວງ​ຍາວ​ທັງ​ໝົດ 28,77 ກມ ເປັນທາງປະເພດ IV ​ເຂດ​ເຄິ່ງພູ​ດອຍໜ້າ​ທາງ​ປູຢາງ​ສອງ​ຊັ້ນ ຄວາມ​ກ້ວາງ​ຂອງ​ໜ້າທາງທັງ​ໝົດ 8 ​​ແມັດ, ທາງ​ລົດ​ແລນ​ກ້ວາງ 7 ​ແມັດ, ມີ 2 ຊ່ອງທາງ​ຈາລະ​ຈອນ ​ເບື້ອງລະ 3,5 ​ແມັດ. ໂຄງການ​ດັ່ງກ່າວ​ເປັນ​ສ່ວນ​ໜື່ງຂອງ​ເສັ້ນທາງ​ເລກ 21 ​​ ຊຶ່ງ​ເປັນ​ທາງເຄິ່ງເຂດ​ພູດ​ອຍ, ​ເປັນ​ເສັ້ນທາງ​ເຊື່ອ​ມຕໍ່ ​ກັບທາງ​ເລກ 1D ອອກ​ສູ່​​ແຂວງ ​ໄຊ​ສົມບູນ ​ແລະ ​ແຂວງ​ຊຽງ​ຂວາງ. ​   ​ໃນ​ເດືອນ ກໍ​ລະ​ກົດ ຜ່ານ​ມາ​ໄດ້​ດຳ​ເນີນ​ການສຳ​ຫຼວດອອກ​ແບບ​ແຜ່ນ​ແຕ້ມ​ກໍ່ສ້າງ, ​ບຸກ​ເບີ​ກອານາ​ໄມ​ຂອບ​ເຂດ​ກໍ່ສ້າງ, ວຽກ​ດິນ​ຕັດ, ວຽກ​ຖົມ​ດິນຊັ້ນ​ຮອງ​ພື້ນທາງ, ວຽກ​ຖົມ​ດິນດ້ວຍ​ວັດ​ສະດຸ​ຄັດ​ເລືອກ, ວຽກ​ຖົມ​ດິນຊັ້ນຍົກ​ພື້ນທາງ ​ແລະ ວຽກ​ຫີນ​ຕັດ. ຊຶ່ງມາ​ຮອດ​ປະຈຸ​ບັນ​ສາມາດ​ຈັດ​ຕັ້ງ​ປະຕິບັດ​ໄດ້ 29,52% ທຽບ​ໃສ່​ແຜນການ​ແມ່ນ​ຫຼຸດ​ແຜນການ​ປະມານ 0,86%. ​ແນວ​ໃດ​ກໍ່ຕາມ​ໃນ​ຊວງ​ລະດູ​ຝົນ​ນີ້, ກົມ​ຂົວ​ທາງ ກະຊວງ ​ໂຍທາ​ທິການ ​ແລະ ຂົນ​ສົ່ງ ​ໄດ້​ຊີ້​ນຳ​ໃຫ້​ບໍລິສັດ​ຜູ້​ຮັບ​ເໝົາກໍ່ສ້າງ​ຕິດຕາມ ​ເຝົ້າ​ລະວັງ​ຕາມ​ເສັ້ນທາງ​ດັ່ງກ່າວເພື່ອ​ຮັບປະກັນ​ການ​ສັນຈອນ ​ໄປມາ​ ​ແລະ ບໍ່​ໃຫ້​ເສັ້ນທາ​ງມີ​ການ​ຕັດຂາດ. ພ້ອມ​ກັນ​ນັ້ນ ກໍ່​ຂໍ​ຮຽກຮ້ອງ​ໃຫ້​ພໍ່​ແມ່ ປະຊາຊົນ​ຜູ້ໃຊ້ລົດ ​ໃຊ້​ຖະໜົນຕາມ​ເສັ້ນທາງ​ດັ່ງກ່າວ​ໃຫ້​ມີ​ຄວາມ​ລະມັດລະວັງ ຄ່ອຍ​ໄປ​ຄ່ອຍ​ມາ, ຖ້າ​ຫາກ​ບໍ່ຈຳ​ເປັນກໍ່​ໃຫ້​ລີກ​ລ່ຽງ​ໄປ​​ໃຊ້​ເສັ້ນທາງອື່ນ​ທີ​ມີ​ຄວາມ​ສະດວກ​ກວ່າ.

