ຂ່າວຕ່າງແຂວງ

ຄວາມຄືບໜ້າໂຄງການກໍ່ສ້າງຂົວມິດຕະພາບລາວŒ-ມຽນມາ ຫລາຍກວ່າ 70%

ໂຄງ­ການ​ກໍ່­ສ້າງ​ຂົວ​ມິດ­ຕະ­ພາບ​ລາວŒ-ມຽນ​ມາ ມີ​ຄວາມ​ຄືບ​ໜ້າ​ຢ່າງ​ຕໍ່​ເນື່ອງ​ໂດຍ​ສະ­ເພາະ​ໂຕ​ຂົວ ມາ​ຮອດ​ປະ­ຈຸ ບັນ​ສຳ­ເລັດ​ແລ້ວ 75% ໃນ​ນີ້ ເບື້ອງ​ລາວ​ໄດ້ 70% ສ່ວນ​ເບື້ອງ​ມຽນ​ມາ​ໄດ້ 81%.

ທ່ານ ໄຊ​ສົງ­ຄາມ ມະ­ໂນ​ທຳ ຫົວ­ໜ້າ​ໂຄງ­ການ​ກໍ່­ສ້າງ​ຂົວ​ມິດ­ຕະ­ພາບŒລາວ-ມຽນມາ ເປີດ­ເຜີຍ​ຕໍ່​ທີມ​ຂ່າວ​ເສດ­ຖະ­ກິດ​ຜ່ານ​ໂທລະ­ສັບ​ຮູ້​ວ່າ: ມາ​ຮອດ​ທ້າຍ​ເດືອນພຶດ­ສະ­ພາ 2014 ໂຄງ­ການ​ກໍ່­ສ້າງ​ຂົວ​ມິດ­ຕະ­ພາບລາວ-Œມຽນ​ມາ ມີ​ຄວາມ​ຄືບ​ໜ້າ​ສະ­ເລ່ຍ​ໄດ້ 75% ສຳ­ລັບ​ເບື້ອງ​ລາວ​ແມ່ນ​ສຳ­ເລັດ​ການ​ກໍ່­ສ້າງ​ເຂັມ​ຮາກ​ຖານ ແລະ ຕີນ​ເສົາ​ທັງ​ໝົດ 7 ເສົາ ເທົ່າ​ກັບ 100% ກໍ່­ສ້າງ​ຄີງ​ເສົາ​ໄດ້ 6 ເສົາ​ໃນ​ຈຳ­ນວນ​ທັງ​ໜົດ 7 ເສົາ ເທົ່າ​ກັບ 86% ຜະ­ລິດ​ຂາງ​ເບ​ຕົງ​ເສີມ​ເຫຼັກ​ໄດ້ 28 ຂາງ ໃນ​ຈຳ­ນວນ​ທັງ​ໝົດ 36 ຂາງ ເທົ່າ​ກັບ 77,78% ສ່ວນ­ວ່າ​ທີ່​ຍັງ​ເຫຼືອ​ແມ່ນ​ຈະ​ໃຫ້​ສຳ­ເລັດ​ໃນ​ເດືອນ​ມິ­ຖຸ­ນາ 2014 ນອກ​ນັ້ນ ຍັງ​ໄດ້​ປະ­ກອບ​ຂາງ​ຂົວ​ເຫຼັກ​ຮ່ວມ​ກັບ​ຝ່າຍ​ມຽນ​ມາ ຊຶ່ງ​ສາ­ມາດ​ຕິດ​ຕັ້ງ​ສຳ­ເລັດ​ແລ້ວ 1 ຊ່ວງ​ຍາວ 120 ແມັດ ໂດຍ​ລວມ​ແລ້ວ​ເບື້ອງ​ລາວ​ສຳ­ເລັດ​ແລ້ວ 70% ແລະ ເບື້ອງ​ມຽນ​ມາ​ສຳ­ເລັດ​ແລ້ວ​ທັງ​ໝົດ 81% ຕິດ​ຕັ້ງ​ຂາງ​ເບ​ຕົງ​ເສີມ​ເຫຼັກ​ໄດ້ 4 ຊ່ວງ​ໃນ​ຈຳ­ນວນ​ທັງ​ໝົດ 6 ຊ່ວງ ແລະ ຜະ­ລິດ​ແຜ່ນ​ເບ​ຕົງ​ໜ້າ​ຂົວ​ອີກ​ຈຳ­ນວນ​ໜຶ່ງ.

