ຂ່າວກິດຈະກຳຕ່າງໆ

ແຂ່ງຂັນກິລາບານແຕະມິດຕະພາບ ລະຫວ່າງ ສາມອົງການຈັດຕັ້ງມະຫາຊົນ ຫ້ອງການ ພົບກັບ ສາມອົງການຈັດຕັ້ງມະຫາຊົນ ກົມການບິນ

 

    ເພື່ອ​ເປັນ​ການ​ຊົມເຊີຍວັນສ້າງຕັ້ງ ພັກປະຊາຊົນປະຕິວັດລາວ ວັນທີ 22 ມີນາ ຄົບຮອບ 59 ປີ ແລະ ​ເພື່ອ​ສ້າງ​ຄວາມ​ສາມັກຄີ​ຮັກ​ແພງ​ລະ​ຫວ່າງສາມອົງການຈັດຕັ້ງມະຫາຊົນ ຫ້ອງການ ແລະ ສາມອົງການຈັດຕັ້ງມະຫາຊົນ ກົມການບິນ ເວົ້າ​ລວມ, ​ເວົ້າ​ສະ​ເພາະ ລະ​ຫວ່າງ ຫ້ອງການ ກັບ ກົມການບິນ ກະຊວງ ຍທຂ, ​ໃນ​ຕອນ​ແລງ​ວັນ​ທີ 27.03.2014 ທີ​ເດີນ​ບານ ສັບພະ​ວິຊາ  ​ເວລາ 16:00 ​ໂມງ, ​ໄດ້​ຈັດການ​ແຂ່ງຂັນ​ບານ​ເຕະ​ມິດຕະພາບ​ຂື້ນ ​ໂດຍ​ເປັນກຽດ​ເຂົ້າ​ຮ່ວມ​ການ​ແຂ່ງ​ຂັນ​ໃນ​ຄັ້ງ​ນີ້​ມີ ທ່ານຮອງຫົວໜ້າຫ້ອງການ,  ຮອງຫົວໜ້າກົມ​ການບິນ, ຫົວໜ້າ​ພະ​ແນ​ກ, ຮອງ​ພະ​ແນ​ກ ​ແລະ ວິຊາ​ການ ທັງ​ສອງ​ພາກສ່ວນ​ເຂົ້າ​ຮ່ວມ, ໃນ​ທາມກາງ​ການແຂ່ງ​ຂັນ ​ແລະ ກອງເຊຍທັງສອງຝ່າຍ​​ເຮັດ​ໃຫ້ການ​ແຂ່ງຂັນ​ໃນຄັ້ງ​ນີ້​ມີບັນຍາກາດ ມີ​ຄວາມ​ເບີກບານ​ມ່ວນ​ຊື່ນ ​ແລະ ​ເຕັມ​ໄປ​ດ້ວຍ​ຄວາມ​ສາມັກຄີ​ຂອງ​ພະນັກງານ​ທັງ​ສອງ​ພາກສ່ວນ.

 

ງານວາງສະແດງ ສະມາຄົມສະຖາປານິກ ແລະ ວິສະວະກອນກໍ່ສ້າງ “ALACE EXPO 2014”

    ເພື່ອ​​ເປັນ​ການ​ຕ້ອນຮັບ ກອງ​ປະຊຸມ​​ປະ​ຈໍາປີ 2014 ຂອງ ສະມາຄົມ​ສະຖາ​ປາ​ນິກ ​ແລະ ວິສະວະກອນກໍ່ສ້າງ “ສສວ“ ທີ່ຈະ​ໄດ້​ໄຂ​ຂື້ນ​ຢ່າງ​ເປັນ​ທາງ​ກາ​ນ ຄື​ດັ່ງ​ທຸກໆ​ປີ ຜ່າ​ນມາ ​ແລະ ​ເພື່ອ​ເຮັດ​ໃຫ້​ກອງ​ປະຊຸມ​ໃຫຍ່​ມີ​ຄວາມ​ໝາຍ ​ແລະ ​ຟົດ​ຟື້ນ​ຍິ່ງ​ຂື້ນ, ສສວ ຍັງ​ໄດ້​ຈັດ​ງານ​ວາງ​ສະ​ແດງ ​​ໃນ​ລະຫວ່າງວັນ​ທີ 20 – 23 ກຸມພາ 2014 ທີ່​ສູນການ​ຄ້າ​ລາວ-​ໄອ​​ເຕັກ ​ໂດຍ​ໃສ່​ຊື່ວ່າ “ALACE EXPO 2014” ພາຍ​​ໃຕ້​ຄໍາ​ຂັວນ "​ເສັ້ນທາງ​ສູ່​ປະ​ຊາ​ຄົມ ​ເສດຖະກິດ​ອາ​ຊຽນ" ຫຼື ​ໃນ​ພາສາ​ອັງກິດ​ແປ​ວ່າ “THE WAYS TOWARDS TO AEC“.