 ເມື່ອ​ເສັ້ນທາງ​ດັ່ງກ່າວ​ກໍ່ສ້າງ​ສຳ​ເລັດ ກໍ່​ຈະ​ເປັນ​ພື້ນຖານ​ໃຫ້​ແກ່​ການ​ຈາລະ​ຈອນ​ສະດວກ​ຂື້ນ, ການ​ຄົມມະນາຄົມ​ຂົນ​ສົ່ງສິນ​ຄ້າ ຂອງ ສປປ ລາວ ​ເວົ້າ​ລວມ, ​ເວົ້າ​ສະ​ເພາະ​ແມ່ນ​ຈະ​ອຳນວຍ​ຄວາມ​ສະດວກ​ໃຫ້​ແກ່​ການ​ຄົມມະນາຄົມ​ຂົນ​ສົ່ງສິນ​ຄ້າພາຍ​ໃນ​ແຂວງ ບໍລິ​ຄຳ​ໄຊ, ​ແຂວງ ​ໄຊ​ສົມບູນ, ​ແຂວງ ຊຽງ​ຂວາງ ​ແລະ ບັນດາ​ແຂວງ​ພາກ​ເໜືອ ​ເພື່ອ​ເຊື່ອ​ຕໍ່​ກັບ​ບັນດາ​ແຂວງ​ພາກ​ກາງ, ​ພາກ​ໃຕ້ ​ແລະ ປ​ະທດອ້ອມ​ຂ້າງ ​ເຊັ່ນ: ສສ ຫວຽດນາມ ​ແລະ ​ໄທ. ນອກ​ຈາກນັ້ນ​ຍັງ​ເປັນ​ການ​ສົ່ງ​ເສີມການ​ລົງທຶນ​ທັງພາຍ​ໃນ ​ແລະ ຕ່າງປະ​ເທດ. ​ໃນການ​ຜະລິດ​ສີນ​ຄ້າ ​ແລະ ການທ່ອງ​ທ່ຽວ ຊຶ່ງ​ຈະ​ເຮັດ​ໃຫ້​ປະ​ຊາ​ຊົນ​ໃນ​ຂົງ​ເຂດ​ນີ້​ມີ​ລາຍ​ຮັບ, ມີ​ຊິວິດ​ການ​ເປັນ​ຢູ່ດີ​ຂື້ນ​ເທື່ອ​ລະ​ກ້າວ.

 

ພິທີມອບຮັບໃບຍ້ອງຍໍຜູ້ທີ່ມີຜົນງານດີເດັ່ນປະເພດ 2 ເຂົ້າໃນວຽກງານ 2 ດີ 5 ເປັນເຈົ້າ ຂອງໜ່ວຍກໍາມະບານຮາກຖານ ພະແນກ ໂຍທາທີການ ແລະ ຂົນສົ່ງ ແຂວງອັດຕະປື