ສ່ວນ​ແຜນ­ການ​ໃນ​ເດືອນ​ມິ­ຖຸ­ນາ​ນີ້ ທາງ​ໂຄງ­ການແມ່ນ​ຈະ​ໄດ້​ສຸມ​ໃສ່​ການ​ກໍ່­ສ້າງ​ເສົາ​ສຸດ​ທ້າຍ​ໃຫ້​ສຳ­ເລັດ​ ກ່ອນ​ລະ­ດັບ​ນ້ຳ​ຈະ​ສູງ​ຂຶ້ນ ແລະ ຕິດ​ຕັ້ງ​ຂາງ​ເບ​ຕົງ​ເສີມ​ເຫຼັກ​ໃຫ້​ສຳ­ເລັດ 2 ຊ້ວງ ເບື້ອງ​ລາວ​ຈະ​ເລີ່ມ​ຜະ­ລິດ​ແຜ່ນ​ເບ​ຕົງ​ໜ້າ​ຂົວ ສ່ວນ​ເບື້ອງ​ມຽນ​ມາ​ວຽກ​ຜະ­ລິດ​ແຜ່ນ​ເບ​ຕົງ​ໜ້າ​ຂົວ​ນີ້​ຈະ​ໃຫ້​ສຳ­ເລັດ 100% ຂະ­ນະ​ທີ່ຫົວ­ໜ້າ​ໂຄງ­ການ​ເຊື່ອ​ໜັ້ນ​ວ່າ​ພາຍ​ໃຕ້​ການ​ຊີ້​ນຳ​ຂອງ​ຄະ­ນະ​ພັກ ​ແຂວງ​ຫຼວງ​ນ້ຳ​ທາ ແລະ ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ເວົ້າ​ສະ­ເພາະ​ກົມ​ຂົວ​ທາງໂຄງ­ການ​ກໍ່­ສ້າງ​ຂົວ​ມິດ­ຕະ­ພາບ​ລາວ-ມຽນ​ມາ ​ຈະ​ສຳ­ເລັດ ແລະ ສາ­ມາດ​ເປີດ​ນຳ​ໃຊ້​ຕາມ​ແຜນ­ການ.

