ຂ່າວພາຍໃນກະຊວງ

ພິທີມອບ-ຮັບ ແລະ ເປີດການນຳໃຊ້ສະຖານີຊິງຊັ່ງ ແບບທັນສະໄໝ

ສະຖານີຊິງຊັ່ງແບບທັນສະໄໝແມ່ນໂຄງການປັບປຸງກໍ່ສ້າງສະຖານີຊິງຊັ່ງນ້ຳໜັກຢູ່ທາງຫລວງແຫ່ງຊາດ ເລກ 9, ກມ 64, ບ້ານຄຳເຕີຍ (ດົງເຫັນ) ເມືອງອາດສະພັງທອງ ແຂວງສະຫວັນນະເຂດ. ໂຄງການດັ່ງກ່າວແມ່ນ 1 ໃນ 3 ໂຄງການທີ່ລັດຖະບານອະນຸມັດໃຫ້ ປັບປຸງ ແລະ ໂຄງການນີ້ແມ່ນອົງປະກອບໜຶ່ງຂອງໂຄງການປັບປຸງຂີດຄວາມ ສາມາດວຽກງານບູລະນະຮັກສາທາງຫລວງ ໃນ ສປປ ລາວ (CaRoI) ໂດຍທຶນຊ່ວຍເຫລືອລ້າຈາກອົງການຮ່ວມມື ສາກົນຍີ່ປຸ່ນ (JICA) ແລະ ໄດ້ສໍາ ເລັດລົງໃນເດືອນພຶດສະພາ 2018.

ໂຄງການປັບປຸງສະຖານີຊິງຊັ່ງທີ່ທັນສະໄໝນີ້ ໄດ້ຮັບທຶນຈາກອົງການ JICA ມູນຄ່າ 676,686.48 ໂດລາສະຫະລັດ ແລະ ທຶນສົມທົບລັດຖະບານ ສປປ ລາວ ມູນຄ່າ 437,000,000 ກີບ. ທຶນ JICA ໄດ້ນຳໃຊ້ເຂົ້າໃນການກໍ່ສ້າງ ສະຖານີ (ເຮັດເຮືອນມຸງຊິງຊັ່ງ, ອ້ອມຮົ້ວສະຖານີ ແລະ ຮ່ອງລະບາຍນ້ຳ) ແລະ ວຽກຕິດຕັ້ງຊິງຊັ່ງທີ່ທັນສະໄໝ (ບັນທຶກຂໍ້ມູນລົດ ແລະ ຊັ່ງນ້ຳໜັກລົດຜ່ານລະບົບອິນເຕີເນັດ) ຮອດປະຈຸບັນໜ້າວຽກດັ່ງກ່າວໄດ້ສຳເລັດຮ້ອຍສ່ວນ ຮ້ອຍ ແລະ ໄດ້ຝຶກອົບຮົມການນຳໃຊ້ລະບົບຊິງຊັ່ງໃຫ້ພະນັກງານວິຊາການຈາກກົມຂົນສົ່ງ, ກົມຂົວທາງ, ກົມກວດກາ, ກົມຈັດຕັ້ງ, ສະຖາບັນຝຶກອົບໂຮມ ຍທຂ ແລະພະນັກງານວິຊາການພະແນກ ຍທຂ ແຂວງຫລວງນ້ຳທາ, ນະຄອນ ຫລວງ, ບໍລິຄຳໄຊ, ຄໍາມ່ວນ, ສະຫວັນນະເຂດ, ຈໍາປາສັກ ແລະ ອັດຕະປື ໃນລະຫວ່າງວັນທີ 26-27 ເດືອນມີນາ 2018 ນີ້. ສ່ວນທຶນສົມທົບລັດຖະບານແມ່ນນຳໃຊ້ເຂົ້າໃນການປຸກສ້າງເຮືອນພັກພະນັກງານ ຮອດປະຈຸບັນກຳລັງ ດຳເນີນການ ແຕ່ງຕັ້ງຄະນະກຳມະການປະມູນ.