    ໃນຕອນແລງຂອງວັນທີ 7 ຕຸລາ 2015 ຜ່ານມາ ຢູ່ທີ່ຫ້ອງປະຊຸມພະແນກ ໂຍທາທີການ ແລະ ຂົນສົ່ງ ແຂວງອັດຕະປື. ໄດ້ຈັດພິທີມອບຮັບໃບຍ້ອງຍໍຜູ້ທີ່ມີຜົນງານດີເດັ່ນປະເພດ 2 ເຂົ້າໃນວຽກງານ 2 ດີ 5 ເປັນເຈົ້າ ຂອງໜ່ວຍກໍາມະບານຮາກຖານ ພະແນກ ໂຍທາທີການ ແລະ ຂົນສົ່ງ ແຂວງ ໂດຍການເປັນປະທານຂອງ ທ່ານ ວຽງທອງ ທໍາມານູວົງ ຄະນະກໍາມະບານຮາກຖານ ພະແນກ ໂຍທາທີການ ແລະ ຂົນສົ່ງແຂວງ ໂດຍໄດ້ຮັບກຽດເຂົ້າຮ່ວມຂອງ ທ່ານ ເພັດມີໄຊ ຄໍາພັກດີ ກໍາມະການພັກແຂວງ ເລຂາພັກຮາກຖານ ຫົວໜ້າ ພະແນກ ໂຍທາທີການ ແລະ ຂົນສົ່ງແຂວງ ເຊີ່ງມີສະມາຊີກກໍາມະບານ ພາຍໃນໜ່ວຍທີ່ມີຜົນງານດີເດັ່ນປະເພດ 2 ໃນການຈັດຕັ້ງປະຕິບັດຂໍ້ແຂ່ງຂັນ 2 ດີ 5 ເປັນເຈົ້າ ປະຈໍາສົກປີ 2013-2014 ຈໍານວນ 20 ທ່ານ.

   ຫຼັງຈາກນັ້ນໄດ້ມີພິທີມອບຮັບອຸປະກອນກິລາຈາກບໍລິສັດ ໂພສີກໍ່ສ້າງ ສ້ອມແປງເຄຫາສະຖານ ເຊີ່ງມີມູນຄ່າທັງໝົດ 5,000,000 ກີບ ແລະ ບັນດາບໍລິສັດກໍ່ສ້າງຂົວ-ທາງ ແລະ ເຄຫາສະຖານ ກໍ່ໄດ້ປະກອບສ່ວນ ບານເຕະ 5 ໜ່ວຍ ແລະ ບານຕີ 5 ໜ່ວຍ, ເຊີ່ງມີມູນຄ່າທັງໝົດ 2,000,000 ກີບ ອຸປະກອນດັ່ງກ່າວ ແມ່ນຮາກຖານກໍາມະບານ ພະແນກ ໂຍທາທີການ ແລະ ຂົນສົ່ງ ແຂວງ ຈະນໍາໄປມອບຕໍ່ໃຫ້ໂຮງຮຽນທີ່ຂາດເຂີນພາຍໃນແຂວງ ໃນໂອກາດຕໍ່ໄປ.

 

ໂຄງການກໍ່ສ້າງຂົວເຊໂດນ 3 ເມືອງປາກເຊ ແຂວງຈຳປາສັກ

 ໂຄງ­ການ​ກໍ່­ສ້າງ​ຂົວ​ເຊ​ໂດນ 3 ເມືອງ​ປາກ​ເຊ ແຂວງ​ຈຳ­ປາ​ສັກ ມາ​ຮອດປະ­ຈຸ​ບັນ​ສຳ­ເລັດ​ແລ້ວ 96% ເຫຼືອ​ພຽງ​ໜ້າວຽກ​ຈຳ­ນວນ​ໜຶ່ງ ແລະ​ຄາດ​ວ່າ​ຈະ​ໄດ້​ເປີດການ​ນຳ​ໃຊ້​ກ່ອນ​ປີ​ໃໝ່​ລາວທີ່​ຈະ​ມາ​ເຖິງໃນ​ເດືອນ​ ໜ້າ​ນີ້.