ໂຄງ­ການ​ນີ້​ແມ່ນ​ໂຄງ­ການ​ຮ່ວມ​ມື​ລະຫວ່າງ​ລັດ­ຖະ­ບານ ສປປ ລາວ ແລະ ສສ ມຽນ​ມາ ເປັນ​ໂຄງ­ການ​ທີ່​ຂຶ້ນ​ກັບ​ກົມ​ຂົວ ທາງ​, ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງມີ​ມູນ​ຄ່າ 26 ລ້ານ​ໂດ​ລາ (ສະ­ເພາະ​ຂົວ) ຊຶ່ງ​​ນຳ​ໃຊ້​ງົບ­ປະ­ມານ​ພາຍໃນ​ ​ຂອງ​ລັດ­ຖະ­ບານ​ລາວ ແລະ ມຽນມາ ຝ່າຍລະ​ເຄິ່ງ ຊຶ່ງ​ມີ​ທີ່​ຕັ້ງ​ຢູ່​ບ້ານ​ຫ້ວຍ​ກຸ່ມຫ່າງ​ຈາກ​ບ້ານ​ຊຽງ​ກົກ​ໄປ​ທາງ​ທິດ​ ເໝືອປະ­ມານ 15 ກິ­ໂລ­ແມັດ ຂຶ້ນ​ກັບ​ເມືອງ​ລອງ ແຂວງ​ຫຼວງ​ນ້ຳ​ທາ ສປປ ລາວ ແລະ ປະ­ມານ 500 ແມັດ ທາງ​ໃຕ້​ຂອງ​ບ້ານ​ຊຽງ​ລາບ ເມືອງ​ທ່າ​ຂີ້­ເຫຼັກ ລັດ​ສານ ສສ ມຽນ​ມາ ຄວາມ​ຍາວ​ຂອງ​ຂົວ​ມີ​ທັງ​ໝົດ 691,6 ແມັດ ກວ້າງ 10,9 ແມັດ ມີ​ 2 ຊ່ອງທາງ ຈະລາຈອນ ກວ້າງ 8,5 ແມັດ ທາງ​ຍ່າງ 2 ເບື້ອງ ເບື້ອງ​ລະ 1,2 ແມັດ ເປັນ​ຂົວ​ທີ່​ມີ​ຂາງ​ປະ­ສົມ ຊຶ່​ງ​ມີ​ຂາງ​ເຫຼັກ​ຍາວ 360 ແມັດ ສູງ 12 ແມັດ ຢູ່​ທາງ​ກາງ (ຢູ່​ວັງ) ແລະ ຂາງ​ເບ​ຕົງ​ອັດ​ແຂງ ຍາວ 330 ແມັດ ຢູ່​ທາງ​ຝັ່ງ ໃນ​ນີ້ ເບື້ອງ​ລາວ​ຮັບ­ຜິດ­ຊອບ​ແມ່ນ 330,8 ແມັດ ແລະ ຝ່າຍ​ມຽນ​ມາ​ຮັບ­ຜິດ­ຊອບ 360,8 ແມັດ.

ໂດຍ​ບໍ­ລິ­ສັດ​ປະ­ສົມ​ລາວ​ຮ່ວມ​ກໍ່­ສ້າງ​ຈຳ­ກັດ ເປັນ​ຜູ້​ຮັບ​ເໝົາ​ກໍ່­ສ້າງ​ເບື້ອງ​ລາວ ແລະ ເບື້ອງ​ມຽນ​ມາ​ແມ່ນກອງ​ກໍ່­ສ້າງ​ຂົວ​ເລກ 9 ຂອງ​ກະ­ຊວງ​ກໍ່­ສ້າງ ສສ ມຽນ​ມາ ໂດຍ​ແຜນ​ເບື້ອງ​ຕົ້ນ​ໃຊ້​ໄລ­ຍະ​ເວ­ລາປະ­ຕິ­ບັດ 30 ເດືອນ ແຕ່​ມີ​ການ​ດັດ­ແກ້​ໃໝ່ໃຫ້​ສຳ­ເລັດ​ກ່ອນ​ແຜນ­ການ 5 ເດືອນ ຄື​ໃຫ້​ສຳ­ເລັດ​ໃນ​ເດືອນ​ມີ­ນາ 2015 ທີ່​ໄດ້​ເລີ່ມກໍ່ສ້າງ​ມາ​ແຕ່​ວັນ​ທີ 16 ກຸມ­ພາ 2013 ເປັນ­ຕົ້ນ​ມາ.