ໃນ​ເວລາ 10:30 ​ໂມງ ຂອງ​ວັນ​ທີ 20 ກຸມພາ 2014 ​​ເປັນ​ກຽດ​ເປີດ​ງານ​ວາງສະ​ແດງ​ໃນ​ຄັ້ງ​ນີ້ໂດຍ​ທ່ານ ສົມ​ສະຫວາດ ​ເລັ່ງສະຫວັດ ກໍາມະການກົມ​ການ​ເມືອງ​ສູນ​ກາງ​ພັກ, ຮອງ​ນາຍົກລັດຖະມົນຕີ,​ ຜູ້​ຊີ້​ນໍາ​ວຽກ​ງານເສດຖະກິດ, ມີ​ທ່ານ​ປະທານ​ສະມາຄົມ ສະຖາປະນິກ ສ ​ເກົາຫຼີ,​ ຫວຽດນາມ, ມາ​ເລ​ເຊຍ ​ແລະ ລາຊະ​ອານາຈັກ​ໄທ. ງານວາງສະ​ແດງດໍາເນີນເປັນເວລາ 2 ມື້, ວັນທີ 20-21 ກຸມພາ 2014.

​ໃນ​ງານ​ກິດຈະ​ກໍາ​ວາງສະ​ແດງ ​ແລະ ສະ​ເໜີ​ຜົນງານ ດ້ານ​ສະຖາ​ປັດຕະ​ຍະ​ກໍາ ​ແລະ ວິສະວະ​ກໍາ ການ​ກໍ່​ສ້າງ​ທັງ​ພາຍ​ໃນ ​ແລະ ຕ່າງປະ​ເທດ ນໍາ​ສະ​ເໜີ​ບັນດາ​ໂຄງການ​ກໍ່ສ້າງ​ເຄຫາ​ສະຖານ, ດ້ານ​ຜັງ​ເມືອງ, ດ້ານ​ຄົມມະນາຄົມ​ຂົນ​ສົ່ງ ພົ້ນ​ເດັ່ນທີ່​ເກີດ​ຂື້ນ​ໃນ ​ໄລຍະ​ຜ່າ​ນມາ, ປັດຈຸ​ບັນ ​ແລະ ​ໃນ​ອານາຄົດ ຂອງ ສປປ ລາວ. ນອກ​ນັ້ນ,​ ຍັງ​ມີ​ຮ້ານ​ວາງສະ​ແດງ​ສິນຄ້າ​ວັດ​ສະ​ດຸກໍ່ສ້າງ, ຜະລິດ​ຕະພັນ​ ​ແລະ ​ເຕັກ​ໂນ​ໂລ​ຊີ ການ​ກໍ່ສ້າງ​ໃໝ່ ທີ່​ທັນ​ສະ​ໄໝ ຈາ​ກພາຍ​ໃນ ​ແລະ ຕ່າງປະ​ເທດ ຫຼາຍ​ກວ່າຮ້ອຍຮ້ານ​ເຂົ້າ​ຮ່ວມ.

   ມີ​ການ​ປະ​ກວດ​ແຂ່ງຂັນ​ແບບ ສະຖາປັດ​ຕະຍະ​ກໍາ ​ແລະ ວິສະວະ​ກໍາ ດີ​ເດັ່ນ​ປະ​ຈໍາປີ ຈາກ​ນັກ​ອອກ​ແບບ, ນັກ​ສະຖາປະນິກ ​ແລະ​ວິສະວະ​ກອນ​ໜຸ່ມ, ນັກ​ສະຖາປະນິກ ​ແລະ​ວິສະວະ​ກອນມື​ອາ​ຊິ​ບ, ບໍລິສັດ​ອອກ​ແບບ, ອອກ​ແບບ​ຕົບ​ແຕ່ງ​ພາຍ​ໃນ ​ແລະ​ບໍ່​ລິ​ສັດ​ທີ​ປືກສາ, ນັກ​ສຶກສາ ​ແລະ ຈາກ​ຫຼາຍ​ອົງ​ກອນ​ເຂົ້າ​ຮ່ວມ. ສະ​ເພາະ​ໃນ​ປີ​ນີ້ ມີ​ຮ້ອຍ​ກ່ວາ​ບໍລິສັດ​ ທັງພາຍ​​ໃນ​ແລະ​ຕ່າງປະ​ເທດ​ເຂົ້າ​ຮ່ວມ​ຢ່າງ​ຄຶກຄື້ນຫຼືທຽບ​ເປັນ​ຈໍານວນກໍ່​ມີ​ເຖິງ 160 ຮ້ານ.