   ຕາມ​ການ​ລາຍ​ງານ​ຂອງ ທ່ານ ບຸນທະ­ວີ ວິ​ສຸດ­ທິ​ວົງ ຫົວ­ໜ້າ​ໂຄງ­ການ​ກໍ່­ສ້າງຂົວ​ຂ້າມ​ນ້ຳ​ເຊ​ໂດນ 3, ໃຫ້​ຮູ້​ວ່າ: ໂຄງ­ການແມ່ນ​ການ​ລົງ­ທຶນ​ກ່ອນ 100% ຂອງ​ບໍ​ລິ ສັດ​ລາວ​ເວີນ ຊຶ່ງ​ເປັນ​ຜູ້​ຮັບ​ເໝົາ​ກໍ່­ສ້າງ​ໃນ ມູນ​ຄ່າ 14,82 ລ້ານ​ໂດ​ລາ​ສະ­ຫະ­ລັດ, ຊຶ່ງມາ​ຮອດ​ປະ­ຈຸ​ບັນ​ການ​ກໍ່­ສ້າງ​ສຳ­ເລັດ 96%,  ໜ້າ​ວຽກ​ທີ່​ຍັງ​ເຫຼືອ​ກຳ­ລັງ​ຂຸ້ນ­ຂ້ຽວ​ສືບ­ຕໍ່ແມ່ນ​ວຽກ​ຕົບ­ແຕ່ງ​ປະ­ດັບ​ ປະ­ດາ, ສ້າງຮາວ, ປູ​ທາງ​ອັດ​ສະ​ຟານ​ໜ້າ​ຂົວ, ກັນເຈື່ອນ, ເສົາ​ໄຟ ແລະ​ທາງ​ເຂົ້າ​ຂົວ​ເລັກ​ນ້ອຍ ຊຶ່ງ​ຄາດ​ວ່າ​ຈະ​ໃຫ້​ສຳ­ເລັດ ແລະ​ເປີດ​ການນຳ​ໃຊ້​ກ່ອນ​ປີ​ໃໝ່​ລາວທີ່​ຈະ​ມາ​ເຖິງ​ໃນເດືອນ​ໜ້າ​ນີ້.

   ຫົວ­ໜ້າ​ໂຄງ­ການ​ກ່າວ​ຕື່ມ​ວ່າ: ຂົວ​ເຊໂດນ​ທີ່​ສ້າງ​ໃໝ່​ນີ້​ເປັນ​ຂົວ 4 ເລັນ, ມີ​ລວງ ກ້ວ​າງ 17 ແມັດ, ລວງ​ຍາວ 220 ແມັດ, ມີ​ທາງ​ຄົນ​ຍ່າງ​ເບື້ອງ​ລະ 1 ແມັດ, ຊຶ່ງ​ແມ່ນຂົວ​ຍຸດ​ທະ​ສາດ​ທີ່​ສຳ­ຄັນ​ໃນ​ການ​ກະ­ກຽມ ເພື່ອ​ພັດ­ທະ­ນາ​ຕົວ​ເມືອງ​ປາກ​ເຊ ໃຫ້​ເປັນ ນະ­ຄອນ​ໃນ​ອະ­ນາ­ຄົດ​ອັນ​ໃກ້​ນີ້.

ພິທີຮັບມະຫາຊົນກ້າວໜ້າເຂົ້າພັກສຳຮອງ

 

 

 

   ໃນ​ວັນ​ທີ 13 ສິງຫາ 2015 ທີ່​ຫ້ອງ​ປະຊຸມ​ພະ​ແນ​ກ ຍທຂ ​ແຂວງ​ເຊ​ກອງ ​ໄດ້​ຈັດ​ພິທີ​ຮັບ​ມະຫາຊົນ​ກ້າວໜ້າ​ເຂົ້າພັກ​ສຳຮອງ ຈຳນວນ 10 ສະຫາຍ, ​ ຢູ່ທີ່​ຫ້ອງ​ປະຊຸມ​ພະ​ແນ​ກ ຍທຂ ​ແຂວງ,ຊຶ່ງ​​ມີ​ມະຫາຊົນ​ກ້າວໜ້າ​ຈາກໜ່ວຍ​ພັກ ຈັດ​ຕັ້ງ-ບໍລິຫານ, ​ແຜນການ ງົບປະມານ ​ແລະ ກວດກາ 03 ສະຫາຍ; ໜ່ວຍ​ພັກຂະ​ແໜງ​ທາງບົກ-ທາງ​ນ້ຳ 02 ສະຫາຍ​ ແລະ  ໜ່ວຍ​ພັກ ຂະ​ແໜງ​ຄຸ້ມ​ຄອງ​ການ​ກໍ່ສ້າງ, ຂະ​ແໜງ​ຄຸ້ມ​ຄອງ​ເຄຫາ​ຜັງ​ເມືອງ ​ແລະ ນ້ຳ​ປະປາ 5 ສະຫາຍ, ​ໂດຍ​ມີ​ຜູ້​ເຂົ້າ​ຮ່ວມຈາກ​ໜ່ວຍ​ພັກ ອ້ອມ​ຂ້າງພະ​ແນ​ກ ຍທຂ ​ແຂວງ ​ແລະ ສະມາຊິກ​ພັກ​ທັງ​ໝົດ 50 ສະຫາຍ ຍີ​ງ 02 ສະຫາຍ.