ໃນວັນທີ 19 ກໍລະກົດ 2018 ກະຊວງ ຍທຂ ກໍ່ຄືກົມຂົນສົ່ງ ໄດ້ສົມທົບກັບໂຄງການ CaRol, ພະແນກໂຍທາທິການ ແລະ ຂົນສົ່ງ ແຂວງສະຫວັນນະເຂດ, ບໍລິສັດຜູ້ຮັບເໝົາກໍ່ສ້າງ ແລະ ບໍລິສັດ SGS ຜູ້ຕິດຕັ້ງຊິງຊັ່ງ ໄດ້ລົງກວດກາ ແລະ ເບິ່ງການສາທິດການນຳໃຊ້ລະບົບຊິງຊັ່ງແບບທັນສະໄໝຕົວຈິງ ຢູ່ສະຖານີຊິງຊັ່ງດົງເຫັນ ເຫັນວ່າການນຳໃຊ້ ລະບົບດັ່ງກ່າວມີຄວາມສະດວກ, ວ່ອງໄວ ແລະ ຊັດເຈນຂື້ນກວ່າເກົ່າ. ໃນກໍລະນີລົດບັນທຸກເກີນກຳນົດ ເຈົ້າຂອງລົດ ຕ້ອງຮັບຜິດຊອບຄ່ຽນຖ່າຍສິນຄ້່າລົງ ແລະ ພະນັກງານປະຈຳສະຖານີຈະອອກໃບບິນປັບໄໝໃຫ້ຜູ້ຂັບຂີ່ເພຶ່ອໄປ ເສຍຄ່າປັບໄໝຢູ່ພະແນກການເງິນແຂວງ.

ດັ່ງນັ້ນ ໃນວັນທີ 20 ສິງຫາ 2018 ຈຶ່ງໄດ້ເຮັດພິທີມອບ-ຮັບ ແລະ ນຳໃຊ້ສະຖານີຊິງຊັ່ງແບບທັນສະໄໝ ຢູ່ບ້ານ ຄຳເຕີຍ, ເມືອງອາດສະພັງທອງ, ແຂວງສະຫວັນນະເຂດ ເຂົ້າຮ່ວມພິທີຄັ້ງນີ້ມີ ທ່ານ ວຽງສະຫວັດ ສີພັນດອນ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງໆ ສະຫວັນນະເຂດ, ທ່ານ Yoshiharu YONEYAMA ຫົວໜ້າອົງການ JICA ປະຈຳ ສປປ ລາວ, ທ່ານ Kiminari TAKAHASHI ຜູ້ປະສານງານ ໂຄງການຂອງ JICA, ທ່ານ ໜູຜາດ ທິຣະວົງ ຮອງອຳນວຍການ ບໍລິສັດໜູຄຳ ກໍ່ສ້າງ ຈຳກັດ ແລະ ພະນັກງານວິຊາ ການຈາກກະຊວງ ຍທຂ, ພະແນກ ຍທຂ ແຂວງສະຫວັນນະເຂດ.

ກອງປະຊຸມສາມັນຄົບຄະນະບໍລິຫານງານພັກກະຊວງ ຍທຂ ຄັ້ງທີ 12 ສະໄໝທີ IV

ໃນວັນທີ 15 ສິງຫາ 2018 ຢູ່ທີ່ຫ້ອງປະຊຸມໃຫຍ່ເບີ 1 ຂອງກະຊວງ ຍທຂ ໄດ້ຈັດກອງປະຊຸມສາມັນຄົບຄະນະ ບໍລິຫານງານພັກກະຊວງ ຍທຂ ຄັ້ງທີ 12 ສະໄໝທີ IV (ເປີດກວ້າງ) ໂດຍ ການເປັນປະທານຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານ ຄະນະກວດກາສູນກາງພັກ ປະທານອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ຜູ້ຊີ້ນຳ ແລະ ຕິດຕາມການຈັດຕັ້ງປະຕິບັດຜັນຂະຫຍາຍຜົນສຳເລັດຂອງບັ້ນດຳເນີນຊີວິດການເມືອງປັບປຸງ ປົວແປງ ພັກປີ 2017, ມີສະຫາຍ ບຸນຈັນ ສິນທະວົງ ກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງ ຍທຂ, ມີບັນດາສະຫາຍຄະນະປະຈຳພັກ, ກຳມະການພັກກະຊວງ, ຄະນະພັກຮາກຖານ, ຜູ້ຊ່ວຍ ລັດຖະມົນຕີ, ທີ່ປຶກສາລັດຖະມົນຕີ, ຫົວໜ້າກົມ, ຮອງຫົວໜ້າກົມ, ແຂກຖືກເຊີນ, ພະນັກງານຫຼັກແຫຼ່ງເຂົ້າຮ່ວມຈຳນວນ 200 ກວ່າ ສະຫາຍ ກອງປະຊຸມຄັ້ງນີ້ ຈະໄດ້ດຳເນີນໄປເປັນເວລາ 3 ວັນ ແຕ່ວັນທີ 15-17 ສິງຫາ 2018.