    ສິ່ງທີ່ສໍາຄັນ ກ່ວາ​ນັ້ນ​ແມ່ນມີ​ການ​ສໍາມະ​ນາວິຊາ​ການ​ເຜີຍ​ແຜ່​ເຕັກ​ໂນ​ໂລ​ຊີ ​ແລະ​ນະ​ວັດຕະ​ກໍາ​ກ່ຽວ​ກັບ​ການ​ກໍ່​ສ້າງ​ແບບ​ໃໝ່​ທັນ​ສະ​ໄໝ​ຈາກ​ວິທະຍາກອນ ​ແລະ ບໍລິສັດ​ຊັ້ນ​ນໍາ​ຈາກ​ຕ່າງປະ​ເທດ, ມີ​ການ​ພົບ​ປະ​​ແລ​ກປ່ຽນ​ຂໍ້​ມູນຂ່າວສານລະຫວ່າງ​ນັກທຸລະກິດ​ດ້ານ​ການ​ອອກ​ແບບ, ດ້ານ​ທີ່​ປຶກສາ, ດ້ານ​ການ​ກໍ່ສ້າງ​, ດ້ານ​ການ​ຄ້າຂາຍ ວັດ​ສະ​ດຸ​ການ​ກໍ່ສ້າງ​ທັງ​ພາຍ​ໃນ ​ແລະ ຕ່າງປະ​ເທດ.

 

ກະຊວງ ຍທຂ ມອບເຄື່ອງຊ່ວຍເຫຼືອທະຫານ

     ໃນວັນ​ທີ 19-20 ​ມີນາ 2014 ກະຊວງ​ ໂຍທາ​ທິການ​ ແລະ​ຂົນ​ສົ່ງ, ບໍລິສັດ ວິ​ສາ​ຫະ​ກິດກໍ່ສ້າງ​ຄົມມະນາຄົມ ແລະ ບໍລິສັດ​ ທາງ​ເລກ 8,  ​ໄດ້ມອບ​ເຄື່ອງ​ຊ່ວຍ​ເຫຼືອ​​ເປັນ ເຄື່ອງ​ອຸປະ​ໂພ​ກ-ບໍລິ​ໂພ​ກຈຳນວນ​ໜື່ງ, ​ເພື່ອ​ໄປ​ຊຸກຍູ້​ຊ່ວຍ​ເຫຼືອ​ບັນດາ​ກອງ​ທີ່​ປະຕິ​ບັດໜ້າ​ທີ​ວຽກ​ງານ​ຢູ່​ເຂດທຸລະກັນດານຫ່າງ​ໄກ​ສອກຫຼີກ 2​ ແຂວງ​ພາກ​ເໜືອຄື: ​ແຂວງ​ບໍ່​ແກ້ວ ​ແລ​ະ ​ແຂວງໄຊ​ຍະ​ບູລີ. ​ ​

