ຂ່າວກິດຈະກຳຕ່າງໆ

ຂະບວນຄາຣາວານ “ ສູ່ຖີ່ນກໍາເນີດກອງທັບປະຊາຊົນລາວ ”

​       ກະຊວງ​ ຖະ​ແຫລ​ງຂ່າວ, ວັດທະນະ​ທໍາ ​ແລະ ທ່ອງ​ທ່ຽວ ຮ່ວມ​ກັບ ກະຊວງ​ປ້ອງ​ກັນ​ປະ​ເທດ ​ແລະ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ຈັດ​ພິທີ​ເປີດ​ຂະ​ບວນ​ຄາ​ຣາ​ວານ “ສູ່​ຖີ່​ນກໍາ​ເນີ​ດຂອງ​ກອງທັບປະ​ຊາ​ຊົນ​ລາວ” ຂື້ນໃນ​ວັນ​ທີ 8 ມັງກອນ 2014 ທີ່​ເດີ່ນທາດຫຼວງ ນະຄອນຫຼວງ​ວຽງ​ຈັນ ​ໂດຍ​ການ​ເຂົ້າ​ຮ່ວມ​ເປັນ​ປະທານ​ຂອງ​ທ່ານ ອາຊາ​ງ ລາວ​ລີ ຮອງ​ນາຍົກລັດຖະມົນຕີ​ ​ແຫ່ງ ສປປ ລາວ, ທ່ານ ສຈ.ດຣ. ບໍ່​ແສງ​ຄໍາ ວົງ​ດາລາ, ລັດຖະມົນຕີ​ວ່າການ ກະຊວງ ຖະ​ແຫຼ​ງຂ່າວ, ວັດທະນະ​ທໍາ ​ແລະ ທ່ອງ​ທ່ຽວ, ທ່ານ​ ພົນຕີ ຈັນ​ສະໝອນ ຈັນຍາ​ລາດ, ລັດຖະມົນຕີ​ຊ່ວຍ​ວ່າການ ກະຊວງ​ປ້ອງ​ກັນ​ປະ​ເທດ, ທ່ານ ພົນຈັດຕະວາ ກົງ​ທອງ ພົງ​ພິຈິດ, ລັດຖະມົນຕີ​ຊ່ວຍ​ວ່າການ ກະຊວງປ້ອງ​ກັນ​ຄວາມ​ສະຫງົບ, ທ່ານ ລັດຕະນະມະນີ ຄູນ​ນີວົງ, ລັດຖະມົນຕີ​ຊ່ວຍ​ວ່າການ ກະຊວງ ​ໂຍທາ​ທິການ ​ແລະ ຂົນ​ສົ່ງ, ພ້ອມ​ດ້ວຍ​ບັນດາ​ແຂກ​ຖືກ​ເຊີນ ​ແລະ ພາກສ່ວນ​ທີ່​ກ່ຽວຂ້ອງ ຕະຫຼອດ​ຮອດ​ບັນດາ​ຜູ້​ເຂົ້າ​ຮ່ວມ​ຂະ​ບວນຄາ​ຣາ​ວານ ຢ່າງ​ພ້ອມພຽງ. ​ໃນ​ພິທີ​ເປີດ​ຂະ​ບວນຄາຣາວານ, ທ່ານ ສຈ.ດຣ. ບໍ່​ແສ​ງຄໍາ ວົງ​ດາລາ ​ໄດ້​ກ່າວ​ບາງ​ຕອນ​ສໍາຄັນ​ວ່າ: ການຈັດ​ຂະ​ບວນຄາຣາວານຄັ້ງ​ນີ້ ​ແມ່ນ​ເພື່ອ​ສະ​ເຫຼີ​ມສະຫຼອງ ວັນ​ສ້າງ​ຕັ້ງ​ກອງທັບ​ປະ​ຊາ​ຊົນ​ລາວ ຄົບຮອບ 65 ປີ (20/01/1949- 20/01/2014) ​ເຊີ່ງ​ເປັນ​ການ​ຫວນ​ຄືນ​ມູນ​ເຊື້ອ ປະຫວັດສາດ​ອັນພິລະ​ອາດ​ຫານ ຂອງ​ປະຊາຊົນ​ລາວ​ບັນດາ​ເຜົ່າ ​ເວົ້າ​ລວມ, ​ເວົ້າ​ສະ​ເພາະ​ວິລະ​ກໍາ​ອັນລໍ້າເລີດ ຂອງ​ປະຊາຊົນ​ ແຂວງຊຽງ​ຂວາງ ​ແລະ ​ແຂວງຫົວພັນ ພາຍ​ໃຕ້​ການ​ຊີ້​ນໍາ-ນໍາພາ​ອັນ​ປີ​ຊາ​ສາມາດ​ຂອງ​ບັນດາ​ທ່ານ​ຜູ້​ນໍາ​ໃນ​ເມື່ອ​ກ່ອນ, ພ້ອມ​ທັງ​ເປັນ​ການ​ເຜີຍ​ແຜ່ ສປປ ລາວ ​ເປັນ​ປະ​ເທດ​ທີ່​ໜ້າ​ທ່ອງ​ທ່ຽວ​ທີ່​ສຸດ​ໃນ​ໂລກ ສໍາລັບ​ປີ 2013 ​ເຊີ່ງ​ເປັນ​ລາງວັນທີ່​ໜ້າພາກພູມ​ໃຈ ​ແລະ ​ເປັນອັນ​ຊົງ​ກຽດ ທີ່​ສະພາ​ການ​ທ່ອງ​ທ່ຽວ ​ແລະ ການ​ຄ້າ​ຂອງ​ສະຫະພາ​ບ​ເອີ​ລົບ ​ໄດ້​ມອບ​ໃຫ້​ປະ​ເທດ​ລາວ​ເຮົາ, ນອກຈາກ​ນີ້​ກໍ່​ເປັນ​ການ​ໂຄສະນາ​ ການທ່ອງທ່ຽວ​ຕາມ​ເສັ້ນທາງ​ວົງ​ຈອນ​ໃໝ່ ​ເພື່ອ​ສົ່ງ​ເສີ​ມການ​ທ່ອງ​ທ່ຽວ​ພາຍ​ໃນ “ ລາວ​ທ່ອງ​ລາວ” ຂະ​ບວນຄາຣາວານ​ໃນ​ຄັ້ງ​ນີ້ ໄດ້​ອອກເດີນທາງ​ແຕ່​ນະຄອນຫຼວງ​ວຽງ​ຈັນ-​ແຂວງ​ວຽງ​ຈັນ-ຊຽງ​ຂວາງ-ຫົວພັນ-ຊຽງ​ຂວາງ-ບໍລິ​ຄໍາ​ໄຊ-ນະຄອນຫຼວງວຽງ​ຈັນ ມີຄວາ​ມຍາວທັງ​ໝົດ 1.340 ກມ ​ໂດຍ​ໃຊ້​ເວລາ 5 ຄືນ 6 ວັນ ​ແຕ່​ວັນ​ທີ 8-13 ມັງກອນ 2014,​ ນອກຈາກ​ນີ້​ບັນດາຂະ​ບວນຄາຣາວານ​ຍັງ​ຈະ​ໄດ້ ທ່ຽວ​ຊົມ ​ແລະ ສຶກສາ​ຮຽນ​ຮູ້ ບັນດາ​ແຫຼ່ງທ່ອງທ່ຽວ ທາງ​ດ້ານ​ປະຫວັດສາດ​ທີ່​ໂດດ​ເດັ່ນ ​ແລະ ມີ​ຄວາມ​ໝາຍ​ສໍາ​ຄັນ​ຈໍານວນ​ໜື່ງຄື:   ວັດ​ເພຍ​ວັ​ດ ​ເມືອ​ງຄູນ ​ເຊີ່ງ​ເປັນ​ວັດ​​ເກົ່າ​ແກ່ທີ່​ສຸດ​ຂອງ​ເມືອ​ງພວນ ​ແຂວງ ຊຽງ​ຂວາງ ​ເຊີ່ງ​ຍັງ​ເຫຼືອ​ແຕ່​ຊາກ ສະຫຼັກ​ຫັກ​ພັງ​ຂອງ​ອຸ​ໂບສົດ ພ້ອມ​ດ້ວຍ​ພຣະພຸດ​ທະ​ຮູບ​ໃຫຍ່ (ພະ​ອົງ​ພະທາດ)  ​ແລະ ພະທາດ​ຝຸ່ນ​ທີ່​ເພພັງ​ຍ້ອນ​ສົງຄາມ​ທໍາລາຍ, ຢ້ຽມຢາມ​ແຫຼ່ງທ່ອງ​ທ່ຽວທີ່ໂດດ​ເດັ່ນ​ຂອງ ​ແຂວງຊຽງ​ຂວາງ​ຄື: ທົ່ງ​ໄຫ​ຫີນ 1, ທົ່ງ​ໄຫ​ຫີນ 2, ບ່ອນ​ຜະລິ​ດ​ໄຫຫີນ​ພູ​ເກັງ, ​ເສັ້ນທາງ​ຜ່າ​ວົງ​ປິດ​ລ້ອມ​ຂອງ​ກອງພັນ​ທີ 2, ຖໍ້າປິວ​ເມືອງ​ຄໍາ. ຢູ່​ແຂວງ​ຫົວພັນ​ຈະ​ໄດ້​ຢ້ຽມຢາມ ​ແລະ ທ່ຽວ​ຊົມ​ບັນດາ​ຖໍ້າຜູ້ນໍາ 7 ທ່ານ ທີ່​ເມືອງ​ວຽງ​ໄຊ ຖີ່​ນກໍາ​ເນີ​ດຂອງ ກອງ​ທັບ​ປະຊາຊົນລາວ ​ແລະ ຫັດຖະ​ກໍາ​ຕໍ່າ​ຜ່າ​ໄໝ​ທີ່​ລື​ຊ່າ​ຂອງ​​ແຂວງ​ຫົວພັນ. ຈາ​ກນັ້ນ, ຂະ​ບວນຄາຣາວານກໍ່ໄດ້​ກັບຄືນ​ສູ່​ນະຄ​ອນຫຼວງ​ວຽງ​ຈັນ ດ້ວຍ​ຄວາມສະຫວັດດີ​ພາບ.