                                                                 ຂໍ້ມູນຈາກໜັງສືພິມ: ເສດຖະກິດ-ສັງຄົມ, ສະບັບລົງວັນທີ 04 ມິຖຸນາ 2014

ພິທີມອບບັດໃຫ້ສະມາຊິກພັກສົມບູນຊຸດທີ I ຂອງພະແນກ ໂຍທາທິການ ແລະ ຂົນສົ່ງ ແຂວງເຊກອງ

  

   ໃນ​ຕອນ​ແລງ​ຂອງ​ວັນ​ທີ 7 ພຶດ​ສະພາ 2014 ​ໄດ້​ຈັດ​ພິທີ​ມອບ​ບັດ​ສະມາຊິກ​ພັກສົມບູນ ຊຸດ​ທີI: ມີ​ສະມາຊິກ​ພັກສົມບູນ 30 ສະຫາຍ, ຍິງ 3 ສະຫາຍ. ​ໂດຍ​ໃຫ້ກຽດ​ເຂົ້າ​ຮ່ວມ​ຂອງ​ສະຫາຍ ລ້ຽງ ຄຳ​ພູນ ຄະນະ​ປະຈຳ​ພັກແຂວງ, ຮອງ​ເຈົ້າ​ແຂວງ-​ແຂວງ​ເຊ​ກອງ; ມີ​ຄະນະ​ກວດກາ​ພັກ-​ລັດ​ແຂວງ, ຂະ​ແໜງກໍ່ສ້າງ​ພັກ ພ້ອມ​ດ້ວຍ​ສະມາຊິກ​ພັກ​ສົມບູນ ​ແລະ ມະຫາຊົນ​ກ້າວໜ້າ ຈຳນວນ 43 ສະຫາຍ ​ເຂົ້າ​ຮ່ວມ. ການ​ມອບ​ບັດ​ເທື່ອ​ນີ້​ຍັງ​ມີ​ຂີດໝາຍສຳ​ຄັນ​ ​ແລະ ​ເປັນປະຫວັດ​ຊາດ​ຂອງໜ່ວຍພັກ ​ແລະ​ສະມາຊິກ​ພັກພະ​ແນ​ກ ​ໂຍງ​ທາ​ທິການ ​ແລະ ຂົນ​ສົ່ງ ​ແຂວງ​ເຊກອງ.

​      ໃນ​ນັ້ນ​ໂອກາດ​ດັ່ງ​ກ່າວສະຫາຍ ລ້ຽງ ຄຳ​ພູນ ກໍ່​ໄດ້​ໃຫ້ກຽດ​ໂອ້​ລົມ​ເພື່ອ​ເປັນ​ການ​ຊີ້​ທິດ​ເຍືອງ​ທາງ​ໃຫ້​ແກ່ໜ່ວຍພັກ ​ໂດຍ​ທ່ານ​ໄດ້​ຍົກ​ໃຫ້​ເຫັນ​ຄວາມໝາຍອັນ​ສຳຄັນ​ໃນ​ການ​ນຳ​ໃຊ້​ບັດຂອງ​ສະມາຊິກ​ພັກ​ສົມບູນ, ພ້ອມ​ກັນ​ນັ້ນ​ສະຫາຍ​ຍັງ​ໄດ້​ຮຽກຮ້ອງ​ໃຫ້​ສະມາຊິກ​ພັກ​ທັງໝົດຕັ້ງໜ້າຝຶກ​ຝົນຫຼໍ່ຫຼອມ ຕົນ​ເອງ ​ໃຫ້​ມີ​ຄວາມ​ຈົ່ງ​ຮັກ​ພັກດີ​ຕໍ່​ພັກ ​ແລະ ລັດ, ​ເອກະ​ພາບ​ກັບ​​ແນວທາງ​ການ​ປ່ຽນ​ແປງ​ໃໝ່ ຂອງ​ພັກ​ຢ່າງ​ມີຫຼັກການ, ສຸມ​ໃສ່​ກໍ່ສ້າງ​ພັກ​ໃຫ້​ໜັກ​ແໜ້ນ​ເຂັ້ມ​ແຂງ ທາງ​ດ້ານ​ປະລິມານ ​ແລະ ຄຸນ​ນນະພາ​ບ ນຳພາ​ຢູ່​​ໃນ​ຂົງ​ເຂດ​ຖັນ​ແຖວ​ຂອງ​ຕົນ.