    ໂດ​ຍ​ເປັນ​ກຽດ​ຂອງ ທ່າ​ນ ພົນ​ຈັດຕະວາ ສຸບັນ ຫຸນ​ນະ​ຈຳປາ, ຄະນະ​ພັກ​ກະຊວງ​ປ້ອງ​ກັນ​ປະ​ເທດ, ຮອງ​ຫົວໜ້າກົມ​ໃຫ່ຍການ​ເມືອງ​ກອງທັບ​​ ແລະ​ ທ່ານ​ ພູ​ແກ້ວ ທຳ​ມະ​ວົງ ຮອງ​ຫົວໜ້າຫ້ອງການ​ ກະຊວງ ​ໂຍທາ​ທິການ​ ແລະ​ ຂົນ​ສົ່ງ ​ເປັນກຽດນ​ມອບ​ເຄື່ອງ​ຊ່ວຍ​ເຫຼືອ​ເປັນ​ເຄື່ອງ ອຸປະ​ໂພ​ກ-ບໍລິ​ໂພ​ກຈຳນວນໜື່ງໃຫ້​ທະຫານ ກອງ​ ຄໍ 203 ກຸ່ມ​ບ້ານ​ກ້ອນ​ຕື່ນ​​ ແລະ​ ຄ້າຍ​ທະຫານ​ຜາ​ມົນ ຫ້ວຍ​ສະ​ງຶກ​ ເມືອງ​ປາກ​ທາ ແຂວງ​ບໍ່​ແກ້ວ ​​ແລະ ກອງພັນ​ໃຫຍ່ 301 ​ແຂວງ​ໄຊ​ຍະ​ບູລີ, ເພື່ອ​ໄປ​ຊຸກຍູ້​ຊ່ວຍ​ເຫຼືອ​ບັນດາ​ກອງ​ທີ່​ປະຕິ​ບັດໜ້າ​ທີ​ວຽກ​ງານ​ຢູ່​ເຂດທຸລະກັນດານຫ່າງ​ໄກ​ສອກຫຼີກ ​ໃນ​ການ​ປົກປັກ​ຮັກສາ ​ແລະ ສືບຕໍ່ພາລະກິດ ສ້າງສາປະເທດຊາດໃຫ້ຮັ່ງມີເຂັ້ມແຂງຂື້ນເລື້ອຍໆ.

 

ທ່ານ ລັດຖະມົນຕີວ່າການ ກະຊວງ ໂຍທາທິການ ແລະ ຂົນສົ່ງ ສືບຕໍ່ອວຍພອນກອງທັບໃນໂອ ກາດວັນສ້າງຕັ້ງກອງທັບປະຊາຊົນລາວຄົບຮອບ 65 ປີ.

                 ທ່ານ ລັດຖະມົນຕີວ່າການ ກະຊວງ ໂຍທາທິການ ແລະ ຂົນສົ່ງ ສືບຕໍ່ອວຍພອນກອງທັບໃນໂອ ກາດວັນສ້າງຕັ້ງກອງທັບປະຊາຊົນລາວຄົບຮອບ 65 ປີ. ພາຍຫຼັງໄດ້ເຂົ້າອວຍພອນຄະນະນຳກະຊວງປ້ອງ ກັນປະເທດ, ວິທະຍາຄານໄກສອນພົມວິຫານ ແລະ ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງກອງທັບປະ

ຊາຊົນລາວຄົບຮອບ 65 ປີ ທີ່ກອງພົນທະຫານລາບທີ1. ໃນຕອນເຊົ້າຂອງວັນທີ 25 ມັງກອນ 2014, ທ່ານ ສົມມາດ ພົລເສນາ, ລັດຖະມົນຕີວ່າການ ກະຊວງໂຍທາທິການ ແລະ ຂົນສົ່ງ, ພ້ອມຄະນະກໍ່ໄດ້ສືບຕໍ່ເຂົ້າອວຍພອນກອງພົນທະຫານລາບທີ3, ຊຶ່ງ ໄດ້ຮັບການຕ້ອນຮັບຈາກ ທ່ານ ພົຈ. ຄຳບຸ່ນ ເຍືອມມະນີວົງ, ຫົວໜ້າການເມືອງກອງພົນ. ຈາກນັ້ນ, ຕອນບ່າຍຂອງວັນດຽວກັນ, ທ່ານລັດຖະມົນຕີວ່າການ ກໍ່ໄດ້ເຂົ້າອວຍພອນກອງພົນທະຫານລາບທີ4, ໂດຍໄດ້ຮັບການຕ້ອນຮັບຈາກ ທ່ານ ພັທ. ບຸນທອນ ສຸພາວົງໄຕ, ຫົວໜ້າພາລະທິການກອງພົນ. ພ້ອມດຽວກັນນີ້, ໃນວັນທີ 28 ມັງກອນ 2014, ທ່ານລັດຖະມົນຕີວ່າການ ຍັງໄດ້ສືບຕໍ່ເຂົ້າອວຍພອນ ກອງພົນທະຫານລາບທີ2, ຊຶ່ງໄດ້ຮັບການຕ້ອນຮັບຈາກ ທ່ານ ພັອ. ຄຳຫຼ້າ ວົງວິໄລ, ຫົວໜ້າການເມືອງ ກອງພົນ ແລະ ກອງບັນຊາການທະຫານແຂວງໄຊຍະບູລີ ໂດຍແມ່ນ ທ່ານ ພັອ. ຄຳໝັ້ນ ວັນນະວົງ, ຫົວໜ້າການເມືອງກອງບັນຊາການທະຫານແຂວງໄດ້ໃຫ້ການຕ້ອນຮັບ. ໃນໂອກາດເຂົ້າອວຍກອງທັບ, ທ່ານ ລັດຖະມົນຕີວ່າການ ໄດ້ສະແດງຄວາມຮູ້ບຸນຄຸນມາຍັງ ນາຍ ແລະ ພົນທະຫານ ທົ່ວກອງທັບ ໂດຍສະເພາະປີນີ້ເປັນປີແຫ່ງວັນສ້າງຕັ້ງກອງທັບປະຊາຊົນລາວ ຄົບຮອບ 65 ປີ, ຊຶ່ງເປັນວັນທີ່ມີຄວາມ ໝາຍສຳຄັນ ແລະ ເປັນປະຫັວດສາດອີກວັນໜື່ງຂອງທົ່ວພັກ, ທົ່ວລັດ, ທົ່ວກອງທັບ ແລະ ປວງຊົນລາວ ທັງຊາດ. ເມື່ອຫວນຄືນໃນພາລະກິດປະຕິວັດຊາດ ປະຊາທິປະໄຕ ທີ່ຍືດເຍື້ອຍາວນານຕ້ານຈັກກະພັດຜູ້ ຮຸກຮານ ແລະ ລູກແຫຼ້ງຕີນມືຂອງພວກເຂົາ, ກອງທັບເຮົາ ສ້າງໄດ້ທາດແທ້ມູນເຊື້ອອັນສະຫງ່າອົງອາດ, ນ້ຳໃຈຕໍ່ສູ້ເດັດດ່ຽວພິລາດອາດຫານ ບໍ່ຍອມຈຳນົນຕໍ່ສັດຕູ ແລະ ສາມາດສຳເລັດພາລະກຳປະຫັວດສາດ ອັນສະຫງ່າງາມຂອງຕົນ. ໃນໄລຍະສ້າງສາປະເທດຊາດ, ກອງທັບ ຍັງສືບຕໍ່ຮັກສາ ແລະ ເສີມຂະຫຍາຍ ມູນເຊື້ອອັນກ້າແກ່ນຂອງຕົນ, ເຮັດໃຫ້ປະເທດຊາດ ມີຄວາມສະຫົງບສຸກ ແລະ ໄດ້ຮັບການພັດທະນາ ຢ່າງຮອບດ້ານ, ກໍຄືເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງໃຫ້ດີຂື້ນເທື່ອລະ ກ້າວ. ສຳລັບຂະແໜງໂຍທາທິການ ແລະ ຂົນສົ່ງ ແມ່ນເປັນຂະແໜງການປາຍແຫຼມແມ່ນຈະສູ້ຊົນໃຫ້ ການຮ່ວມມື ແລະ ສະໜັບສະໜູນກອງທັບ, ສ່ວນກອງທັບແມ່ນເປັນກຳແພງເພັດຂອງຊາດ, ຂອງປະຊາ ຊົນ, ສະນັ້ນຂະແໜງໂຍທາທິການ ແລະ ຂົນສົ່ງ ແລະ ກອງທັບ ຍາມໃດກໍ່ຕິດພັນເຊິ່ງການ ແລະ ກັນ.

ໃນໂອກາດທີ່ມີຄວາມໝາຍສຳຄັນນີ້, ທ່ານ ລັດຖະມົນຕີວ່າການ ໂດຍຕາງໜ້າໃຫ້ຄະນະພັກ, ຄະນະນຳ ແລະ ພະນັກງານລັດຖະກອນທົ່ວ ກະຊວງ ໂຍທາທິການ ແລະ ຂົນສົ່ງ, ຍັງໄດ້ອວຍພອນໃຫ້ ນາຍ ແລະ ພົນທະຫານທົ່ວກອງທັບ ມີສຸຂະພາບເຂັ້ມແຂງ, ມີພະລານາໄມທີ່ສົມບູນ, ສືບຕໍ່ພາລະກິດ ປົກປັກຮັກສາ ແລະ ສ້າງສາປະເທດຊາດໃຫ້ຮັ່ງມີເຂັ້ມແຂງຂື້ນເລື້ອຍໆ.

Additional information