ກອງປະຊຸມໄດ້ຮັບຟັງ ແລະ ປະກອບຄຳເຫັນ ຕໍ່ບົດສະຫຼຸຸບຕີລາຄາການເຄື່ອນໄຫວນຳພາລວມຂອງຄະນະພັກ ກະຊວງ ຍທຂ ໃນ 6 ເດືອນຕົ້ນປີ 2018 ແລະ ທິດທາງແຜນການ 6 ເດືອນ ໃນຕໍ່ໜ້າ, ສະຫຼຸຸບຕີລາຄາການ ດຳເນີນຊີວິດການເມືອງປັບປຸງປົວແປງພັກຂອງຄະນະພັກກະຊວງ ຍທຂ ໃນປີ 2017 ທີ່ຜ່ານມາ. ພ້ອມກັນນີ້ ບັນດາ ສະຫາຍຄະນະພັກກະຊວງ, ຫົວໜ້າຫ້ອງການ, ກົມ, ສະຖາບັນ, ກອງສະໜາມບິນລາວ ແລະ ກອງຈາລະຈອນທາງ ອາກາດ ຈະໄດ້ດຳເນີນການສຳຫຼວດຕີ ລາຄາສະເພາະການແກ້ໄຂຂໍ້ ຄົງຄ້າງຂອງຕົນ ທີ່ໄດ້ຮັບຈາກການຕຳນິສົ່ງຂ່າວ ຈາກບັ້ນດຳ ເນີນຊີວິດການເມືອງປັບປຸງປົວແປງພັກ ປີ 2017 ຢູ່ຂັ້ນກະ ຊວງ, ຂັ້ນຮາກຖານພັກ ຜ່ານມາໄດ້ແກ້ໄຂ ສຳເລັດຄືແນວໃດ? ຍັງມີຂໍ້ຄົງຄ້າງຄືແນວໃດ ? ແລະ ມາດຕະການແກ້ໄຂໃນຕໍ່ໜ້າ. ໃນໂອກາດເຂົ້າຮ່ວມກອງປະຊຸມ ສາມັນຄົບຄະນະບໍລິຫານງານພັກກະຊວງໂຍທາທິການ ແລະ ຂົນສົ່ງ (ຍທຂ) ຄັ້ງ ທີ 12 ສະໄໝທີ IV ເປີດກວ້າງ ຄັ້ງນີ້, ສະຫາຍ ບຸນທອງ ຈິດມະນີ ໄດ້ໃຫ້ທິດຊີ້ນຳບາງຕອນ ສຳຄັນກ່າວວ່າ: ກ່ອນອື່ນ ສະຫາຍໄດ້ກ່າວສະແດງ ຄວາມຍ້ອງຍໍຊົມເຊີຍຕໍ່ຜົນງານທີ່ ຍາດມາໄດ້ໃນໄລຍະທີ່ຜ່ານມາກອງປະຊຸມຄັ້ງນີ້ໄດ້ເປີດຂຶ້ນ ເພື່ອເປັນການຕີລາຄາ ຄືນ ຜົນຂອງການຄົ້ນຄວ້າແກ້ໄຂບັນຫາຂໍ້ຄົງຄ້າງຕ່າງໆ ກໍຄືຫາງສຽງຂອງປະຊາຊົນ ອັນທີໜຶ່ງ ພວກສະຫາຍຕ້ອງ ເຂົ້າໃຈ ເຖິງຈຸດປະສົງລະດັບຄາດໝາຍ ຂອງການດຳເນີນຊີວິດການ ເມືອງໃນເທື່ອນີ້ ເນື້ອແທ້ມັນແມ່ນເພື່ອພ້ອມ ກັນຄົ້ນຄວ້າ ສັງລວມກ່ຽວກັບຄວາມເຫັນ ການຕຳນິສົ່ງຂ່າວຂອງພະນັກງານຫຼັກແຫຼ່ງທີ່ມີຕໍ່ການນຳພາລວມ, ຕໍ່ບຸກຄົນ ແລະ ຄະນະພັກໃນໄລຍະທີ່ຜ່ານມາ ເພື່ອພ້ອມກັນຊອກໃຫ້ເຫັນສາເຫດ ທີ່ເກີດຂຶ້ນຂອງບັນດາຈຸດອ່ອນ ຂໍ້ຄົງຄ້າງ ນັບທັງອັນລວມ ແລະ ອັນສະເພາະຂອງແຕ່ລະ ສະຫາຍໃນຄະນະພັກ ເພື່ອ ພ້ອມກັນສືບຕໍ່ແກ້ໄຂບັນຫາເຫຼົ່ານັ້ນ ໃຫ້ມັນໄດ້ ແນໃສ່ເພື່ອ ປັບປຸງປົວແປງພາຍໃນພັກຂອງ ພວກເຮົາໃຫ້ມັນປອດໃສ, ເຂັ້ມ ແຂງ ແລະ ໜັກແໜ້ນ ຕາມ ຄາດໝາຍທີ່ວາງໄວ້ ທັງນີ້ເພື່ອ ສ້າງຄວາມເຊື່ອໝັ້ນໃຫ້ສະມາຊິກພັກ, ພະນັກງານ ແລະ ປະຊາຊົນ ເວົ້າລວມຕໍ່ ຂົງເຂດ ຂະແໜງວຽກງານ ຍທຂ, ສະນັ້ນບັນຫາທີ່ພວກສະຫາຍຈະ ຕ້ອງໄດ້ເອົາໃຈໃສ່ຂ້າພະເຈົ້າ ຂໍເຈາະຈິ້ມດັ່ງນີ້: ຂໍໃຫ້ພວກ ສະຫາຍພ້ອມກັນເບິ່ງຄືນກ່ຽວ ກັບຄວາມຮັບຜິດຊອບຕໍ່ການ ຊີ້ໆນຳພາທາງດ້ານການເມືອງ ແນວຄິດ ຮາກຖານພັກ ສະມາ ຊິກພັກພະນັກງານເຮົາໄດ້ເຮັດ ເລິກເຊິ່ງປານໃດ ຈິດໃຈໜຶ່ງ ຢາກໃຫ້ເບິ່ງການສ້າງສະຕິຕໍ່ ການຈັດຕັ້ງຜ່ານມາເຮົາໄດ້ເອົາໃຈໃສ່ແນວໃດ, ສະຕິຕໍ່ກົດລະບຽບ, ສະຕິຕໍ່ກົດໝາຍໃນການປະຕິບັດໜ້າທີ່ເປົ້າໝາຍ ແມ່ນສ້າງໃຫ້ຄົນເປັນເອກະ ພາບຕໍ່ແນວທາງ ບໍ່ແມ່ນເວົ້າໄປຊື່ໆຕ້ອງໄດ້ປະຕິບັດໄປພ້ອມ ໂດຍສະເພາະແມ່ນພະ ນັກງານໜຸ່ມນ້ອຍພວກເຮົາ ຕ້ອງໄດ້ສ້າງເພື່ອສືບທອດວຽກ ງານ ຍທຂ, ຂໍໃຫ້ເບິ່ງໃນແງ່ຄວາມສາມັກຄີ, ຄວາມເປັນ ເອກະພາບຄວາມບໍລິສຸດສັດຊື່ ຄວາມບຸກບືນແຂ່ງຂັນການປະຕິບັດໜ້າທີ່ຝຶກຝົນຫຼໍ່ຫຼອມຕົນ ເອງເຮັດແທ້ທຳຈິງຄວາມ ຮັບຜິດຊອບຄວາມເປັນແບບຢ່າງ ທັງໝົດນີ້ແມ່ນການສ້າງທາດແທ້ທາງດ້ານການເມືອງ ແລະ ຄວາມເປັນເອກະພາບ ທາງດ້ານແນວ ຄິດ, ອັນທີສອງໃຫ້ເບິ່ງຄວາມ ຮັບຜິດຊອບຕໍ່ການກໍ່ສ້າງພັກ ພະນັກງານພວກສະຫາຍໄດ້ພ້ອມກັນ ເອົາໃຈໃສ່ແນວໃດຈິດ ໃຈທີໜຶ່ງເບິ່ງການຄົ້ນຄວ້າເຊື່ອມຊຶມ, ກຳແໜ້ນ ແລະ ນຳ ພາປະຕິບັດກົດລະບຽບຂອງ ພັກ, ການຂະຫຍາຍພັກການກໍ່ ສ້າງໜ່ວຍພັກໄດ້ເອົາຈິງເອົາຈັງສ່ຳໃດ, ອັນທີສາມຢາກໃຫ້ ເບິ່ງຄືນຄວາມຮັບຜິດຊອບ ການຊີ້ນຳໆພາທາງດ້ານວຽກ ງານວິຊາສະເພາະ, ເບິ່ງຄືນກ່ຽວກັບການຄົ້ນຄວ້າຫັນແນວທາງນະໂຍບາຍຂອງພັກໃນ ຂົງເຂດວຽກງານ ຍທຂ ໃຫ້ເປັນຍຸດທະສາດ, ເປັນແຜນການ, ໂຄງການ, ເປັນນິຕິກຳ, ເປັນກົດໝາຍ, ເປັນດຳລັດ ຫຼື ລະບຽບການອື່ນໆ ເຮົາໄດ້ເຮັດຄືແນວໃດຜ່ານມາ ແລະ ອັນໃດທີ່ເຮົາຈະເຮັດໃນສະເພາະໜ້າ, ອັນທີ່ມີແລ້ວຈະ ປັບປຸງໄປແບບໃດ, ບັນຫາການປະຕິບັດວິໄນແຜນການ, ການເງິນ, ການລົງທຶນ, ໂຄງການລົງທຶນມູນຄ່າສູງ, ການຄຸ້ມ ຄອງການປຸກ ສ້າງຕ່າງໆທາງຜັງເມືອງ, ການຄຸ້ມຄອງພາຫະນະ, ການນຳເຂົ້າໃນຂົງເຂດ ຍທຂ, ນັບທັງຢູ່ນະຄອນ ຫຼວງ ແລະ ບັນດາແຂວງ ໄດ້ພ້ອມກັນປະຕິບັດຕາມກົດໝາຍຄືແນວໃດ? ຈະແກ້ໄຂດ້ວຍວິທີໃດ? ຕໍ່ກັບການສະກັດ ກັ້ນການສໍ້ລາດບັງ ຫຼວງຜ່ານມາເຮົາໄດ້ເຮັດຄືແນວໃດ? ຖືສຳຄັນແນວໃດ ວຽກງານການຕິດຕາມກວດກາໃນແຕ່ ລະບ່ອນ, ຂໍໃຫ້ພວກ ສະຫາຍເບິ່ງຄືນ, ອັນທີສີ່ເບິ່ງ ຄືນບັນຫາການຄຸ້ມຄອງການ ນຳເຂົ້າພາຫະນະທີ່ບໍ່ຖືກຕ້ອງ ແລະ ບັນຫາອື່ນໆ ເພື່ອໃຫ້ບັນ ດາສະຫາຍພ້ອມກັນເອົາໃຈ ໃສ່ເພື່ອເປັນພື້ນຖານໃນການ ປະກອບຄິດຄຳເຫັນໃນບັ້ນດຳ ເນີນຊີວິດການເມືອງໃນຄັ້ງນີ້ ຢ່າງເລິກເຊິ່ງ.