     ສືບ​ຕໍ່​ກໍ່ສ້າງ​ແຜນກາ​ນສ້າງໜ່ວຍພັກ​​ເຂັ້ມແຂງ-ຮູ້​ນຳພາ​ຮອບດ້ານ ​ໃຫ້​ໄດ້ຮັບຮອງ​ເຮັດ​ວຽກກວດກາ​ພັກ, ກວດກາ​ລັດ ​ແລະ ວຽກງານ​ປ້ອງ​ກັນ​ພັກ, ພະນັກງານ ​ໃຫ້​ໄດ້​ດີ ​ເວົ້າ​ລວມ​ແລ້ວ​ແມ່ນ​ອອກ​ແຮງ​ຜັນ​ຂະ​ຫາຍ ມະຕິ IX ຂອງ​ສູນ​ກາງ​ພັກ​ວາງ​ອອກ, ​ເວ້າສະ​ເພາະ​ມະຕິ​ກອງ​ປະຊຸມ​ໃຫ່ຍ ຂອງ​ອົງຄະ​ນະ​ພັກ​ແຂວງ ຄັ້ງ​ທີ VIII​ ໃຫ້​ເກີດ​ດອກ​ອອກ​ຜົນ​ເປັນ​ຢ່າງ​ດີ.

 

ຄວາມຄືບໜ້າໂຄງການປັບປຸງເສັ້ນ ທາງເລກ 9 ແຂວງສະຫວັນນະເຂດ

ໂຄງ­ການ​ປັບ­ປຸງ​ເສັ້ນ­ທາງ​ ເລກ 9 ແຂວງ​ສະ­ຫວັນ​ນະ​ເຂດ ພາຍ­ຫຼັງ​ເລີ່ມລົງ­ມື​ກໍ່­ສ້າງ​ມາ​ແຕ່​ປີ 2012 ເປັນ­ຕົ້ນ​ມາປະ­ຈຸ​ບັນຫົວ­ໜ້າ​ໂຄງ­ການ​ໃຫ້​ຮູ້​ວ່າ: ສຳເລັດ​ກາຍ​ແລ້ວ 80% ຂອງ​ໜ້າ​ວຽກທັງ​ໝົດ.

   ທ່ານ ວຽງ​ວິ­ໄລ ສຸ­ລິນ­ທອນ ຫົວ­ໜ້າໂຄງ­ການ​ໃຫ້​ຮູ້​ວ່າ: ໂຄງ­ການ​ປັບ­ປຸງ​ເສັ້ນທາງ​ເລກ 9 ແຂວງ​ສະ­ຫວັນ​ນະ​ເຂດ ໄດ້ ຈັດ​ຕັ້ງ​ປະ­ຕິ­ບັດ​ວຽກ​ຍົກ​ລະ­ດັບ​ໜ້າ​ທາງໃຫ້​ສາ­ມາດ​ຮັບ​ນ້ຳ­ໜັກ​ໄດ້ 11 ໂຕນ​ຕໍ່​ເພົາຈາກ​ເມື່ອ​ກ່ອນ 9 ໂຕນ​ຕໍ່​ເພົາ ຊຶ່ງມີ​ຄວາມ​ຍາວ​ທັງ​ໝົດ 58 ກິ­ໂລ­ແມັດ ຊຶ່ງ​ໄດ້​ຮັບ​ທຶນ​ຊ່ວຍ­ເຫຼືອ​ລ້າ​ຈາກ​ລັດ​ຖະບານ​ຍີ່­ປຸ່ນ​ມີ​ມູນ​ຄ່າ​ສັນ­ຍາ 2,18 ຕື້​ກວ່າເຢັນ (ສະ­ກຸນ​ເງິນ​ຍີ່­ປຸ່ນ) ຊຶ່ງ​ໄດ້​ເຊັນສັນ­ຍາ​ໃນ​ວັນ​ທີ 26 ເມ­ສາ 2012 ກັບ​ບໍລິ​ສັດ​ໂອ​ບາ​ຢາ​ຊິŒ-ໂອ​ບາ​ຢາ​ຊິ​ໂລດ​ຈອຍເລັນ​ເຈີ້, ຜ່ານ​ການ​ຈັດຕັ້ງປະຕິບັດ​ຮອດ​ເດືອນພຶດ­ສະ­ພາ 2014 ແມ່ນ​ປະ­ຕິ­ບັດ​ໜ້າ​ວຽກໄດ້ 82,32% ຊຶ່ງ​ຈະ​ໃຫ້​ໂຄງ­ການ ດັ່ງກ່າວສຳ­ເລັດໃນ​ວັນ​ທີ 26 ມີ­ນາ 2015. 