 

ຫ້ອງການສ້າງຂະບວນການຕ້ອນຮັບ ກອງປະຊູມໃຫຍ່ສະໃໝທີ IV ຂອງຕົນ

ຄະນະພັກຮາກຖານຫ້ອງການ ແມ່ນຮາກຖານພັກໜຶ່ງທີ່ຂື້ນກັບອົງຄະນະພັກກະຊວງ ໂຍທາທິການ ແລະ ຂົນສົ່ງ, ປະກອບດ້ວຍ 3 ໜ່ວຍພັກທີ່ຂື້ນກັບ ແລະ 1 ຫ້ອງການຊ່ວຍວຽກ, ປະຈຸບັນ ຫ້ອງການໄດ້ມີການປັບປຸງກົງຈັກ ການຈັດຕັ້ງ ແລະໄດ້ຊັບຊ້ອນ ຍົກຍ້າຍສະມາຊິກພັກ-ພະນັກງານ ຕາມໜ້າທີ່ວຽກງານ ແລະ ຕາມຄວາມຮັບຜິດຊອບ ຂອງແຕ່ ລະສະຫາຍ. ຈຶ່ງເຮັດໃຫ້ຄະນະພັກຮາກຖານຫ້ອງການສະໃໝທີ III ໃນເບື້ອງຕົ້ນປະກອບມີ 5 ສະຫາຍ ຍັງເຫລືອ 4 ສະຫາຍ, ຍິງ 1 ສະຫາຍ, ມີຄະນະໜ່ວຍພັກ 7 ສະຫາຍ, ຍິງ 1 ສະຫາຍ, ສະມາຊິກທັງໝົດມີ 39 ສະຫາຍ ຍິງ 11 ສະຫາຍ, ໃນນີ້ມີສະມາຊິກສໍາຮອງ 6 ສະຫາຍ, ເປັນເພດຍິງ 2 ສະຫາຍ.