ທ່ານຮອງລັດຖະມົນຕີ ເຂົ້າຮ່ວມກອງປະຊຸມລາຍງານ ຄວາມຄືບໜ້າຂອງໂຄງການສຶກສາຄວາມເປັນໄປໄດ້ເບື້ອງຕົ້ນຂອງທ່າບົກທ່າແຂກ ແຂວງຄໍາມ່ວນ

ໃນວັນທີ 13 ສິງຫາ 2018, ທ່ານ ວຽງສະຫວັດ ສີພັນດອນ ຮອງລັດຖະມົນຕີ ເຂົ້າຮ່ວມກອງປະຊຸມລາຍງານຄວາມ ຄືບໜ້າຂອງໂຄງການສຶກສາຄວາມເປັນໄປໄດ້ເບື້ອງຕົ້ນຂອງທ່າບົກທ່າແຂກ, ແຂວງຄໍາມ່ວນ, ໂດຍມີ ທ່ານ ບຸນມີ ພິມມະສອນ ຮອງເຈົ້າແຂວງໆຄໍາມ່ວນ, ບັນດາທ່ານ ຫົວໜ້າຫ້ອງວ່າການປົກຄອງແຂວງ, ຄະນະກົມ, ຄະນະ ພະແນກ, ຈາກບັນດາກະຊວງທີ່ກ່ຽວຂ້ອງ ທັງສູນກາງ ແລະ ຂະແໜງການທີ່ກ່ຽວຂ້ອງຂອງທ້ອງຖິ່ນ ແລະ ທ່ານ ນາງ ທູນສະຫວັນ ສີຈັນທອງທິບ, ອຳນວຍການ ບໍລິສັດ ຂົນສົ່ງສາກົນ ຈຳກັດ ເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ ທ່ານຮອງລັດຖະມົນຕີ ໄດ້ເວົ້າຄືນກ່ຽວກັບວຽກງານໂລຊິດສະຕິກ ຫລື ການພັດທະນາທ່າບົກ ຢູ່ ສປປ ລາວ ດັ່ງນີ້: ການຂົນສົ່ງສິນຄ້າ ເປັນສ່ວນໜຶ່ງຂອງວຽກງານໂລຊິດສະຕິກ ຊຶ່ງກວມເອົາຫລາຍໜ້າວຽກ ແລະ ພົວພັນຫລາຍຂະແໜງການ. ໃນປີ 2007 ສປປ ລາວ ໄດ້ຮັບການຊ່ວຍເຫລືອລ້າ ຈາກລັດຖະບານຍີ່ປຸ່ນ ເລີ່ມສຶກສາ ວຽກງານໂລຊິດສະຕິກ. ຕໍ່ມາຮອດປີ 2013 ສປປ ລາວ ໄດ້ລົງນາມເປັນພາຄີສົນທິສັນຍາສົນກົນ ວ່າດ້ວຍທ່າບົກ ຂອງອົງການສະຫະປະຊາຊາດ ຊຶ່ງມີທັງໝົດ 52 ປະເທດ ແລະ ປັດຈຸບັນ ມີ 20 ປະເທດ ໄດ້ລົງນາມເປັນພາຄີ ແລະ ປະເທດທີ່ຍັງເຫຼືອກໍທະຍອຍລົງນາມເຂົ້າເປັນພາຄີ. ຫລັງຈາກນັ້ນປີ 2015 ຈຶ່ງໄດ້ກຳນົດຈຸດທີ່ຕັ້ງທ່າບົກ 9 ແຫ່ງ ໂດຍອີງໃສ່ຈຸດພິເສດທີ່ຕັ້ງພູມສາດ, ຄວາມຮຽກຮ້ອງຕ້ອງການຂອງ ສະພາບການຂົນສົ່ງສິນຄ້າ ຢູ່ແຕ່ລະແຂວງ ຮອດ ປະຈຸບັນ ມີການຂະຫຍາຍໂຕ ດັ່ງນີ້: ທ່າບົກສະຫວັນນະເຂດ, ທ່າບົກທ່ານາແລ້ງ, ທ່າບົກນາເຕີຍ, ທ່າບົກຈຳປາສັກ ແລະ ທ່າບົກທ່າແຂກ.