   ທ່ານ ວຽງ​ວິ­ໄລ ສຸ­ລິນ­ທອນ ກ່າວ​ຕື່ມ ອີ​ກວ່າ: ໃນ​ເດືອນ​ນີ້ ແມ່ນ​ໄດ້​​ຂໍ​ສະເໜີ​ອະ­ນຸ­ມັດ​ນຳ​ເຂົ້າ​ຖາ­ວອນ​ຊົ່ວ­ຄາວພ້ອມ​ທັງ​ ຍົກ­ເວັ້ນ​ພາ­ສີ, ອາ­ກອນ ແລະ ຄ່າ​ທຳ­ນຽມ​ຕ່າງໆ ສຳ­ລັບ​ວັດ​ສະ​ດຸ​ອຸ­ປະກອນ​ການ​ກໍ່­ສ້າງ ແລະ ພາ­ຫະ­ນະກົນ​ຈັກ​ ທີ່​ຈະ​ນຳ​ໃຊ້​ໃນ​ໂຄງ­ການ​ຕາມ​ແຜນ­ທີ່​ໄດ້ຮັບ​ຈາກ​ຂັ້ນ​ ເທິງ​ໃນ​ເບື້ອງ​ຕົ້ນ, ນອກຈາກນັ້ນ​ຍັງ​ໄດ້​ສົມ­ທົບ​ກັບ​ອຳ­ນາດ​ການປົກ­ຄອງ​ທ້ອງ­ຖິ່ນ ແລະ ພາກ­ສ່ວນ​ກ່ຽວຂ້ອງ​ເພື່ອ​ລົງ​ໄປ​ໄກ່​ເກ່ຍ​ສິ່ງ​ກີດ­ຂວາງ ອອກ​ຈາກ​ເຂດ​ການ​ກໍ່­ສ້າງ. 

   ສ່ວນ​ບໍ­ລິ­ສັດ​ຮັບ​ເໝົາ​ໄດ້​ສືບ­ຕໍ່​ດຳເນີນ​ການ​ຜະ­ລິດ​ຫີນ​ຢູ່​ກິ­ໂລ­ແມັດ 138+500 ບ້ານ​ສະ​ລອບ ເມືອງ​ພີນ ແຂວງ​ສະ­ຫວັນ​ນະ​ເຂດ ເພື່ອ​ຮັບ​ໃຊ້​ເຂົ້າໃນ​ການ​ກໍ່­ສ້າງ​ທາງ​ໄລ­ຍະ​ທີ 2 ສືບຕໍ່​ກັບ​ບໍ­ລິ­ສັດ​ທີ່​ປຶກ­ສາ​ໂຄງ­ການ ເພື່ອ​ຕິດຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ວຽກໃນ​ເດືອນ​ພຶດ­ສະ­ພາ 2014 ຂອງ​ຜູ້​ຮັບເໝົາ​ຊຶ່ງ​ມີ​ບັນ­ດາ​ໜ້າ​ວຽກ​ທີ່​ດຳ­ເນີນການ​ກໍ່­ສ້າງ​ຊັ້ນ​ພື້ນ ​ທາງ 8,8 ກິ­ໂລ­ແມັດ, ປູ​ຢາງ​ອັສ​ຟານ​ຊັ້ນ 1 ໃຫ້​ໄດ້ 13,5 ກິ­ໂລ­ແມັດ, ປູ​ຢາງ​ອັສ​ຟານ​ຊັ້ນ 2 ໃຫ້​ໄດ້ 10,2 ກິ­ໂລ­ແມັດ, ກໍ່­ສ້າງ​ຮ່ອງ​ລະ­ບາຍນ້ຳສອງ​ຂ້າງ​ທາງ​ດ້ວຍ​ເບ​ຕົງ​ໃຫ້​ໄດ້ 7,2 ກິ­ໂລ­ແມັດ, ກໍ່­ສ້າງ​ທໍ່​ລະ­ບາຍ ນ້ຳ 5 ຈຸດ, ສືບ­ຕໍ່​ຖົມ​ບ່າ​ທາງ ແລະ ໄດ້​ຂີດ​ເສັ້ນ​ແບ່ງ​ເລນ​ກາງ​ພ້ອມ​ຕິດ​ຕັ້ງຫຼັກ​ກັນ​ຕົກ ແລະ ຫຼັກ​ກິ­ໂລ­ແມັດ.