ໂດຍອີງຕາມລະບຽບການຈັດກອງປະຊູມໃຫຍ່ ຄະນະພັກຮາກຖານ ແລະ ໜ່ວຍພັກ ຂອງພັກປະຊາຊົນປະຕິວັດລາວ, ຄະນະພັກຮາກຖານຫ້ອງການພວກເຮົາຈະໄດ້ເປີດກອງປະຊຸມໃຫຍ່ສະໃໝທີ IV ຂອງຕົນຂື້ນຢ່າງເປັນທາງການ ໃນ ລະຫວ່າງເດືອນ 4/2013 ທີ່ຈະມາເຖິງນີ້, ເພື່ອທົບທວນຫວນຄືນການຊີ້ນໍາ ນໍາພາ ການຈັດຕັ້ງປະຕິບັດວຽກງານ ໃນຂົງເຂດທີ່ຕົນຮັບຜິດຊອບ ຕາມມະຕິກອງປະຊູມໃຫຍ່ຄັ້ງທີ IX ຂອງພັກ, ມະຕິກອງປະຊູມໃຫ່ຍຄັ້ງທີ III ຂອງ ອົງຄະນະພັກກະຊວງ ແລະ ຕາມມະຕິກອງປະຊຸມໃຫຍ່ຄັ້ງທີ III ຂອງຄະນະພັກຮາກຖານຫ້ອງການ ພ້ອມທັງວາງ ທິດທາງແຜນການໃນຕໍ່ໜ້າ, ໃນນີ້, ຄະນະພັກຮາກຖານຫ້ອງການພວກເຮົາ ໄດ້ຊີ້ນໍາ ນໍາພາພະນັກງານ-ລັດ ຖະກອນພາຍໃນຫ້ອງການ ພ້ອມກັນສ້າງຂະບວນການເພື່ອຄໍານັບຮັບຕ້ອນວັນສໍາຄັນດັ່ງກ່າວ, ໂດຍສະເພາະແມ່ນ ການແຂ່ງຂັນກັນ ປະຕິບັດໜ້າທີ່ວຽກງານຕາມຄວາມຮັບຜິດຊອບຂອງຕົນ, ການແຂ່ງຂັນກັນນໍາໃຊ້ຊັບສົມບັດສິ່ງຂອງ ສ່ວນລວມຢ່າງຖືກຕ້ອງຕາມຄວາມຈໍາເປັນເຊັ່ນ: ການນໍາໃຊ້ໄຟຟ້າ, ນໍ້າປະປາ, ໂທລະສັບ, ຈັກອັດເອກະສານ ແລະ ອື່ນໆ ໂດຍມີການຕິດຕາມກວດກາຢ່າງຄັກແນ່ ແລະຜ່ານມາກໍ່ເຫັນວ່າສາມາດປະຢັດລາຍຈ່າຍທີ່ບໍ່ຈໍາເປັນລົງ ໄດ້ດີພໍ ສົມຄວນ. ນອກນີ້ ພວກເຮົາຍັງໄດ້ມອບໃຫ້ 3 ອົງການຈັດຕັ້ງມະຫາຊົນ ແຂ່ງຂັນກັນຮັກສາຄວາມສະອາດຢູ່ພາຍໃນ ຫ້ອງການ, ຈັດການແຂ່ງຂັນກິລາຕີບູ່ນ ເຊິ່ງເປັນກິລາທີ່ນິຍົມໃນໝູ່ພະນັກງານ ແລະ ແຂ່ງຂັນກິລາເຕະບານມິດຕະພາບຢ່າງເປັນ ຂະບວນຟົດຟື້ນ.