      ​ໂດຍ​ເປັນ​ປະທານ ຂອງ ທ່ານ ສຸດ​ສະ​ນະ ສີ​ຫາ​ວົງ ກຳມະການ​ພັກ​ແຂວງ, ​ເລຂາ​ຄະນະ​ພັກ​ຮາກ​ຖານ ພະ​ແນ​ກ ຍທຂ, ມີຫົວໜ້າ​ພະ​ແນ​ກ ຍທຂ ​ແຂວງ​ເຊ​ກອງ; ຄະນະ​ຈັດ​ຕັ້ງ​ພິທີ​ໄດ້​ຜ່ານ​ຂໍ້​ຕົກລົງ​ດຳລັດ ຂອງ​ເລຂາຄະນະ​ພັກ​ແຂວງວ່າ​ດ້ວຍການ​ຮັບ​ມະຫາຊົນ​ກ້າວໜ້າເຂົ້າ​ພັກ​ສຳຮອງ 10 ສະຫາຍ, ມະຫາຊົນ​ກ້າວໜ້າ​​ແຕ່​ລະສະ​ຫາຍ​ໄດ້​ຂື້ນອ່ານ​ບົດ​ສຳ​ຫຼວດຕົນ​ເອງ ​ແລະ ຂື້ນ​ກ່າວ​ປະຕິຍານ ຫລັງ​ຈາກ​ນັ້ນ​ຜູ້​ຕິດຕາມ​ສະມາຊິກ​ພັກ​ສົມບູນ 2 ສະຫາຍ​ຂື້ນ​ຜ່ານ ​​ແລະ ສຶບຕໍ່ຕິດ​ຕາມ​ຈົນ​ໄດ້​ເຂົ້າ​ພັກ​ສົມບູນ. ຫຼັງຈາກ​ນັ້ນ, ທ່ານ ​ເລຂາ​ຄະນະ​ພັກ​ຮາກ​ຖານ ​ຂື້ນ​ສຳ​ພັດ​ມື ​ແລະ ກ່າວ​ຕັກ​ເຕືອນ ມີ 5 ໜ້າ​ທີ 6 ສິດ​ ແລະ 3 ທິດ​ນຳ, ສໍາລັບ​ມະຫາຊົນ​ກ້າວໜ້າ​ເຂົ້າ​ເປັນ​ສະມາຊິກ​ພັກ​ສຳຮອງ ມີ 5 ທິດ 1 ສິດ ​ແມ່ນ​ບໍ່​ສາມາດ​ລົງ​ຄະ​ແນນ​ສຽງ ​ແລະ ລົງ​ສະ​ໜັກ​ຮັບ​ເລືອກ​ຕັ້ງ. ຫລັງ​ຈາກ​ນັ້ນ, ຕາງໜ້າ​ສະມາຊິກ​ພັກ​ສຳຮອງ​ຂື້ນ​ຮັບ​ຄຳ​ຕັກ​ເຕືອນ ​ເຊີ່ງ​ສະ​ແດງ​ອອກ ສະມາຊິກ​ພັກ​ເປັນ​ແບບຢ່າງ​ໃຫ້​ມະຫາຊົນ ພິທີ​ສີ້​ນສຸດ​ລົງ ​ເວລາ 16:00​ໂມງ ຂອງ​ວັນ​ດຽວ​ກັນ  ​ດ້ວຍ​ຄວາມ​ຈົບງາມ.

Additional information