   ນອກ­ຈາກ​ນັ້ນ​ທາງ​ບໍ­ລິ­ສັດໂອ​ບາ​ຢາຊິŒ-ໂອ​ບາ​ຢາ​ຊິ​ໂລດ​ຈອຍ​ເລັນ​ເຈີ້ ຍັງ​ໄດ້ສືບ­ຕໍ່​ສົມ­ທົບ​ກັບ​ພາກ­ສ່ວນ​ຮັບ­ຜິດ­ຊອບຕິດ​ຊັ່ງ​ນ້ຳ­ໜັກ​ຢູ່​ດົງ​ເຫັນ ເພື່ອ​ຕິດຕາມການ​ຊັ່ງ​ນ້ຳ­ໜັກ ແລະ ເກັບ​ກຳ​ຂໍ້​ມູນ​ລົດບັນ­ທຸກ​ຜ່ານ​ທາງ​ເລກ 9 ເພື່ອ​ສະ­ເໜີ​ໃຫ້ພະ​ແນກ ຍທຂ ແຂວງ​ສະ­ຫວັນ​ນະ​ເຂດຮູ້​ຕື່ມ​ອີກ.

                                                                                 ຂໍ້ມູນຈາກໜັງສືພິມ: ເສດຖະກິດ-ສັງຄົມ, ສະບັບລົງວັນທີ 02 ມິຖຸນາ 2014

ຄວາມຄືບໜ້າຂອງໂຄງການກໍ່ສ້າງ ຂົວຂ້າມນໍ້າຂອງເມືອງປາກແບງ ແຂວງອຸດົມໄຊ

 

  ໂຄງການກໍ່ສ້າງຂົວຂ້າມນໍ້າຂອງ​ເມືອງປາກແບງ ແຂວງອຸດົມໄຊ ຫາ ເມືອງເງິນ ແຂວງໄຊຍະບູລີ. ​ໂຄງການ​ດັ່ງ​ກ່າວໄດ້ເຊັນສັນຍາ ໃນວັນທີ 18 ສິງຫາ 2011 ໄລຍະການກໍ່ສ້າງ 36 ເດືອນ; ຊຶ່ງເລີ່ມຕົ້ນ ປະຕິບັດວຽກໃນວັນທີ 23 ທັນວາ 2012 ​ແລະ ໄດ້ມີການດັດແກ້ໃໝ່ 28 ເດືອນ; ສໍາເລັດໂຄງການກໍ່ສ້າງ ໃນວັນທີ 22 ມີນາ 2015 ໃນມູນຄ່າການກໍ່ສ້າງທັງໝົດ 30,899,554 ໂດລາສະຫະລັດ ​ເຊິ່ງເປັນທືນກູ້ຢືມ ພິເສດຈາກ ທະນາຄານ EXIM BANK ຈາກ ສປ ຈີນ 95% ແລະລັດຖະບານລາວສົມທົບ 5%, ໂຄງການກໍ່ສ້າງດັ່ງກ່າວໄດ້ມອບໃຫ້ ບໍລິສັດ ຂົວທາງ ຈາກ ສປ ຈີນ (CRBC) ເປັນຜູ້ຮັບເໝົາການກໍ່ສ້າງ.