ຄະນະກຳມະບານຮາກຖານ ຫ້ອງການ ຍທຂ ສ້າງກິດຈະກຳຮ່ວມ ກັບພະແນກ ຍທຂ ນະຄອນຫລວງ

ເພື່ອສ້າງຂະບວນການກະກຽມໃຫ້ແກ່ກອງປະຊຸມໃຫ່ຍຄະນະພັກຮາກຖານ ຫ້ອງການກະຊວງ ຄັ້ງທີ IV ແລະ ຂ່ຳນັບ ຮັບຕ້ອນວັນສຳຄັນຂອງຊາດ ຄະນະກຳມະບານຮາກຖານຫ້ອງການ ກະຊວງ ຈຶ່ງໄດ້ຈັດກິດຈະກຳແຂ່ງຂັນກິລາ ມິດຕະ ພາບປະເພດເປຕັງ (ບູ່ນ) ກັບ ຄະນະກຳມະບານຮາກຖານ ພະແນກ ໂຍທາທິການ ແລະ ຂົນສົ່ງ ນະຄອນຫລວງ ວຽງຈັນ ຂື້ນ ໃນວັນສຸກ ວັນທີ 19 /07/ 2013 ທີ່ສະໜາມກິລາເປຕັງ ພະແນກ ຍທຂ ນະຄອນຫລວງ, ຊຶ່ງໄດ້ເລີ່ມ ການແຂ່ງຂັນແຕ່ເວລາ 16:00 ໂມງ ແລະ ໄດ້ແບ່ງທີມຕີບູ່ນດັ່ງລາຍລະອຽດ ຄື: ທີມຄະນະນຳຫ້ອງການ ກະຊວງ ພົບກັບ ທີມຄະນະນຳຂອງພະແນກ ຍທຂ ນະຄອນຫລວງວຽງຈັນ ຜົນການແຂ່ງຂັນ ແມ່ນທີມຄະນະນຳພະແນກ ຍທຂ.ນວ ເອົາຊະນະທີມຄະນະນຳຫ້ອງການ ກະຊວງ, ທີມທີ 2 ແມ່ນທີມຄະນະກຳມະບານຮາກຖານ ຫ້ອງການ ພົບກັບທີມຄະນະກຳມະບານຮາກຖານ ພະແນກ ຍທຂ.ນວ ຜົນການ ແຂ່ງຂັນແມ່ນທີມຄະນະກຳມະບານຮາກຖານ ພະແນກ ຍທຂ.ນວ ເອົາຊະນະທີມຄະນະກຳມະບານ ຮາກຖານ ຫ້ອງການ ແລະ ອີກທີມສຸດທ້າຍ ເປັນການພົບກັນ ລະຫວ່າງທີມສະຫະພັນແມ່ຍິງຮາກຖານ ຫ້ອງການ ກັບທີມ ສະຫະພັນແມ່ຍິງ ພະແນກ ຍທຂ.ນວ ຜົນການແຂ່ງຂັນ ສະຫະພັນແມ່ຍິງ ຫ້ອງການ ສາມາດເອົາຊະນະທີມ ສະຫະພັນແມ່ຍິງ ພະແນກ ຍທຂ.ນວ ໄດ້, ແລະກິດຈະກຳດັ່ງກ່າວ ນີ້ ຍັງເປັນການສ້າງຄວາມສາຍສຳພັນອັນດີ ລະຫວ່າງ ຫ້ອງການກະຊວງ ໂຍທາທິການ ແລະຂົນສົ່ງ ກັບພະແນກ ໂຍທາທິການ ແລະຂົນສົ່ງ ນະຄອນຫລວງວຽງຈັນ ໃຫ້ດີຂື້ນເລື່ອຍໆ.