ມາຮອດປະຈຸບັນ, ​ໄດ້ມີເຂດກວດກາສິນຄ້າຮ່ວມກັນ (Common Control Area “CCA”) ​ໃນ​ການກວດກາຈຸດ ດຽວ-ປ່ອງ​ດຽວ ລະຫວ່າງ ລາວ-ຫວຽດນາມ ຢູ່ດ່ານຊາຍແດນ ແດນສະຫວັນ-ລາວບາວ ແລ້ວ ຊຶ່ງເລີ່ມຈັດຕັ້ງ ປະຕິບັດນັບແຕ່ວັນທີ 6/2/2015 ເປັນຕົ້ນມາ. ສ່ວນ CCA ລະຫວ່າງ ລາວ-ໄທ ແມ່ນ ພວກເຮົາກຳລັງປຶກສາຫາລື ເພື່ອຈັດຕັ້ງປະຕິບັດ ຢູ່ດ່ານສະຫວັນນະເຂດ-ມຸກດາຫານ. ພ້ອມກັນນັ້ນ ທັງ 2 ຝ່າຍລາວ-ໄທ ກໍຍັງມີແຜນຈະ ຂະຫຍາຍ ການຈັດຕັ້ງປະຕິບັດການ​ກວດກາ​ຈຸດ​ດຽວ-ປ່ອງ​ດຽວ ຢູ່ດ່ານອື່ນໆອີກ ໃນອະນາຄົດ.

Additional information