      ໜ້າວຽກທີ່ປະຕິບັດໄດ້ໃນ ເດືອນ ເມສາ 2014 ​ເຊິ່ງມີ​ລາຍ​ລະອຽດ​ດັ່ງ​ນີ້:

ການຈັດ​ຕັ້ງ​ປະຕິບັດ​ໜ້າ​ວຽກ​ຕ່າງໆ​ມາ​ຮອດ​ ເດືອນ 4/2014 ສາມາດ​ສັງ​ລວມຜົນສຳ​ເລັດ​​ໄດ້​ດັ່ງ​ນີ້:

- ວຽກເບຕົງເສົາຂົວ, ແຜ່ນເບຕົງທາງຍ່າງ ແລະວຽກດິນຈໍານວນໜຶ່ງ ໃນການຈັດຕັ້ງປະຕິບັດໃນ ໄລຍະ 16 ເດືອນ ຜ່ານມາຂອງໂຄງການ ທຽບກັບແຜນການລວມສາມາດປະຕິບັດໄດ້ດັ່ງ​ນີ້: ວຽກຕົວຈິງທັງໝົດ 44,36% ຖ້າທຽບໃສ່ແຜນການ (ແຜນດັດແກ້) ຂອງໂຄງການ 6 ເດືອນຕົ້ນປີ 2013-2014 ຍັງລຸດຄາດ ໝາຍ -4,28%, ສ່ວນໂຄງສ້າງພາກສ່ວນລຸ່ມປະຕິບັດໄດ້ 82,01%.

      ໃນການຈັດຕັ້ງປະຕິບັດຂອງໂຄງການ ໄດ້ມີການຕິດຕາມ, ການຊຸກຍູ້ຈາກຂັ້ນສູນກາງກໍ່ຄື: ກະ ຊວງ ຍທຂ, ສອງແຂວງ, ສອງເມືອງ ແລະອໍານາດການປົກຄອງຂັ້ນທ້ອງຖິ່ນ ຢ່າງສະໝໍ່າສະເໝີ, ຄຽງຄູ່ກັບຂໍ້ ສະດວກນັ້ນ ການປະຕິບັດໂຄງການຍັງພົບຄວາມຫຍຸ້ງຍາກຢູ່ບາງປະການເຊັ່ນ: ການ ປະສານງານໃຫ້ ຄວາມ ຮ່ວມມື ທາງດ້ານເອກະສານຕ່າງໆ ຂອງຜູ້ຮັບເໝົາຍັງຊັກຊ້າ, ຄ່າຊົດເຊີຍ ຕໍ່ຜູ້ທີ່ຖືກຜົນກະທົບຂອງໂຄງການ, ພາຫະນະຮັບໃຊ້ວຽກໂຄງການ ແລະການໂອນເງິນບ້ວງບໍລິ ຫານຂອງໂຄງການກໍ່ສ້າງ.

      ສໍາລັບແຜນວຽກທີ່ຈະຕ້ອງປະຕິບັດໃນ 6ເດືອນ ທ້າຍປີ (ງວດ 3 ແລະງວດ 4) ສົກປີ 2013-2014, ແຜນການລວມຂອງໂຄງການສົກປີ 2013-2014 ຄາດໝາຍໃຫ້ໄດ້ 75%, ສໍາລັບແຜນປະຕິບັດວຽກ ໃນເດືອນສະເລ່ຍຕໍ່ເດືອນແມ່ນໄດ້ 5,1%.

 

Additional information