ມອບເຄື່ອງຊ່ວຍເຫລືອໃຫ້ ທະຫານຊາຍແດນ

ເພື່ອເປັນການຮູ້ບຸນຄຸນຕໍ່ອ້າຍນ້ອງທະຫານ ທີ່ປະຈຳຢູ່ເຂດຫ່າງໄກສອກຫລີກ, ເພື່ອຮັກສາຄວາມປອດໄພ ໃຫ້ແກ່ພໍ່ແມ່ປະຊາຊົນລາວທຸກທົ່ວໜ້າ. ກະຊວງໂຍທາທິການ ແລະ ຂົນສົ່ງ ເຫັນໄດ້ເຖິງຄວາມ ເອົາໃຈໃສ່ຕໍ່ ໜ້າທີ່ວຽກງານດັ່ງກ່າວ. ຈຶ່ງໄດ້ມີການລະດົມເຄື່ອງຊ່ວຍເຫລືອ ເພື່ອທີ່ຈະນຳໄປ ມອບໃຫ້ອ້າຍນ້ອງທະທານ ທີ່ຢູ່ແນວໜ້າ. ດັ່ງນັ້ນ, ໃນວັນທີ 20 ກຸມພາ 2013 ທ່ານ ນາງ ວິໄລຄຳ ໂພສາລາດ ຫົວໜ້າສະຖາບັນໂຍທາ ແລະ ຂົນສົ່ງ, ຄະນະພັກກະຊວງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ທ່ານ ຈັນຕຸລາ ພານະລາສີ ຫົວໜ້າ ກົມກວດກາ, ຮອງປະທານກວດກາກະຊວງ ພ້ອມຄະນະ ຈາກກະຊວງໂຍທາທິການ ແລະຂົນສົ່ງ ໄດ້ໄປມອບເຄື່ອງ ຊ່ວຍເຫລືອໃຫ້ອ້າຍນ້ອງທະຫານ ທີ່ປະຈຳການຢູ່ເຂດຫ່າງໄກສອກຫຼີກຂອງແຂວງວຽງຈັນ ແລະ ແຂວງຊຽງຂວາງ.

    ການມອບເຄື່ອງຊ່ວຍເຫລືອໃນຄັ້ງນີ້ ມີເຄື່ອງອຸປະໂພກແລະ ບໍລິໂພກຊຶ່ງປະກອບດ້ວຍ ໝີ່, ປ໋ອງປາ, ນ້ຳດື່ມ ແລະ ຜ້າຫົ່ມ ໄດ້ແບ່ງອອກເປັນ 3 ຈຸດ ຄື: ຈຸດທີໜຶ່ງໄດ້ມອບໃຫ້ກອງຮ້ອຍ 421 ເມືອງວັງວຽງ ແຂວງວຽງຈັນ ໃຫ້ກຽດ ມອບໂດຍ ທ່ານ ນາງ ວິໄລຄຳ ໂພສາລາດ ຫົວໜ້າສະຖາບັນໂຍທາ ແລະ ຂົນສົ່ງ, ເຄື່ອງທີ່ນຳມາມອບ ໃນຄັ້ງນີ້ ລວມມູນຄ່າການມອບເຄື່ອງຊ່ວຍເຫລືອທັງໝົດ 8.500.000 ກີບ, ຈຸດທີ 2 ແມ່ນມອບເຄື່ອງຊ່ວຍເຫລືອ ໃຫ້ທະ ຫານກອງຮ້ອຍ 101 ເມືອງໄຊສົມບູນ ແຂວງວຽງຈັນ ມອບໂດຍ ທ່ານ ນາງ ວິໄລຄຳ ໂພສາລາດ ມີມູນຄ່າ 8.300.000 ກີບ ແລະ ຈຸດສຸດທ້າຍແມ່ນໄດ້ມອບເຄື່ອງຊ່ວຍເຫລືອໃຫ້ກອງບັນຊາການທະຫານ ເມືອງຜາໄຊ ແຂວງ ຊຽງຂວາງ ລວມມູນຄ່າການຊ່ວຍ ເຫລືອ 8.900.000 ກີບເຄື່ອງທີ່ນຳມາຊ່ວຍເຫລືອໃນຄັ້ງນີ້ ມີມູນຄ່າທັງ ໜົດ 25.700.000 ກີບ. ເພື່ອເປັນການປະກອບສ່ວນເຂົ້າໃນວຽກງານປ້ອງການຊາດ ທີ່ຍາມໃດອ້າຍນ້ອງທະຫານ ຢູ່ແນວໜ້າ ກໍໄດ້ເອົາໃຈໃສ່ເວນຍາມ ເພື່ອຄວາມສະຫງົບສຸກຂອງປວງຊົນລາວທັງຊາດ.

Additional information